Thursday, December 6, 2007

ماخدوش ياباباااااااااااا


ميساء الخير والسعادة

اكيد كلنا فاكرين المشهد الجمييل جدااا فمسرحية سك على بناتك

:وفاكرين برضو الجمله الشهيرة اللى بتقول

وهى على نغمة واحدة ماخدوش يابابا ماخدوش يابابا

وانا من منطلق هذه الجملة هتكلم عن موضوع البيت المصرى مش بيخلى من الكلام عنه

وكتييييييييير جدااااااا اتناقشوا فيه بس انا هحاول اتكلم بشكل مختلف

انا هتكلم كفرد من بنات حواء.. معرفش بقى اولاد آدم رأيهم ايه

كل البنات بتحلم باليوم اللى هيتقدم فيه استاذ فارس ابو حصان ماركة اوبل وموبايل نوكيا من نوعية للعرض فقط

بس ياترى ايه الطريقة اللى بتفكر بيها علشان توصلها لهذا الشخص المثالى

كان فى موقف حصل قدامى من فترة مش بعيدة

عريس جاى يتقدم.. ودى اول مرة فحياتى اتفرج كدا لايف على الموضوع دا

كنت عند بنت خالتى وهتموت مالعياط وقربت تعمل مظاهرة وتشجب وتدين هذا السلوك السافر لهذه الطريقة فى الجواز

انا مش هاطلع يعنى مش هاطلع

انا محبش اكون بضاعة الناس تييجى تتفرج عليها ويايقبلو يايشوفو غيرها

يابنتى يهديكى يرضيكى اطلعى بس سلمى عليهم اهم برضو ضيوفك

قلتلها ماهم فى الشارع بيمسكو البنت وبيعملولها فحص مجهرى

طبعا باستثناء اللى بيمشو فحالهم ويغضو من ابصارهم

جت يعنى على الغلبان اللى هايلقى نظرة وافتكر يعنى انها من حقه

امال هيتعرف على اللى ممكن تبقى نصفه الاخر ازاى ؟؟؟

تقولنا طيب وافرضو انا ماعجبتوش وحسيت بقبول من ناحيتى

يبقى منظرى ايه ساعتها

وكرااااااااااااااااااامتى اللى هتروح فى الارض

(ساعتها حسيت كأننا بنناقش قضية كرامة امرأة مش قضية زواج امرأة)

بجد ريقنا نشف على مارضيت تطلع وقامت بواجب الضيافة ولله الحمد

واليوم عدى على خير


طبعا الطريقة دى اسمها على مااعتقد جواز الصالونات واللى غالبية البشر بيتجوزو عن طريقه


:رأى صاحبة القصة بتقول

هى رافضة انها تكون زى مانيكان للفرجة مع احتمال للرفض او القبول

ممكن لو المقابلة دى حصلت من غير ماتعرف نواياها ايه.. يعنى مثلا تتم فتجمع زى فرح مثلا وهى وقتها مش هتكون فبالها بقى ان دا عينه عليها واللا جاى علشانها

بتقول انه احساس صعب اوى لما تلاقى نفسك معروض زى اى بضاعة

بتقول كمان ان افضل طريقة للارتباط من وجهة نظرها لما يكون فى تعارف مسبق زى مثلا زمالة فى الكلية او العمل ويكونو وقتها الاتنين واخدين فكرة عن بعض وساعتها اللى هيتقدم هاييجى علشانها

مش علشان سمع عنها اوعن اهلها او جاى عن طريق القنطرة


القنطرة دا مصطلح انا بطلقه على هواة توفيق راسين فى الحلال

....والى لقاء مع طريقة اخرى


43 بعبر ياشعب:

بنت الصالحين said...

يااهلا يااهلا

ممممممممممممم اعتقد ان ده سوء تفكير
او ممكن يكون نتيجه التفكير الغريبه اللى استوردناها من بره

الزواج ده لازم يكون نتيجه لان الشخص سال عن العيله دى وعرف اخلاقها ومبادئها وبعد كده بيتقدم لهم وفى الفتره دى فى لاما قبول لاما رفض

وطبعا الفتاه بتدرس شخصيته وهو كمان
يعنى الاتنين بيعرفوا كل حاجه اذا كان الانسان ده او الانسانه دى هو /هى اللى هتسعده /يسعدها ولا لا



مش لاقيه ان فيها امتهان للبنت
بالعكس
ده يدل اكتر انها غاليه وانها مش سهله
لازم يروح لاهلهها ويستاذن اصلا قبل اى شئ


بوست رائع ياصرصاره
والموضوع ده بيختلف من شخص للتانى تبع العادات او تبع النشاه

mohand said...

السلام عليكم
ههههههههههههههههههههههههههههههههههههههههههههههههههههههه
عجبتني حتت الصورة دي

عموما انا مع زواج الصالونات اوقات
لانه كتير بينتج عنه حب

ودا عن تجارب ناس

وعموما
الزواج مش بنت بس وشكل بس دي اخلاق ودين
وجمال برضه
وشخصية
تحياتي

مشروع انسان said...

