Wednesday, December 31, 2008

توينتى سريس مع باقة ورد- وأجدعها زير لـ2008

اولا توينتى سريس لانه طبعا السنة اللى فاتت كانت توينتى تو
وكل ماالسنين بتعدى بتقع معاها ورقة من شجرة عمرى
: يعنى كل اللى يدخل هنا يسيب مناديل فلورا ناعمة وقوية عشان ناوية أغنى 
ماكنش يومك يانقاوة عينى


ثانيا باقة الورد مش ليا

دى للاخت الفاضلة 2009
اللى كلها بالظبط نص ساعة وتهل علينا
والواحد مش عاوز يتشائم .. بس ياريت لو فى رحلات لكوكب زحل لانى مش مستعدة اقضيها ع الارض اكتر من كدا

وثالثا بقى الكل يستعد لرمى القلل وانا عشان كريمة هتبرع بأكبر زير فخار منقوش بأجود انواع الطين البلدى

ورابعا اسمحولى اقدم لكم نشرة اخبارية مختصرة عن ال365 يوم اللى فاتوا من عمرى
هناااااااااااااا محطة البلاعة الاخبارية والساعة الان حداشر ونص .. التوقيت اللى صرصارة نزلت فيه الدنيا وقالت وااااااااء

بالنسبة للنشرة العملية
صرصارة ولله الحمد عدت كورس جامد جدا كان لمدة 8 شهور وبقت دلوقت
international trade marketing specialist
بس الحمدلله برضو سبع صنايع والبخت لسا بندور عليه

وبالنسبة للنشرة الاجتماعية
صرصارة ومن اول السنة برضو اتعرفت على اجدع واجمد وافظع واروع مدونين فى القطر المصرى.. ودا كان تعارف تعدى حدود الشاشة والعالم الافتراضى ووصل الى عالم الواقع بكل فوله وطعميته
وتتمنى دايما اننا نفضل عيلة كبيرة تتمدد وتنتشر وينضم ليها العديد والمزيد من ابناء الجيل البلوجرى

بالنسبة للنشرة السيكولوجية:
صرصارة والى حد ما جمعت ثقتها بنفسها وعرفت مين اللى بيحبها عشان هى صرصارة وبس

ومين اللى بيحبها عشان هى صرصارة وممكن تساعد ف أزمة أو رأى وبعدها تاخد صابونة
ومين اللى مش بينزل من زور ولابس ماسك على كل لون ياباتسطا ومع ذلك لازم صرصارة تكون كويسة وعسولة عشان ماما تحبها وتجيبلها شوكولا
وكمان عرفت ان الدماغ الصرصارى دماغ حر اصيل دهب عيار 36 ومش اى حاجة تليق عليه وان المستوى الصرصارى مش هينزل لبيع ملابس بسبعة ونص وتعالى بص لانه اللى اندفع فيه مش قليل
ولكن مع كل ذلك صرصارة لازالت وسط كل ماتكتبه من كلام يقال عليه بيسخسخ مالضحك الا انها تخفى وراءه خجل صرصارى من النوع الزائد عن اللزوم وايضا تقلل من الشأن الصرصارية لمنعها من الاصابة بعدوى الغرور..كفانا الله شره

بالنسبة للنشرة العاطشفية:
صرصارة اخدت مقلب معتبر والحمدلله ربنا سبب الاسباب عشان تعرف المعدن الاصيل من المسوس
 واستقرت على اعتزال وجع الدماغ دا والاخد بحكمة المعلم دعبس بتاع الانابيب واللى بيقول
نو مان نو كراى
ولكن واضح ان 2008 حبّت تصالحنى فابعتتلى قلب دهب مليان ياقوت ومرجان وصرصارة فرحانة اوى بيه وبتدعى ربنا انه مايصحيهاش من الحلم الجميل دا

بالنسبة للنشرة العالمية:
موجود هنا فى الارشيف الصرصارى اى خبطة سياسية دولية هزت الكوكب.. ولو فى اى حاجة ناقصة فهى بتقدم اعتذارها لان السنادى كان نشاطها التدوينى محدود يادوب مترين فربع متر

وفى الختام نتمنى للجميع عام (هجرى-ميلادى) سعيد مديد مفيد جديد لطيف ظريف خفيف على القلب والرئة
والسلام عليكم

ملحوظة:
كل سنة وانتى طيبة يابلاعتى.. عيد ميلادك عدا من شهر ..عقبال تمناشر سنة واحنا سوا مع بعضينا وعساسيل وامامير 





Saturday, December 27, 2008

نعـــى.... وقصيــدة

مساء النكد والقهر والسواد اللى مش ناوى ينزاح بقى ويورينا نور الشمس ومعاه فرحة الانتصار ولو حتى يوم واحد وبعدها نتنكد تانى
ماهو بقى مكتوب علينا نتحول من جيش صلاح الدين لجيش من المذلولين ومن الفئران المدفوسة فجحورها ومتغطية بالجبن والذعر والهوان

هو احنا هنفضل لحد امتى نتفرج
ونعيط لحد ماتنشف دموعنا ونستورد عبوات دموع معدنية من الخارج
وهنفضل لامتى نصرخ فى السما ومحدش يسمع صوتنا
هنفضل لحد امتى محبوسين فى القمقم دا, والقفل بتاعه مع الرؤساء والحكام والقادة اولياء امورنا اللى المفروض يراعونا ويحافظوا علينا وعلى كرامتنا اللى اتبعزقت وبتتبعزق فى الوحل كل دقيقة

خلاص..بقى دا السيناريو الدموى اللى اتعودنا عليه من اكتر من ستين سنة
ومن قبلها كمان
كل شوية يضربوا ويقتلوى ويدبحوا ويأسروا
واحنا نشجب وندين ونستنكر ونرفض وفنفس الوقت
بنبوس القدم ونبدى الندم على غلطتنا فى حق الغنم
.......أه..... الغنم
الغنم الوديع اللى الديابة بتوع فلسطين عمالين ياعينى ينهشوا فيهم وييهوشوا عليهم بالبمب والصواريخ المصنوعة بحديد مصدّى
ماهما الديابة بتوع حماس اللى سبقوا بالضرب وبالنار
وعلى رأى الغلبان المسكين اللى اتكلم باسم الجيش الاسرائيلى المقهور وقال لمذيعة قناة الجزيرة وهو بيرد على حماس:" ضربنى وبكى وسبقنى واشتكى"... قالها بالحرف الواحد
وطبعا عشان كدا احنا كمان ضربنا لان الديابة بتوع حماس خانوا العهد اللى كان بينا وضربونا على خوانة

طيب معلش حقكم علينا ..ماهو احنا نستاهل برضو
نستاهل اننا سايبنكم لبلاويكم ومصايبكم
سايبينكم على هواكم وبنساعدكم كمان على الجرم اللى بترتكبوه كل ثانية فحق اخواتنا

لا...أسفة انى اقول علي الفلسطيين اخواتنا
مانتو فعلا لو اخواتنا يبقى كان المفروض اننا نكون معاكم ونساندكم ونرفع عنكم محنتكم

أسفة اننا مش اخواتكم...أسفة اننا إديناكم ضهرنا ودايرين ورا الهيافات
ورا هز النواعم... ورا بنا الفنادق والملاهى..ورا بيع البترول والغاز الطبيعى للى ماصين دمكم علشان يشحنوا ويفرغوا رصاصهم في قلوبكم

