Sunday, November 25, 2007

عيش اسكندرية


انا عارفه ان محدش مالمدونين ماكتبش عن ساحرة القلوب وعروس البحار اليكسسس
بس انا المرادى ناوية اكتب عنها بشكل مختلف الجوانب والاركان والحيطان والستاير وكافة شىء
واوعدكم ايها الشعب الحبيب.. قصدى ايها المدونين الاعزاء بهذا الكلام
انا امبارح كنت فى المكتبه.. مش عارفه انا الروعة والجمال دا يبقى اسمه مكتبه بس.. مافيش اسم احلى

BIBLIOTHECA ALEXANDRINA


هناك نظام..نظافة..أمن مستتب..سياح على كل لون.. كاميرات ديجيتال على احدث طراز.. تصوير على ودنه
بصراحة الاماكن هناك ماينفعش تسيبها كدا من غير ماتخدلها صورتين تلاته عشرين
انا عن نفسى اخدتلها..وفآخر البوست هتلاقو الصور وابقوا قولو شو رأيكم فيها


نرجع تانى للمكتبه بقى من الداخل
محيط من الكتب خلانى اقول حراااام والله اللى بعمله فنفسى دا.. قربت انسى القراية اساسا من كتر مالنت لحس عقلى
المهم بقى هكلمكم عن كتاب الحمدلله مالحقتش اكمله عشان المكتبه كانت هتقفل
وللى حابب يزورها يعنى هى بتقفل الساعة 7 مساءً.. يعنى تشوفولها يوم كدا مخصوص تروحو من اوله


ونرجع للكتاب اللى قريت فيه.. اسمه فن الاتصال اللغوى ووسائل تنميته.. للدكتور محمد دهيم الظفيرى.. واضح انه مش مصرى
بيتكلم فى حدود اللى قريته يعنى عن اللغة وازاى انها اهم طريقة للتواصل بين الناس.. كلغة ناطقة وليست مكتوبة
وازاى ان ممكن اللغة يكون فيها تلاعب كبير فى الالفاظ وتتفهم بشكل عكسى خالص
زى امثلة هكتبهالكم., وعجبتنى جداااااا
اول مثال بيتكلم عن القدرة على تحليل الظواهر.. يعنى فى المثال دا هتلاقو الكلام ظاهره حاجة وأصله حاجة تانية خاااالص
نشوف مع بعض

>

>
يذكر أن امرأة دخلت على هارون الرشيد وعنده جماعة من وجوه أصحابه

فقالت: يأمير المؤمنين, أقر الله عينك وفرحك بما أعطاك, لقد حكمت فقسطت

فقال: من تكونين أيتها المرأة؟ فقالت: من آل برمك, ممن قتلت رجالهم وأخدت أموالهم. فقال: أما الرجال فقد مضى فيهم قضاء الله , وأما المال فمردود إليك. ثم التفت إلى الحاضرين من أصحابه وقال: اتدرون ماقالت هذه المرأة؟
فقالوا: مانراها قالت إلا خيراً, قال ماأظنكم فهمتم ذلك
أما قولها: أقر الله عينك, أى أسكتها عن الحركة.. وإذا سكتت العين عن الحركة عميت
"وأما قولها : وفرحك بما أعطاك, أخدته من قوله تعالى:" حَتَّى إِذَا فَرِحُوا بِمَا أُوتُوا أَخَذْنَاهُم بَغْتَةً
"وأما قولها: حكمت فقسطت, أخذته من قوله تعالى:" وَأَمَّا القَاسِطُونَ فَكَانُوا لِجَهَنَّمَ حَطَباً


***********************************************

المثال التانى عن تفسير الطرف الاخر للرسالة.. يعنى ممكن كتير الواحد يتكلم بحسن نية وتتفهم حاجة تانية خااالص زى اللى حصل مع هذا الرجل


يروى أن أبا حسن على بن الجهم أراد أن يمتدح هارون الرشيد( مش عارفه الراجل دا حكايته ايه بالظبط معانا) فاستأذن الخليفة فأذن الله فقال منشداً بغرض المديح
أنت كالكلب فى حفاظك الود ** وكالتيس فى قراع الخطوب
(جاب لنفسه مصيبه..وعلى رأى مابنقول الملافظ سعد)
فغضب كل من كان فى المجلس منه وأرادو الفتك به, فتدخل الخليفة قائلاً: والله ما أراد الهجاء إنما أراد الثناء علينا فى الشجاعة والوفاء, فهو فى مكان لايرى فيه أشجع من التيس, ولا أوفى من الكلب, فأمر أن يمكث فى قصره مده وأجلسه فى شرفه مطلة على نهرى دجلة والفرات وبعد مدة امره ان ينشد فأسمعه من حسن المديح ماسر الخليفة حيث قال
عيون المها بين الرصافة والجسر ** جلبن الهوى من حيث أدرى ولا أدرى
(اللى فاهم اللى اتقال دا ينوبه ثواب ويقوللى)
:تحديييييييييييييث
بعتذررر جدااا عن هذا الخطأ الغير مقصود.. هى فعلا الهوى مش المها.. انا بس مخدتش بالى وانا براجع البوست
وشكرااا لكل اللى وضحلى النقطة دى

