Monday, December 31, 2007

توينتى تووووو

هلااااااااااااا بيكووووو
طبعاً اى حد هايدخل ويقرا البوست دا هاييجى على باله لاول وهلة انى هاتكلم بقى عن السنة الجديدة

(وأهنيكم برأس السنة( اشمعنى الرأس يعنى.. هى السنة منحازة للعنصرية واللا حاجة؟؟



بصراحة يعنى انا عندى حدث اهم.. يمكن بالنسبالى وعشان كدا حبيت اقولكم عليه


ففى مثل هذا الوقت من العام وقبل منتصف ليل اخر ساعة كان يوم ميلاد



*


*

صرصاااااااااااااااارة اللى هى اناااااااااااااااااااااا



@كل سنة وانا طيبة ودايما معاكم ومصدعاااكم@




النهااااردة وزى مابيقول المعلم حنفى صاحب الباخرة نورماندى اصبح عندى توينتى تو.. تو.. تو

واليوم الرسمى اللى فى الحكومة هو 1-1

رقم بيزيد وعمر بيقل.. ربنا يجعل ايامنا كلها طاعة ليه ولرضاه ويحسن خاتمتنا آآآآميييين ياااااارب


ـــــــــــ


بحب جداااا عيد ميلادى لانه موقعه استراتيجى بين سنة قديمة وسنة جديدة.. بحس كأنه ليل بيودعنا ونهار جديد بيهل علينا مليان بالتفاؤل والأمل وكل حاجة جميلة.. مش عاوزة اتشائم بس اتمنى فعلا تكون السنة الجديدة كدا


وكمان اول مرة احتفل بيه معاكم.. بجد فرحاااانة اوى انى اتعرفت على اجمل عائلة الكترونية وكمان مدونتى بقى عمرها سنة وشهرين وربنا مايحرمنى منكم ويديم المحبة بيننا


وبالمرة بقى اقولكم كل سنة وانتو طيبين وان شاء الله السنة الجديدة تكون احلى وتحققوا فيها كل اللى تتمنوه


(زى ما الممثلين بيقولو.. اشمعنى هما يعنى)


ــــــــــــــــ


انا رسمت تويتى... قالتلى لازمن ترسمينى وانا بديكى هدية عيد ميلادك


مارضتش اكسر بخاطرها الصراحة





وانتو كمان ليكو هدايا عندى


اغنية ليلة عيد لفيروز


happy birth day اغنية عيد الميلاد


وفمدونتى التانية هتلاقو


أغانى بالانجليزى..قلت انزلهم فعالمى المسحور


اتمنى تعجبكم الهدايا البسيطة دى


****

Monday, December 24, 2007

المدونة التانية...!!!؟

لما بيدخل حد جديد المدونة عندى الطبيعى انى اشوف ايه مدونته هو كمان
كليك على الاسم وادخل عند البوابة اللى هى البروفيل
والاقي خير اللهم اجعله خير امم من المدونات وادخل فى متاهة مكونة من مدونة
اتنين


تلاتة


.

.
لحد.. ممممممم .. انتو اكتر مدون لقيتوه عامل مدونات كتير كان كام مدونة؟؟

ـــــــــــ
وانا مش متضايقة من الحكاية دى.. بالعكس كل انسان جواه حاجات كتير مختلفة وبيحب يعبر عنها وماينفعش يتجمعوا فى مدونة واحدة فابالتالى يغير المكان والجو.. يروح البحر.. يتمشى جنب الخضرة..يطلع فوق السحاب وجنب النجوم..وكل دا بيكون من خلال الكتابة

يعنى ينتقل من مرحلة التدوين الاصلى الى التدوين الفرعى ويمكن مدونة من اللى يكونهم جديد تكون هى الرسمية ليه
ــــــــــ
انا عن نفسى عاملة مدونتين
واحدة ابعبر عن نفسيتى بالانجليزى عشان ثقافتى يابانى طبعا:))
والتانية كانت مدونة المسابقات اللى هال عليها التراب بس صعبان عليا احذفها لاننا تعبنا فيها اوى
بس معروف على مااعتقد ان البلاعة هون هى مقرى الرسمى للتدوين والرغى
مش ملاحظين معايا ان معظم اللى بيعملوا اكتر من مدونة وتدخلو تلاقوهم فاضيين او من زمان ماتكتبش فيهم
الواحد بجد بيتوه ومش بيبقى عارف يسجل حضور فى اى مدونة منهم
انا بقترح اللى ليه مدونات كتير يوضحلنا ايه المدونة الرسمية اللى فيهم عشان يبقى سهل علينا الزيارة من غير دوخة
كمان بين قوسين عند العنوان يكون مكتوب نوع المدونة ايه هل هى ترفيهية واللا اجتماعية واللا سياسية..الخ
عشان كل اللى مهتم بحاجة معينة فى المدونات دى يبقى سهل يوصلها ويشارك فموضوعاتها
اتمنى ماكنش غلست بالاقتراحات دى ومن يوافق على الاقتراح رقم خمساشر وتمناشر يتفضل برفع المغرفة.. قصدى يده
.
.
مواااااااااااااااااااااااااااافقة.. توكلنا على الله:))
وخللو بالكو من مدوناتكو.. اعدلو بينهم عشان بيحسوا ان فيه تفضيل وبيشيلو فنفسهم
وانا من هنا مقرى الرسمى بعتذر لمدونتى العالم المسحور انى مطنشاها بس راجعالها تانى قريباااا جداااا بإذن الله
انا عارفه هتقولو ايه الجنان دا هى بتتكلم زى ماتكون المدونات دى بنى ادمين زينا
انا فعلا بحسهم كدا وبحس انى لما بسيب مدووناتى انهم مهجورينوالعنكبوت معشش فيهم وعاوزين حملة تنضيف عشان يرجعوا زى الاول
هاااااااااااااتسى.. بدأت تنضيف مدونتى التانية.. مش عارفه انا ايه كل التراب دا
.
.
سؤال الحلقة
ــــــ
ايه اكتر شهر سجلتو فيه اكبر عدد من المواضيع
ولو عندكم اكتر من مدونة.. ايه المفضلة بالنسبالكم
وتصبحوا على خير
**
هاااااااااااااااتسى..... التراب اشتغلللل




Monday, December 17, 2007

اهداء..من خرفانى الاعزاء



اتحاد الخرفان العالمى للاذاعة والتلافازيون


:جاءنا البيان التالى


من حكمدار العاصمة الى خرفان المزرعة


استخبواااااا... العييييد جااااااااااى
ــــــــــــــــــــــــــــــــــــــــــــــــــــــــــــ

بس احنا خرفان مانخافش ولو مين

وإن جانا جزار وسانن سكين

وبيغريبنا بعودين برسيم

هنمشى وراه مستسلمين

ماهو اكل العيش مر واحنا مساكين

ناكل ونشبع حتى حين

نسلمه رقابينا واحنا مبسوطين

تطلع ارواحنا ترفرف عالفتة

**وتقولكم :** كـل سنـة وانتـم طيبين

......................................................

