Sunday, November 19, 2006

والفيلم دا لامؤاخذه.... قصه واللا مناااظر؟؟؟

انا طبعا دلوقت من ساعة ماتقاعدت من الكوليدج وانا زارعه نفسى هنا والحمدلله انه مفيش دوش يدوشنى
ولاقنوات تجيبلى العصبى ولاكليبات تعملى تلوث بصرى ولا برامج تفسير احلام وابراج تجيب اعوجاج فى فص مخى الوسطانى اللى بين قرونى ... بس امبارح قلت لما افتح كدا تليفزيونا بقنواته المحليه اللى الواحد مهما قال والله مش هيوفيها حقها من الشلل
المهم بقى لقيت رجلى اليتيمه داست على القناه التانيه ولقيتلكو برنامج هوم سويت هوم او بلغتكو العاميه كدا"البيت للاسف بيتك" بس بجد كلمه حق لوجه الله البرنامج دا الوحيد تقريبا اللى فك حالت العته والشلل اللى موجودة فى تليفزيونا العتيق
المهم ماطولش عليكو اصل انا عارفه لما اتفتح مش هاتسد
ولقيتلكو لقاء مع المغنيه الست كارول سماحه"وسماح ياهل الرضا والسماح"..
وبصراحه لغاية امبارح بسسسس انا مشفتلهاش حاجه كدا واللا كدا وكل اغانيها يعنى..ها.. شغاله وبنت ناس
وعمالين يتكلمو عن اغانيها وكلمات اغانيها وان الفن مش رساله زى مالكل لازق الكلمه اليتيمه دى فى لسانه وانه وسيله للخروج من الإسترس اليومى ومشاكل الحياه الى عالم جمييييييل من الاحلام والامال واديها ميه تديك طراوة
وبعدين قالو نروح نشوف فاصل مع احدث كليب ليها واللى آثار جدا واااسع جدا بين النقاد
وانا بصراحه بسمع كلمه جدل دى وماتعرفوش ايه اللى بيحصلى ..قرنى الشمال بيفضل يرف لحد مايحولنى معاه
وجاء عرض الكليب والاقيلكو كدا خير اللهم اجعله خير الارض بيضاااااااااا ومفيش غير حتت كنبه بيضااااااااا وحاجه كدا احمر فاحمر عمالة تتلوى يمين وشمال وتنام شويه وتقوم شويه وتروح شويه وتييجى شويه مع هز الدراعات وهفهفه الشعرات
وقرنى اللى كان بيرف تنح ادام الشاشه هو واليمين كمان ولاول مرة لاافتكر كلمه من الاغنيه ولا حتى حتت لحمايا منها
وافتكر ازاى صحيح هو انا كنت فايه واللا فايه .... لا وانا اللى لسا كنت بقول دى فعلا من المغنيات الفاضلات الحلوات الأمورات(أمر بالستر ياختى)
وخلص الكليب وقرونى عادت لعملها الطبيعى واستنيت بقى الدماغ محمود سعد هيقول ايه
وهى رد فعلها ايه من كلام النقاد (والله معاهم حق) دا عرض ازياء بكل المقاييس "وياريته ازياء بس" والصاعقه بقى انها بتقولكو هى قاصده كدا عشان دايما الممثل بيحب التغيير وهى بتعتبر الكليب دا فيلم صغنون والناس على طول شايفين كليباتها احداث دراميه ومفيش تركيز على المغنيه نفسه وهى المفروض نجمه الكليب(كان الله فى العون والله) وبالتالى فحبت يكون الكليب متركز عليها كأنثى كامله الانوثه(طب وهوحد قال غير كدا) والمخرج الفرنسى قاللها نقلب بقى الموازين ونعمل كليب يعرض انوثتك الطاغيه(كان المفروض يعرض معاه كعب جزمتها) ونخللى الكلمات واللحن مجرد مؤثرات صوتيه(لأ..بيفهم الراجل دا) واحنا بقى اللى مالناش فى الفن ولا نعرف نقيمه ولابنفهم الفنان قصده ايه ودايما كدا بنفترى عليهم ونظلمهم
ربنا يستر فى البيوت المصريه ...انا حاسه انه الرجاله هتعمل ثورة من الفستان الاحمر دا
انا عارفه انه فى بلاوى اكتر من كدا بس كل اللى غايظنى انه حتى المغنيات اللى المفروض يكون فنهم مختلف شويتين عن البلاوى التانيه طلعو هما بيج بوص البلاوى دى"انا كنت حاسه انه اللى ورا الهنا دا مخرج اجنبى-انا خسارة افضل فى البلاعه دى"
اه نقول بقى محمود سعد قال ايه
قاللها : احنا زمان فى السينما كان الواحد بيسأل .. هو الفيلم دا قصه واللا لامؤاخذه مناظر؟
لو كان قصه ودراما ومواعظ يبقى فكك منه ..اما بقى لو كان تحبيشه مناظر كدا من اللى هيا,الواحد يدخل على طووووووووول ومايفوتهوش
والكليب دا شكله كدا ابن عم الافلام دى... من بتوع شوفنى بتلوى وبسرسع.. دا مفعولى من السحر اسرع
ولاعزاء للصراصير