واخر مثال بيتكلم فيه عن استخدام لغة سهلة والإبتعاد عن الالفاظ الغريبة ان امكن حتى ولو كانت فصيحة زى ماهنشوف مع عيسى بن عمر النحوى وهو من علماء النحو فى القرن الثانى الهجرى
انه سقط عن حمار فاجتمع عليه الناس

"فقال :"مالكم تكاكأتم على تكأكؤكم على ذى جنة؟ افرنقعوا عنى
لا بجد كلمتين خارجين من المجمع اللغوى طازة.. بس عجبتنى اوى افرنقعوا دى:))
وللاسف ماكملتش الكتاب بس اكيد ليا لقاء معاه مرة تانية.. يارب تكونو استمتعتم بالفقرة الثقافية دى واسيبكم بقى مع الصور اللى اخدتها للمكان


ماعرفتش اجيب صورة للمكتبه كلها


هنا التمثال ماكنش له مزاج يظهر

دا الطريق اللى قدام المكتبه

دى القبه السماوية

دا مدخل المكتبه من جوه





وطبعا مافاتنيش اخد صورتين وانا ماشية

ممكن الاضاءة مش حلوة اوى لان الكاميرا بتغلس بالليل مش عارفه ليه


26 بعبر ياشعب:

خمسة فضفضة said...

انا اول تعليق اخيرا

احجز مكان وارجعلك يا قمر

خمسة فضفضة said...

السلام عليكم ورحمة الله وبركاته

بصي بقي انا اول ماقريت العنوان قلت بس صرصاره هاتتكلم علي العيش "الخبز يعني " في الاسكندريه وبما ان اليومين دول في ازمه في العيش والدقيق غلي يبقي اكيد هاتحكيلنا عن مغامراتها في افران الاسكندريه ومدي جودة العيش هناك
ههههههههههههه

بس بعد ما قريت لقيتك داخله في الغميق اوي
مكتبة الاسكندريه
وافرنقعوا
وتكأكأتم
وكلام كبير اوي

بصي يا عسوله فيه حكمه بتقول :
لكل مقام مقال
يعني ما ينفعش اقول لعم عبده البواب افرنقع من قدامي
طبعا مش هايفهم حاجه

يبقي الواحدلازم يختار طريقة كلامه واسلوبه علي حسب الموقف اللي هو فيه والناس اللي بيكلمهم علشان يقدر يوصل وجهة نظره وغايته من ورا كلامه ده للشخص المتلقي و ما يحصلش اي لبس من اي نوع

مش كده ولا ايه

تحياتي يا قمر

mohand said...

السلام عليكم

هعتبرني تاني تعليق

بتقوليلنا افرنقعوا يا بنت الليث

بس عموما انا لما بكلم حد بالفصحي بجيب اصعب الالفاظ

متعرفيش بقي رزاله مني ولا ايه


بس معلومات شديده

والصور
بصراحه انتي مفروض تشتغلي مصورة محترفه

بجد والله جميله يا بنتي

تحياتي

بنت الصالحين said...

ههههههههههههههههه
صرصورتى حبيبتى بقت مثقفه
ايه يابت محكتيليش على انفرنقعوا ن هنا دى
ممممممممممممم
ولا عايزاه يبقى مفاءجه وتخرعينا

بوست عسل زيك بجد

وانا مع خمسه فضفضه
كنت فاكراكى هتتكلمى عن العيش

بس برده حاجه غريبه
انتى قريتى كتاب

لالالالالالالالالالالالالا
مش مصدقه

من امتى الكلام ده

بس بجد روعه وربنا يكرمك
ويلا بقى انتى موحشتكيش مدونتك
يلا ورينا الهمه

الطائر الحزين said...