شعر والقاء صرصارة بمصاحبة اوركسترا الخرفان الدولى

Friday, December 14, 2007

ثم ماذا بعد>>ما خدوش يا بااااابااااا؟؟؟

بصراحة مش عارفه اشكركم ازاى على التعليقات والمشاركات الفعالة اللى لقيتها منكم
حسيت ان الموقف اللى كتبته تحول الى قضية قومية معاصرة:))
الكل تناول الموضوع تقريبا بوجهة نظر واحدة مع نسبة بسيطة خالفت الرأى دا
طبعا كل واحد كان ليه طريقة فى التعبير عن رأيه ولكن اتفقوا على ان جواز الصالونات هو افضل طريقة
وبم ان فى مقارنة يبقى معناه ان فى حاجتين او اكتر بنقارن بينهم
انا اتكلمت عن حاجة وباقى الزملاء الافاضل تفضلو وقالو الباقى والحمدلله مافضليش حاجة اكتبها فى البوست دا:))
دا شىء يسعدنى طبعا.. بس انا بعد اذنكو فى بعض النقاط هتكلم عنها واسمحولى لو غلست وطولت شويتين
انا هعمل دلوقت شجرة وفروع وطرق وكبارى.. هقسم الموضوع لحاجات كتير
*
*
اولا
نتكلم عن الشكل او الهيئة لانه مش هياخد وقت
الشكل بينقسم لجميل وغير جميل..بلاش قبيح دى
طبعا الجمال بنسب.. والبنت الجميلة اللى بتزين الجمال دا بالاخلاق والتعليم والثقافة لما هيتقدم لها واحد عن طريق القنطرة مافتكرش انها بالمواصفات دى وهتترفض.. بالعكس دى الكورة فملعبها واحتمال ان العريس هو اللى يترفض
لكن لو بنت جمالها متوسط او اقل لكن برضو اخلاق وتعليم.. تفتكرو هينفع معاها جواز الصالونات
للاسف شباب كتييير جداااا اهم حاجة عندهم الشكل.. معلش لكن دى الحقيقة
وكل اللى هينوب البنت دى هنا انها هتنجرح.. لانه هيشوف الشكل ومش هايدقق كتير بقى فى الاخلاق والمستوى الاجتماعى
لانه هيقول اكيد فى الاجمل
اللى زى البنت دى محتاجة تتعامل اكتر من الناس علشان يعرفوها وتخللى ثقتها بنفسها وسلوكها مع الاخرين اللى دايما بيكون ليه حدود
هما اللى هايوصلو لان اللى هايتقدملها هيكون عارفها كويس وعارف اخلاقها
*
*
ثانيا بقى
احنا عندنا مجتمعين .. مجتمع ريفى ومجتمع مدنى
فى المجتمعات الريفية.. البنت ماتعرفش فيها غير ابوها واخوها وغير كدا هاتتطخ بالنار
انا ماقصدش التعبير دا الحرف وانا عارفه كويس ان اصبح فى تقدم وتحضر والكلام دا كله
لكن لازلت الخطوة هنا محسوبة على البنت.. لدرجة لو قابلت زميل ليها مثلا واللا قريبها وسلمت عليه بحسن نية تبقى كدا اجرمت
بالتالى هنا علاقتها باولاد ادم تعتبر معدومة.. وهنا مش هايناسبها غير طريقة الصالونات
على فكرة انا عارفه كتير هيقول البنات دلوقت فأى مجتمع اصبحوا للاسف عاوزين ضرب النار
لكن انا هنا بتكلم عن القاعدة واللى اتمنى انها ماتكنش هى شواذ القاعدة

تحدييييييث: انا زى ماذكرت فى الجملة السابقة انى عارفة ان الاحوال دلوقت مابقتش زى زمان والبنات فى الريف اختلفو كتير
لكن احب اوضح بس ان اللى اختلفو وتلفو بتكون مستوياتهم الاجتماعية بسيطة جدا عشان كدا بيكونو زى قنبلة موقوتة وتنفجر.. لكن فعلا لغايت دلوقت البنت اللى من عيلة ومعروفة كويس بتكون الخطوة محسوبة عليها لان المجتمعات الريفية بيكون الناس عارفين بعض كويس ودا ابن فلان ودى بنت فلان.. ودا اللى انا قصدته
..اتمنى اكون وضحت رأيى
المشكلة هنا ان التربية بتكون مشددة جداا ودا اللى بيخللى فى خوف وعدم وعى بكيفية التعامل مع ابن ادم كإنسان زيه زيها
لانها مع بلوغ المرحلة الجامعية بالذات لانها دى اللى بيكون فى الانفتاح على العالم الخارجى
هنا البنت بتكون على نياتها اوى وتبدأ فى مرحلة الحلم الجميل اللى بتشوفه فى المسلسلات والافلام
والله يجازى اللى كان السبب
المهم المرحلة دى اللى هتدور فيها على الشاب المناسب اللى بتحلم بيه
وهنا الشباب الحلوين هيبدأو فى مرحلة اصطياد فرائسهم من البنات اللى مالهاش فى البطاطس
برضو مع الاعتذار للملتزمين اللى ملهمش فلعب العيال دا
تبدأ هنا طريقة التعارف المسبق اللى قلنا الجامعة كمثال ليها
بعد تبادل نظرات الاعجاب ثم المصارحة بالمشاعر الحنينة اوى تبدأ مرحلة المقابلات
افتكر الطريقة دى تكون ارتباط الكورنيشات مش الصالونات
لان الكورنيش الحقيقة بيبقى مثال حى مباشر للمقابلات دى.. وزى مابيقولو: على عينك ياتااااجر
هنا البنت نيتها سليمة وصافية مثل اللبن الحليب وكل اللى فبالها انها اخيرااا عثرت على فتى الاحلام
انما الولد ناصح وكل اللى همه انه ماشى مع بنت لزوم الكماليات.. يعنى معاه موبايل واسكتش للمحاضرات على اساس انه بيروح يعنى وعلبة السجاير المستوردة والام بى ثرى بالاضافة الى البنت بتاعته
والبنت فرحنالى اوى انها ماشية مع راجل طول بعرض عاملى فيها شمشون الجبار
ولما ييجى وقت الجد بقى.. الف مبروك اتخرجنا وكل حى بقى يروح لحاله
لكن ازاى تروح لحالك واللى بينا يامرسى
مرسى يقول: بينا مين يابهانة انتى عاوزة تجبيلى مصيبة..دى كانت مرحلة وعدت يابنت الناس
تقوله مش المفروض بعد كدا انك تتقدملى
تيييجى بقى الاسطوانة اللى من ايام انسان الغابة
هو انا لاقى ااكل نفسى لما اجى واتقدملك..بعدين اهلك هيرضو بواحد مش لاقى شغل
او لو كان بيشتغل هيقول.. هما اهلك هايوافقو على واحد مرتبة مش عارفه كام مليم
لا ماعطلكيش انا مش اد المسئولية دى
وهنا تنهاااااااااار بهااااااانة
نركن بهانة شوية على مااعصابها تهدا
*
*
بيقولو ان فى ناس بتتعرف على بعض وفعلا بيحاربو الحياة علشان ارتباطهم دا يكون رسمى وعلى نور
دلوقت فى بنات كتير راضية بالحياة البسيطة ومفيش حد بيبتدى كبير
يعنى بيكفيهم دبلة للشبكة وباقى الحاجات دى ربنا بييسر الحال فيها
وإيد على إيد تساعد
يعنى الشاب لو فعلا كان عاوز البنت دى وشاريها كان اتقدم لاهلها وحتى لو اترفض يبقى يكفيه شرف المحاولة وكمان يبقى عرفهم انه فعلا شارى بنتهم وجى مالباب زى مابيقولو
نرجع بقى لبهانة وعاوزة اقولها كلمتين
انا بتخيل ان البنت زى شوكولاتة متغلفة.. غلاف الشوكولاته لو اتشال مرة واتلف عليها تانى عمره ماهيكون شكله زى (ماكان فى الاول ولا زى باقى الشوكولاته اللى فى الطبق(تشبيه متخلف انا عارفه
زى مثلا الارض والغلاف الجوى.. لو كل واحدة تتخيل انها ماشية وحواليها غلاف من التربية الغير متعصبة والعادات السليمة اللى اتربت عليها...اكيد الغلاف دا هيكون حاجز انه يمنع اى حد من الاقتراب منه
*
*
شوفتو ادينى تفرعت لنقاط عديدة ونسيت اتكلم عن المجتمع المدنى
هنا بصراحة البنت مش هتفرق كتير عن بنت الريف بس فى حاجة انا لاحظتها
البنت فى المدينة عمرها بيتقدم من غير مايكون فى ارتباط وبتبدأ تخاف من مواجهة الحياة لوحدها
يعنى مثلا لو كانت بتشتغل وملهاش قرايب كتير حواليها ووالدتها هى اللى بتراعيهم
هنا بيكون كل اللى شاغلها انها تلاقى انسان يحميها ويحسسها بالامان
ولدى برضو انا بوجهلها كلامى اللى قلته لبهانة
**الـــزواج**
لو بطريقة الكورنيش عمره ماهيمشى بما اننا فى مجتمع للرجال فقط
بطريقة الصالونات فى احتمال انه يمشى
بطريقة التعارف فقط كزملاء فى العمل بس يكون فى مصارحة مباشرة
يعنى ييجى يقول انا عاوز اتقدم,, وهى اكيد هتكون واخده فكرة عن الانسان دا بس طبعا فحدود
لوموافقة خير وبركة وتقول لاهلها ويتفضل يزورهم
مش مواقفة يبقى الموضوع يخلص بدبلوماسية وتكون علاقة زمالة ليس اكثر
*
*
فى بقى حاجة انا شايفاها خطيرة.. ساعات وبدون اى مقدمات ييجى الشاب يقول للبنت انا عاوز ارتبط بيكى وجاد فى الكلام دا
تجرى بسذاجتها تبلغ اهلها على اساس انه هاييجى ويتقدم واهو ظل راجل ولا ظل هرم خوفو
هنا بقى يطلب منها تقابله بعدها..دا من غير مايكون جه البيت لسا ويقولها كام حجة حلوة كدا منعته ان مايجيش
زى مثلا انا قلت لاهلى وقالو انت لسا مش جاهز دلوقت واتخانقت معاهم عشانك
وهى برضو زى العبيطة لامؤاخذة تصدقه
ويطلب منها بقى يخرج معاها.. نروح السينما.. وهات ايدك فى ايديا
والله يجازى اللى كان السبب برضو
وهنا بقى مبرراته انها قالت لاهلها وهو قال لاهله وكدا الحمدلله بقوا فى النور وكله تمام
ياحلاوتى... والله مش عارفه اقول ايه
انا بس عاوزة اقول للشباب امثال الاخ مرسى واللى فاكرين انهم كدا مش بيغلطو لانه راجل
دى مش رجولة ابدا انك تتعامل مع البنت كمجرد آلة للتسلية لانك فى الاول والاخر بشر زيها
ومفيش مساواه هنا اكتر من المساواه فى الذنوب والاعمال الصالحة
الكل فى الاخر هيتساوى ودايما افتكر انك كما تدين تـُدان
وانتو يابنااااااااااااات ياحلويييييين
خللو فبالكو دايمااا ان اللى يسيب حاجة عارف كويس ان ربنا مش راضى عنه وهو بيعملها
يبقى لاااازم يكون مؤمن ان ربنا ان شاء الله هيعوضه بالاحسن منها
والمرادى هتكون فى النور
ومن الباب
وعلى سنة الله ورسوله
وكل عام وانتم بخير
************************************
عذراً للاطالة بس لقيت النـُص كلمة اللى بينشرها استاذ احمد رجب فى الاخبار بصراحة ماينفعش انى ماكتبهاش
لانى كنت هكتب تدوينة عن الموضوع دا لكن قلت الرحمة حلوة وكفاية الرغى اللى كتبته
الموضوع هنا عن اللخبطة اللى اتعودنا عليها فى التقويم الهجرى
:وعن الموضوع دا بيقول
الفلك علم معترف به عالميا ماعدا عند العرب الذين يحددون اول رمضان والاعياد برؤية الهلال فى كل بلد
وقد يتم اهدار كل الحسابات الفلكية الدقيقة لان عالما دينيا جليلا شاهد هلال رمضان
وهو فى الحقيقة- كما جاء فى مذكرات احد العلماء- قد شاهد شعرة مقوسة بيضاء فى اعلى حاجبه فظنها الهلال
وأمجاااااااااد ياعرب.. أمجاااااااااد
**
يااااريت الكل يدخل عند مهند ويشوف موضوعه الاخييييير

