Monday, May 28, 2007

واتفرج ياسلااااااااااام

ياهلااااااا فيكم
البوست دا من اول التخاريف اللى كتبتها
اهو تروقو حالكو بعد بوست البؤساء اللى كتبته
قلت اوريكو كدا كام صوره تفاريحى ومعاهم تعليق منى ولو عندكو تعليقات احسن حولوها عليا وانا فى الانتظارررررر


مش كنت تقول ياراجل كنا فرشنا الأرض سمك بدل الديك اليتيم دا


إحم...دى بلا فخر ماى ليج اللى فضلالى من حرب الشباشب والبيروسوللات

(نصب تذكارى تخليدا لبطولاتها معايا)



I Wish You A Merry Christmas And A Happy New YeaaaaaaR


إنى أرقص تحت الماااااااء...إنى أهبل أهبل أهبل




تشكيلة ساااااااااحرة من الالوان...سبحان اللــــــه



حسره عليا اللى ماعندى كورة شراب واللا حتى عروسه ورق آآآآآآآ

مش عارفه انا ايه التقليد الاعمى دا...شافونى مليت ترعه العمده عرق سوس حلفو لايعملو زيى...ربنا الشافى



(:وأخيرااا.. اليوجا الهندى بس على دبادييبى شويه


Tuesday, May 22, 2007

[§©¤][حـــوار معى[§©¤][


بعض من الحوارات مع النفس
لا اعلم ان كانت لنفسى ام لمن
ولكنى سأقوم بإظهار الجوانب المختلقة لهذا الكائن المقيم بداخلنا
سواء شئنا ام ابينا
(1) حوار مع النفس المتمردة
..................................................
لكم اكرهكى حين تبغضى الحياة التى كتب ليا الله ان احياها-
وهل تطلقين على وقتك الذى يمضى وسط هؤلاء الطينيين بحياة؟؟؟*
لكم انتى ساذجه كعادتك
فلتنظرى حولك الى من تجردو من جلدهم الطينى
فهاهم الان يفهمون معنى الحياة الحقيقى
ان تحيا كالافعى تحوم حول فريستك لتسقطها وقتما وكيفما تشاء
ان تحيا كالحرباء تغير اقنعت وجهك طبقا لمن تعاملهم
الى ان تحين فرصة تحقيق المصالح المرجوه
فهل يمكن ان تكونى مثل هؤلاء ذات يوم؟؟
ولكنهم تحولو الى قلوب متحجرة وانا ابحث عن معنى الحب الصادق المنزه عن اى اغراض-
ايتها الحمقاء انك تتحدثين عن كلمة اندثرت ولم يعد لها اثر بعد الان*
ان هذا الساكن بجوارى الذى تطلقون عليه قلب لايصلح إلا لضخ الدماء
من أجل ان يظل الحمقى امثالك على قيد الحياة
فلتنظرى الى من اراد ان يثقل على قلبه بالمشاعر ويحيا حياة العشاق المسحورون بلعنت الحب
ها هم يذوقون ويلاته يوما بعد يوم
يذوقون ويلات الخيانة والكذب وحب الذات
فهاهم اصدقائى يتواجدون دائما حيثما تنبت مشاعركم الواهنة
ممممممم...هل هذا يعنى اننى لن اجد من يحبنى بصدق ويقدر العبء الجديد الذى سأحمّله على قلبى؟؟-
نعم عزيزتى.. لن تجديه طالما ترتدين ثوب الضعف والطيبة التى لامكان لها بيننا الان*
خذى هذا الرداء هدية منى.. ارتديه دوما فهو من قماش الدهاء ومطرز بحب السيطرة على مشاعر الاخرين
ازراره سلاح جاهز دائما للانتقام وتملك فريستك واطرافه تفضى لمسة ساحرة للجمال القاتل
-
انا لن استجب لكى ايتها الملعونة ولن اتقبل هديتك..فكل ماقلتيه لن يغيرنى
سأظل أنا..وأنا فقط من سأتحكم بمصيرى
تعجبنى طيبتى التى تسمينها سذاجه
يعجبنى قلبى النابض بمعانى الحب التى تسميها حماقة
تعجبنى حياتى كبشر طينى لايريد الاقتراب من لهيب النار التى جذبت الكثيرين اليها
واصبحوا شياطين متنكرة تحت طبقة من التراب
ولو كان بيدى التخلص منك لفعلت منذ يوم ولادتى
*************************************
فى بعض الاحيان لا يستطيع الجسد التحكم بمن يسكن بداخله
فهل يمكننى التخلص من وساوس نفسى؟؟
هل يمكننى بناء جدار عازل يحول بينى وبين لعناتها المستمرة؟؟
هل من مجيب لتساؤلاتى؟؟؟؟

