Wednesday, December 31, 2008

توينتى سريس مع باقة ورد- وأجدعها زير لـ2008

اولا توينتى سريس لانه طبعا السنة اللى فاتت كانت توينتى تو
وكل ماالسنين بتعدى بتقع معاها ورقة من شجرة عمرى
: يعنى كل اللى يدخل هنا يسيب مناديل فلورا ناعمة وقوية عشان ناوية أغنى 
ماكنش يومك يانقاوة عينى


ثانيا باقة الورد مش ليا

دى للاخت الفاضلة 2009
اللى كلها بالظبط نص ساعة وتهل علينا
والواحد مش عاوز يتشائم .. بس ياريت لو فى رحلات لكوكب زحل لانى مش مستعدة اقضيها ع الارض اكتر من كدا

وثالثا بقى الكل يستعد لرمى القلل وانا عشان كريمة هتبرع بأكبر زير فخار منقوش بأجود انواع الطين البلدى

ورابعا اسمحولى اقدم لكم نشرة اخبارية مختصرة عن ال365 يوم اللى فاتوا من عمرى
هناااااااااااااا محطة البلاعة الاخبارية والساعة الان حداشر ونص .. التوقيت اللى صرصارة نزلت فيه الدنيا وقالت وااااااااء

بالنسبة للنشرة العملية
صرصارة ولله الحمد عدت كورس جامد جدا كان لمدة 8 شهور وبقت دلوقت
international trade marketing specialist
بس الحمدلله برضو سبع صنايع والبخت لسا بندور عليه

وبالنسبة للنشرة الاجتماعية
صرصارة ومن اول السنة برضو اتعرفت على اجدع واجمد وافظع واروع مدونين فى القطر المصرى.. ودا كان تعارف تعدى حدود الشاشة والعالم الافتراضى ووصل الى عالم الواقع بكل فوله وطعميته
وتتمنى دايما اننا نفضل عيلة كبيرة تتمدد وتنتشر وينضم ليها العديد والمزيد من ابناء الجيل البلوجرى

بالنسبة للنشرة السيكولوجية:
صرصارة والى حد ما جمعت ثقتها بنفسها وعرفت مين اللى بيحبها عشان هى صرصارة وبس

ومين اللى بيحبها عشان هى صرصارة وممكن تساعد ف أزمة أو رأى وبعدها تاخد صابونة
ومين اللى مش بينزل من زور ولابس ماسك على كل لون ياباتسطا ومع ذلك لازم صرصارة تكون كويسة وعسولة عشان ماما تحبها وتجيبلها شوكولا
وكمان عرفت ان الدماغ الصرصارى دماغ حر اصيل دهب عيار 36 ومش اى حاجة تليق عليه وان المستوى الصرصارى مش هينزل لبيع ملابس بسبعة ونص وتعالى بص لانه اللى اندفع فيه مش قليل
ولكن مع كل ذلك صرصارة لازالت وسط كل ماتكتبه من كلام يقال عليه بيسخسخ مالضحك الا انها تخفى وراءه خجل صرصارى من النوع الزائد عن اللزوم وايضا تقلل من الشأن الصرصارية لمنعها من الاصابة بعدوى الغرور..كفانا الله شره

بالنسبة للنشرة العاطشفية:
صرصارة اخدت مقلب معتبر والحمدلله ربنا سبب الاسباب عشان تعرف المعدن الاصيل من المسوس
 واستقرت على اعتزال وجع الدماغ دا والاخد بحكمة المعلم دعبس بتاع الانابيب واللى بيقول
نو مان نو كراى
ولكن واضح ان 2008 حبّت تصالحنى فابعتتلى قلب دهب مليان ياقوت ومرجان وصرصارة فرحانة اوى بيه وبتدعى ربنا انه مايصحيهاش من الحلم الجميل دا

بالنسبة للنشرة العالمية:
موجود هنا فى الارشيف الصرصارى اى خبطة سياسية دولية هزت الكوكب.. ولو فى اى حاجة ناقصة فهى بتقدم اعتذارها لان السنادى كان نشاطها التدوينى محدود يادوب مترين فربع متر

وفى الختام نتمنى للجميع عام (هجرى-ميلادى) سعيد مديد مفيد جديد لطيف ظريف خفيف على القلب والرئة
والسلام عليكم

ملحوظة:
كل سنة وانتى طيبة يابلاعتى.. عيد ميلادك عدا من شهر ..عقبال تمناشر سنة واحنا سوا مع بعضينا وعساسيل وامامير 





22 بعبر ياشعب:

Anonymous said...