Thursday, December 6, 2007

ماخدوش ياباباااااااااااا


ميساء الخير والسعادة

اكيد كلنا فاكرين المشهد الجمييل جدااا فمسرحية سك على بناتك

:وفاكرين برضو الجمله الشهيرة اللى بتقول

وهى على نغمة واحدة ماخدوش يابابا ماخدوش يابابا

وانا من منطلق هذه الجملة هتكلم عن موضوع البيت المصرى مش بيخلى من الكلام عنه

وكتييييييييير جدااااااا اتناقشوا فيه بس انا هحاول اتكلم بشكل مختلف

انا هتكلم كفرد من بنات حواء.. معرفش بقى اولاد آدم رأيهم ايه

كل البنات بتحلم باليوم اللى هيتقدم فيه استاذ فارس ابو حصان ماركة اوبل وموبايل نوكيا من نوعية للعرض فقط

بس ياترى ايه الطريقة اللى بتفكر بيها علشان توصلها لهذا الشخص المثالى

كان فى موقف حصل قدامى من فترة مش بعيدة

عريس جاى يتقدم.. ودى اول مرة فحياتى اتفرج كدا لايف على الموضوع دا

كنت عند بنت خالتى وهتموت مالعياط وقربت تعمل مظاهرة وتشجب وتدين هذا السلوك السافر لهذه الطريقة فى الجواز

انا مش هاطلع يعنى مش هاطلع

انا محبش اكون بضاعة الناس تييجى تتفرج عليها ويايقبلو يايشوفو غيرها

يابنتى يهديكى يرضيكى اطلعى بس سلمى عليهم اهم برضو ضيوفك

قلتلها ماهم فى الشارع بيمسكو البنت وبيعملولها فحص مجهرى

طبعا باستثناء اللى بيمشو فحالهم ويغضو من ابصارهم

جت يعنى على الغلبان اللى هايلقى نظرة وافتكر يعنى انها من حقه

امال هيتعرف على اللى ممكن تبقى نصفه الاخر ازاى ؟؟؟

تقولنا طيب وافرضو انا ماعجبتوش وحسيت بقبول من ناحيتى

يبقى منظرى ايه ساعتها

وكرااااااااااااااااااامتى اللى هتروح فى الارض

(ساعتها حسيت كأننا بنناقش قضية كرامة امرأة مش قضية زواج امرأة)

بجد ريقنا نشف على مارضيت تطلع وقامت بواجب الضيافة ولله الحمد

واليوم عدى على خير


طبعا الطريقة دى اسمها على مااعتقد جواز الصالونات واللى غالبية البشر بيتجوزو عن طريقه


:رأى صاحبة القصة بتقول

هى رافضة انها تكون زى مانيكان للفرجة مع احتمال للرفض او القبول

ممكن لو المقابلة دى حصلت من غير ماتعرف نواياها ايه.. يعنى مثلا تتم فتجمع زى فرح مثلا وهى وقتها مش هتكون فبالها بقى ان دا عينه عليها واللا جاى علشانها

بتقول انه احساس صعب اوى لما تلاقى نفسك معروض زى اى بضاعة

بتقول كمان ان افضل طريقة للارتباط من وجهة نظرها لما يكون فى تعارف مسبق زى مثلا زمالة فى الكلية او العمل ويكونو وقتها الاتنين واخدين فكرة عن بعض وساعتها اللى هيتقدم هاييجى علشانها