Tuesday, May 15, 2007

ماتضيعش الفنصة يامعنم


أنا جيييييييييت تاااااانى


بجد زعلانه اوى انى بقالى كتير ماصدعتش ودانكو


النهاردة بقى كان يوما من خيال بس ماهواش ولا حاجه


انا اللى جالى كساح اليوم ماللى حصللى ياختيييييييييييي


كنت النهاردة عقبال عندكو فى مقابلة عمل وجت منين دى بقى اقولك


انا اولا كنت اشتغلت عقبال عندكو جميعا بس هما شهرين وقعدنالان الحمدلله شغل الاوت دوور دا معناه انتحار


بس بصراحه انا الشركة اللى كنت فيها ولافندق الهيلتون فى زمانه


لكن انا شكلى كدا مش هعرف اتعامل مع مجتمع الناس فيه بتتنفس ورق بنكنوت


فصرفنا نظر عن موضوع الشغل دا وقلت ياواااد طنث خااالث والبيت اكرملنا برضو


وبالذات الناس بصراحه دلوقت تشجع اوى على التعامل معاهم..اللهم قوى ايمانهم


المهم بقى بعد المقدمة الاكس لارج دى نرجع للاعلان عن الوظيفه اللى صابحتى شافته




انا عن نفسى عملت ديليت لموضوع الشغل دا من الهارد بيتاع دماغى لكن قلت اروح مع صابحتى واهو بالمرة الواحد يغير جو ويشوف ناس


المهم رحنا الشركة...عمارة من ايام الستينات واسانسيرزى بتاع فيلم سكر هانم

طلعنا الدور اللى فيه الشركة...باب خشبى من القرن قبل الميلادى وقبل مانخطى جواه قلت لصابحتى هى دى الشركة اللى ناوية تشتغلى فيها ياختى...وبصوت اكيد سمع الشارع التانى

عاوزة اعرفكو ان صاحبتى كانت فى قمة البؤس والشقاء والكآبه اللى فى الدنيا

شافت منظر الشركة من هنا وزى ماتكون بلعت لبان زغزغ


مابطلناش ضحك بصراحة.. الحمدلله ان ربنا سترها ومحدش كان يعرفنا


المهم دخلنا ومكنش فى غير واحد كمان..اخدنا الاستمارات ومليناها وقالولنا لسا المعاد الساعه واحدة قلنا ماشى اهو نروح نتمشى شويه على ماتييجى واحده

وطبعا طبقا لقواعد الانترفيو انك تروح قبل المعاد بعشر دقايق واللا حاجه


ام هند..رحنا واتلطعنا لحد اتنين ونص مستنيين صاحب الشركة وكل دا ومش عارفين اساسا هى الشركة تخصصها ايه


شويه واحد يدخل يشترى خراطيم غريبة المنظر دخلت فى الالف جنيه


وهى تقولى ماتشوفيلنا البتاعه دى تخصصها ايه.. فى الخراطيم واللا البويا واللا ايه بالظبط


بعدها جه تليفون واللى ردت عليه كانت بتتكلم عن الفلاتر..قلنا وماله يعنى شغاله فى الصناعات مجهولة المصدر..وكل اللى هناك متباشموهندسين


بدأت طبعا الجماهير الغفيرة تتجمع وقعدنا ولا اللى فى عيادة ومستنى دوره فى الكشف بس طبعا بما اننا من اوائل الحاضرين فكنا من اوائل الداخلين برضو