Saturday, November 18, 2006

تدخل شات؟؟... مش عايز شات!!

دى مجرد دردشه بريئه عابرة ليس الغرض منها اى سوء نيه لاسمح الله
انا بس المرارة اللى حيلتى مفقوعه من اللى بشوفه وبسمعه ياخوااااااااااااتى
نفسى اعرف ايه كميه الهيافه والتفاهه والعبط والهبل والظرف والخفه اللى بيتسم بيها شبابنا الحليوة بتاع اليومين دول
زى مايكونو رمو عقولهم فى اقرب مقلب زباله وجابو بداله مخ متسستم على كلام وموضوع واحد مش بيتغير
وادى حوار من الحوارات اليوميه اللى خلاص قربت تجيبلى شلل رباعى ولو فى سباعى كمان هتجيبهولى
الخفه باشا: هاى ممكن نتعرف؟
المفروسه هانم: اوى اوى وماله..دا حتى سمعت ان التعارف مفيد اوى للقولون
الخفه باشا: انا ميدو ..22 سنه..ساكن عند بابى ومامى..وحدانى والوحده عذاب واتمنى نكون اصحاب
المفروسه هانم: برضه اوى اوى..انا سمعت ان الصحوبيه مفيده جدا للوسواس القهرى
الخفه باشا:طيب ممكن اشوف صورتك
المفروسه هانم: لا والله معنديش.. كل ماتصور ميطلعش فى الصورة غير القرنين بس اصلهم طوال اوى
الخفه باشا: طيب عندك كام(كاميرا يعنى)والله يرحم ايام مصوراتى الكورنيش
المفروسه هانم: محظور تداولها عندنا فى البلاعات ..لو عرفت تسربلى واحده من الجمارك يبقى جميل مش هنساهولك
الخفه باشا: ولايهمك ياجميل بكرة لما نتعرف على بعض اكتر هتلاقينى اهل للثقه ويمكن تلاقينى الثقه نفسها متنكرة فى صورة ملاك فحلقى لابيهش ولابينش ومش طالب غير شويه شات لله
المفروسه هانم:خلاص يابنى قطعت قلبى ..عفونا عنك
الخفه باشا: طيب هشوفك تانى امتى؟
المفروسه هانم:لما تشوف قفاك.. قصدى كله بأمره
واليوم اللى بعديه
الخفه باشا: هاااااااااااااااااااااااى(خللو بالكو دى اطول من الاولانيه)
المفروسه هانم: هاى ورحمه الله وبركاته
الخفه باشا: بجد وحشتينى مووووووووووت
المفروسه هانم: وليه موت هو اللى موحشكش..اقصد يعنى ماتشفش وحش
الخفه باشا: ازاى بس ..دانا شفت القمر كله ومعرفتش انام بالليل من كتر التفكير فيكى..ونمت ماتينيه
المفروسه هانم: لاخير خير بتحصل فى أحسن العائلات .. انت بس تخللى ماما تحكيلك حدوته قبل النوم وانت بتشرب اللبن وكل دا هيختفى
الخفه باشا: انتى بتتريقى عليا..وانا اللى كنت فاكرك فاهمانى وحاسه باللى فقلبى
ياخسااااااارة سهر الليالى ولعبه الحب والليل وآخره(مع اضافه وش بيعيط لزوم التسيبكه)
المفروسه هانم: يابنى روح العب بعيد يابنى.. يابنى انت مش اد نرفزتى يابنى
المحطم باشا: وادى الملاااااااااك البرىء ابو قلب طيب اوى ..ادى اللى كان كل شىء ..كسرلى قلبى ومشى
المفروسه هانم: ايام وبنعيشها هنعمل ايه ياربى فناس.. مفيش احساس ولاعقل خلااااااص
وكفايه عليكو الموجز دا
بس بجد ياجماااااعه نفسى اعرف ايه اللى جرى لعقولنا علشان توصل بالهيافه دى ومعقول يعنى خلصنا كل الافكار ومش لاقيين حاجه نعملها غير التتنيح ادام الشات ومعاكسه البنات!!
ولغايه دلوقت معرفتش القولون العصبى والضغط والمرارة هاجو عليا من ايه!!
يمكن عندهم كبت هما كمان ونفسهم فى شويه شات مع البنات:))