موضوع جميل
نتكلم طيب عن الضع التانى اللى هى بتفكر تتجوز بيه ونشوف انهى فيهم فيه امتهان ليها
للاسف كتير من البنات دلوقتى عن قصد او غير قصد بقوا يسوقوا لنفسهم سواء لنيل الاعجاب من الشباب قولا او نظرا او سواء للزواج
بقول بعض مش كل اكيد طبعا
انا عارف ان حتى من المتبرجات بتبقى بتلبس كده موضة او انها بتحب كده بس
واكيد نعرف نظرة كتير من الشباب لبنات صاحبوهم ومشيوا معاهم بتبقى ازاى وساعة لما يتجوز يقول اتجوز بنت متدينة متعرفش الكلام ده
اقصد ان البنت لما تنخرط بشدة وتصاحب وكده فهى كده بتقلل من نفسها المفروض ان المراة دى كائن جميل صعب المنا يتعب الرجل لينالها ولكن للاسف كثير من قد رخصن فى انفسهن
وتلاقى البنات فى كل مكان مع كل انواع الشباب انا شايف اللى تستنى حد يجيلها لحد عندها هو اللى ييجى وهو اللى يدور وهو اللى يتعب لغاية ما ينولها ان ده مش اهدار لكرامتها الاهدار بجد ان هى تدور على عريس او على الاقل تبقى صاحبت ده وده وممكن تعجب ده ومتعجبش ده وده يحبها يومين ويسبها وده يلعب بيها وده يكون استنزف كل مشاعرها ويا عالم هيقدر يتجوزها ولا لا

خمسة فضفضة said...

السلام عليكم ورحمة الله وبركاته

بصي يا صرصارتي الموضوع ده كبير والكلام فيه ما بيخلص

زواج الصالونات الناس واخده عنه فكره غلط جدا وده اللي رسخته في العقول مشاهد السنيما المصريه والافلام الابيض واسود بتاع ماري منيب وهي قاعده تشد في شعر لبني عبد العزيز
بس عن تجارب لا حصر لها وناس شفتهم وانا اولهم زواج الصالونات من انجح مايكون وهو ده اللي المفروض شرعا
مش الاول الاتنين يمشولهم 3 اربع شهور مع بعض وبعدين لو عجبوا بعض يبقي يتقدملها
طب افرضي انهم ما عجبوش بعض ؟؟؟؟

رفقة عمر said...

شوفى
من اللى شوفته لاقيت انجح الزواج زواج الصالونات وربنا بيقذف الحب فى قلوب الطرفين علشان الاتنين ابتدوا بدايه صح
لانه بيكون هناك توافق اجتماعى ودينى ومالى وعمرى كمان فعلشان كدة بيكون ناجح
وشوفت كمان الزواج عن طريق معرفه مسبقه للاسف لاما طلاق لاما مشاكل مستمرة
لان بتكون نظره سطحيه واحيانا كتير مش بيكون هناك اى توافق بين الطرفين
وفى الاخر كل شئ قسمه ونصيب

كراكيب عادل said...

طول عمري بقول علي تلات حجات علي حسب النية

يعني الانسان ينوي وربنا بيسهل للانسان

بناء بيت والزواج والحج

ربنا يكرم كل حد ناوي علي حاجة من التلاتة

عصفور المدينة said...

السلام عليكم بصي يا أستاذة سارة أنا قرأت التدوينة دي أول واحد وماكانش فيه تعليقات أما وقد ألمحت إلى العتاب أنني لم أعلق وذلك بقدومك برجليك إلى بلاعتنا المجاورة فأنا جيت أعلق
متشجعا بالست تعليقات اللي قبلي

طبعا موضوع الزواج حاليا وخاصة من وجهة نظر الفتيات أصبح فيه قدر من التأثر بالدراما مش واقعية خلينا نسميها رومانسية ولو اتكلمنا على الحالة الخاصة اللي معانا دلوقت نقول لها اعتبري يا ستي إن هو العريس هو اللي انت حتتفرجي عليه مش هو اللي جاي يتفرج عليكي بدليل إنه أكيد ماجاش كدة ما هو أكيد سامع أو شايف وراغب من الأصل وبناء على معايير ومميزات موجودة فيك ليه تبصوا لها بالاصطمبات
أنا مش سلعة
جواز الصالونات
يوفق راسين في الحلال

فعلا هي مش سلعة ولا هو مشتري هو راغب في بناء أسرة وهي لو متزنة يبقى عندها الغريزة دي صاحية وموجودة أقصد طبعا غريزة الأسرية ودي أعلى بكثير من أي غريزة أخرى بدليل إن الناس بتضحي بكافة الغرائز عشان الغريزة دي أقصد الناس الأسوياء

هي مش سلعة ولا هو مشتري والصالون ده مش الكرسي اللي هي قاعدة عليه حيتجوز الكرسي اللي قاعد عليه ولا هي راس غنم وهو راس غنم هما إنسانين بيجتمعوا في مكان مبارك بمباركة أسرتيهما كان ممكن يجتمعوا في مكان آخر وتكون النتائج نتائج أخرى
أما نتيجة هذا الاجتماع إما إتمام الزواج أو حنرد عليك بالتليفون سيب الأبليكيشن بتاعك مع السكرتارية ولا يتم الاتصال يا عيني
:)

فأعتقد فرصة الاجتماع بهذه الطريقة هي فرصة مريحة للضمير تكفل الدراسة المتأنية بعيدا عن روح المغامرة التي تكون في الأنواع الأخرى والتي غالبا يكون التسرع عنصر فيها

ويا بخت من وفق إنسانين بلاش راسين
في الحلال

موجة said...

عقبالك لما تمري بطابور العرض ده
انا باستفزك علشان اعرف رايك
لحظي يا انسة انك ما كتبتيش رايك و فضلتي تقولي راي بنت خالتك و بس
عايز اسمع رايك
و اشوفك في مدونتي المتواضعة
تحياتي

WhatEver?!!! said...