أسفة ان كل متحدث باسم دولته العربية سايب المصيبة اللى احنا فيها وعمال يتكلم عن بطولات وشهامة زعيمه والمواقف المعادية اللى بيتخدوها ضد اسرائيل
ودايرين يهزقوا فى المصريين اللى لولا قضيتكم كان زمانا ملوك العالم.. ولولا السادات كان زمانا زيكم عايشين فى غابة اليهود
دلوقت بيفتكروا السادات وبيترحموا عليه بعد ماتهموه بالخيانة
ودلوقت بيهينوا فى مبارك ويهزقوه وبرضو يتهموه بالخيانة والتواطؤ مع اسرائيل
---------طب وباقى العرب فين لما احنا اللى خونة وولاد

انا بعتذرلكم باسم المصريين الغلابة المقهورين الفقرا اللى زيكم ومش لاقيين اللقمة الحاف ومع ذلك قلبهم معاكم وشايلين همكم
وياريت بإديهم حاجة يعملوها لانهم ببساطة مش قادرين يحرروا نفسهم .. وفاقد الشىء للاسف لايعطيه
أسفة اقولكم اننا كمان مغلوبين على امرنا
أسفة اقولكم ان مجرد دموعى ودعواتى مش هييجى حاجة جنب حجر بترموه فوش الدبابات
دا اللى بإيدى... دا اللى بإيدينا........ وحسبى الله ونعم الوكيل


****************************************************

-أشلائكم هدية كل عام-
قصيدة او مجرد كلام مش عارفه بس اللى اعرفه انه خارج من اشواك محبوسة فقلبى
فوق التلال المحتلة
يجلس ملك الظلام
يجتمع بطاولته الخفية
يستمع لمباركة الحاخام
ينتظر شروق الشمس
يترقب خروج الطلاب
انتهى وقت الدراسة
وحان وقت القتال
يستعد ليزين الشجرة
برؤوس وأشلاء الاحرار
النساء يوقدن الاوانى الفارغة
الرجال سلاحهم الاحجار
الاطفال يصرخون جوعا
والشيوخ يدعون الإله
يترقبوا لحظات الموت
يستعدوا لمفارقة الحياة
تُطلق رصاصة وتُرمى قنبلة
تزأر الدبابة بعلو الطائرة
هيا اسرعوا لجمع الزينة
اجلب لى هذه الذراع
وتلك القدم لتثبيت الشجرة
ورأس الطفل مكان النجمة
ولاتنسوا آبار الدماء
فهى نبع الاحتفال
بمرور عام آخر
من تواصل الاحتلال
فلنحتفل بزيادة الآلام
فلننثر رائحة الموت
فأشلائكم هدية الميلاد
أشلائكم هدية كل عام


Monday, December 15, 2008

شـــوز الوداع...وعجبى


الزمان
مش عارفة بالظبط بس افتكر من كتييير

المكان
احدى البيوت العراقية فى قبيلة بنى زيد القحطانية

مشهد واحد:
منتظر الزيدى يتناول فطوره ويحبس بالشاى العراقى
وبعدها يمسح فردتين الشوز الاسود بتاعه مقاس 43 ويلمعهم عالسنجة

وعلى انغام ام كلثوم:
فااااااااااااات المعااااااااااااااااد
وبقينا بعااااااااد بعاااااااااااااااااد بعاااااااااااااااااااااااااااااد
والنااااااااار الناااااااار بقت
دخاااااااااااان ورماااااااااااااااد
فاااااااااااااات المعااااااااااااااااد
ويرد عليها منتظر:
لاااااااااااا ياسومة المعاد مافتش هو صحيح فاضله شهر ويتكل من الرياسة لكن لسا فى تنتوفة نار مشعللة جوايا ولااااازم اطفيهاااااااا

مشهد اتنين:
الام فى وداع ابنها
يعنى يابنى لازم تعمل العملية الاستشهادية دى.. دانت لسا يادوب 29 سنة والحياة قدامك
مش كفاية ابن عمتك وابن خالتك واخو جوز بنت خالك اللى راحو فى شربة قنبلة
منتظر بيرد:
ياأمى انا فاض بيا الكيل خلاص وحتى لو لسا شباب .. اللى حصلنا وبيحصل فينا دا يخللى اللى عنده سنتين يشيب
الام بتنهيدة حارة مولعة ياعيني والدمع بيفر من عنيها:
خلاص يابنى روح ربنا يوقفلك فكل خطوة مؤيد ويبعد عنك شر المستخبى

مشهد تلاتة:
بعد ما تناول الكاوبوى الامريكى بشبش الغديوة المعمولة مخصوص عشانه والمكونة من فطيرة الدهب بالزتون الاسود المهبب
مع عصير البترول بالبلح العراقى
جه معاد المؤتمر الصحفى بينه وبين نورى الملكلك زير وزراء العراق
وبعد مارموا اجدع تماسى على الموجودين من صحفيين ومصوريين ..و بودى جاردات
بدأ الريس بشبش يتكلم ويادوب لسا جاى يقول:


ياجماعة انا مش عارف اقولكم ايه والله على التضحيات الجامدة والملاين اللى ماتت فى سبيل ان امريكا تعيش وتنغنغ من خيركم وخير العرب اللى دورهم كلهم جاى واحد واحد بس عشان احنا دولة نظام فاماشيين بالدور ياجماعة مش عاوزين لخبطة كله هياخد حقه من القنابل والمفرقعات وابو غريب وام جلامبو
وانا هنا عشان نعمل اتفاقية حرامية الامن بينا وبين العراق وهننقل الاف بى اى والسى اى ايه ومخابرات البنتاجون عندكم وكل دا عشان بياض عيونا.. قصدى سواد عيونكم

دا كله كان فى نص دقيقة لانه ملحقش يتهنى ببنص الدقيقة التانى ولقى خير اللهم اجعله خير فردة شوز اسود عيار 43 متلمعة بورنيش صدام للاحذية الفاسدة وطايرة فوق نافوخه




يامااااميييي..الحقنى ياعمو نورى العيال الوحشة بتحدفنى بالشوز..واااااااااء


ولسا جاى يصلب طوله من اول فردة لقى اختها بتحصلها ومالحقتش تخبط فوشه المسمسم المسبهل
بس لمست العلم ابو نجوم

ودى للى ماتو واتيتمو بسببك يا............