صاحبتى دخلت وبعدين خرجت تقوللى دا عمال يتفلسفلى زى دكاترة الجامعة ياللا ادخلى ولايهمك بس خللى عندك ثقة بنفسك

حسستنى انى داخله على سقراط الالفية التالته

المهم دخلت لقيت سعادة المدير..راجل كوبارة كدا اد جدنا


بيقوللى: وانتى اشتغلتى قبل كدا
قلتله ايوة لكن انا بفضل الشغل الادارى او المكتبى عموما عن الشغل خارج مكان العمل

وان نوعية الوظايف دى بتناسب الاولاد اكتر

قاللى: سبحان الله مانتو بتطالبو بالمساواه من ساعت امنا حوا جايين دلوقتى تقولو دا مناسب ودا لا


قلتله انا مش تبع الناس دى وبعدين كل واحد وعلى أد قدراته


قاللى طيب عموما احنا شغلنا هيكون تسويق لمنتج المانى


قلت فبالى انا كان اييه اللى جابنى هنا ياربى هو التسويق دا ورايا ورايا


واحنا بقى نظامنا مش اننا نلف كدا على المحلات لا احنا متخصصين بقطاع معين وهو الصناعة


يعنى انا بالصلاة على النبى هلف على الميكانيكية واصحاب الورش عشان خاطر المانية المتحده


قلتله طيب وايه نوعية المنتج دا يعنى لو تطفل منى


قاللى هو منتج المانى عالى الجودة ومش اى المانى يتقاله المانى


وعاوز اقولك ان الاول فى الشغل هنا وعلى مدار تاريخ الشركة كله كانت بنت... مصر هى أمى

محسسنى انها الاولى فى مصارعه الافيال


كمان الانسان الطموح بيوصل دايما لهدفه مهما كانت الصعوبات...عظمة على عظمة ياست


ولو قبلتى معانا هيكون فى مقابلة تانيه تعرفى منها ايه نظام الشغل بالظبط وبعدها هتكونى مهندسة وفنفس الوقت بتشتغلى فى التجارة


الله اكبر يعنى الهندزة اللى بيحمضوا فيها خمس سنين انا هعرفها فيومين
ياللا اهو ارحم برضو من اللى كانوا طالبين ناس توزعلهم تذاكر الدورى


قلتله خلاص يافندم احنا نفكر كدا ولو مش هنييجى نتصل بيكو برضو علشان مانعطلكوش لو هتستنو معالينا واللا حاجه


marketing and sales خرجت من عنده وانا كارهه كلمة


يعنى ياربى اقعد اربع سنين تجارة وانجليزى يعنى بعنا الحديدة اللى كانت حيلتنا كمان

علشان اشتغل مندوبة والف على كعوب رجليا وفى الاخر اخد ملاليم

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

طيب بالله عليكو شاركونى الفرسة اللى انا فيها دى


اولا الاعلانات دلوقت سطرين عمى ولاتعرف الشركة دى بتاعت ايه ولا عاوزة منك ايه
دا غير اعلانات الانترنت... وبلاش نفتح فى العلب

لكن بواقع خبرتى المحدودة اقدر اقول


الشركة اللى اعلانها مايكملش سطرين دى تبقى كوحيتى


ولو طالبة جميع المؤهلات او تجارة خارجية او انجليزى يبقى معنى مندوبين مبيعات


الاعلان النضيف بقى اللى عليه القيمة يكون لشركة عاوزة خبرة ماتقلش عن تلات سنين


طيب اجيب انا التلات سنين دى منين


ازور فى اوراق رسمية واقدم تاريخ ميلادى


واللا اقعدهم فى البيت واخد شهادة تخليل منزلى


واللا اتكل على الله واخد برأى الفيلسوف اللى عملت معاه المقابله

اوعى تضيعى الفرصة دى


لا وبيقوللى يعنى ايييييييييه ماتضيعيش الفرصه


means, dont miss the chanceانا اتلامضت عليه وقلتله

قاللى يعنى ايه برضو

قلت يعنى الفرصه بتييجى مرة واحده بس والشاطر اللى يستغلها صح


قاللى وكمان

you will not lose anything as long as you do nothing


يعنى كدا كدا مابتعمليش حاجة فاتكلى على الله يمكن تفلحى واللا تتكعبلى فعريس واهو زيادة الخير خيرين