مش علشان سمع عنها اوعن اهلها او جاى عن طريق القنطرة


القنطرة دا مصطلح انا بطلقه على هواة توفيق راسين فى الحلال

....والى لقاء مع طريقة اخرى


Sunday, November 25, 2007

عيش اسكندرية


انا عارفه ان محدش مالمدونين ماكتبش عن ساحرة القلوب وعروس البحار اليكسسس
بس انا المرادى ناوية اكتب عنها بشكل مختلف الجوانب والاركان والحيطان والستاير وكافة شىء
واوعدكم ايها الشعب الحبيب.. قصدى ايها المدونين الاعزاء بهذا الكلام
انا امبارح كنت فى المكتبه.. مش عارفه انا الروعة والجمال دا يبقى اسمه مكتبه بس.. مافيش اسم احلى

BIBLIOTHECA ALEXANDRINA


هناك نظام..نظافة..أمن مستتب..سياح على كل لون.. كاميرات ديجيتال على احدث طراز.. تصوير على ودنه
بصراحة الاماكن هناك ماينفعش تسيبها كدا من غير ماتخدلها صورتين تلاته عشرين
انا عن نفسى اخدتلها..وفآخر البوست هتلاقو الصور وابقوا قولو شو رأيكم فيها


نرجع تانى للمكتبه بقى من الداخل
محيط من الكتب خلانى اقول حراااام والله اللى بعمله فنفسى دا.. قربت انسى القراية اساسا من كتر مالنت لحس عقلى
المهم بقى هكلمكم عن كتاب الحمدلله مالحقتش اكمله عشان المكتبه كانت هتقفل
وللى حابب يزورها يعنى هى بتقفل الساعة 7 مساءً.. يعنى تشوفولها يوم كدا مخصوص تروحو من اوله


ونرجع للكتاب اللى قريت فيه.. اسمه فن الاتصال اللغوى ووسائل تنميته.. للدكتور محمد دهيم الظفيرى.. واضح انه مش مصرى
بيتكلم فى حدود اللى قريته يعنى عن اللغة وازاى انها اهم طريقة للتواصل بين الناس.. كلغة ناطقة وليست مكتوبة
وازاى ان ممكن اللغة يكون فيها تلاعب كبير فى الالفاظ وتتفهم بشكل عكسى خالص
زى امثلة هكتبهالكم., وعجبتنى جداااااا
اول مثال بيتكلم عن القدرة على تحليل الظواهر.. يعنى فى المثال دا هتلاقو الكلام ظاهره حاجة وأصله حاجة تانية خاااالص
نشوف مع بعض

>

>
يذكر أن امرأة دخلت على هارون الرشيد وعنده جماعة من وجوه أصحابه

فقالت: يأمير المؤمنين, أقر الله عينك وفرحك بما أعطاك, لقد حكمت فقسطت

فقال: من تكونين أيتها المرأة؟ فقالت: من آل برمك, ممن قتلت رجالهم وأخدت أموالهم. فقال: أما الرجال فقد مضى فيهم قضاء الله , وأما المال فمردود إليك. ثم التفت إلى الحاضرين من أصحابه وقال: اتدرون ماقالت هذه المرأة؟
فقالوا: مانراها قالت إلا خيراً, قال ماأظنكم فهمتم ذلك
أما قولها: أقر الله عينك, أى أسكتها عن الحركة.. وإذا سكتت العين عن الحركة عميت
"وأما قولها : وفرحك بما أعطاك, أخدته من قوله تعالى:" حَتَّى إِذَا فَرِحُوا بِمَا أُوتُوا أَخَذْنَاهُم بَغْتَةً
"وأما قولها: حكمت فقسطت, أخذته من قوله تعالى:" وَأَمَّا القَاسِطُونَ فَكَانُوا لِجَهَنَّمَ حَطَباً


***********************************************

المثال التانى عن تفسير الطرف الاخر للرسالة.. يعنى ممكن كتير الواحد يتكلم بحسن نية وتتفهم حاجة تانية خااالص زى اللى حصل مع هذا الرجل


يروى أن أبا حسن على بن الجهم أراد أن يمتدح هارون الرشيد( مش عارفه الراجل دا حكايته ايه بالظبط معانا) فاستأذن الخليفة فأذن الله فقال منشداً بغرض المديح
أنت كالكلب فى حفاظك الود ** وكالتيس فى قراع الخطوب
(جاب لنفسه مصيبه..وعلى رأى مابنقول الملافظ سعد)
فغضب كل من كان فى المجلس منه وأرادو الفتك به, فتدخل الخليفة قائلاً: والله ما أراد الهجاء إنما أراد الثناء علينا فى الشجاعة والوفاء, فهو فى مكان لايرى فيه أشجع من التيس, ولا أوفى من الكلب, فأمر أن يمكث فى قصره مده وأجلسه فى شرفه مطلة على نهرى دجلة والفرات وبعد مدة امره ان ينشد فأسمعه من حسن المديح ماسر الخليفة حيث قال
عيون المها بين الرصافة والجسر ** جلبن الهوى من حيث أدرى ولا أدرى
(اللى فاهم اللى اتقال دا ينوبه ثواب ويقوللى)
:تحديييييييييييييث
بعتذررر جدااا عن هذا الخطأ الغير مقصود.. هى فعلا الهوى مش المها.. انا بس مخدتش بالى وانا براجع البوست
وشكرااا لكل اللى وضحلى النقطة دى

واخر مثال بيتكلم فيه عن استخدام لغة سهلة والإبتعاد عن الالفاظ الغريبة ان امكن حتى ولو كانت فصيحة زى ماهنشوف مع عيسى بن عمر النحوى وهو من علماء النحو فى القرن الثانى الهجرى
انه سقط عن حمار فاجتمع عليه الناس

"فقال :"مالكم تكاكأتم على تكأكؤكم على ذى جنة؟ افرنقعوا عنى
لا بجد كلمتين خارجين من المجمع اللغوى طازة.. بس عجبتنى اوى افرنقعوا دى:))
وللاسف ماكملتش الكتاب بس اكيد ليا لقاء معاه مرة تانية.. يارب تكونو استمتعتم بالفقرة الثقافية دى واسيبكم بقى مع الصور اللى اخدتها للمكان


ماعرفتش اجيب صورة للمكتبه كلها


هنا التمثال ماكنش له مزاج يظهر

دا الطريق اللى قدام المكتبه

دى القبه السماوية

دا مدخل المكتبه من جوه





وطبعا مافاتنيش اخد صورتين وانا ماشية

ممكن الاضاءة مش حلوة اوى لان الكاميرا بتغلس بالليل مش عارفه ليه


Sunday, November 4, 2007

تسفييييك حاااااد

يامرحبا يامرحبا نورك غطا على الكهربا

(بس بحيى نفسيتى بالعودة اخيراااا لبلاعتى)

المرادى انا داخلة حرب مع وصلة النت.. وعاوزة اى مشاكل تحصل فيها تانى

عشان خاطر رمضان بس كنت مطنشة.. انما المرادى لاممكن يحصل فيها حاجة ابداااا

لقد اشتقت كثيرا لعالم التدوين بكل مافيه .. عامللى عمل دا واللا ايه

وبالطبع كل جمهورى الكريم هايصفق لرجوعى برضو.. مش كدا واللا اييييه

عموما زى مانتو شايفيين العنوان.. تصفيق حاااد.. دا المفروض يعنى لكن بلغتنا الحديثة اصبح تسفيك

بالصدفة البحتة خالص نزل عليا وحى الثقافة وقلت اتصفح الجورنال ولقيت المحاور الاعلامى الجليل مفيد فوزى هيقدم تحقيق عن التصفيق