مشهد اربعة:
جراد من الحرس والجتت العريضة المنكعين تنقض كالوحوش المفترسة نحو الصحفى منتظر الزيدى وينهالو عليه باللكمان والضربات وجروه مثل البنى ادمين .. لانهم هما اللى بقوا ينجروا فى الزمن دا:-(


ونورى المكلكع يعتذر لبوش بالنيابة عن جميع العراقيين.. يعتذر لنفسه ياخويا ايش حشره هو فباقى مخاليق ربنا

وبشبوش المنفوش المسبهل المستعبط كعادته بابتسامته الباردة المستفزة وكأن اللى انضرب بيها دى وقية طماطم وبيضتين
يقول للجماهير الغفيرة:
انا كويس ياجماعة ماتقلقوش عليا.. دى جزمة وعدت

وبعدين اخونا دا شكله عاوز يلفت الانتباه وخلاص ..هاييجى ايه دا جنب المصايب اللى انا عملتها وحفرت بيها اسمى فى التاريخ
دول حتى فردتين مقاس عشرة لاراحوا ولاجم.. وانا بقولكم اهو انا مابحسش ومابتهددشششش

بس اللى ميعرفوش ان الجزمة دى مقامها عالى اوى عندنا والضرب بيها معناه غالى اوى برضو وبالنسبالى انا فرحانة انها مصابتهوش وانه نزل تحت عشان ماتخبطوش.. دا معناه ان الشوز دا مقامه اعلى من مقامك ياسى الامبرا-طور

واحد من ممثلين امريكا بيقولك بطريقة امريكانى شيك
have a nice vacation

واحنا كمان قولناها على طريقة منتظر


هذه جزمة الوداع يا.......بوش


واحب افكركم بالصورة دى اللى نشرتها فموضوع زيارة بوش لينا

دى زغروطة البلهاء
قلت اجيبها هنا لانه هو انسب واحد يزغرط فى المناسبة دى:-)
وماشربش الشاى...اشرب أزوزة انا

كلمتين جد بقى:
ياريييييت اللى يعرف يعمل لوجو عليه صورة حلوة كدا لمنتظر ومعاها كلمتين جامدين عشان نحطها فكل المدونات
الله يكرمكم عالاقل نفضل فاكرينه ونحييى ذكرى الحادث الجامد دا وماتبقاش شعلة حماس فوقتها وبعدها كله هيشد اللحاف وينام كالعادة
ياترى حد ممكن يساعدنى فكدا؟

Monday, December 8, 2008

بلغنى أيها الملك السعيد..ان النهاردة عيد




بلغنى ايها الملك السعيد
ذو الرأى الرشيد والعمر المديد
ان الولايات العربية المحتلة..(قصدى المتحدة متودوناش فداهية)

قد اصدرت مرسوما ملكيا بأن اليوم اللى هو الاثنين الثامن من ديسمبر بتوقيت الفرنجة
العاشر من ذى الحجة بتوقيت ابن سيرين
هو يوم عيد الاضحى
اى انه النهاردة عيد
اى ان عيد عدى علينا النهاردة


وسيجول البقاع المصرية والعربية لمدة اربعة ايام
فعلى السادة المقيمين خارج القارة الارضية مراعاة فروق التوقيت
يمكن العيد يعدى عليكو بعد بكرة واللا حاجة مانتو عارفين زنقة المطارات

وقد افاد مراسلنا انه يشم رائحة اللحم الضانى والللحم البتلو واللحم المشوى واللحم ابو فته
واستوقف مراسلنا ليرى رأى الجمهور فى هذه الظاهرة فقالو:
ياباشا دى زى مانت شامم كدا لحمة من النوع اللى بناكله مرة فى السنه واحيانا من كتر الزحمة ومن كتر الغلابة بنقف طوابيروكل واحد ينوبه نسيرة ونعمل عليها شربة نسيرة الخروف ونكسر عليها بصلتين


وعدى مراسلنا على احدى قرى محافظة الملوخية المصرية واندهش من سماع صوت الخرفان والجديان فى هذا الوقت من الزمن واللى كان ساعة عصرية
ولم يهدأ له بال حتى اكتشف الحقيقة وهى ان عجل من العجول اللى كانت هتندبح ثار وهال من هول هذه اللحظة الحاسمة فى تاريخ حياته ونطح ولد صغير ياعينى مش عارفه انا ايه اللى وقفه قدامه بس هذا هو القدر


فاجتمع جميع جزارين المنطقة وانهالو على هذا العجل حتى مزقوه اربا اربا وحتى انقطع نفسهم نفس نفس
وبعد ان اخدو ريست استكملو رحلتهم فى دبح باقى الضحايا

هذا وقد قررنا نحن صرصارة خان ان نكتب عن هذه الواقعة التاريخية
تقريبا لانى مش لاقيه حاجة تانية اكتب فيها

وبالنسبة للعيد فأنا ببذل قصارى جهدى عشان اشوف جملة تانية غير كل سنة وانتو طيبين

هقولكم زى ماقالت عصابه اكس:
السنجة فى الرنجة
والمورتة فقعر الحلة
والبرغوت فى النملية
والفيل فى المنديل
والخروف فى الحلة
وكل عام وانتم بخير


Tuesday, November 4, 2008

وإنه هو ...أوبــاما

هنا ال سى ان ان
.
.
صرصارة من محطة بلاليع نيويورك تحييكم وتنقل لكم هذا الحدث التاريخى

وربنا اللى يعلم مدى الجهد العميق اللى بذلته ومدى النيسكافيه اللى بلبعته عشان افضل مصحصحة واتابع التفاصيل المثيييييييرة جدا فى اول انتخابات امريكية اشوفها ببث حى مباشر ومن اول ماكانوا لسا بيقولو ياهادى
وبيرشوا مية قدام اماكن الانتخاب


ومن بين ال بى بى سى والإ بى سى والدى دى تى هقولكم ملخص للى تابعته بخبرتى السياسية المتواضعة:

فى اول اليوم الراجل اتصدم بوفاة جدته اللى ملحقتش تتهنى بنجاح ولد الولد وكان واضح انه هيبقى يوم شؤم ولكن شاءت الاقدار وربنا عوض زعل الراجل خير واهو فاز والحمدلله

والمنافس الراجل الطيب ماكين ابو 73 سنة وفعز شبابه ملحقش يتهنى باللحم المشوى اللى طبخه فبرنامج امريكى مشهور واكيد حصله عصر هضم بعد ماسمع النتايج


من صباحية ربنا والناس كلها مستنظرة النتيجة وكل ناخب راح ادلى بصوته وكان من ضمنهم طبعا الرئيس المنتخب ودخل ورقة التصويت فى الماكينة واللى بدورها قالت سانك يو

على السى ان ان ايضا كان فى متابعة لنتايج الولايات الامريكية المتعددة والتى تجرى على النحو اللى جاى:

هما 270 صوت مجموع اغلبية الاصوات اللى موجودة فى الولايات من 538 صوت تقريبا
اللى يعدى بالصلاتو عالنبى الرقم دا او يتسحوذ على معظم الاصوات هو اللى طبعا هيبقى الريس
349 هما عدد الاصوات اللى خدها اوباما
ماكين اخد 159
ودا لحد دلوقت لان فاضل اربع ولايات ماقالوش النتايج بس عموما هى اتحسمت زى ماهو واضح


والاصوات دى بتكون عدد المقاعد اللى بتشغلها كل ولاية فى المجلس الكبير بتاع الولايات كلها
يعنى مثلا لو ولاية كاتشب عدد الكراسى تبعها 11 واكبر الاصوات فيها رشحت اوباما يبقى اوباما كدا اخد الولاية دى فجيبه وهكذا دواليك

وداخل استوديو السى ان ان تشوفوا المحللين وهما مش سايبين فتفوتة فكل حركة بتحصل وبيحلولها بشكل منظم هادىء..منطقى..ومحايد..وحتى لو الاحتمالات بفوز اوباما كبيييييرة لكن الكل كان بيقول ممكن تحصل مفاجأت فأى وقت

وكمان التكنولوبيا المتطورة جدا فى شاشات العرض داخل الاستوديو وتشوفوا المذيع عمال يحرك فى الشاشة بصوابعه ويشيل دا ويحط دا ويجيب دا ويعلم على دا.. والويب سايت شغال على طول مع اى رقم يتحط جديد تلاقيه عالموقع
والحركة الجامدة بقى واللى اول مرة تحصل فى التاريخ زى ماقال حضرة المذيع تقنية الهولو جرام
HOLOGRAM
واللى اتنفذت مع المراسلة جيسيكا يلين من شيكاغو
Jessica Yellin

