Monday, October 20, 2008

صدق من قال ... بحبك ياحمار

اكييييييييييييد بحبك ياحمااااااااااار وبقولها وبأعلى صوتى


طالما الحمار بقى هو سندنا ودرعنا الاقتصادى وسلاحنا لتقوية صادرات بلدنا.. وتحيا مصر

كنت فى جلسة صفاء مع الجريدة وقرأت خبراً سخسخنى مالضوحك
قال اييييييييييييه الحمير المصرية بقت مطلب دولى وبالاخص يعنى.. صينى
سيبكو من حكاية الصين دى لانه اصبح من المتعارف عليه إنها راشقة حتى ف جحر النمل
وانا بقى ناوية احلل الخبر دا من منطلق اقتصادى واجتماعى وسياسى وتهييسى

من المنطلق الاقتصادى ايها الاخوة والاخوات
هذا الكائن الغلبان المغلوب على امره تخيلو .. تخيلو هيستخدموا جلده فإيه
ايييييييييييييييه ايييييييييييييييييييييييه
تصنيع شوزات وشنط؟......... نو
دواسات تتحط على عتبة البيوت ويكتبو عليها ويلكم ؟.............. نو
ناويين يعملوه رمز من رموز الكفاح المسلح؟........... احتمال بس نو برضو

قال ايييييييييييييه .. ولامؤاخذة يعنى.. هيعملو منه منشطات
واعتقد انهم بيعملو كدا عشان الكام ترليون صينى مش كفاية وعاوزيين ينتجو صنيين اكتر
لتوزيعهم على جميع دول القارات السبع

واكيد بعد نجاح الجنان دا احتمال الصين تصدر هذا العقار ويتم استبدال الفياجرا بال حماجرا

وفى نقطة كمان شديدة الاهمية.. اكتشاف عظيم لأهمية ألبان الحمير واللى الصينيين برضو بيبلبعوها لكثرة غناها بالبروطينات

ولحمها طبعا غذاء كامل الدسم.. دول بيقزقزو الصراصير ,, جت عالحمير يعنى؟

ومن المنطلق الاجتماعى.. للجانب الصينى برضو.. لمّا يزيد عدد السكان كدا مش هيضطروا للهجرة فى افراد..
الهجرة هنا هتكون فى جماعات.. يعنى كل صينى هيغادر ومعاه المدام والاولاد


وينزلو يستوطنوا البلد ويكوّنوا أقاليم صينية شعبية.. ويبقى اسمها جمهورية الصين المتشعبة

والجانب السياسى زى مانتو شايفين.. زى الفل يامعلمى طالما فيها تصدير يعنى عملة صعبة يعنى خير لينا كلنا
واعضاء مجلس الشعب بقى لامؤاخذة يعنى يخبطوا راسهم فى الحيط
هما صحيح يتسائلون اين تختفى اللحوم الحميرية بعد سلخها لكن مش دا المهم طبعااااا

وعلى الجانب الاقتصادى المصرى.. هناك استغلال كامل للحمار

- فعز شبابه يجر الكارو


- فى سن اليأس يندبح وياكلوه الاسود والديابه اللى فى الجونينة يااااولدى

- وبعد الدبح الجلود تهاجر الصين فى مهمة رسمية سامية

بس الموشكلز البسيط جدا .. من وجهة نظر المسئولين.. والكبير جدا.. من وجهة نظر جمعية الرأفة بالحمار
ان دا فيه تهديد للحمار بالانقراض.. يعنى خلاص هنفقد هذا الكائن الاغلب من الغلب اللى تبص فعنيه تلاقيها كلها طيبة وقهر وشكوى من ظلم البنى ادمين


ومش هنسمع تانى صوته العذب اللى بيفكرنا بأيام الزمن الجميل.. اااااااخر الحناجر المحترمة.. عااااااااااااااااا


دا غير انهم اكتشفو ان الجلود اللى بتتصدر كتيييرة جدااا بالنسبة للحمير المذبوحة ظلما وعدوانا

يااااترى يااااهل ترى اين تختفى هذه الللحوم؟؟؟
.
.
سؤااااال من شدة صعوبته اجابته تاهت وبدور عليها


ااااه على فكرة ساندوتش الفاهيتا اللى باكله دا حلو اوى.. صينى صينى يعنى
وتلاقى نسيرة اللحمة فيه اطول من رغيف الفينو.. ناس كرما بصحيح

اوصيكم تاكلو فاهيتا هتعجبكم جد...هأ.... جد... هأ.... جدا
حااااأ حاااااااأ حااااااااااااااأ

ايه دا انا جرالى ايييييييييييييه.. اين ال 911 ؟
الحقوووونى بالداكتووووور

للاسف عندك حالة شوحار حااااد... ياريت ماتكاليش لحم حميرى مش عليه ختم الوزارة بعد كدا


11 بعبر ياشعب:

nona said...