(وهل هو كذب واللا نفاق (مش حاسة ان الكلمتين مختلفين اوى يعنى

وكمان هيتكلم عن متى يجوز التصفيق شرعا

ماكدبش عليكو انا ماشافتش التحقيق دا لكن استوقفنى الموضوع بصراحة

احنا فمصر ولله الحمد بنييجى للدنيا دى مع تسفيك حاااد

تشجيع للماما واحنا ياعينى مطلعين عينها علشان نعزل

وياللا الراس بانت اهى ..اتجدعنى امال.. وهوبااا نييجى للدنيا الجميلة دى مع تسفيك حااد ماللى فى المستشفى كلهم

فى البيت لما نقول حاضر ومانعملش حاجة غلط بابى ومامى يسقفولنا ويدونا شوكولا

ونييجى فى الدراسة .. اللى يجاوب صح الكل يسقفولو والميس تديلو نجمة كمان

ولما نتخرج من الكلية القاعة كلها تتهز من كتر التسقيف بقى امال ايه اتخرجناااا.. وعقبال شهادة العاطلين الدولية
وكمان صحيح لما نجيب جوووون وناخد الكاس.. طبعا انتو عارفين ايه اللى بيحصل وقتها

اللى فاتو دول كانو تصفيق للتشجيع او للفرحة

مممم وفى ايه تانى ياترى؟؟.. اه التسفيك الحااااد اوى بقى لما مدير المدرسة ييقول الخطبة المملة المعهودة
بمناسبة بدأ العام الدراسى وكل عام وانتم بخير

ولما معيد الكلية يلقى محاضرة بمناسبة استيراد الجودة من الخارج ورشها على كليات مصر المتحدة

ولما الفنان اللى ياحبة عينى زاهد الدنيا ومتطوع لله فـ لله علشان يؤدى رسالة الفن السامية

ياخد جايزة الاوسكار العريبة تقديرا لجهوده الذاتية

ولما مرشح مجلس الشعب يشجينا بدموع عينيه وشحتفته ياعينى على احوال المطحونين من ابناء الشعب

ولما .... قاللا اخبار مؤتمر الحزب الوطنى ايه لو حد متابع يعنى

مااااا علينااااا ياجماعة نتكلم دلوقت بقى عن زمن حدوث التصفيق..ماتنسوش الحاااااد

يبدأ هرمون التصفيق فى الافراز داخل اوردة اليد اول ما

واحد ماللى سبق واللى ماسبقش ذكرهم يظهرو ويبانو عليهم الامان

وكل البشر تديلو جرعة تسفيك حاد لحد ما إيديهم تورم.. يريحو ادييهم شوية على ماياخد هو كمان شهيق ويبدأ يشجينا

وطبعا كل مايقول كلمة الايادى المصرية العظيمة تبدأ فى العمل الجماعى للتصفيق

تقريبا محدش بيسمع ولا بيعرف بيقول ايه من قوة الالحان والسيمفونيات العبقرية اللى بتألفها الايدى البشرية

وياريت ياريت على رأى الست.. ياريت بنسقف واحنا مقتنعين واللا عشان الكلام اللى بيتقال عاجبنا وداخل جمجمتنا

اهو دا بقى التصفيق بغرض النفاق اللى على أصله.. اللهم لا نفاق ولا رياء

نفسى الايادى اللى بتسقف عالفاضى والمليان .. واغلب الوقت بيكون عالفاضى .. نفسى تعمل حاجة عليها القيمة

نعمل بإيدينا حضارة تعيش واللى بعدنا يفتكرنا بيها ويترحم علينا.. يقولو دا كان زمن اصيل استغلو كل حاجة فيه صح

مش زمن جدوره مسوسه وبناياته خلاص مستنية تتساوى بالتراب فأى وقت

انا من هنا.. بناشد كل اللى يقرا الموضوع دا إنه يمتنع عن التصفيق ولاى سبب لغايت لما البلد دى تقف تانى على رجليها

وتستاهل اننا كلنا نحييها

بالمناسبة صحيح.. سمعت ان صاحبة السمو الزعيمى امريكا سقفت لبنت عمنا النيل الغلبان مصر علشان ناوية تستخدم الطاقة النووية

ياخوفى يابدران لايكون تصفيق ماقبل العاصفة

استرها معاانا يااااااارب

*******************************
فقرة اعلانية

صرصارة المفروسة تهنأ جميع الامة الملحوسة بعيد حبينى واخلصى

وهدية منى لكل المحبين.. باقة مخصوص من البصل الاخصر

دا مع شوية فسيخ هيبقى ايه.. غرام وانتقام

اهو حاجة تدخل المعدة بدل الورد اللى بيدخل الرئة

ويجعله عامر ياشعب مصر.. الملحوس

Wednesday, September 12, 2007

رمضان جاااانااااااااااااا



السلااااااااااااام عليكم ورحمة الله
ازى الصحة وازى الحااااااال ...يارب تكونوا بخير جميعاااااااااا
مفتقداكم جدااااااااا ومدونتى ...ولسا كمان مش هكتب فى رمضان
يعنى تقريبا ولله الحمد 3 شهور ماكتبتش حاجة عليها القيمة
قال يعنى بكتب فى التاريخ المعاصر
ماااااا عليناااااا
طبعا انا عارفة معظم المدونين كاتبين عن شهر رمضان
كل رمضان وانتم بألف خير وصحة
المهم بقى انا مش هكتب عن رمضان...عارفنى دايما محبش اقلد حد:)
انا هحكى عن امبارح...كان يوم بجد رااااائع..تخيلو كنت فييييين
اولا كنت انا وقريبتى اللى تقريبا كدا انكتب عليا ماعرفش غيرها..المهم كنا هنعمل شوبينج ومشيتها جنب المتحف المصرى
فقالتلى هو ايه البتاع الكبير اوى دا...قلتلها دا المتحف..طيب ياللا ندخله
وعليهااااا رحنا داخلين وانا اول مرة بصراحة ازوره بس مش هتكون اخر مرة ان شاء الله
مالحقناش نشوف ربعه اساسا بس كنا مبهورين بالجمال اللى شفناه بجد سبحان الله
انا مش عارفه احكى اوى لانه للا سف الموضوع دا كان محتاج صور لكنهم منعو التصوير جوا المتحف فاتصورنا بره فى المدخل بتاعه
واللا السياح الاجانب كمان احتلو المتحف بصراحة ...حاجة بجد اللهم لاحسد ولاقر
بس شاطرين يقولو السياحة مضروبة
امال لو مش مضروبة بقى كنا هندخل بضرب النار واللا ايه:))

انا هنزل كام صورة اخدتهم للمكان ويارب يعجبوكم
وكل اللى مازرش المتحف بجد هيندم...زوروه تجدو ما يسركم:)))
وزى ماعملت جولة فى الايجيبشيان ميوزيم اخد لفة عالمدونات
بس بالله عليكو ماحد يزعل انى مادخلتش عنده بس انا هحاول ازور كل حبايبى
عاوزة اقولكم انى بالظبط ساعة ومسافرة..هاقضى رمضان فى اليكسسسسس..تاتاتا وانتو لأاااا

قريبتى ماسكة فيا اسافر معاها...انتو عارفين بقى مقدرش ازعل الجماهير منى
انا هزعل ماما واخواتى منى بس:)))
بس بصراحة رمضان مايتفوتش فى اليكس ..واللى عايش هناك اكيد عارف اد ايه الجو فى رمضان هناك بيكون اكتر من رائع