بصراحة مش عارفة اقول اية فى الموضوع دة اصل انا لسة بدرىىىىىىىىىى اوى على ميعاد العرض بتاعى

بس اعتقد ان بنت خالتك عندها حق
صعبة شوية انك تعرضى نفسك على امل القبول

واكيد ساعتها مش بتتصرفى زى اى وقت تانى
يعنى مش على طبيعتك اوى يعنى

اعتقد لما بيكون فى سابق معرفة بتبقى احسن على الاقل بيكونوا عرفوا بعض

šσяšαяαα said...

عاشقه الفردوس:

ياهلا بيكى
ايوة هى حلوة اوى اصلا اللى قلتيها دى
وانا اعرف ياختى ايه دا
هو حد لاقى فى الزمن دا
دا حتى السوق شاحح خالص:)))
:::::::::::::::::::::::::::::::::::::::::

mohand:

ياسلام ايه ربى الحكم دى
فكرتنى بالاعلان اللى بيقول
الراجل مش بس بكلمته
هههههههههههههه

تحياتى

šσяšαяαα said...

تصدق فعلا كل الكلام دا تماااام جدا جدا
والحمدلله كل اللى دخل بيتكلم فى السياق دا برضو
خلاص كدا حرقتولى الطريقة التانية اللى كنت هتكلم عنها
عااااااااااااااااااااااااا
بس بعيدا عن ال عاااااااااااااااااااا دى
كلام حضرتك مفيهوش اى جدال

تحياتى
::::::::::::::::::::::::::::::::::::::::

خمسة فضفضة:

وعليكم السلااااااااام ورحمة الله وبركاته

ايوة فعلا هو موضوع كبير كبير يعنى انا عارفه
وهو كله مالسيما والبلاوى اللى بناخدها مالسيما والتذاكر اللى بنقطعها عشان خاطر السيما

ههههههه وحلوة اوى يمشولهم تلات اربع شهور دى
فكرتينى بعبد الحليم لما مشى على الاشواك:)))

ولو معجبوش بعض يبفى صباح الخير ياجارى
انت فحالك وانا هابحث مع الشرطة عن شخصون اخر:D

šσяšαяαα said...

رفقة عمر:

ايه ياجماعة دا زواج الصالونات دا طلع ليه شعبيه جامدة اوى ياجدعااان

والله يافرقة كلامك سليم وتمام وبرضو كنت هقوله فى الجزء التانى
عاااااااااااااااااااااااااااااا
ياللا ماعلينا هاقتبسه منكم بقى لما اجى اكتبه

وفعلا كل شىء قسمه ونصيب
واكيد النصيب اللى يكون ربنا راضى عنه

:::::::::::::::::::::::::::::::::::::::::::::::::::::::

كراكيب عادل:

اللهم آآآآميييييييين
وشكراااا على مرور حضرتك.. نورتنى

šσяšαяαα said...

عصفور المدينة:

وعليكم السلاااااام ورحمة الله
الاب الروحى استاذنا عصفور
انا يشرفنى ان حضرتك اول واحد يطلع على التدوينة دى
مع انى مش واخدة بالى برضو من حكاية العتاب دى.. ساعات الفصحى بتخللى عقلى ياخد شويتين تلاته على مايستوعب:))

بس عموما انا بيشرفنى زيارة حضرتك الدائمة لمدونتى المتواضعة
والاهتمام بالتعليق على تدويناتى المتواضعة برضو:))

بالنسبة بقى للصالونات والسلع الاستهلاكية
وفعلا زى ماحضرتك بتقول احنا قلنالها برضو الكلام دا وانك كمان هتتفرجى عليه
بس نقول ايه بقى لنشوفية الدماغ

المشكلة هنا انها مش عاوزة تغير رأيها عن طريقة الجواز دى
وبرضو مش بتفكر فحكاية التعرف على واحد الاول والكلام دا
هى عاوزة واحد يشوفها الاول وييجى على اساس انه شافها واتعرفو على بعض
لكن مش واحد جاى ولاعمره شافها ولايعرف عنهم حاجة غير كلام قالته اللى عاوزة توفق الراسين فى الحلال
خلليها راسين المرادى:)

وجميلة اوى حكاية الابليكيشن دى :))

:::::::::::::::::::::::::::::::::::::::::::::::::::::

موجة:

وليه بس الاذية دى
ههههههههههههههههههه
بس برضو ماعرفتش تستفزنى لانى لسا ماكملتش الموضوع
ان شاء الله فى الجزء القادم ان لم يكن الاخير هتعرفو رأيى ايه

وسعيدة لمرور حضرتك واتمنى تكرار الزيارة

šσяšαяαα said...

WhatEver?!!!

حلو اوى العرض اللى قلتيها دى
محسسانى اننا فطابور عرض فى الجيش:))

وبالنسبة لباقى التعليق
ممممممممممممممم

ماشى الحال برضو بس سايف المعرفة مايطلش لتلات اربع شهور على رأى فضفوضة

تحياتى

صاحب المضيفة said...

كلام واقعي جدا وطبيعي

لكن ليه بناخد الموضوع كده بحساسية

انا باتكلم من وجهة نظر الراجل طبعا

زي ما البنت بتكون مرتبكة

الرولد بيكون مرتبك برضو

طبعا أنا باتكلم على الراجل الطبيعي مش اللنماذج اللي بنشوفها في الشوارع اليومين دول

مردونة جميلة ورايقة

دمت بكل الود

الطائر الحزين said...

الأمر بين خيارين

خيار شرعى
وخيار يخضع للعادات والتقاليد

الاول يعضدة اوامر الله ونواهية
والثانية يعضدة ثقافة المسلسلات والافلام


اساليها و نرى أيهما تختار


تحياتى

ضـوء الـقـمر said...