وتم نقلها للستوديو كأنها موجودة فعلا قدام المذيع وبتكلمه.. ولا كأننا فيلم لستار تريك وكرروها تانى مع واحد من مدعمين حركة اوباما بس مش فاكرة اسمه ايه .. المهم جيسيكا لان افتكر ان اسمها هيتشهر اوى للى اخد باله وشاف دا فى التلافزيون وقلت اشوفه كدا نزل عاليوتيوب.. وقد كان






- وباراك حسين اوباما المولود فى هاواى من اب كينى وام امريكية بيضاء من مواليد اغسطس 1961

- ابوه خلع وعمره سنتين ومامته هى اللى ربته واتجوزت بعدها طالب اندونيسى وراحوا جاكرتا
- دخل مدرسة اسلامية مدة سنتين وبعدها اعتنق المسيحية والتحق بعدها بمدرسة مسيحية كاثوليكية

--> وهو دلوقت الرئيس رقم 44 واول رئيس امريكى من اصل افريقى ياخد كرسى الحكم
يعنى نقدر نسميه ابو اربع واربعين هلى اسم ام اربعة واربعين كدا


وطبعا لما النتايج ظهرت الناس هاااااصت والدنيا ولعت .. دا من جهة اوباما



من جهة ماكين بقى الناس كانت مذبهلة ومش قادرة تصدق النتايج اللى شايفاها قدامها عالشاشة لحد مالراجل بتاعهم طلع عالمسرح

ان-- ااااااااااااااااااااان
ماى فيلو امريكانز.. يعنى الجدعان والحبايب


انا وبكل اسف ببلغكم اننا انهزمنا فى المعركة وان الراجل اللى عامل فيها شباب دا هو اللى بلع الكرسى

ييييييييييييييييييييييييييييييييييييييييييي.. دى اصوات استهجان المواطنين


لا ياجماعة انا مش عاوز كدا منكم وكفاية انكم كنتم جنبى واهم حاجة مصلحة امريكا.. امريكا اعظم أمة فى العالم

تررررررررررررررررررررراااااااااااااااك... تصفيق حاد

وسارة ياعينى جنبه الدموع محبوسة فعنيها ومدرياها بنضارتها اللى تسوى شىء وشويات وكانت قربت تمسح دموعها بكم البدلة اللى يسوى شىء وشويات برضو..
اللى مش واخد باله دى الاخت سارة بالين نايبة ماكين واللى صرف عليها لوحدها دم قلبه

وكان زمنها اول نايبة رئيس تكون سيدة ويمكن كمان كانت تبقى الريس لو ربنا اخد ماكين.. تخيلو؟؟؟؟؟

ونييجى بقى للكبير اللى فوزه ملوع الدنيا دلوقت ودخل علينا برزانة وتقل وهو بيتمشى على المسرح المخصص لخطابه فى شيكاغو-ايلينوى مكان اقامته

وقال.. ماى فيلو امريكانز.. يعنى الناس اللى كلها حماس


نهنىء انفسنا بالنجاح الامريكى العظيم واحب اشكر كل اللى ساهم فى النجاح دا واحب اشكر المعلم ماكين انه اتصل بيا وهنانى واحب اقوله هى الدنيا كدا يوم ليك ويوم عليك
واحنا تعبنا اوى ياخوانا ونفسنا البلد دى تتحسن واننا نتطمن على عيالنا اللى بيحموا بلادنا من الاعداء والملطوعين دلوقتى فجبال افغانستان وفصحارى العراق
وزى ماامريكا اتغيرفيها كتير خلال المية وستين سنة اللى فاتوا محدش عارف الايام اللى جاية ايه اللى هيحصل فيها ومحدش عارف لما بناتى يكبروا هيلاقو ايه جديد حصل فبلدهم

وانا بقول ان اى حد عاوز الحرب احنا هنحاربه واللى عاوز السلام احنا هنرمى عليه السلام وهنقف جنبه ونعزمه على قهوة امريكانى فى الخمسينة


مش عارفه ليه افتكرت السادات لما كان بيقول وياايتها الام الثكلى املؤا الارض بتراتيل السلام.. الله يرحمك ياساداااات

ودا حتة من اوباما سبيتش اللى لقطت رزقى وعرفت اكتبه فأخر الخطبه المؤثرة والتى ابكت دموع الكثير من المرهفين الامريكين

and to those who still doubt of democracy in America
and that every thing is possible in America
today there is the answer

this is our people this is our time

that while we breath
e,we hope
yes we can,
,,, thank you
God bless you

and may God bless the United States of America

والناس بقى قعدت تقول تعيش الولايات المتحدة الامريكية



راح هو قايلهم .. مش عاوز هتاف خاص.. انا عاوز هتاف عام

**تعيش القارات السبع الامريكية**

فكرنى هنا برضو وبالذات لما خلص الكلام وقعد يسلم هو ومراته على النايب جوزيف بايدن هو والمودام
كان مشهد مؤثر مع الخلفية الموسيقية اللى عاملة زى فيلم الاندبيندنس داى
واضح ان ستيفن سبيلبيرج كان المخرج النهاردة برضو

ومش عارفه ليه قارنت فعقلى الباطن بين الانتخابات دى والانتخابات اللى بيعملوها فكفر الكوسة المحروسة

العمدة الالى يوزع ورق اللحمة على الناس وكل واحد يبصم يديلة حتتين عضم او جنيه مخروم

ومفيش حد اساسا داخل فى المنافسة لانه اللى بيستجرى يتنفس بيروح ورا المريخ يصيفله قرنين تلاتة هناك


وفرز الاصوات بيعدى عليها خمس ايام مش خمس ساعات.. مع ان كفر الكوسة اصغر بكتير من كفر امريكا


والموقع الرسمى الانترنيتى لكفر الكوسة المحروسة اللى المفروض انه ينقل اول بأول النتايج تلاقى عليه نتايج انتخابات الملك الفاروق فى القرن قبل الميلادى

والمراسلين اللى فى التلافزيون تحمدوا ربنا انهم بيعرفوا يكلموا المذيع مع بعض من الاشياء مثل.. لم اسمع ماقلته ارجو اعادة المحاولة

مش كفر امريكا المراسل تلاقيه فوشك كأنك معاه وقاعدين على قهوة البيت الابيض

ايييييييييييييييييييييه ياكوسة يامحروسة انا اتقهرت فعلا ماللى شفته ويارب الاقيكى بتمسكى العالم بأيدك
وتبقى انتى اللى اعظم أمه فيه


اروح انا بقى للطعمية اللى ماما عملتها بمناسبة فوز اوباما.. طعمية بيتى سخنة مولعة بالسلطة والفلفل
اتفضلو معايا:)


Thursday, October 30, 2008

قصة قصيرة..وربنا يسامح اللى كتبها

كان الرجل قد أوشك أن يلقي بنفسه في البحر لولا انه سمع
صوتا يصيح به قائلا:
أيــها المجنون قـــف

وأيقن انه لن يتمكن من الانتحار بهدوء وتوقف الرجل مرتبك
وشاهد رجلا عجوزا يتقدم منه