ياللا انا رغيت كالعادة طبعا ..استودعكم الله وربنا يعينا على حسن العبادة ويتقبل منا صالح الاعمال..اللهم امين
وكل ياميش وكنافة وقمر الدين وقطايف وانتو طيبين:))
اسيبكم مع الصور بقى






Thursday, August 2, 2007

اللى كتب حرف فمدونة...لاااازم يرجعلها تااانى

السلاااااااااام علييييييكم اولاااااااااااا
ثانياااااا بقى انا مش عارفه اقول حاجة خالص لانى فعلا مكنتش متوقعة اد ايييييه هاشتاق لمدونتى ولكل اخواتى اللى عرفتهم
دا لو بيت من طوب وحيطان ماكنش هيوحشنى بالشكل دا
فعلا اللى عاوز يعرف قيمة حاجة يبعد عنها
ولكل اللى بعتولى بجد انا بشكركم جدااااا وربنا يخلليكو لياااا.....انا هعيط
واسفه جداااا انى مردتش عليكم لكن حتى مودنتى ماكنتش بفتحها
لكن بعتذرلها جداااا وليكم كمان...انا مش هسيبها تاااانى ابدااا مهما يكون
ـــــــــــــــــــــــ
دلوقت بقى انا هتخيل حفلة رجوعى ليكم مع اغنية وردة
اهلااااااا اهلااااااا اهلاااااا اهلاااااا بأعز الحبايب
(دا اللى هى انا؟؟؟)
اهلااااااا اهلااااااااااا اهلاااااااا اهلاااااااااااا بالقمر اللى غايب
(ياسلااااام..قمر حتة واحده..ماتخلوها قمرين على رأى عمنا عمرو)
وحشتوووووونى وحشتوووووونى وحشتوووووونى
(لازم ارد بقى عليكو..كفاية شهر بحااااله)
وحشتووووو عيوووونى ووحشتنى ليااااالى زماااااان
ونكتفى بهذا القدر دلوقت وهرجع تاااانى ببوستات ساخنة ملهلبة مشطشة
(دعاية بقى اشمعنى الجرايد والمجلات)
تحيااااتى ليكم ودمتم بألف خير
ــــــــــــــــــــــــــ
تحديييييث
بالمرة يعنى عاوزة اعرف من كل واحد فيكم مدونته تبقى بالنسباله ايه
وياريت اللى علق فى البوست دا يدخل تانى ويقوللى

Friday, June 29, 2007

تاج وتاج وتاج=3 تاج

أولااااااا لازم بجد أعتذر عن تقصيرى معاكم بس الحمدلله جهازى هيخللينى انتحر بسببه

وذلك لاسباب عديدة مش هدوش دماغكم بيها

ثانياااااا بقى انا حبيت انهى فتره تدوينى بالتاجات دى واسفة انى اتأخرت فى الرد عليهم

انا هعمل فترة بيات صيفى كدا وراجعة تانى..بجد هتوحشوووووونى جداااااااااااا

وعلى قد ماقدر بإذن الله هتابعكم


ومعلش بقى هطول عليكم فى التاجات دى استحملونى..انا اللى جبته لنفسى وكومت الواجب كله

نبدأ بتاج العسولة ضوء القمر

هل كنت طالب شاطر فى المدرسة ؟

ايه دا يابنتى عيب عليكى انتى بتهنينى

بصى انا وبلافخر كنت الاولى فى الاعدادية

وبرضو كنت الأولى فى الثانوية..بس من الصفوف الخلفية

****************


أحب مادة , أكره مادة ؟

العلوم والانجليزى..دا قبل الثانوية العامة

لانى طبيعى كرهت نفسى فيها

ومن الاول بقى مش بطيق الرياااضة
****************

كنت عايزة تطلعي ايه وانتي صغيرة؟

مضيفة طيران
****************************************************

التاج اللى بعده من حبويتى رينـــــــــا-معلش انا عارفه انه اتخلل واستوى من الحر

ومهند جاوب عليه حديثا هو والتاج اللى بعده وبعتهوملى هو كمان

انت ليه اخترت الاسم الغريب ده؟

لانه اسمى

سارة

وفى بيقولولى صورصارة وانا بكره الاسم دا

بس عند فنفسى كتبت اسم المدونة كدا
****************
undo...لو تقدر ترجع الزمن مره واحده,تعمل
لموقف ما,ايه الموقف اللي حتختار تشطبه من حياتك؟
نتيجة الثانوية العامة...كان يوم عالمى بجد...يعنى تخيلو الصدمة الكبرى
بنتيجة غير اللى اتبلغت بيها...ياللا ربنا يوفق الجميع
****************
لو معاك طاقيه الاخفا,حتعمل بيها ايه؟
ياولددددددد...دانا هعمل عمايل
اهمها انى اركب الطيارات ومحدش يشوفنى والف العااااااااااالم كله
****************
لو تقدر ترجع بالزمن ليوم واحد بس,لاي وقت او يوم,ترجع لامتي و فين؟
يااااااااه لكاااام سنة كدا معرفش اد ايه
ليوم لما كنت فمرسى مطروح تقريبا كان اخر مصيف مع بابا الله يرحمه
مطروح بجد ماتتنسيش
****************
و معاك مصباح علاء الدين,ايه التلات طلبات اللي حتطلبها من الجني؟
ايه السؤال الحمضان دا
طيب عموما رقم واحد هطلب منه انى اروح السعودية وازور الاماكن الشريفة هناك
ورقم اتنين انو يبقى معايا فلوس حلوة كدا وبنت ناس علشان ارمى الجهاز دا فى الزبالة واجيب واحد تانى
(ورقم تلاته بقى خلليه سر(غلاسة وخلاص
**********************
لو تقدر تعيش في شخصيه تانيه ليوم واحد,او حتى علي طول,تحب تعيش بدل مين؟
احب اعيش زى المليونيرات
واحلم لو ماعييش مالعنش الأزمات
لا بجد احب اعيش بدل اسماء بنت ابى بكر
ولو راجل يبقى عمر المختار
****************

سؤال شبه الاولاني
,نفس قدره ترجيع الزمن,حاجه حتعملها و انت مش قادر تعملها و خايف من النتيجه بتاعتها,معاك لقدره دي,فتقدر تعمل
الحاجه دي و لو فشلت ببساطه تعمل ليهاundo
و يا دار ما دخلك شر,ايه هي الحاجه دي؟
ماهذا الذى
طيب هقلكم حاجة مقرفة ومرعبة
عاوزة اشرّح نفسى واسبح فى الخلايا والانسجة لانه عالم الانسان دا غريب وساحر بجد
وعمر مالتكنولوبيا الحديثة ماهتجيب اخره
****************

