دى مجرد دردشه بريئه عابرة ليس الغرض منها اى سوء نيه لاسمح الله
انا بس المرارة اللى حيلتى مفقوعه من اللى بشوفه وبسمعه ياخوااااااااااااتى
نفسى اعرف ايه كميه الهيافه والتفاهه والعبط والهبل والظرف والخفه اللى بيتسم بيها شبابنا الحليوة بتاع اليومين دول
زى مايكونو رمو عقولهم فى اقرب مقلب زباله وجابو بداله مخ متسستم على كلام وموضوع واحد مش بيتغير
وادى حوار من الحوارات اليوميه اللى خلاص قربت تجيبلى شلل رباعى ولو فى سباعى كمان هتجيبهولى
الخفه باشا: هاى ممكن نتعرف؟
المفروسه هانم: اوى اوى وماله..دا حتى سمعت ان التعارف مفيد اوى للقولون
الخفه باشا: انا ميدو ..22 سنه..ساكن عند بابى ومامى..وحدانى والوحده عذاب واتمنى نكون اصحاب
المفروسه هانم: برضه اوى اوى..انا سمعت ان الصحوبيه مفيده جدا للوسواس القهرى
الخفه باشا:طيب ممكن اشوف صورتك
المفروسه هانم: لا والله معنديش.. كل ماتصور ميطلعش فى الصورة غير القرنين بس اصلهم طوال اوى
الخفه باشا: طيب عندك كام(كاميرا يعنى)والله يرحم ايام مصوراتى الكورنيش
المفروسه هانم: محظور تداولها عندنا فى البلاعات ..لو عرفت تسربلى واحده من الجمارك يبقى جميل مش هنساهولك
الخفه باشا: ولايهمك ياجميل بكرة لما نتعرف على بعض اكتر هتلاقينى اهل للثقه ويمكن تلاقينى الثقه نفسها متنكرة فى صورة ملاك فحلقى لابيهش ولابينش ومش طالب غير شويه شات لله
المفروسه هانم:خلاص يابنى قطعت قلبى ..عفونا عنك
الخفه باشا: طيب هشوفك تانى امتى؟
المفروسه هانم:لما تشوف قفاك.. قصدى كله بأمره
واليوم اللى بعديه
الخفه باشا: هاااااااااااااااااااااااى(خللو بالكو دى اطول من الاولانيه)
المفروسه هانم: هاى ورحمه الله وبركاته
الخفه باشا: بجد وحشتينى مووووووووووت
المفروسه هانم: وليه موت هو اللى موحشكش..اقصد يعنى ماتشفش وحش
الخفه باشا: ازاى بس ..دانا شفت القمر كله ومعرفتش انام بالليل من كتر التفكير فيكى..ونمت ماتينيه
المفروسه هانم: لاخير خير بتحصل فى أحسن العائلات .. انت بس تخللى ماما تحكيلك حدوته قبل النوم وانت بتشرب اللبن وكل دا هيختفى
الخفه باشا: انتى بتتريقى عليا..وانا اللى كنت فاكرك فاهمانى وحاسه باللى فقلبى
ياخسااااااارة سهر الليالى ولعبه الحب والليل وآخره(مع اضافه وش بيعيط لزوم التسيبكه)
المفروسه هانم: يابنى روح العب بعيد يابنى.. يابنى انت مش اد نرفزتى يابنى
المحطم باشا: وادى الملاااااااااك البرىء ابو قلب طيب اوى ..ادى اللى كان كل شىء ..كسرلى قلبى ومشى
المفروسه هانم: ايام وبنعيشها هنعمل ايه ياربى فناس.. مفيش احساس ولاعقل خلااااااص
وكفايه عليكو الموجز دا
بس بجد ياجماااااعه نفسى اعرف ايه اللى جرى لعقولنا علشان توصل بالهيافه دى ومعقول يعنى خلصنا كل الافكار ومش لاقيين حاجه نعملها غير التتنيح ادام الشات ومعاكسه البنات!!
ولغايه دلوقت معرفتش القولون العصبى والضغط والمرارة هاجو عليا من ايه!!
يمكن عندهم كبت هما كمان ونفسهم فى شويه شات مع البنات:))
2 بعبر ياشعب:
بجد يا سارة موضوع واقعى مية فى المية ومنتشر وطريقة عرضك لية تحفة بس زى ما فى شباب هايفيين وفاضيين فى بنات بردو كدة المهم حاولى تحافظى على صحتك علشان تداومى على كتاباتك الرائعة ولا يهمك منهم :)
مانا عارفه والله ياجيجو بس انا كتبت من الواقع اللى شفته وان نسبه الولاد للأسف تعدت ارتفاع الهيمالايااا (وعلى فكرة ناويه اروح استجملى شويه هناك لو تحبى ابقى احكيلك عاللى هشوفه;)
Post a Comment