اولا كده ازيك يا صرصارة وحشاني والله ربنا ينفخ في صورة النت عندي ويتعدل :@
ثانيا بوست جميل جدا بيناقش مشكلة او زي ماتقولي كده ظاهرة في المجتمع ..معظم البنات دلوقتي بترفض تتجوز بالطريقه دي وتقولك لا لازم اكون اعرف ويعرفني ونشوف طباعنا متوافقه ولا لا .. اومال فترة الخطوبة عملوها لييييه ؟معتقدش انها عياقه مثلا عشان تلبس دبله في ايدها اليمين وخلاص :D
وبعدين اللي بيجي يشوف عروسة ده اكيد بيجي على السمعه الطيبه والسيرة الحلوة يعني بردو مش جي من فراغ
وبعدين مش جايز والله اعلم يكون هو سي فارس اللي بتدور عليه ؟
اه .. على فكرة الصورة حلوة اوي :D

ToOoKa said...

السلام عليكم ورحمة الله وبركاته

لو كورفرتينا على العريس انا موااااافقه (*_*)
معرفش ليه افتكرت الاعلان دا ما علينا

موضوع كنت لسه بفكر فيه من قريب
انا طبعا مع جواز الصالونات بالرغم انو الصراحه بيكون محرج جدا وفعلا الواحد بيكون مرتبك
بس بيبين حسن النيه من اولها
والصراحه انا بحس انو تكريم للمرأه انو العرسان هما اللى يروحولها ويقدمو طلب واحنا نقول فوت علينا بكره
هههههههههه
لا طبعا بهزر
فى مقوله بتقول كتيرا ما ينتج عن الجواز حب وقليلا ما ينتج عن الحب جواز
وعن تجارب كتير لصحباتى وناس حواليا جواز الصالونات بيكون انجح لانو على اساس ومعرفه للاهل وكمان لان الجواز بيتبنى على الصراحه والوضوح مش هزار
واعتقد انو الاعلام هو السبب انو كل فتاة بتحلم انها تعيش قصة حب
بس انا عاوزه اقول انو مافيش حب وانتى مش محافظه على كرامتك يعنى فاقد الشىء لا يعطيه لازم تحبى نفسك الاول وتحميها من انو حد يتسلا بيها علشان تتحبى الحب الحقيقى

معرفش دا رأى

نفسى بس الناس او الاهل يسهلو الجواز ومش يعقدوه لانو سعات بجد بيكون فى ولاد جاده فى الحب بس للاسف اهل البنت بيطلعو عين الواد

الناس صعبت الحلال وسهلت الحرام
ربنا يسترها معانا
فى انتظار رأيك
احلا سلام لاحلا ساره

موجة said...

شاكر طبعا زيارتك لمدونتي
و متفق معاكي في كون الحزن هو اللي المفروض يكون في القلب
اما عن موضوع الدموع و تطهير العين
فيكفي في واقع الحال لامؤاخذة بصلة .. للقيام بالمهمة دي بدل أن تكون الدموع في واقعها فيضان الحزن
انتي خيبتي املي
كنت فاكر اني حاسمع رايك انتي في موضوع بنت خالتك ده هل انتي متفقة مع زواج الصالونات و لا لا
ماليش دعوة بقى
ههههههههههههههه
تحياتي

موجة said...

ممكن اعرف كمان المقصود بعبارة بلاعة الحكومة
هل هي دعوة للصبر موجهة الى الشعب الجائع ههههههههههههه

Tamer Nabil Moussa said...

انا معاكى ان احساس الانسان انة بقى مجرد بضاعة للعرض احساس صعب ومؤلم


لكن لماذا ناخذ الامور وننظر اليها من منظار اسود معتم


اغلبية الجواز الناجح بيكون عن طريق ما يسمى بالصالون



انا معاكى لو حصل مقابلة بدون معرفة الغرض كان الامر هيبقى عادى

طيب البنت خايفة ترفض

والولد نقول خايف يترفض

واحنا فى زمن اصبح البعض لايستطيع التعرف على نصة التانى او غير موجود فى محيط العمل

ماذا نفعل نجلس ونضع ايدنا على خدنا ونقول ياميلت بختنا

ولانحكم العقل
انا شايف ان الموضوع المفروض ان ننظر لة نظرة تانية

يعنى لو حضر شاب وشاف البنت وقال مش عجبانى او العكس

دة لايقلل من البنت او الشاب فى حالة الرفض

لان القبول دة بتاع ربنا وكل انسان لة كمياء معينة لاتركب الا على شبيها

ياريت نخد الامور ببساطة

وطبعا مع جواز نابع من التعارف المباشر بين البنت والشاب لكن اذا لم يتتواجد

لامانع من جواز الصالون

اشكرك جداا على الاجابة على استفسارى

ربنا يوفقك ويكرمك.

تحياتى

šσяšαяαα said...

صاحب المضيفة:

اكيد طبعا الراجل كمان بيكون محرج من الموقف
هو مش بنى ادم برضو واللا ايه:)

وربنا يهدى النماذج اللى بنشوفها اليومين دول

وشكرا لمجاملتك ودايما منورنى

::::::::::::::::::::::::::::::::::::::::::::::::

الطائر الحزين:

حضرتك على الرغم انك واضع خيارين
لكن باعتقادى مفيش مجال للاختيار:)

دا شىء واضح ومش محتاج تفكير
لكن عموما نسألها.. احنا فبلد ديمقراطى:)

تحياتى ودمت بألف خير

šσяšαяαα said...