خمس حاجات محدش يعرفها عنكممممم.
هيهيهيهيهيهيهيهيهيهيهيهيهيهيهيهيهي
انا ولله الحمد لسانى متبرى منى يعنى ممكن لو حد اعرفه لاول مرة بس ارتحتله تلاقونى حكيتله قصة حياتى اساسا
ودى بجد خصلة نفسى اتخلص منها
وانى على الرغم من كلامى وهزارى الدائم إلا انى بستسلم بسرعة للحزن واليأس
وانى معنديش صبر ودايما متسربعة..على ايه معرفششش
وانى انطوائية على الرغم من انه بيظهر عكس كدا لكن فعلا لو اتعرفت على ناس طيبة
بكون معاهم صداقات بأسرع مايكون وبجد بتعلق بيهم اوى وبزعل لو بفارقهم
لدرجة انى مرة اتعرفت بواحدة عن طريق المواصلات شافتنى وانا شايلة كتاب من كتبى الخمسة كيلو دى وصعبت عليها اوى
ومن هنا بدأنا نتكلم وبقينا اصحاب اوى
الحمدلله اللى بيحبب فيا خلقه
ياللا كفاية كدا وعدو انتو بقى شوفو دول كام
*********************************************************
اللى بعده ياواااااد يابندق
دا من حبوبتى أمانى بنت الجنوب
انا عملته اهو يامعلم والفيل فى المنديل وكله تمام
أحب شخص لقلبك في الدنيا؟
مامتى حبيبتى اللى لو عمرى كله مايغلى عليها
و
خاااااااااااااااااااااااليييي بحبه اوى وربنا يجيبهولنا بالسلااااامة
كنت خاطباه وانا صغيرة وواحده تانيه خطفتو منى... ياللا بقى مايغلاش عليها وربنا مايحرمنا منهم ولامن الكتاكيييت حبايبى
وطبعا والدى الله يرحمه بس السؤال بيقول--احب شخص فى الدنيا
بابا دلوقت فمكان احسن من الدنيا
****************
انسان مستعد تضحي بحياتك – ركز فى كلمة حياتك – عشانه؟
انا اتدبست وقلت ماما فى السؤال اللى فات:D
لا بس طبعا مش تدبيسة ولا حاجه
ولو اى حد هلاقى انه حياتى تساوى انقاذه انا مش هتأخر
كدا كدا الصلاحية هتنتهى...يبقى ننهيها فحاجة ثوابها اكيد مش هيكون قليل

****************


انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

هو ايييه فيلم الرعب دا

انا مابعرفش اكره حد بجد...بس فعلا وزى اى مخلوق عاقل فى الدنيا ماهيقول

انا بكره اسرائيل واقولها لو اتسأل ..انشالله اموت قتيل او اروح المعتقل...وايييييييه

****************

ما هو اسم اجمل كتاب كتبه بشر قراته ومحتفظ به حتي الان؟

لا كتب بصراحة مش فاكرة لانى للاسف النت قرب يلحسلى عقلى بس بإذن الله الفترة الكادمة هرجع للكتب تانى

****************


اسم كتاب كتبه بشر برضة- انت متعلق بيه وبتقرأه كل فترة؟

لا تحزن لعائض القرنى...طبعا دا كتااااب كبيييير ولا ماخلصتوش لكن بقرأ مع انه مش كتير

****************


اهم جهاز منزلى انت متعلق بيه او بتستخدمه كتير؟

حاليا لانى مش بخرج كتير اوى يبقى الكمبرورر

بس لو بخرج يبقى المااااكوااااااه

ولو حرانة يبقى المروحة

ولو عاوزة اشرب حاجة ساقعة واكل ايس كريم يبقى التلاجة

ولو عاوزة اشوف المسلسل يبقى اييييييه..اكيد مجلة ميكى:D

****************

مكان تحس بالراحة عندما تدخله؟

بوابة اليكس

****************


شىء تحس بالراحة النفسية عندما تنظر اليه؟

البحرررررررررررررررررررررررررر

****************


مكان تحس فيه بالحنين الى شىء لا تدرى ماهو و ذكريات جارفة الى لاشىء؟

شبرا ووسط البلد

****************

اجمل مدينة زرتها داخل مصر ؟

لا والحق يقال مصر فيها اماكن كتير جميلة

بس لو هنقول على الجمال بس يبقى شرم الشيخ

ولو على الجمال بكل معانيه يبقى اسكندريييييييييييية

****************


أجمل مكان طبيعي رأيته داخل مصر ؟

عجيبة- بمرسى مطروح

****************


شخصية كارتونية بتحبها


تيمووووووون صديقى الصدووووق

****************

نوع هاتفك المحمول؟

عروستى:D

بالتأكيد هيكون الاستاذ ن و ك ي ا

****************


سرعة بروسيسور جهازك؟

مكسلة اشوف بصراحة

بس اعتقد السلحفة اسرع منه

****************


حجم ذاكرة –هارد- جهازك؟


40 رضا الحمدلله

****************

المساحة التى تشغلها المواد الاسلامية على جهازك؟

برضو مكسلة اشوف بس الموضوع مش بالمساحة المهم اللى يشغلها

****************


أهم هدف انت واضعه لحياتك الآن؟


انى احقق كل اللى بتمناه...اجابة منطقية برضو:D

****************


مواصفات فتى الأحلام بالنسبة لك؟

عشرين قدم..نو فروست..بتسقع صيف وشتا

ايه دا ..معلش لخبطت وكتبت مواصفات التلاجه

المرة الجاية بقى ابقى اكتب مواصفات الفتى ابو حصان وايت:D

****************

صف ما يأتى:
شعورك لما بتسمع كلمة مصر ؟

مصـــــــــــــــــــــــــــر؟؟؟؟

ياربى سمعت الكلمة دى فين قبل كدا

****************

شعورك لما بتسمع كلام عن اليهود؟


دول بالظبط عاملين زى خلايا السرطان بتنتشر وتتوغل وماعتقدش ريد الغلبان هاينفع معاهم

****************

شعورك لما بتشوف ظابط شرطة؟

وليه كدا بس مالطيب احسن..بعدين تقصدو الظابط واللا بدلة الظابط:D

****************

شعورك لما بتشوف الكناس العجوز فى الطريق؟

بتمزق بجد لما بشوفهم لانهم ناس على قد ماتقدر بتخللى البلد نظيفة

وللاسف مش لاقيين اهتمام كافى

وقصاد كدا فى ناس مش شاطرين غير فى العكس

****************


افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

والله مافكرتش بصراحة قبل كدا ولا هفكر لانه عادى بنى ادم يعنى زيه زينا

المهم اللى جواه يبقى زى اللى بره

****************


احساس يراودك فى اشارة مرور مغلقة بسبب مسئول كبير؟

الكبير كومبو والصغير مينى

وربنا عالظالم والمفترى:D

*******************************************

تم بحمد الله

واعتقد محدش ماجاوبش على التاجات دى بس بجد اى حد يقرا التاجات وحابب يجاوب عليهم يتفضل بكل سروووور

تحيااااااتى ليكم ودمتم بألف خييييير

Wednesday, June 20, 2007

تهييس للمناقشة

ايييييييه...ولا حد عارف ربنا بيرزق الواحد بالتخاريف دى منين
كلها مصادفات بحتيه..يعنى انا وبصافى نية كنت بهنى اخوانى الاعزاء بافتتاح مدونتهم الجديدة(انظر البوست اللى قبل كدا)
الاقى وبقدرة قادر يتحول الموضوع لمناقشة حول:- هى ايه الكورة دى؟؟؟؟
وليه الاهتمام اللى ملوش لازمة بيها دا؟!؟!؟!؟
وازاى البنات تشجع النوعية دى من الرياضة.. او يمكن الرياضة عموما
(على العلم بإن خبرتى فى الكورة انها لما بترن فى الشبكة بقوول جووووووووون)
وبصرف النظر برضو عن الموضة اللى طالعة البنات فيها بالهتافات فى الملاعب والضرب على الطبول ولبس العلم لزوم الانتماء الوطنى وعشان ايه نتعصب ونتخانق على بتاعة ملهاش لازمة
بصرف النظر برضو عن المعارك الضارية اللى بتحصل بين جبهة الاهلى وجبهة الزمالك المعادية
(هى مش كلها مصر فى الاخر واللا انا اللى مش واخده بالى)
طيب بلاش الكورة احسن بتجيب حساسية
ليه هربانين من الواقع المرير الاليم المهبب وداخلين هنا نكتب شعر وخواطر وروايات ومواقف مرينا بيها
او بننتقد حال مش عاجبنا بشكل ساخروسايبين المواضيع اللى اهم من كدا فى حياتنا وراكنينها عالرف
سايبين الموضوعية والجدية والحماسة وحرقة الدم فى سبيل نصرة الحق وتحيا الثورة وياعزيز ياعزيز كبة تاخد الانجليز
سايبين السياسية اللى صارت جزء لايتجزأ من حياتنا سواء شئنا ام لا
سايبين الكلام عن احوال الاسلام والمسلمين اللى بيتم اضطهادهمفى جميع انحاء الكرة الارضية واصبح هرم الاسلام الشامخ مقلوب
بعد ماكان بأعلى قمته ولايخفى عليكم الاسباب
سايبين الكلام عن اوضاع بلادنا الداخلية واللخبطة اللى بقينا فيها ولاعارفين اذا كانت البلد بتتقدم بينا زى ما إعلامنا المبجل مابيقول
واللا البلد بترجع بينا الى عصر ما قبل اكتشاف الحجارة