سبحان الله... حتى الحمام عينه زايغه!!!

فى يوم من ذات الايام اللى شبه بعضها كنت بنشر غسيلنا المزهزه على سطوح بلاعتنا واللى مربيين فيه كام شويه حمام كدا على اد الحال
والسؤال اللى جاى اهه(ازاى صراصير تربى حمام؟؟) طبعا سؤال وجيه واجابته سهله جدا" الزمن دا كل حاجه فيه اتشقلبت وزى ماالوز العراقى بيربى شويه خنازير امريكانى.. احنا كمان معشر الصراصير بنربى حمام بلدى"
ونييجى بقى فى المهم..فوجئت وانا بنشر بحمامه واخده ركن مع نفسها وساكته خااااالص ولا بتاكل ولابتشرب ولا حتى بترد عليا لما بكلمها.. فى سؤال جاى اهه فى السكه انا شايفاه(معقوله العبقريه دى وكمان بتكلمو الحمام؟؟)
والرد هنا بقى(والله كل صرصار حر ويكلم اللى يعجبه وبعدين دى مسائل فلسفيه بحته قليل اوى اللى بيستوعبها ويكون عبقرى زى حلاتي كدا)
المهم اختى شافتنى وانا عماله اهاتى مع الحمامه وقلتلها: هى مالها ياعين مامتها كدا قاعده بتتشمس فى كورنر مع نفسها ليه ؟
ردت عليا بالخبر الصاعقه: اصل جوزها طلقها وراح اتجوز الحمامه اللى جوزها مات وطردتها من الصفيحه(عش الزوجيه) وبينقرها لو قربت منه
ولقيتلكو بقى الزوجين السعيدين طالعينلى يتمخطروا وكل واحده فيهم عينها حمرا ويطق منها شرار
زى مايكونو بيقولو وايه حشركو انتو فى المسائل دى يابنى صراصير؟!!
وفعلا... وماهم الا امم امثالنا بس احنا اللى دماغنا مقفله

ازيكن ازيكن... انا جايه اصدع ودنكن

مساء الخييييييييييير عليكو جميعا
ومع اول كتاباتى وافتكاساتى ابدأ ... بس فى مشكله صغنونه وهايفه جداااااا
وهى انى لسا مش عارفه اكتب ايه اساسا:-)
بس ممكن دلوقت اتكلم عن مجتمع البلوجز واللى شكلى كدا هسيب بلاعه الحكومه واستوطن فيه
ساعات كتير بييجى كلام فدماغنا ومش بنعرف نكتبه فين ونوصله ازاى لباقى البشر
وبما ان العيشه بقت نار وتأجير حتى مكان الواحد يكتب فيه هيبيعه اللى وراه واللى قدامه
اذن فليس امامنا الا انشاء بلوجر فور فريي وندعبس فيها براحتنا وربنا يخللى سيادتة رئيس مجلس الصراصير الموقر اللى اتاح ليا المكان دا وبدون مقابل"ازااااى؟؟..معرفششش"
وشكلى كدا هعمل تحالف مع البنى ادمين وامرى لله لان شعارى فى الحياه"لسان واحد لايكفى"
وبالتالى فعندى طلب من كل واحد هيشرفنى بزيارة بلاعتى انه يرميلى مواضيع وافتاكاسات نكتب عنها
واتمنى اكون صرصارة خفيفه على قلبكو
والسلاااااااام ختااااااااااام