ضـوء الـقـمر:

اهلييييييين قموووورتى وانتى كمان وحشااااااانى جدااااااااا
وان شاء الله النت عندك يبقى زى الحصان.. لا حصان ايه يبقى زى الصاروووخ:)

ايييييييييوة هى الدبلة دى ياختى اللى مدوبة قلوب البنات:DD

وكلامك كله تمااام جداااا .. بس مافتكرش انه سى فارس لانه اترفض من قبل ماتشوفه:)

ميرسى ياجميلة اتفضلى الصورة والبلاعة كلها كمان :)

:::::::::::::::::::::::::::::::::::::::::::::

ToOoKa:

وعليكم السلااااااااااام ورحمة الله وبركاته

يبقى هيتجوز ونهييييييييييص:DD

اه فعلا ماجاش على بالى الاعلان دا ازاى:)

وزى مابتقولى: اللى عايزنى يجيلى انا مابرحش لحد:))

وبصراحة ياجماعة انتو كدا ماخليتوش حاجة هكتبها من دماغى البوست الجاى
ماشاء الله مظبطين كل واحد بيقول نقطة ماللى عاوزة اناقشها
ربنا يكرمكم:))

بس دا طبعا شىء يسعدنى على اى حال

وانا مش بتكلم فنقطة بعد الزيارة والموافقة لان اجراءات تطليع العين معروفة للجميع:))

وجميلة اوى الجملة اللى قلتيها.. واقعية ومؤلمة
الناس صعبت الحلال وسهلت الحرام

وربنا فعلا يسترها معانا
سلااااااام يااحلى توكاااااا

šσяšαяαα said...

موجة:

عفوا يافندم دى حاجة بسيطة:))

والبصلة دى استنى بقى هكمل الرد واجى عندك

طبعا على ماتييجى تقرا ردى هنا هكون كتبت عندك اساسا:)) لكن بطبيعة الزمن الذى اكتب فيه دلوقت:))

وبعدين فى الناس اللى معندهاش صبر دى

الصبر
الصبر
الصبر

مفتاح تلاتين:DD

وبالنسبة بقى لعنوان مدونتى
فقط لمجرد التنويه ان ظلم الانسان لاخيه الصرصار بيقابله حنية حكومية وتوفير بلاعات للوقاية من غدر بنى ادم
وبس كدا
شكلك عاوز تودينا فداهية:))

:::::::::::::::::::::::::::::::::::::::::::::::

Tamer Nabil:

ايوة بصراحة هو احساس صعب شوية

ياجماعة انا بقول يمكن العقدة فكلمة صالونات
مانخلليها انتريه عالاقل اشيك:).. احسن صالون دا بيفكرنى بحلاق الصحة:DD

وعلى رأيك فعلا انا بحس ان الناس تايهة ومش عارف توصل للنص التانى اللى تلاقيه فى الصفات اللى بيتمنوها
بجد بيصعبوا عليا.. ربنا يهدى الجميع لكل الخير يااارب

وفعلا ممكن نعتبر الموضوع زى ناس بتتناقش فى اجتماع وممكن تترفض العروض اللى فيه او تتقبل
ودا مش هايقلل من موقف الشركة فى السوق:))

هو ايه اللى انا بقوله دا
يمكن ثقافتى التجارية خرطت على دماغى:DD

والعفو ياسيدى دا اقل واجب.. وربنا يكرمك ويوفقك لكل خير

تحياتى

همسات دافئه said...

طيب
بصى ياجميل
أولا هو موقف منيل وانتى قاعده عشان الناس تتفرج عليكى انا مع الأخت ده فى كده جدا
بس احيانا مش بيكون فى فرصه فى الجامعه أو فى الشغل او لو وجدت هايكون مش مناسب مستوى اجتماعى اقل مادى ضايع وحاجات كده
لكن عن طريق القنطره ذى ما بتقولى بيكون جايبين واحد الى حد ما مناسب فى ظروفه ومعروفه أخلاقه وأسرته
وكتير بيحصل قبول وبيطور بحب فحياه سعيده
بصراحه انا رغم كل الكلام الى البنت قالتهولك ده والى عندها حقك فى كتير منه انا مع جواز الصالونات

فرنسا هانم said...

دوختينى يا صرصاره
خالتك متجبسه وتعبانه وسايقه العجله بايد واحده من الصبح وعماله الف على البلاعات
مش لاياكى
كل بلاعه عليها الامن بتاعها ويقولولى مفيش عندنا صراصير بتدون
انجرى يا ست من هنا لنعملك محضر تحرش
وبعد ما تعبت
ولاد الحلال اخدونى لمدونتك الجميله الظريف دى بعيدا عن البلاعات وزحمتها
وسلام
اه
كنت هنسى

اصعب موقف فى حيا البنت لما تحس انها مانيكان يمكن رفضه او الموافقه عليه
وللاسف الشديد 70 فى الميه من بناتنا يتعرضون لهذا الموقف

Ma 3lina said...

بصى يا صرصورة انا لا مع و لا ضد زواج الصالونات

هوا زى اى حاجة فى الدنيا ممكن يبقى مشروع كويس و فعلا الاتنين يتشدوا لبعض و ممكن لا

و فى الاخر البنت ليها حق الاعتراض لو مش موافقة

يعنى الاتنين بيتفرجوا على بعض و بيدرسوا بعض مش بس الراجل هوا اللى بيتفرج هههه

الصورة مسخرة على فكرة

و ماا علينا

أمـ الله ـة said...