طيب انتو ايه رأيكو فى واحد بيفطر جرايد محشية بالتقارير عن اوضاعنا الداخلية من رشاوى وغش وعمارات بتقع
ومخدرات بتتوزع زى علب الشوكولاته وجرايم قتل وسرقة و و و و و
بعدين يرجع البيت يتغدى على ساوند تراكس من زعيق للمدام ودوشة للاتفال وخناقات للجيران
ونييجى بقى عالعشا نلاقى نشرة اخبارمحبشة بالحرب فى العراق وعليها تسبيكة قتل الفلسطنيين فبعضهم مع خلطة من تفجيرات لبنان والمجاعات فى افريقيا....ألخ ألخ
طيب بزمتكو تدو للراجل دا مدة صلاحية اد ايه وبعدها يتكل من الدنيا؟
انا برأيى لو منه وعايشة كل يوم فى الموال دا ياسيب القارة بحالها واروح انتراكتيكا استجملى يومين مع البييرز القطبية
ياانتحر بطبق مهلبية عليه صوص فنيك مركز

انا كل سطر ماللى كتبته يلزمه بوست مخصوص وعارفة يمكن كله اتلخبط فبعضه ومحدش عارف انا عاوزة اتكلم عن ايه اساسا
:Dاللهم طولك ياروووح).. دا واحد بيقرا البوست وشكله مش طايقنى)

-:طيييييييب خلاصة التهييس اللى فوق دا
عاوزة اخد رأيكو هل احنا فوسط كل المشاكل والبلاوى دى لما نحاول ناخد نفس عميق ونستجم شوية
نسمع اغانى...نشوف مسرحية تضحكنا...نتفرج على ماتش كورة...نفتح مدونات ترفيهية
هل لما نسيب ولو لجزء من اليوم الهموم اللى مغرقانا ونحاول نخرج من الكبت دا نبقى هايفين...مش غيورين على حال بلدنا... مش عاوزين نتحمل المسؤلية؟؟؟؟
بجد عاوزاكو تتحاورو معايا حوار صريح جدا جدا وهيسعدنى مشاركتكم

Tuesday, June 12, 2007

أهليييي أهليييي


البوست دا مخصوص للتهنئة بافتتاح مدونة الاهلاوية




ومعاه



و


و

وأى حد أهلاوى حابب يشترك فى المدونة اهلا بيه
وانا ركبى حديييد...والاهلى حدييييد
اضغط على الصورة للانتقال للمدونة...هذه رسالة مسجلة*

Thursday, June 7, 2007

%مشاهد مصرية100



أولا البوست دا المفروض ينزل من قرن بس ياللا الحمدلله انى لسا معاكم:D

دى مشاهد مصرية عصرية فيها اللى قريت عنه وفيها اللى شفته بعيونى الاربعة


(مشهد(1

عثر طالب على قطعة من البلاستيك فى بسكوت المدارس اللى بيسلموه كوجبة غذائيه متكاملة

والتى من المفروض ان تكون من الدقيق المخلوط بالحديد اللازم لصد الانيميا بعيد عنكو وعن القارئين

ولكن من الواضح ان حكومتنا المبجلة استغلت الحديد نظرا لاسعاره الولعة النار وبدلته بالبلاستيك

واهو كله اكل وتحيا المعدة المصرية الحديدية... آه يابطنى


(مشهد(2

العثور على مدرسة بها طالبان فقط ومدرسان ومدير ووكيل وعمال فى محافظة قنا

وتدعى هذه المدرسة باللقيطة-دا على ماودانى سمعت يعنى...بس والله ينفع اسم فيلم من بتوع العصر الذهبى للسينما المصرية

"أخرج من بيتى... انت مش ابنى...حسن يوسف بس هو اللى ابنى...طرررراخ"

يعنى المدارس التلاميذ فيها بيقعدو على السطوح ويمكن على رف السبورة كمان..وعندنا هنا مدرسة مفتوحة عشان اتنين

انا عاوزة حد فيكو ييجى يقول ان فى أزمة فى اماكن الطلاب تانى


(مشهد(3

عند محل العصير فى يوم اظاهر والله اعلم ان جهنم كانت بتشقر علينا فى ذلك اليوم الله لايعوده

سمعنا زعيق وصوت عالى وواحد بيقول روح ياشيخ بقى كل دا عشان بق مية دانت هتدخل جنهم حدف

دانا لو مش بنى آدم كنت شربتنى

وفى الطرف الاخر من الخناقة ولد باين من ملامحه انه طالب على نياته خالص ولم ينطق بكلمة واحده وانما ظل يراقب هذا الهمجى بصمت

وفى يده زجاجة المياة التى طلبها منه هذا البائع المتجول

مده ايده واداله إزازة المية

أخدها منه ورماها على الارض وركلها برجله

وما كان من هذا الشاب الا انه رمقه بنظرة غاضبة ومندهشة بنفس الوقت

بعدها مد هذا المدعو انسان يده فى جيبه واخرج منها نقودا وقال له: خد حقها ياخويا اهو

وبعدها اعطيت ظهرى لهذا المشهد احسن ارتكب جريمة وهو مش أدى

ولكنى سمعته وهو يقول لزميل له ويصفق بيديه: كنت عاوز اخد بق ميه ومرضيش يدينى

وفى نهاية هذا المشهد اقول: لاتعليق


(مشهد(4

وانا بشترى تذكرة مترو الانفاق لقيت شرايط ازرقيكا منورة باعثة للتفاؤل

سألت الموظف: ودا من امتى الللون الجديد دا

قاللى من يومين كدا...يعنى من الاسبوع اللى فات تقريبا

كنت هزغرط وانا فى المحطة..ايوة كدا يامصر اتقدمى واعملى نيولوك


التذكرة الصفرا موجودة من أيام تحتمس القرن العشرين وكفاية عليها كدا

انما بقى التذكرة الجديدة حاجه ايه..جاية فوقتها بصراحه وكمان لونها باعث على التفاؤل ومرطب للجو الحار

وانا من بلاعتى المتواضعة بتقدم بخالص التهنئة لسيادتة الرئيس والسادة الوزراء وكافة اعضاء مجلسى الشعب والشورى وجميع اعضاء جمهورية مصر التقدمية على هذه النقلة الحضارية وعقبال باقى النيولوكات

وبهذه المناسبة برضو بطلب منكم تقولولى ايه كمان نفسكو يتعملو نيو لوك زى تذكرة مترو مصر العربية؟؟

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
:تحد يــــث
بس حبيت اوضح ان البوست دا تشابه مع بوست مهند مواقف ومشاهد طريفة جدا بالصدفة البحتة وانى مكنتش واخدة بالى خااالص وانا بكتب البوست دا...الفرق بس انه دى مشاهد حقيقية انا نقلاها وبعلق عليها
يعنى حبيت اوضح النقطة حماية لحقوق الملكية الفكرية...واللا ماعرف بيقولو عليها ايه دى:))))