حمدا لله على سلامتك الاول

عيون المها بين الرصافة والجسر ** جلبن المها من حيث أدرى ولا أدرى

الصح

عيون المها بين الرصافة والجسر ** جلبن الهوى من حيث أدرى ولا أدرى

اظن ان هذا ممكن يكون المعنى وضح
كنت كاتب تدوينة من زمان

اسمها المنطوق والمقصود واردت بها ما تفضلت به


اما المكتبة نفسى ازروها ان شاء الله قريب

الطائر الحزين said...

نسيت اقول

علي بن الجهم
حين قدم مادحا على : المتوكل العباسي قائلا:

أنت كالكلب في حفاظك للود... وكالتيس في قِراع الخطوب

أنت كالدلو ، لا عدمناك دلوا...ً من كبار الدلا كثير الذنوب

تحياتى

عصفور المدينة said...

ربنا يبارك فيك والبوست رائع رائع مزج السياحة بالفائدة

أما بيت الشعر فالتصحيح
عيون المها بين الرصافة والجسر جلبن الهوى من حيث أدري ولا أدري

أعدن لي الشوق القديم ولم أكن سلوت ولكن زدن جمرا على جمر


عيون المها يعني عيون الغزلان تشبيه
والرصافة والجسر الرصافة مكان في بغداد والجسر جسر على نهر دجلة
والباقي أظن مفهوم

ToOoKa said...

السلام عليكم ورحمة الله وبركاته

ازيك يارب تكونى كويسه واستمتعتى بالزياره اللى ياريت تكرر علشان تقوليلنا قريتى ايه
اصلا اسكندريه كلها حلوه والمكتبه كمان بس للاسف ربنا لسه ما اردش ازورها بس ان شاء الله قريب
انا كنت عاوزه اعلق عن موضوع الكتاب
العلم دا بجد حلو اوى وبينقسم لحاجات كتير فى برمجه لغوية عصبيه وفى بردو فن الحديث وفى حاجات كتير انا اخدت كورس مره عن العلم دا مع صناع الحياه واد ايه مهمه لغة الجسد واللى بتشكل 70 % فى اقناع الاخر بوجهة نظرك لغة العين واليد وازاى تعرفى من اللى ادامك هو بيكذب ولا لأ وازاى تفهمى شخصية الاخر واقصر طرق لاقناعو
وقبل دا كلو بتحاول تعلمك ازاى تتفاهمى مع نفسك وترتبى فكارت يعنى من الاخر تعلجى نفسك من الاحباط واليأس والخوف

وحقولك على طريقه بتنفعنى والله وبتريحنى لما اكون متوتره او خايفه من الامتحان مثلا وبدأت افقد سيترتى على خوفى
تغمضى عينك وتخدى نفس عميق وتحبسيه جواكى لمده 3 ثوانى وبعدين تطلعيه وحده وحده فى مده اكتر من اخدو
يعنى الزفير مدته اكتر من الشهيق
دا بيطلع الشحنات السالبه اللى جواكى
انا عارفه انى رغايه اوى
يعنى من الاخر العلم دا بجد حلو اوى وحيساعدك فى حاجات كتير ياريت تعرفى عنو
وياريت تكلملى الكتاب وتقوليلنا عليه
اسفه انى طولت
سلام واتمنالك كل سعاده وخير

WhatEver?!!! said...

يا بختك يا عم

مكتبة اسكندرية وافرنقعوا بقى وثقافة


عقبالنا يا رب بزيارة لحد المكتبة كدة ونرجع بسرعة

hurricane_x said...

mosh 3aref 2elmaktaba de 2ezay fe masr we7na mabenro7hash, wana 2welhom!

di el2mr said...

اسكندريه من اجمل الاماكن فى مصر
والمكتبه دى بقى بالذات تحفـــــــــــه بجد
ومهما الواحد راح هناك بيبقى عايز يروح تانى

Tamer Nabil Moussa said...

جميل البوست والصورر


بس عايز اسال سؤال

هو الدخول باشتراك

ولا ممكن اجى فى يوم ادخل عادى

ولا اية نظام الدخول عشان مش اعرف عنة حاجة

تحياتى

رينـــــــــــا said...

صورصارة
بجد تصويرك رااااااائع
وحشتنى اوى اسكندريه :(

Anonymous said...

الله ينور عقبالى بس مش الوقتى عشان مش فاضى
بس كويس
عيون المها ياستى هيا عيون البقر الواسعة الجميلة

gohayna said...

صورصاره يا قمر

تسلم ايدك علي الصور يا سكر والله

واكيد كانت رحله حلو طبعا

انا رحتها مره واحد بس لما كنت في الكليه
وبجد كانت متعه والله

اما الصور فحكايه

اعترفي انتي الي مصوراهم ولا فيه حد عملهالك حاكم انا عرفاكي


تسلم ايدك بجد والله

ابقي طلي يا قمر

سلام

šσяšαяαα said...