وَمَن يَتَّقِ اللَّهَ يَجْعَل لَّهُ مَخْرَجًاوَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا


أختى ŞoŖśậŖấầ
احب أوجه كلامى لصاحبة القصة ولكل من تنظر إلى الأمر بهذه الصورة

أين تقوى الله ؟؟ وأين التوكل عليه ؟؟


أولا هى رفضة أنها تكون للفرجة مع احتمال للرفض او القبول مع أن فى الحقيقة دى مش فرجة دى رؤية شريعة أحلها الله تبارك وتعالى وأمر بها رسوله صلى الله عليه وسلم

عن المغيرة بن شعبة قال أتيت النبي صلى الله عليه وسلم فذكرت له امرأة أخطبها فقال اذهب فانظر إليها فإنه أجدر أن يؤدم بينكما فأتيت امرأة من الأنصار فخطبتها إلى أبويها وأخبرتهما بقول النبي صلى الله عليه وسلم فكأنهما كرها ذلك قال فسمعت ذلك المرأة وهي في خدرها فقالت إن كان رسول الله صلى الله عليه وسلم أمرك أن تنظر فانظر

هل قارنتى أختى حالك بهذه المرأة الأنصارية ؟؟ استجابت على الفور عندما علمت أن رسول الله صلى الله عليه وسلم أمره بأن ينظر إليها .. وهذاإن يدل فيدل على صدق الإيمان والإستسلام الكامل لأوامر الله ورسوله

ثانياً هى وافقت على الحرام وهو ان ينظر إليها بدون إذن محارمها وفى مكان اختلط فيه الرجال الأجانب بالنساء الأجانب ورفضت منزلها الذى هو استر إليها من أعين الآخرين فربما فى ذلك المكان الذى تريده ينظر إليها مئات الرجال غيره وبذلك تتحمل وزرهم جميعاً وهى لا تدرى

اما عن رأيها فى أنها تريد زوج يتقدم لخبطها من أجلها فقط لا غير

فهى بذلك قد وقعت فى مخالفات كثيرة جدا جدا جدا

منها أنهاخالفت حديث رسول الله صلى الله عليه وسلم تنكح المرأة لاربع لمالها ولحسبها ولجمالها ولدينها فاظفر بذات الدين تربت يداك

عدد رسول الله صلى الله عليه وسلم أربع أسباب تنكح المراة من أجلهم وليس لذاتها فقط

ومنها أنها بذلك تكون قد رخصت من قيمة أهلها فهى لاترغب بان يأتى الزوج لمجرد الانتساب لهذه العائلة فهى ترى ان لا كرامه لها فى ذلك

ومنها أنها تريد أن تفتح لنفسها المجال للتقرب من أشخاص أجانب للتتعرف عليهم وتألفهم وتعتاد عليهم فإذا تقدم لخطبتها أحد تبادر بالموافقة .. وهذا ما لا يرضاه ديننا


أختى ŞoŖśậŖấầ
اعتذر لكِ فقد أطلت الحديث ولكن أحييك على طرح هذا الاعتقاد السائغ لدى كثير من الفتيات المسلمات

اسال الله لنا ولهم الهداية والثبات

بوركتِ أختى وسلمت من كل سوء

ابو صهيب ( الجمعاوي الاصيل)سابقاً said...

السلام عليكم ورحمة الله وبركاته

اختي الفاضلة

ان هذا الموضوع قد قتل بحثاً

وانا رأي الشخصي

ان الزواج هو مشروع صناعة بيت

ولكل منا اتبع الاسلوب الصحيح

في الزواج

لاختلف هذا المنظور للزواج

ولو اتبعنا وصية النبي صلي الله عليه

وسلم

فقال للبنات

اذ جاءكم من تردون دينه وخلقه فزوجوه

وقال للرجال

فاظفر بذات الدين تربت يداك

ويقول الله تعالى

وأخذن منكم ميثاقا غليظا

فالزواج مشروع مستقبلي لابد من حسن

الاختيار كي يكون بيتسعيد

واتفق مع حضرتك في كل ما تقولينه

وكل مايحدث الان وذلك لاننا بعدنا

عن هذه الوصية النبوية

واخذنا نبحث عن اشياء اخرى في شريك

العمر

بارك الله فيك

وانتظر الزيارة لمعرفة

اين الجيش العربي

ميخا

l0ma said...

انا طبعا مع صديقتك فكرة جواز الصلونات دى فكرة فاشلة عاملة كدة زى البطيخة يا قرعة يا حمرة لالالا مش الطاحونة البطييييخة
انا من راى ان احسن زيجة لما يكونوا الاتنين عندهم فكرة عن بعض وطريقة تفكير بعض يعنى يكونوا قاريين دماغ بعض من الاخر انما الصلونات دى بتهيئلى بطلت من زمان

موجة said...

حلوة قوي حكاية زائد على الدنيا دي
بالنسبة للبصل دا انا قعدت كتير مغترب ايام الكلية و ياما قشرت بصل هههههههه
بس لازلت عندي رايي عايز اعرف رايك انتي في موضوع زواج الصالونات
و انا صابر
الصبر
الصبر
الصبر
مفتاح ثلاثين ههههههههههههه
تحياتي

mesh2dra said...