اوعى تقولى الكلام دة صحيح لااااااااااااااااااا لايمكن امال الغلابة هياكلوا اية لما الحمير تتصدر بس لو كان قصدك انهم ياخدوا الجلود و يسبوا اللحمة ماشى كدة ممكن نفكر
ههههههههههههههههه
قوليلى يا سوسو انتى قريتى الخبر دة فين
بس ماتقلقيش احنا متوقعين ان الصين عن قريب هنستورد منها البنى ادمين ما احنا اصلانا استوردنا منها كل حاجة ناقص دية بس
تفتكرى ممكن حالنا يتعدل لو استوردنا منهم بنى ادمين

nona said...

اية دة انا اول تعليق و تانى تعليق
لولولولولىىىىىىىىىىىىىىىىىىىىىىىىى

الطائر الحزين said...

وكل الحيوانات كمان

لانه من البنى ادمين من هم كالانعام بل هم اضل

محمد فاروق الشاذلى said...

بلاش سوء نية وسؤال عن لحم الحمير، طبعا بيروح الجونينة علشان الأسد ياكل وينبسط ومافيش داعى تجيبى سيرة السندويتشات علشان دى كويسة جدا يا ظالمة يا مفترية

مهندس مصري بيحب مصر said...

يا ستي مش مشكلة مش حتكون اول مرة نصدر الحمير
أثناء جهاد الافغان للإحتلال السوفيتي لأفغانستان كانت مصر بتصنع سلاح روسي و تصدره لأفغانستان عبر باكستان تحت إشراف وزارة الدفاع المصرية و الـمخابرات المركزية الأمريكية cia
و اكدت كل الدراسات المخابراتية و الحربية إن أفضل وسائل المواصلات لعمل خطوط إمدادات بالسلاح و الذخائر للمجاهدين عبر الجبال هي البغال و الحمير
و عليه قامت مصر بتصدير كميات مهولة من البغال و الحمير المصرية لأفغانستان طوال الثمانينات
و كانت كلها حمير فرز اول مطابقة للمواصفات الأمريكية و الباكستانية
و كل حمار كان له ملف بيطري و شهادة صحية بخلوه من العيوب و الأمراض

بجد و حصلت فعلاً
يبقى مش جديدة يا أختي و من فات قديمه تاه
:)

دعاء مواجهات said...

يعنى تغيبى تغيبى والآأخر

تيجى تتكلمى عن الحمير

دا انتى صحيح عيله ....

بلاش نسيح بقى

المهم انتى وحشاانى

جدا

واوعى تغيبى كدة تانى

بيس ياقمر ..

شفـقــة و إحســــان said...

حرام عليكى انا كنت بحب الفاهيتا قبل ما اقرا البوست ده
كده مش هاكلها تانى
بس برافو عليكى عرضك للموضوع بشكل ساخر
ومعلش يعنى هما هيعملوا ايه اللحمة بقت ب 43 جنيه بذمتك مش الحمار كله على بعضه ارخص من كيلو اللحمة
يلا خلى الغلابة تعيش
هههههههههههههههه

DR.HAMAS said...

ههههههه

انا امبارح كنت راكب الميكروباص على طريق مصر اسكندرية

و لاقيت حمار ميت على جنب الطريق

و لاقيته منزوع الجلد

اتقرفت بصورة فظيعة

بس حالا و بعد مقالك الذاخر

عرفت ليه كان منزوع الجلد


يعععععععععع



ابقى هاتى سيرة حلوة فى البوست الجاى بعد إذنك



د.حماس

صاحب المضيفة said...

اهو ده اللي ناقص كمان

حماجرا ومقويات ومنافع أخرى

يانهار على الناس وسنينها

:):):):)

تحياتي

اقصوصه said...

ههههههههههههه

موضوع طريف فعلا:)

Anonymous said...

اتمنى من حضرتك كتابة سطر واحد واعلان تضامنك معنا فى الحملة اللى انا عاملاها
واظن سطر او سطرين مش خسارة عشان ندافع عن حق احد المتضررين من حوادث التعذيب واللى المرة ادى الى قتل امراة حامل هى وجنينها
ارجو التضامن
http://al7orya.blogsome.com/