كل سنة وانتى طيب يا سارة والا تحبى نقول اية
بصى انا اول واحدة هشترى قلق قناوى وافخر انواع الزير وممكن اتبرع بالتلاجة الاى عندنا كمان بس السنة دية تعدى عشان حراااااااااااام كفاية قوى كدة
وكويس قوى انك استفدى من 2008
طبعا من اجمل حجات 2008 ان الواحد داخل عالم التدوين وعاش فية وعرف ناس على الطبيعة والسة فى ناس خلف الكيبورد بس برضة انا مش عايزة ترجع
وكل سنة وانتى طيبة ويا رب 2009 تكون سنة سعيدة علينا كلنا

Ahmed Al-Sabbagh said...

كل سنة وانتى احلى واطيب واجمل سارة فى العالم

nigro said...

كل سنة و طيبة يا سارة هانم
و سنة سعيدة عليكي يا رب

بالنسبة للمناديل فانا جبتلك مناديل فاين أم أربع طبقات
تنفع يا أوختي في موقفك ده

و ألف مبروك على الـ
ITMS

بالنسبة للقلة
لا قلل ولا حاجة
كلها ايام ربنا
احنا بس اللي وحشين
و عاوزين مدخنة فخار بحالها تترزع فوق نافوخنا علشان نصحى


و يعود عليكي الأيام بخير



يلا سلام

خمسة فضفضة said...

السلام عليكم ورحمة الله وبركاته

كل سنة وانت طيبه يا احلي صرصاره في بلاليع الحكومه والحكومات المجاوره

ويارب 2009 تبقي احلي من 2009
ياريت بقي ترجعي تدوني بانتظام وبلاش الاستهتار بتاع 2008 ده ما ينفعش كده ماشي

كل سنة وانت طيبه كمان مره وبووووووووووووووووووووسه كبيره عشانك يا قمر

امووووووووووه

سلام

بنت الصالحين said...

اهلاااااااااااااااااااا

سي مسعدددددددددد اذيك ياباشا


انبارح الواد محمود خد ام الموبايل بتاعي
العده اقصد ليييييييييه
قولتيلي ليه لان الشاحن بتاعه اتسرق ياولداه فاضطر يحط رحاله علي ام عدتي ويرمي الخط بتاعي جنبي ع السرير ماانا الهبله اللي بنام وانا متطمنه علي حاجتي

زعقتله ع النت طبعا جه جباهولي
اتصل بيكي الساعه 3 مترديش لييييييييييييييييييييه


انتي وحشه علي فكره
انتي عارفه اني وقتي محكوووووووم فاهمه انتي طبعا
ورسايل ام الموبايل مبقاش يبعت اعمله ايه وانتي شوفتي بنفسك


عموووووووووووووووما

مستنياكي الاسبوع الجاااااي ماشي يامسعد

كل سنه وانتي طيبه والي الله اقرب وعلي الطاعه ادوم والسنه دي بقي تتجوزي وتفكيني منك
:)))

زيارتك المره اللي فاتت رفعتلي محنوياااااااتشي
سلام ياساسووو

http://kasperb4.blogspot.com/ said...

يارب السنادي تكون احسن من اللي فاتت
:)

مهندس مصري بيحب مصر said...

كل سنة و انتي طيبة

ارخم عليكي تاني
ما انتي بتلمحي لكده
:)

حول غزة و المعبر نحكي علهم يفهمون http://egyptioneng.blogspot.com/2009/01/blog-post.html بوست لكل من يريد ان يفهم لا لمن يريدون الجدال

Empress appy said...

صورصاره كل سنه وانتى طيبه وبعدين سيبى القلل والزير ليه انا تخصص مش هنتعدي على بعض ما هومش مودينا فى داهيه غير عدم الاختصاص ده ههههه

عالم ماريونت said...

صرصارة
كل سنة وانتي طيبة ويارب سنة جديدة سعيدة عليكي
ويارب ربنا يكرمك وتحقي كل احلامك
لغتك حلوة اوي
دي اول زيارة ليا بس ان شاء الله متكوش الاخيرة
رنا

Blank-Socrate said...