(دى الترجمة الفعلية للجملة واللى مش عاجبه يقدم شكوى لانيس عبيد)






Wednesday, May 2, 2007

واتخرجنا يابووووى إلى محطة الحياة..رصيف البطالة..رقم2007



مساء الخير أعزائى المشاهدين...إليكم آخر الأنباء المنقلة من بلاعة صرصارة

لقد إحتفلت صرصورة ببلوغها سن التقاعد من الكوليدج أول أمس فى حفل مهيب حضره رئيس الجامعة ولفيف من الأساتذه فضلا عن البيج بوص عميد الكوليدج

هذا هو الموجز ونوافيكم بالأنباء بالتفاصيل المملة جدا جدا


ياهلا بالغاليين..معاكم صرصارة سخصيا هتحكيلكو عن اليوم التريخى دا
اولا حفلة تخرجى يعنى اليوم اللى كل واحد بيستناه..
يعنى هقابل أصحابى اللى وحشونى جداااا
...يعنى هلبس الروب الاسمريكا واتمشى بيه فى المكان بقى ومحدش أدى
يعنى هتصور مع العمدة ودكاترتى العساسيل ودفعتى الكميلة

لكنننننن..كل شىء راااح راااح وانقضااااا..اولا الدعوة لاتنين بس ييجو معاك..قلنا مااااشى وماله الكتاكيت حلو برضو
رحنا الكليه انا وماما واخويا كان مستنينا هناك جريت عشان اروح استلم الروب..لقيتلكو كوم أرواب على الارض وزى اللى خارجة من بق أسد وياللا كله يعبى ويشيل ...مااااشى عديتها دى..جريت على قاعه الاحتفالات وعلى ماوصلنا لقينا الباب اتقفل وأمة لا اله الا الله واقفه والكل عمال يخبط ويزعق..ياخوانا احنا معانا الدعاوى اهى مش عاوزين تدخلونا ليييه,,,يطلعلنا واحد شكله كدا ابن عشماوى ويقولنا العميد مش هيدخل حد..انتو ايه اللى جابكو متأخرين دا على اساس الانضباط اللى عايشين فيه من ساعت مادخلنا الكليه..دا حتى الحفله اللى فاتت انا كنت من المنظمين فيها واتلطعنا ساعتين على ماتكرمو وبدأو الحفله..انما من بختنا المرادى ان سيادة الريس وراه اجتماع ومش فاضيلنا غير نص ساعه فبدأو الحفله مخصوص عشان خاطر عيون جنابه واحنا بقى نولع بببيروسول ..اقوله طيب من فضلك احنا معانا الدعاوى واحنا اصحاب الحفلة ازاى ماندخلش
وبعدين اهلينا اللى معانا دول هيفضلو واقفين ومتبهدلين كدا ..طيب احنا واخدين على المرمطه من ساعت مادخلناكى ياجامعه انما اهلينا ذنبهم ايه... بعدها يقوللى الاوامر كدا وانا مفيش بإيدى حاجه..عاوزين تدخلو روحو الباب التانى...نروح الباب التانى نلاقيه مقفول برضو..زى مانكون عيال صغيرة ادامهم بيستهزئو بينا...واللا اللى يحرق الدم بقى ان تلات تربع اللى جوا مالهمش دعوة بالخريجيين وكلهم عيال لسا بتدرس دخلو ازاى واللا ايه اللى جابهم انا معرفشششش..حتى واحده كانت واقفه جنبى واحنا بنعافر عشان ندخل ومنظرها مايديش سنه اولى اساسا..بقولها وحضرتك بقى خريجه معانا..تبصى باسبهلال كدا وماتردش... قلتلها ماهو واضح ان نص اللى جوا بالمنظر دا...واللا الشباب اللى متكومين ادام الباب..ولا اللى واقفين ادام الجمعيه..والكل عمال يستظرف .. والواحد خلاص مبقاش لاقى اوكسجين ياخد نفسه