وينهال عليه بعبارات التأنـيب ليأسه
من رحمة الله ومحاولته الانتحار

ثم سأله :
مالذي يدفعك الى الانتحار يا رجل ؟

فقال :مشكلة عائليه معقدة
فرد عليه العجوز
وهل توجد مشكلة دون حل... ما هذه المشكلة ؟

وبدأ الرجل يروي قصته قائلا :
تزوجت سيده ارمله ولها فتاه مراهقة وعندما بلغت الفتاه
سن الرشد رآها ابي فأحبها وتزوجها فصرت صهرا لابي كما ان ابي اصبح في مقام زوج ابنتي
واصبحت انا (حماً) لابي لان زوجتي حماته

ثم انجبت زوجتي ولدا لي
فاصبح الولد سلف ابي
وبما ان ابني هو اخو زوجة ابي التي هي بمثابة
خالتي.. صار ابني يعد خالي ايضاً

وحدث ان وضعت زوجة ابي طفلا يعد اخي من ابي وفي
الوقت نفسه هو حفيدي
لانه حفيد زوجتي من ابنتها وبما ان زوجتي صارت
جدة اخي فهي بالتالي جدتي وانا حفيدها
وهكذا اصبحت انا زوج جدتي وحفيدها في الوقت ذاته

ونظرا الى انها جدة اخي فانا اصبحت ايضا جدا لاخي
وبناء عليه اكتشفت انني اصبحت جد نفسي او حفيد نفسي
لانني .....


وهنا قاطعه الرجل العجوز

قائلا: كفاية... كفاية...


وقام العجوز بدفعه للبحر قائلاً:
تييييييييييييييييييييييييييييييييييييييييييت


(اللى عارف الحدوتة اكيد عارف قاله ايه واللى مش عارف يخمن بقى انا مليش دعوة)

انا وصلتنى الحدوتة دى فى الايميل ونقلتها زى ماهى لانى الحالة اللى انا فيها اليومين دول هى نفس حالة الراجل اللى اترمى فى البحر مع اختلاف فى الظروف والجوابات

حياتى اصبحت معقدة ومتقوقعة ومتخونقة ولادايم الا وجه الله

اللى لسا فاكرنى يدعيلى ينوبه ثواب فيا


Monday, October 20, 2008

صدق من قال ... بحبك ياحمار

اكييييييييييييد بحبك ياحمااااااااااار وبقولها وبأعلى صوتى


طالما الحمار بقى هو سندنا ودرعنا الاقتصادى وسلاحنا لتقوية صادرات بلدنا.. وتحيا مصر

كنت فى جلسة صفاء مع الجريدة وقرأت خبراً سخسخنى مالضوحك
قال اييييييييييييه الحمير المصرية بقت مطلب دولى وبالاخص يعنى.. صينى
سيبكو من حكاية الصين دى لانه اصبح من المتعارف عليه إنها راشقة حتى ف جحر النمل
وانا بقى ناوية احلل الخبر دا من منطلق اقتصادى واجتماعى وسياسى وتهييسى

من المنطلق الاقتصادى ايها الاخوة والاخوات
هذا الكائن الغلبان المغلوب على امره تخيلو .. تخيلو هيستخدموا جلده فإيه
ايييييييييييييييه ايييييييييييييييييييييييه
تصنيع شوزات وشنط؟......... نو
دواسات تتحط على عتبة البيوت ويكتبو عليها ويلكم ؟.............. نو
ناويين يعملوه رمز من رموز الكفاح المسلح؟........... احتمال بس نو برضو

قال ايييييييييييييه .. ولامؤاخذة يعنى.. هيعملو منه منشطات
واعتقد انهم بيعملو كدا عشان الكام ترليون صينى مش كفاية وعاوزيين ينتجو صنيين اكتر
لتوزيعهم على جميع دول القارات السبع

واكيد بعد نجاح الجنان دا احتمال الصين تصدر هذا العقار ويتم استبدال الفياجرا بال حماجرا

وفى نقطة كمان شديدة الاهمية.. اكتشاف عظيم لأهمية ألبان الحمير واللى الصينيين برضو بيبلبعوها لكثرة غناها بالبروطينات

ولحمها طبعا غذاء كامل الدسم.. دول بيقزقزو الصراصير ,, جت عالحمير يعنى؟

ومن المنطلق الاجتماعى.. للجانب الصينى برضو.. لمّا يزيد عدد السكان كدا مش هيضطروا للهجرة فى افراد..
الهجرة هنا هتكون فى جماعات.. يعنى كل صينى هيغادر ومعاه المدام والاولاد


وينزلو يستوطنوا البلد ويكوّنوا أقاليم صينية شعبية.. ويبقى اسمها جمهورية الصين المتشعبة

والجانب السياسى زى مانتو شايفين.. زى الفل يامعلمى طالما فيها تصدير يعنى عملة صعبة يعنى خير لينا كلنا
واعضاء مجلس الشعب بقى لامؤاخذة يعنى يخبطوا راسهم فى الحيط
هما صحيح يتسائلون اين تختفى اللحوم الحميرية بعد سلخها لكن مش دا المهم طبعااااا

وعلى الجانب الاقتصادى المصرى.. هناك استغلال كامل للحمار

- فعز شبابه يجر الكارو


- فى سن اليأس يندبح وياكلوه الاسود والديابه اللى فى الجونينة يااااولدى

- وبعد الدبح الجلود تهاجر الصين فى مهمة رسمية سامية

بس الموشكلز البسيط جدا .. من وجهة نظر المسئولين.. والكبير جدا.. من وجهة نظر جمعية الرأفة بالحمار
ان دا فيه تهديد للحمار بالانقراض.. يعنى خلاص هنفقد هذا الكائن الاغلب من الغلب اللى تبص فعنيه تلاقيها كلها طيبة وقهر وشكوى من ظلم البنى ادمين


ومش هنسمع تانى صوته العذب اللى بيفكرنا بأيام الزمن الجميل.. اااااااخر الحناجر المحترمة.. عااااااااااااااااا


دا غير انهم اكتشفو ان الجلود اللى بتتصدر كتيييرة جدااا بالنسبة للحمير المذبوحة ظلما وعدوانا

يااااترى يااااهل ترى اين تختفى هذه الللحوم؟؟؟
.
.
سؤااااال من شدة صعوبته اجابته تاهت وبدور عليها


ااااه على فكرة ساندوتش الفاهيتا اللى باكله دا حلو اوى.. صينى صينى يعنى
وتلاقى نسيرة اللحمة فيه اطول من رغيف الفينو.. ناس كرما بصحيح

اوصيكم تاكلو فاهيتا هتعجبكم جد...هأ.... جد... هأ.... جدا
حااااأ حاااااااأ حااااااااااااااأ

ايه دا انا جرالى ايييييييييييييه.. اين ال 911 ؟
الحقوووونى بالداكتووووور

للاسف عندك حالة شوحار حااااد... ياريت ماتكاليش لحم حميرى مش عليه ختم الوزارة بعد كدا


Monday, October 13, 2008

حالة غيبوبة واضحة..نرجو المساعدة

زى ماهو واضح وضوح الشمس فعز الليل انى بقالى فترة مش بدون

وانا عن نفسى مليت من كدا وطهقت وزهقت واتخنقت وانتحرت ودا العفريت بتاعى اللى بيكتب البوست