كل سنه و انت اجمل و الذ سارة
your new look is amazing :)
انشاء الله كله يبقى تمام خاصه حياتك العاطفيه
:)

šσяšαяαα said...

Anonymous :

وانتى طيبة يانونيمس
ولو انى تقريبا عرفت من انتى:)

وارمى قلل ونجف وازايز زى مايعجبك

واتمنالك سنة اسعد .. قولى ااميييين
:)

šσяšαяαα said...

Ahmed Al-Sabbagh :

خال البشرية كلها:)

ايه الكلام الجامد دا.. دا كتير عليا والله

ربنا يكرمك وان شاء الله تكون سنة سعيدة عليك وكل الاهل والاصدكاء
:)

šσяšαяαα said...

ňįĝŗő:

منور يانيجرو
وانت عامل ايه دووقتى:D

شكرا عالمناديل ياريس
نردهالك فعيد ميلادك

وكل عام وانت بخير
:)

šσяšαяαα said...

خمسة فضفضة:

وعليكم السلام ورحمة الله وبركاته

وانتى طيبة يافضفوضتى وبألف خير وسعادة دايما
يعود عليكى الايام بخير وكل الناس الطيبة

ومن عنيا حاضر هرجع اصدع دماغكم تانى
والا شعار رغاية درجة اولى يتحول للمعاش:D

ووصلت البوسة يافندم
سانكيو
:)

šσяšαяαα said...

عاشقه الفردوس:

هههههههههههههههههههههههههههههههههههههه

يابنتى انتى خلصتى على كل امهات البلد:D

مش بقولك الناس مش فاهماكى صح يامعلمتى
واللا تلاقيه كلام صحيح عشان يليق بالاجواء الصورصارية

اكرمك الله يااختاه
:P

وسلامى لكابتن مسعد سافو
:D

šσяšαяαα said...

آلام وآمال:

اللهم آاااميييييييين

يسمع منك ربنا

وكل سنة وانت بألف خير
:)

šσяšαяαα said...

مهندس مصري:

وانت طيب ياباشمهندز

ياسيدى رخم ولايهمك.. البلاعة بلاعتكم:D

وربنا يكرمك بجد عالمجهود المبذول لمناقشة هذه القضية الشائكة
:)

šσяšαяαα said...

~*§¦§ Appy §¦§*~:

آبى بيبووو
وانتى طيبة وبخير دايما

وبعدين يامعلمى انا اعرف منين بس ان اختصاصك فى الزير

خلاص انا هاخده ارمى بيه بواقى السنة واسيبهولك

واحنا فخدمة الوتن
:D

šσяšαяαα said...

يوميات نائمة في الأرياف:

شكرا ليكى يارنا ولكلامك العسول دا

فرحانة اوى بزيارتك ويارب تكون البلاعة عجبتك
:)

وكل سنة وانتى طيبة

šσяšαяαα said...

Blank-Socrate:

وانت طيب وبخير وسعادة دايما ياسقراطى

شكلى هتعمل ساندوتش من كتر الذاذة وتحطوا فوقيه كاشتب:D

happy u like my new look:)

وربنا يسمع منك ياخويا ياااااارب

وينكى said...

كل سنه وانتى طيبه يا احلى واجدع صراصيرو فى الدنيا
السنه جريت بسرعه
وادى سنه جديد ان شاء الله تبقى احسن من اللى قبلها
ربنا يحلى ايامك وتاكلى شوكولا كتير
وتحضريلى حفلات اكتر
على فكرة عندى واحده يوم 20 فبراير
هابقى اقولك عليها ساعتها بقى
عاوزه الصراصير كلها تتلم بقى
:)
وماتخافيش مافيش فليت ولا شباشب

šσяšαяαα said...

وينكى:

ونكوووووووووووووووكى
مش مصدقة نفسى بجد
ايه النووووووووور دا كله

ربنا يخلليكى ياعسولى ونسمع عنك كل خير دايما

حاضر ياباشا انت تؤمر بس
الحفلة تيجى وهتلاقى جيش الاستماع الصراصيرى كله:)

وكل سنة وانتى طيبة وبتحبى الشوكولا
:)