وواحد من الظرفاء جدا الحقيقه بيقول لماما...دخلينا معاكى وقوليله انهم ولادى..احنا كلنا النهاردة ولادك.. وربنا يخلليكى للغلابه
!!!والكل خلاص جاب أخر اخره..ماما قالت لعشماوى اللى واقف..معقوله يعنى يصح اننا نقف كدا والولاد عمالين يزاحمو فينا...
راح موسعلها ودخلت هى ومامت صاحبتى.. بعدها الباب اترزع تانى فوشنا..وانا وصاحبتى لسا واقفين بره
ههههههههههههههه...كان موقف بصراحه..طيب هما دخلو يحضروا حفلة تخرج مين بقى لما ولادهم لسا واقفين منبوذين بره طيب الحمدلله انهم دخلو..مش مهم احنا بقى..نضحى عشان الجنين يعيش:)))))...وبعد ماطلعت روحنا طلعتلنا معيدة كتر خيرها يارب دخلتنا بس قعدنا فمكان مختلف عن المكان اللى فيه الخرجيينطيب مش مهم المهم اننا وصلنا لارض الوطن بسلام بعدها بقى كل واحد يطلع يقوله كلمة ويقعد فيها ساعتين...
واهم فقرة اللى هى تكريم الخريجيين... مشوهم عالمسرح زى اللى بيوزع فراخ..حتى الشهادات اللى انضف من ورق اللحمه شوية ماسلموهاش وقالو ابقو استلموها وانتو بتسلمو الروب..وعاوزة اقلكم ان اللى طلع عالمسرح هم العشرين الاوائل بس.. ولو حد منهم ماكانش وصل لسا يطلعو واحد يسلم على العميد بداله...تزوير فى اوراق رسميه..وكل دا حفاظا على الشكل العام
بس اعرف هو كان فين الشكل دا اساساااا؟؟؟
ولو كان فى نظام اكتر من كدا كان ممكن كل اللى بيتكرمو يطلعو بس عادى جدا...لو فى نظام يبقى فى حاجه غلط..واللا رحنا كوكب تانى واحنا مش واخدين بالنا
بعدها بقى فقرات الحفله ابتدت وكانت لذيذه جداااااا بصراحه وكلنا
انبسطنا واتصورنا وهيصنا وسلمنا على بعضينا..كانو واحشنى اويييييييي
واللا صحيح لما الريس بتاعنا مشى ..كتر خيره قعد ساعه بحالها مش نص بس...دا طلع كريم اوى ..هو بقى مشى من هنا ... وعينكو ماتشوف الا النور.. الابواب اتفتحت واللى عاوز يدخل يدخل واللى عاوز يرقص يرقص بصراحه شبابنا كلهم مواهب.. البنات تروح فين منهم بس.. لابجد كانو ناقصهم بدل رقص ويبقو ولا نعيمة شخلع
عمدتنا بقى كان منشكح جدا ... ماهو اليوم يومنا بقى ونعمل اللى نفسنا فيه..بس بصراحه ماحدش
مناا عمل حاجه.. البشر اللى حضرو الحفله ومالهمش علاقة بيها اساسا هما اللى قاموا بالواجب

بس بجد افهم انا ازاى كان فى الاول زعيق وقلة ذوق مفيش بعد كدا .. ولما رئيس الجامعه مشى بقى سوق جوا القاعه اللى عاوز يدخل واللى عاوز يخرج واللا مايشترى يتفرج
وقال ايه اتنين بس اللى يحضرو..دا كل واحده واللا واحد جايبين معاهم العيله كلها....
الله عليكى
يامصر وانتى منورة بالنصر
واختتمو الحفله طبعا بالنشيه الوطنى بلادى بلادى لكى مرارتى و الشباك اللى فاضل فى نافوخى

بصراحه كانت حفلة تخرج مش هتحصل ولا عاوزة يحصل زيها تانى...انا كان ايه اللى ودانى مش عارفه
وعمار يامصر.. وتعيش جامعتى حرة مستقله