انا مش هارغى كتير انا بس عاوزة كل اللى يشوف البوست دا يكتبلى فى التعليق اخر المستجدات واهم قضية او موضوع شاغل باله دلوقت
لانى فعلا حاسة انى مش عارفه حاجة فأى حاجة ودى حاجة غيظانى جدا
ممكن اقرا الجرنال او اشوف العاشرة مساءا بس الاخبار مالمدونين بيبقى ليها طعم تانى بالكاتشب والمايونيز

وفى تنويه هام وافتكر ان الكل عارفه بس زيادة توكيد

جروب كلنا ليلى عاوزين الناس تشترك وتفضفض وياترى مين اللى شايفة نفسها ليلى ومين اللى مش عاوزة تكون ليلى

ويامكتر الليلات فيكى يابلد

دا إعلان عن الحدث التدوينى
والمينز برضو اكيد ليهم حق المشاركة بدون ادنى شككك


موقع كلنا ليلى

مدونة كلنا ليلى

Sunday, September 21, 2008

شخلعة سكووول

وتانى تانى تانى..تيررارارارا..راجعين للكتب تانى.. تيررارارارار.. للدرووس وللشخابيط من تاااانى من تاااااانى


انا بهدى الاغنية المعبرة الشعرية دى لكل اللى استقبلوا عام دراسى جديد ولكل اولياء الامور اللى قرّبوا يبيعوا الحديدة اللى باقيلاهم من طوفان المصاريف

وافتكرت فى هذه الاثناء الخبر اللى قريته عن دخول الراقصات فى مجال التربية والتعليم وعن مدى التطور العظيم فى الحاجة الساقعة اللى بتعيشه مدارسنا فى هذه الايام

وعلى الرغم من الاعتراضات التى طالبت بوقف هذه المهزلة الوسطية.. الا اننى فكرت فيها كدا وقلت طالما دخلوا المدارس لاداء واجب وظيفى وهو الترويح عن الطلبة و
زى مابيعملوا خير وبيفتحوا بيوت وبيعملوا موائد الرحمن يبقى من حقهم شخعلتن وتقسيمن ان يكون هناك صرح تعليمى شامخ لتعليم..استغفر الله العظيم.. الرقص

فاأنا فكرت كدا ومخمخت ورسمت مشروع سكوول لتعليم الرقص البلدى على واحدة ونص للتلاميذ علشان يبقى الرقص منه فيه ومايستوردوش حد من بره ويعملوا مشاكل مع الصحافة والتلافازيون

نيجى لتصميم المدرسة

هيبقى عبارة عن طبلة بلدى مقلوبة وبتكييف مركزى من سقف الطبله

والديسكات هتبقى على شكل بيانو وفيه زراير للمشاريب

والكتب هتبقى موديلات مصممة على حسب نوع كل رقصة وتصنيفها.. كاريوكية او جمالية اوبديعية او عصرية

ونماذج الرقصات والهز على حسب الامكانيات وطبيعة كل هيكل من هياكل التلاميذ

والتدريب العملى هينقسم الى قسمين
تدريب داخلى هيكون فيه شرايط فيديون وسى دى هات لاجمد مطربين شعبيين.. حسن بسكلته.. بعرور ابو حنطور.. عديلة شخلع
والتدريب الخارجى هيكون فى الملاهى الليلية على ايدى مدربين رفيعى المستوى وعندهم دقة واداء عالى على واحدة ونص لايزيدوا ثانية ولايأخروا ثانية

والامتحانات هتكون بعد منتصف الليل وهتيجى عريبات مخصوص توصل التلاميذ لأماكن الامتحانات المخصصة ليهم.. وبفكر اعملها فى كباريه من بتوع شارع الهرم.. الناس دى خبرة بجد

الشهادات بقى هتكون عبارة عن بدل رقص وكل طالب هياخد نوع بدله غير التانى على حسب الدرجات اللى حصل عليها

يعنى مثلا لو جاب امتياز هياخد بدله من غير قماش
ولو جاب جيد جدا هياخد بدلة قطعتين
ولو جاب جيبد هياخد بدله مفتوحة على خفيف
ولو هيشيل مادة الرقص يبقى ياخد جلابية

ادى ياجماعة التخطيط التكتيكى اللى فدماغى .. مش عارفه بقى هل فى حاجة ناقصة واللا كدا كله فى السليم ونبدأ الافتتاح على دقت الصاجات

ودقت الصاجاااااات فى عز اللليييييييييل.. عظمة على عظمة ياستتتتت

وكل عام وانتم بخير

Sunday, September 14, 2008

عملت ايه امبارح

دا مش سؤال
دى المشاهد اللى عدت عليا خلال الاربعة وعشرين ساعة وناوية اكتبها
اللى عاوز ياخدله تعسيلة واللا يشربله كوبايتين شاى علشان المشوار طوييييل طوييييل ياولدى وربنا يصبركم بقى:)

امبارح السبت السادس من اكتوبر التاسع من شعبان
كنت مستنية اليوم دا من ساعت ماعرفت بموضوع مستشفى ابو الريش لانى رحت هناك قبل كدا وفعلا الناس دى حالتهم تقطع القلب وتشرحه وتفرمه كمان
انا ملحقتش اجمع تبرعات بس حاولت على اد ماقدر.. عندى فى الشغل نزلت للراجل الكبير المسئول اللى بيقولو عليه رئيس مجلس الادارة.. عرفته بنفسى بم انى عضو جديد فى الحزب وقلتله عالموضوع
رد عليا: طيب اتفضلى انتى وانا هرد عليكى على طول
قلتله: طيب بعد اذنك ياريت قبل الساعة اتنين علشان انا همشى
قاللى: لااااااا انا هرد عليكى حالاااا
وطبعا دلقنى ولا كأنى ماشية وراه فى الشارع وبقوله انا بجرى على يتامى يابييييييه
ناس طيبين اوى هنا الصراحة وبيحترموا كلمتهم اوى زى مانتو شايفين
المهم مافقدتش الامل وقلت فى ناس جاية تاخد كورس دلوقت لما اقول للميس يمكن قلبها يحن
هى كمان قعدت تدينى محاضرات ولازم نتحرى الناس اللى بنديلهم الصدقة وممكن اهالى الاطفال يطلعو مدمنين ياخدو الفلوس يشربو بيها واللا بالذات المستشفيات دول حرامية ومن كتر مابيشوفو عيانين مابقوش يصعبوا عليهم
معلش انا صدمتك بس عشان انتى لسا صغيرة ومتحمسة.. عموما خدى بس لو هاتجيبى بيهم ادوية اوكى

بس بصراحة عملت معايا حركة جدعنة وكلمتلى دكتور صيدلى عشان اروحله اخد منه الادوية وبصراحة لما رحت عملولى تخفيض كمان ربنا يكرمهم.. هو صحيح الادوية كانت فيها اسامى غلط كتير ولخبطت فيهم وهاروح ابدلهم بعد ماجبت الاسامى الصح بس كله يهون
المهم ركبت المترو وابتديت اقابل الزملاء نااافر ناااافر
وكان فى ناس جديييييييدة كتييييييييييير وناس مش مدونين.. العدد كان ماشاء الله كبير اوى بيقولو اكبر من اى تجمع حصل قبل كدا
وبعد مارحنا بشوية العصر أذن فقلت للبنات ياللا نصلى قبل الوقت مايسرقنا
رحنا صلينا وقبل مانمشى لقيت الامام بيقول: صلاة الجنازة على طفل
الجملة دى مش راضية تطلع من ودانى.. ربنا يصبر اهله ويشفى كل المرضى
كان نفسى اصلى بس استنيت الامام يتكلم ماسمعناش حاجة وفى الاخر اتضح انهم خلصو صلاة الجنازة