خمسة فضفضة:

وعليكم السلااااااااام ورحمة الله وبركاته
والله يافضفوضة مش عارفه ايه الميس اندرستاندينج
دا... انا اقصد زى عيش
فانتا..سبرايت ..سفن اب..كدا يعنى:))

وكلامك فعلا بيتوافق شكلا وموضوعا مع اللى انا كتباه
وكله تمام تمام يافندم
وسعيدة انك اول تعليق
الحمدلله فى ناس بتعمل فرح زيى لما بكون اول تعليق:))
تحيااااااااااتى
:::::::::::::::::::::::::::::::::::::::::::

mohand :

وعليكم السلاااااااام ورحمة الله

اه يعنى الكلام اللى كاتبه بالفصحى وانا مش هافهمه
مش هقلك غير اللى روز قالته لمارد وشوشنى:
دمك خفيييييييف:P
وعموما التصوير دا هواية.. مش ناوية احترف
وشوكران على الاطراء يااستاذ غضنفر:))
تحياااااااااتى
:::::::::::::::::::::::::::::::::::::::::::

عاشقه الفردوس:

اه اتسقفنا.. فى ما يمنع ذلك وااللا حاجة
بعدين ايه تخرعينا دى.. ياى ياى خالص
انا هقول لبابى ومامى بتوع الانتى
اجى اضربك بالكتاب علشان تصدقى انى قريت واللا ايه؟
وميرسى كتيييير على المجاملات والنفاق الكتير دا:P
سلاماااااااات

šσяšαяαα said...

الطائر الحزين:

الله يسلم حضرتك

وجزاك الله خيرا على التوضيح
هى فعلا كدا بس كانت خطأ مطبعى منى ماخدتش بالى وانا بكتب
وكان نفسى اتشرف واقرأ البوست اللى حضرتك كاتبه
لو تسمح تبقى تكتبلى اللينك

وان شاء الله تزور المكتبه قريبااااااااا

وشكرااااا كتييييييير على تكملة الشعر

تحياتى
::::::::::::::::::::::::::::::::::::::::::::

عصفور المدينة:

ربنا يبارك فى حضرتك ودايما مواضيعى تكون عند حسن الظن

وجزاك الله كل خير على تكملة الابيات وفعلا هى الهوى بس انا اللى مخدتش بالى وانا بكتب
وشكرا كمان على التفسير
والله فرحانة اوى برد الفعل والمساعدة منكم

تحياتى
::::::::::::::::::::::::::::::::::::::::::

ToooKa :

وعليكم السلاااااااااام ورحمة الله وبركاته

اهليييين توكتى.. مش عارفة اعتقد ان اسمك تقى
بس انا هقلك توكتى لو تسمحى:))

وفعلا العلاااااام حلو جوى جوى
انا بحب الكتب جداااااا بس من ساعت ماستخدمت الانترنت مابقتش اقرأ كتير للاسف
علشان كدا كنت سعييييدة اوى انى رجعت لهوايتى من تانى
وفعلا كل اللى الانسان بيفهمه من الكلام مجرد7%
وال93% بتكون من لغة الجسد.. انا قريتها فى الكتاب

وكل المعلومات اللى كتبتيها جميييييييله فعلااااا
ربنا يجزيكى كل خير ياااااااارب ونستفيد منك دايما
سلاااااااااااام ياعسولى

šσяšαяαα said...

WhatEver?!!!:

اللهم لا قر ولا حسد:))

ويارب بجد الكل يزورها.. انا عن نفسى لو اشوفلى اى مكان عالروف هناك
اسكن فيه عشان تبقى المواصلة نزول السلالم بس:))

::::::::::::::::::::::::::::::::::::::::::::


hurricane_x :

wala ana we7yatak... but we should be better than el sowwa7 elly everywhere there
e7na awla... or u have another point:))
really u will miss so wonderful things if u dont visit it

::::::::::::::::::::::::::::::::::::::::::::

di el2mr:

كلامك مظبوووووووط جداااااااا

ياريت والله لو نعرف نتجمع كلنا ونزورها فيوم

تحياتى ليكى وشكرا على زيارتك ليااا

šσяšαяαα said...