السلام عليكم

اممممممممم
اقول رأيي
بصراحة مش عارفة
بس انا مع بنت خالتك في جزء انها مش سلعة
يعني فعلا لو ماعجبتوش
حيبقى المنظر ايه
سيبك من منظرها ادامه ... منظرها أدام نفسها والناس اللي حواليها

حصل قبل كده موقف
وكانت والدتي طرف واقترحت ساعتها ان الشخص المتقدم للبنت انه يروحلها الشغل ويتعرف عليها من على بعد
ساعتها انا اعترضت وقلتلهم حرام عليكم يعني البنت تبقى تحت المراقبة والكل متآمر وعارف وهى آخر من يعلم

فعلا محتارة
بصي عشان مانحيرش نفسنا كتير
افضل حاجة
واحسن حاجة
والطف حاجة
ان
الواحد
...
..
..
..
ميتجوزش :D

********

واااااو
وطلعتي كمان بتحبي اسكندرية
احنا كده اصحاب :)

سلاماتي ليكي ولمدونتك اللذيذة اوووى

عروس البحر said...

تتشرف اسرة يالانفضحهم
بدعوة سيادتكم لافتتاح مقرها بالاسكندرية
مركز ضحايا
للاستشارات القانونية والتأهيل النفسى

محاضرة بعنوان مبادىء واساسيات حقوق الانسان

وورشه عمل لتقسيم فريق الاسكندرية وذلك يوم الجمعة اوافق 14/12/2007 فى تمام الساعة الواحدة ظهرا

العنوان :- 9ش مسجد الايمان متفرع من شارع اسكندر ابراهيم خلف جزارة الزهيرى - ميامى - الاسكندرية
ت:- 5484897 - 0166885063

حقوق الضباط الإحتياط said...

ازيك يا سارو عامله ايه؟
بقالى فتره مسمعتش عنك, يمكن انا اللى مختفى بقى
ياستى عندى رايي اتقال كتير بس اهو ميضرش لما ازود شوية
الى الاخت صاحبه القصه وقريبة سارة : ليه يا بنت الحلال شايفه الموضوع بضاعه وشكل يعجب وشكل ميعجبش!!! تعرفى ايه الفارق بين مقابلة الصالون ومقابلة النادى؟؟ الفارق انك مش عارفه, بس وانتى مش عارفه فى النادى هتكونى محل تفتيش من العريس وتدقيق الخ الخ,, بس فى البيت بقى انتى هتبقى عارفه وبتفتشى فيه يمين وشمال وبرضه عندك حق الفيتو وهو الرفض باى حجة مثلا زى انه شكله مش حلو ( اه والله انتى كمان تقدرى ترفضى علشان اى سبب) يعنى عندك جبروت اهو ياستى
من ناحيه تانيه هقولك حاجة : ليه ميكنش العريس شخص ملوش تجارب سابقه او معندوش رغبه او معندوش مقدرة يتعرف على بنت وبعدين يتقدم لها, وبالتالى قرر يتجوز عن طريق الصالون (صالون موديل فرنساوى ولا هندى بقى)
المهم ليه نتهم الشاب دا انه بيدور على شكل بس؟؟ ليه ميكنش قعدته الاولانية دى هيدرسك كويس قوى ثقافيا واجتماعيا ودينيا وفى الاخر شكلك الخارجى, ليه الراجل متهم انه بيسعى للست امينه مش بيسعى ل..مى زياده ولا تاتشر ولا حتى هند عاكف!!!
ياانسه ( قريبة سارة) يا انسه ( اى بنت) يا مدام ( اى ام( ريحونا من الدماغ المقفلة واللى عايزين شغل تلات سنين فى عقلهم علشان نقنعهم ان الدنيا بسيطه مش معقدة
كفايه كده احسن لو اتكلمت ممكن اعمل كتاب والفراغ وحش
يالا سلام عليكم

Unknown said...

الله مقولتيش ايه اللى حصل بعد كدة والعريس وافق عليها ولا لأ

بصراحة يا صورصارة ياختى صالونات مش صالونات اهوه كله برتقال ههههههه

المهم انتى عاملة ايه .. وحشانى اويييييي

رئيس جمهوريه نفسى said...

اول مره ادخل البلاعه اسف قصدى المدونه وبعد لف ودوران بسم الله ما شاء الله كتباتك مميزه ودمها خفيف
موضوع جواز الصالونات كاشاب مصرى احب اقولك ابناء ادم بيلجو ليه للطريقه دى بصى يا ستى علشان احنا مجتمع ذكورى يحمل الكثير من سمات الشرقيه المتخلفه الشباب بيابى انه يتجوز واحده عرفها او خرج معاها ليه علشان بتكون فى نظر الاخ مش محترمه وطبع كل المعروض فى الشغل او الجامعه او النادى بتخرج مع اصدقاءها فبالتالى مش حينفع يرتبط بيها
بيسمع كلام اى قنطره عن اى بنت ماشيه على العجين رغم انى المسكين مش عارف حاجه عن البنت ولا خاروجتها كانت ازى يبقا يرتبط بنت قرب منها وعرفها ووثق فيها ولا لسه جواز صالونات ويجرب بقاء
بصراحه بحى بنت خالتك على تفكيرها

smraa alnil said...

انا عن نفسي بصراحة معاها

لاني ضد الفكرة دي
جايز غيري ينتقدني بس انا مش عايزاها
ومش بحبها

جايز عشان كل اللي اتقدمولي قبل كدة فعلا حسوني اني فاترنة عرض

والحمد لله اتخطبت بالطريقة اللي تريحني

وبيني وبينك بقي في الاخر
صالونات مش صالونات وقت ما ربك يريد
هتمشي باي طريقة والسلام

šσяšαяαα said...