رجعت تانى للمستشفى وكانو منظمين الموضوع وطلعنا على مجموعات
انا طلعت عشان انزل:).. لانه كان عندى برد وخفت ادخلهم وهما مش ناقصين اساسا
بس كان ايه بقى ولاتقولو كائنات فضائية احتلت المكان.. الناس كلها عمالة تبص علينا واللى تيجى تقول انا بنتى تعبانة بكذا واللى يعدى رايح جاى علينا ويقولنا الجملة الشهيرة جدااا: كل سنة وانتو طيبين.. واللا الامم اللى كانو واقفين عند السور.. الواحد مابقاش عارف مين فيهم اللى محتاج فعلا ومين اللى بيمثل
الواحد حس انه لو معاه ملايين حتى مش هيكفى الناس دى كلها

وفى الاخر اتجمعنا قدام المستشفى واستنينا نروح الفطار الجماعى فوسط البلد
كانت لمة جميييلة جداااااا.. مع انى مليش فى المشويات الخارجية دى بس كله يهون فى سبيل الوطن التدوينى:)
لما خلصنا قالو هنروح نقعد على قهوة فوسط البلد.. الشوارع هناك فااااضية.. ماهو بعد الفطار بقى على طووول لسا الناس ماهضمتش
عديت على ميدان طلعت حرب وافتكرت عادل امام وهو بيقول.. احنا بقينا فى زمن المسخخخخ
الكلمة الحكيمة الوحيييدة اللى سمعتها مالراجل دا

بعد ماتمشيت شوية وهضمت الاكل ركبت المترو وروحت
ولحقت اخر جزء من صلاة التراويح واستنيت الشيخ لما طلع من المسجد علشان كان فى سؤال واقف فزورى
قلتله عن الميساية اللى ادتنى محاضرة قبل ماتساهم بالتبرع
وقلتله ليه الناس بتفترض سوء النية.. ماهو الواحد لو بالشكل دا يبقى مش هنساعد حد
قاللى لا طبعا احنا بندى الصدقة وبنفترض حسن نيه المحتاج
وضربلى مثال: قاللى فيما معناه لو واحد بيبع عنب .. اكيد هيبيع لكل الناس لكن لو عرف ان فى واحد بياخده يصنع منه خمور وبيرضو بيبيع له يبقى ياخد وزر

بعدها رجعت البيت ودماغى مشحونة بكل المشاهد اللى حصلت

دى على فكرة مش تغطية صحفية لليوم.. امبارح دا بصرف النظر عن التجمع وزيارة الاطفال صحصح حاجات وافكار كتير جوايا.. هى ايه مش قادرة احددها بصراحة:)

النهاردة مش عارفه مالى ولا فرحانة ولازعلانة.. يمكن من كتر التفكير فى حاجات كتيرمش عارفة احدد
وختاماً احب اقدم خالص الشكر والتقدير لكل من ساهم ولو بكلمة طيبة فى هذا العمل الخيرى ونلتقى دائما ان شاء الله على خير
"كانت معكم صرصارة العضو المنتخب عن دايرة حزب بلاليع الكاهرة الكبرى"

Sunday, September 7, 2008

فاضل ايه فيكى يامالطة

مالطا دى حتة ارض طوييييييييلة عرييييييييييييضة يجى متر فمتر كدا
الناس اللى ساكنين فيها شوية صغيرين خالص ييجى تمانين تسعين مليون اعصار --كلمة نسمة هتبقى صغيرة اوى عليهم
ومنهم اللى ساكن فى فيلل واللى بيستلقى فى صفيح مصدى واللى بانيله بيت عالجبل

اووووم اييييه خير اللهم اجعله خير واذ فجأتن السما مطرت حجر صوغنون خالص دلعو كدا وكل حجراية مفيش اد قولو بيتين فبعض بس

تعاول نتخيل مع بعضينا اللى ساكن فى الفيللا هيعمل ايه ساعتها
هيخلع على اول طيارة
طيب واللى بيستلقى فى الصفيحة المصدية
هيخلع بالصفيحة على اى حتة تانية
واللى بيته عالجبل
هيتهد فوقيه هو واللى معاه واللى مع اللى معاه واللى مع اللى مع اللى معاه
حاجة كويسة خالص

والحكومة المالطية تتميز بسرعة الاداء والدقة فى انجاز المهام الصعبة والمستحيلة والالترا مستحيلة
فأول ماسمعت ان فى كام زلطاية وقعو مالجبل اللى كانوا شغالين فحت فيه قامت جرى مالنوم شالت اللحاف وعملت تمارين الصباح وتسخين لجميع اعضاء مجلسى الشعب والشورى وحضرت اكل الفطار بم انها هتبقى مشغولة فى انقاذ ابناء مالطة المدفونين تحت الانقاض

وبعد ماحضرت اكل الفطار وحطتة فى التلاجة عشان مايبردش نادهت على العساكر عشان يضربوا ويقفشوا الناس اللى هتتخانق وتدعى عالبلد وعاللى خاربها

فات قولو ييجى خمس ست سبع ساعات يااادوووب على مالحكومة فردت طولها وقامت.. وكااااااااانت المفااااجأة
الناس مختفية تحت الصخور وشغالين بالموبايلات انجدوناااااا الحقونااااا.. وما من مجيب.. اصل الحكومة كانت مشغلة ام بى سريس على اغانى رمضان ومعلية الصوت عشان تعرف تتمزك.. هتمسع ايه واللا ايه الحكومة فاضيالكو هى اياك

كل دا والناس عمالة تتخنق وتموت وولا الات نافعة ولا مجانيق ولا قوات خاصة ولا حتى الالات حشوا الاسنان

ايييييييييه ولادايم الا وجه الله.. ماهو الذكاء له احكام برضو
من كتر الذكاء سايبين اراضى ربنا الواسعة وعاوزين يزودوا مبانى عالجبال
من كتر الذكاء برضو سايبين الناس اللى المفروض انهم ارقى مخلوقات ربنا تموت وتتحرق وتتخنق وتتفعص وتغرق واهو كله توفير .. امال يعنى يسدوا الافواه الجائعة دى منين
وطبعا برضو من كتر الذكاء الخارق العالم كله كان مهتم بالحدث المأساوى دا.. بالنسبالهم مأساوى.. بالنسبة للحكومة المالطية خير وبركة

على جنب المواقع الاخبارية تلاقى متعلقات اخرى لاخبار قديمة عن كوارث متشابهة حدثت فى مالطة زى
قتلى وجرحى فى تصادم جديد للقطارات بمالطة
ارتفاع عدد ضحايا عمارة الاسكندرية المالطية الى 29 قتيلا
تبرئة مالك العبارة المالطية السلام 98

مالطة اتخربت ومش فاضل فيها شبر واحد عليه القيمة.. واللى عالوش دا قشرة ملمعينها عشان نكسر بيها عين اللى بيحقدوا علينا.. على ايه ياحسرة