Tamer Nabil:

شكرا على الكلام الجميل دا

وحضرتك ممكن تدخل عادى فأى وقت
للاسف انا مش عارفه المكتبه بتفتح الساعة كام بس هى بتقفل 7 مساءً
والتذكرة سعرها بسيط جدا
هو طبعا فى ناس كتير عاملة اشتراكات وبالذات الطلبة
بس هو حضرتك تروح وتاخد تذكرة الدخول وبس
وان شاء الله تزورها قريب وتحكيلنا لما ترجع

تحياتى

على فكرة انا قلت ادور يمكن الاقى موقع كاتب عن المواعيد
الرابط دا لقيت فيه حاجات كويسة اتمنى تفيد حضرتك
http://www.alex4all.com/aboutAlex/articl.php?id=126

::::::::::::::::::::::::::::::::::::

رينـــــــــــا:

ربنا يخلليكى يارينا
وترجعى لينا ولألكس بالسلامة:)

šσяšαяαα said...

Dr-hema:

الله ينور عليك:))
وان شاء الله تلاقى وقت فاضى وتزور المكتبه
وشكرا عالمعلومة الجميلة:))
تحياتى

::::::::::::::::::::::::::::::::::::

gohayna:

تسلميلى ياجهينة وسعيدة انك افتكرتينى اخيراا

وانا اللى مصوراهم طبعا

ايه مش باين الفن والإبداع فى الصور واللا ايه:)

تحياتى ليكى

ToOoKa said...

السلام عليكم
لا على فكره انا ما اسميش تقى انا اسمى توكا بس دا اكيد دلع ومش اسمى الحقيقى
وياريت بقه تدعيلى علشان امتحاناتى
سلام واشوفك على خير

الراقـــص مع الذئـــــاب said...

السلام عليكم ورحمة الله وبركاته

بجد الكتاب دا تحفة...أنا اخدت اسمه وهنزل في اقرب فرصة إن شاء الله اشتريه
انا اعشق الكتب والقراءة يا سارة

كان في موقف مشابه برضو مع الحجاج واحد تلامذته عندما قال له احد تلامذته وكانه يدعوا له امام اصحابه
رفع الله كعبك وبيض وجهك

فتبسم الحجاج ساخرا وبعد إنصراف الغلام قال لأصحابه اتدرون ما يقصد
هذا الغلام؟؟...قالوا انه يدعوا لك

قال كلا...أنه يدعوا علي
فرفع الله كعبي تعني ان اصلب وتتأرجح قدماي في الهواء
وأما بيض الله وجهي فتعني ان يصيبني الله بالعمي

كان فصيح جدا في اللغة لدرجة انه كان يقتل اي حد يلحن في اللغة العربية

الموضوع جميل يا سارة وياريتك كنتي قرأتي اكتر


جزاكي الله خيرا علي السؤال عني

دمتي في خير

•«ρяoιd»•™ said...

هو في حد مبيحبش اليكس

اسكندريه يا ناس دي ليها سحر مع نفسها كده

مفيش مخلوق علي وجه الأرض مبيحبهاش

يعني هنتكلم عن ايه و لا ايه

حضاره و لا نضافه و لا بحر و لا سما و هوا و لا ايه و لا ايه

بحبك يا اليكس

تحياتي المعطره بالحب

صاحب البوابــة said...

احب اسكندرية للغاية

ذكرياتي تكاد تكون كلها هناك

تحياتي اختاة

šσяšαяαα said...

ToooKa:

وعليكم السلاااااااااام ورحمة الله
ولايهمك ياتوكتى وربنا يوفقك ونسمع عنك كل خير دايما
سلام ياجميل
::::::::::::::::::::::::::::::::::::::

الراقص مع الذئاب:

وعليكم السلاااااااام ورحمة الله وبركااااته
هلااااااااا محمد وحمدلله على سلامتك
انا للاسف ماقريتش كتير فى الكتاب لكن واضح انه كويس فعلا
واكتر حاجة عجبتنى فيه اللعب بالكلمات زى المثال اللى انت كاتبه

واتمنى بجد انى اكمل الكتاب فأقرب وقت
تحياتى ودمت بألف خير

šσяšαяαα said...

•«ρяoιd»•™:

ياسلااااااااام ايه الجمال دا كله
انا بقول نعمل مدونة ونسميها
رابطة مجانين اليكس:))

تحياتى المعطرة بنسيم البحر:)
:::::::::::::::::::::::::::::::::::::

صاحب البوابــة:

سبحان الله مع ان كل الاماكن مصر برضو
يارب بس تفضل بالجمال دا على طول
حاكم احنا مفيش حاجة بتفضل سليمة معانا:)
تحياتى اخى الكريم