همسات دافئه:

والله حاجة تحير بقى انا مش عارفه بصراحة ماذا افعل
بس عموما ادى صوت كمان مع جواز الانتريهات..قصدى الصالونات:))
نورتينى وان شاء الله تنورينى تانى
سلاااااااام
::::::::::::::::::::::::::::::::::::::::::::::

فرنسا هانم:

سلااااااااامتك من الدوخة فرنسا هانم
وانا اقول ياخوانا البلاعة منورة كدا ليه
المهم حمدلله على سلامتك
والموقف فعلا بيكون صعب بس افتكر على الطرفين مش البنت بس
ياللا ربنا ييسر الحال لكل البشر

نورتينى بجد وتعالى تااانى

šσяšαяαα said...

Ma -3lina:

مااااااااا علينااااااااااااااااا
وحشااانى جدااااا وفرحانة اوى بزيارتك دى

فعلا احنا فى بلد حرية التعبير وابداء الرأى
بس افتكر انه لسا فيه شوية تعصب من ناحية الاهل
مش موضوعنا وعلى رأيك ماهما الاتنين بيتفرجوا:))

واتفضلى الصورة ماتغلاش عليكى:)
::::::::::::::::::::::::::::::::::::::::::::::::

أمـ الله ـة:

اختى امة الله
مش عارفه اقلك ايه على الكلام الرائع دا وانا فعلا قلتلها انها النظرة دى من حقه ومفيهاش اى حاجة تجرحها
واتمنى انها تقرأ تعليقك دا وتاخد بيه
وجزاك الله كل خير
اتمنى تنورينى دايما

šσяšαяαα said...

الجمعاوي الاصيل:

وعليكم السلاااااااام ورحمة الله وبركاته

اه هو فعلا الموضوع دا الناس طهقت من الكلام فيه
بس انا قلت برضو اشمعنى الناس تتكلم عنه وانا لا:))

وفعلا لو كل حاجة فى حياتنا رجعنا فيها لتعاليم الدين واللى الرسول صلى الله عليه وسلم نصحنا بيه كان زماننا بنينا بيوت سعيدة وامم اسعد

تحياتى ليك وان شاء الله ازور مدونتك واتشرف بيها
::::::::::::::::::::::::::::::::::::::::::::::

l0ma:

ايييييييه التعليق الجااامد دا
دا قريبتى هتفرح بيكى اوى
وبصى هو مش موضوع موضة وبطلت لانى اعتقد انها عادة مصرية قديمة
هى بس الخاطبة اللى اتغيرت وبقى بدالها القنطرة:))

نورتينى وكررى الزياااارة
::::::::::::::::::::::::::::::::::::::::::::::

موجة:

هههههههه اه انت بتاخد بالمثل يعنى زى مانا علقت عاللى كاتبه عندك
اووووكى هكبر عقلى

اه والصبر فعلا مفتاح تلاتين
خلليك صابر ياعم... موجة

تحياتى

šσяšαяαα said...

mesh2dra:

وعليكم السلاااااام ورحمة الله وبركاته

اتفضلى نورينى وقولى رأيك طبعاااا

وكويس والله تقريبا تانى صوت واقف مع قريبتى

دى حاجة مشجعة جدااا.. ودليل فعلا ان الجواز دا

وجع دمااااااااااااغ:)))

وانا اكون سعيدة لو بقينا اصحاب
طالما سيجمعنا حب اليكسسس:))

سلااااااام ياعسولى
:::::::::::::::::::::::::::::::::::::::::::::::::::

عروس البحر:

لو اسكندرانى كنتى هتلاقينى اول واحدة حضرت
ياللا مفيش نصيب:((
لا طايلة مصر ولا اليكس:(

šσяšαяαα said...

ورقة لكل عصر:

اهلييييين انت اللى اخبارك ايه؟

انما ايييه الكلااااااام الجاااااامد دا
فعلا عاوز كتاب وانت ضفت نقطة انه ممكن الشاب فعلا من النوع اللى على نياته وماشى فى الحيط مش جنبه بس
وفعلا بتكون الطريقة دى هى انسب طريقة يرتبط بيها

نورتنى وماتغيبش تانى
اه حلوة سارو دى.. هضيفها لقائمة ألقابى:))

سلااااااااااام
::::::::::::::::::::::::::::::::::::::::::::::::::::::

إنـســـانـة:

يابنتى انا كتبت فتعليق انها كانت رفضاه اساسا من قبل ماتشوفه
ناس عندها مبدأ بقى نعمل ايه:)

وفعلا كله برتقال ياسكرى:)

نورتينى ووحشتينى جداااا وبجد اسفه انى مقصرة

تحيااااتى ليكى

šσяšαяαα said...

رئيس جمهوريه نفسى:

نورت البلاعة يافندم.. وشكرا على هذه المجاملة
وااااادى صوت كماااان لبنت خالتى
لا دا كدا مش هنعرف نكلمها تانى:))

وكويس ان حضرتك اضفت نقطة المجتمع الذكورى دى
كدا فعلا كل اللى شاركونى ماسابوليش حاجة جديدة هكتبها فى البوست الجاى
الحمدلله:))

عموما حضرتك نورت واتمنى تكرار الزيارة
:::::::::::::::::::::::::::::::::::::::::::::::::::::::::

smraa alnil:

سموووووووورة
مفاجأة البوست بجد.. فرحااانة اوى لمرورك عندى
فينك من زماااااااااااااااااااااان
وكمان مع رأى قريبتى.. كدا الحزب دا هايقوى اوى:))

والحمدلله ياجميلة ان ربنا وفقك للطريقة اللى تتمنيها
وربنا يتمملك على خير يااااارب

وفعلا وقت ماربنا يريد

تحياتى ليكى