ونييجى للبشر اللى بيوتهم اتخربت واهاليهم ماتوا ياترى الحكومة المالطية ناوية تعمل معاهم ايه
انا بقترح ان الفلوس اللى ناويين يدفعوها لأخونا المالطى المحبوس ظلما وقهرا وعدوانا وتخليص حق
انا من رأيى يعنى انه يستعوض ربنا فى الاتناشر مليون اللى صرفهم عالغزية اللى اتقتلت
ويروح يبوس راس الكبير عز ابن وز
ويتصدق بكام مليون اورر حلوين كدا للغلابة اللى اتشردوا فى ارض مالطة
او يديلهم كام بيت مالبيوت اللى ناوى يعملها اهو ينوبه ثواب

وهكذا هو الحال فى مالطة.. كانت حلوة وبنت ناس ومتنغنشة.. صابها الفقر والذل والسحابة السودا

يامالطة الف حسرة عليكى
قتلوكى وخربوا اللى فيكى
والكيل طفح عندنا لكن
قلبنا محروق عليكى

Friday, August 22, 2008

هذا هو الموجز.. واول حاجة فيه.. وحشتونى جدااا

السلاااااااااااااااااااام عليكممممممممممم
ايوة هى انا صرصارة.. مش مصدقة نفسى انى فاتحة المدونة بكتب بوست جديد

يااااااااااااااااه الدنيا دى مابتديش الواحد كل حاجة... كان نفسى ابقى معاكم كل يوم واتابعكم دايما واعرف ايه الجديد معاكم وفى الدنيا كلها
انا اساسا لو اطول اكتب كلمة مدونة جنب الجنسية فى البطاقة هعملها


واحب افرحكم واقولكم اولا انى اشتغلت يامينزززز الحمدلله .. وطبعا الشغلانة فى القاهرة تحديدا مصر الجديدة يعنى المنوفية طلعت اوت برضو ادعولى ان ربنا يوفقنى فيه لان بلدى واقفة فزورى برضو عشان خاطر المسافة والمواصلات

يعنى انا داخلة على منعطف تاريخى واحتمال يكون مطب واتكعبل فيه بس الحاجة اللى مصبرانى انى هكون فى القاهرة مركز الاحداث ومركز التدوين يعنى ان شاء الله لو قدرت انى احضر اى مقابلة ليكم زى حفلة توقيع العدد التانى من كتابنا اللى هتكون بكرة
وانا ان شاء الله هاحضر... ياااااااااااه بجد ماتتصوروش مفتقدة كل حاجة فى التدوين
انا قلت اكتب البوست دا اسلم عليكو واهو بالمرة اعلقلى شوية على حاجات حصلت..انا مش عارفه سبت نفسى مالكتابة كل دا ازاى.. مع انى فى بوستات مكتوبة وجاهز عالنشر بس حتى مالقيتش فرصة انى ادوس على زرار
publish

ماعلينا
اول حاجة فى الاحداث البلدية المحلية.. قانون المرور واللى بسببه قعد السواقين فى البيت وباعوا عربياتهم واحنا بقينا نتنشق على عربية حنطور ولو فى عربية الحمدلله بقو يتأمرو علينا ويسيبونا ملطوعين عالموقف.. نفسى افهم ليه

الحدث اللى بعده.. حريق مجلسى الشعب والشورى بصراحة الجملة دى حكمة فعلا: ومن اعمالكم سلط عليكم... مش هى صح كدا واللا ايه
وفى اعتقادى ان حد من النواب الافاضل كان مولع سيجار او بيشرب شيشة بس كان نعسان شويتين تلاتة فساب السوجارة لحد ماوقعت وشبكت فى الكراسى اللى حواليها وطبعا بم ان باقى النواب الافاضل برضو كانوا نايمين فامحدش حس بيهم

ياللا اهو كله فى سبيل الوطن

والحدث التانى بقى وهو حدث رياضى دورة الالعاب الاولمبية
الصين بصراحة اثبتت انها تضرب باقى بلدان العالم بال... وتقعد مطرح اجدعها تخين فيها واعتقد ان اللى اتكبسوا كتير اوى ومصر كالعادة عمالة تنفخ فى الفراعنة لحد ماهايطيروا ويرجعولنا بالزيرو.. بس خير تقريبا خدنا كام ميدالية

والاحداث الخارجية
سمعت ان روسيا مولعة الدنيا بس للاسف معرفتش تفاصيل.. اهم حاجة انى الاقى مرتبة السرير وانام
بس امريكا ام قلب حنين عرضت على مش عارفه مين كدا قولو معايا انها تبعتلهم درع مسلح قوى من الجنود الامريكان وهما ماصدقوا وفرحوا اوى وكان ناقص يبوسوا ايد عمنا بوش.. باسته عقربه

والحدث الفنى والادبى بقى وفاة اوكسجين الانتفاضة والقضية الفلسطينية.. الراجل اللى عيشنا معاه مأساة شعبه وكافح عنه لاخر يوم فعمره ربنا يرحمك ياشاعرنا الكبير.. محمود درويش مش هيتعوض بجد.. ومش اى حد نقدر نقول عليه انه مش هيتعوض:(

فى مجال الفنون بقى فيلم احمد حلمى ... عيطنى لانه بيكلم النفس اللى جوه كل واحد.. يمكن لانى زيه بتخيل ناس على طول وبكلمهم.. انا عندى انفصاااااااام:) الراجل دا عبقرى ماشاء الله واهم حاجة ان افلامه نضيفه لو عرفت ادخل الفيلم دا تانى هدخله

وبالنسبة اللاغانى.. المطربين دول يروحو ينامو احسن
محمد منير واغنيته كان فاضل هى الوحيدة اللى فيها حاجة .. هى ايه مش عارفه:)


اه وبالمناسبة رحت حديقة الازهر مرتين.. ماشاء الله تحفة رائعة.. ياريت بس تفضل عالجمال والنظام اللى هى فيه
انا صورت كتير اوى وهبقى انزل الصور فى اقرب وقت ان شاء الله لانها جميلة وهتعجبكم واتمنى اللى مارحش هناك يروح

ياللا ادينى عملت كوكتيل منعش فى الحر دا
انا عارفه انها اخبار قديمة بس معلش انا اللى اتأخرت فى الكتابة

وقبل الختام طبعا أهنى جمييييييييع اهلى المدونين برمضان وربنا يجعله شهر خير ويرزقنا فيه بالصيام والقيام وصالح الاعمال


وياربت ياريت ياريت الناس ماتمثلش على بعض عشان خاطر انهم فرمضان.. يعنى نخللي دايما معاملاتنا مع بعض باحترام وبذوق
واللى متغاظ ومفروس من حاجة يحاول انه يكون هادى.. الناس مالهاش ذنب
وياريت كمان اللى نفسه يتخانق يبقى يجيب عضاضه يطلع فيها غله
وياريت بقى الكلام دا كله مايبقاش فرمضان بس لانه عيب اوى اننا نكون ملايكة لمدة تلاتين يوم وبعدين نقلب تانى 360 درجة
مش عارفة احنا بنضحك على مين بالظبط
يارب الناس تفهم ان كل الشهور واحد وان رمضان مميز عنهم لانه اوكازيون للحسنات وسباق لاعمال الخير.. دا غير طبعا قمر الدين حبيبى.. فى حد بيبحب ياكله من الكيس زى حلاتى:)

بس كل الحاجات دى برضو طول السنة.. يااااااريت كلنا نفهم كدا
وانا عارفه ان فى ناس كتير زيى نفسهم ان البلد دى تتغير وناسها تبقى احسن
ربنا يصلح الحال
اشوفكم على خير ويارب كلكم تكونو موجودين فى الحفلة بكرة ان شاء الله