Saturday, March 31, 2007

فى مدح سيد الخلق-عليه الصلاة والسلام

دى ابيات شعر كتبها جدى من حوالى 10 سنين بحالهم
فى ذكرى مولد الرسول-صلى الله عليه وسلم
دى ابيات بهديها ليكو ولجدو كمان فى عيد ميلاده اللى وافق ذكرى المولد النبوى

هو فصحى تمام ويارب يعجبكو














نور ٌ بدا فى ظلمة الأكوان فمحا
مقام الشرك والطغيان


واندك حصن الكفر حين ظهوره
وكذاك زالت دولة الأوثان


إيوان كسرى قد تصدع فوقه
وغدا خرابا ًهاوى الأركان



رهبان فارس أخمدت نيرانهم

بظهور ذاك النور فى البلدان




ً ميلاد أحمد كان فجرا ً ساطعا

وسناؤه قد عم كل مكان



ميلاد أحمد كان نورا ً للورى
يهدى القلوب بمشعل الايمان




ٍ الله ارسله بدين ٍٍ صا لح

للعالمين على مدى الأزمان



ٍٍ دين قويم آمر بفضيلة
ناه ٍٍ عن الآثام والبهتان



ً الله ارسله فكان مبشرا
للمؤمنين بجنة الرضوان




أثنى عليه الله جل جلاله
فى محكم الآيات فى القرآن



فى مولد المصطفى الهادى

أهدى إليكمو تحية العرفان



أمة خصها الإله بنور
وحباها الهدى من الاديان

مـــــــولد الرســـــــــاله

السلام عليكم ورحمة الله
اخوانى الاعزاء جداااااااااا جدااااااااااااا
كل عام وانتو بخير وكل حلاوة مولد وانتو بخير وكل تسوس وانتو بخير:)
انا عارفه الموضوع دا المفروض يتكتب من امبارح واللى اخرنى هو "الرسالة"
فيلم للمخرج مصطفى العقاد-رحمه الله
اكيد الكل شافو او سمع عنه ...وانا اخيرااااااا شفته
بجد يستاهل التلات ساعات ونص مدة الفيلم
اول مرة يشدنى فيلم تاريخى بعد الناصر صلاح الدين
الفيلم كله تحفه رااائعه وعمل بجد ربنا يجزى كل اللى شارك فيه خير
مش زى باقى الاعمال اللى حمضت...مافيش على لسانهم غير(اليوم خمرون ونساااااء..عااااو)
برضو لسانى مابيحرمش-بس من فرستى على الافلام اللى بيعيدو ويزيدو فيها دى
بس دا فعلاااااا حاجه تانيه جاب السيرة النبويه بشكل منظم وصورة رااائعه وتتابع مذهل للاحداث
اسمحولى ارفع القبعه واحييى كل اللى شارك في الفيلم دا من عرب واجانب
ويارب نكون ولو ربع اللى الصحابه عملوه...دا لو شباب اليومين دول واتحطو فى المواقف دى هاياخدو فى سنانهم ويخلعو
ياللا ربنا يصلح الحال بس لازم نفتكر دايما ان "الله لايغير مابقوم حتى يغيروا مابأنفسهم"
لازم نتغير علشان نستاهل فعلا اننا نكون مسلمين ويباهى بينا الرسول-عليه الصلاة والسلام- الامم
وعلى فكرة دا رابط لموقع عن السيرة النبويه
انا مش بعرف احط روابط بصراحه بس هنسخه ويارب يشتغل
موقع الكتاب هو : http://www.islam-guide.com
ودا لتحميل الكتاب(على هيئه بى دى إف بشكل الكتاب الاصلى)
اتمنى يعجبكو و تعجبكو كمان الاغنيه اللى نزلتها هنا
وكل سنه وانتو طيبين:)

Friday, March 30, 2007

مؤتمر المصطبه العربيه..كلاكيت 19 مرة...هااااااااتسى








ياحلاوة يولاد..والله واتلمو الاخوة الكرامازوف تانى..متجمعين كدا عند النبى دايماوالناس ولاعارفه تروح عمرة المولد والسكك واقفه قال يعنى واخدين معاهم الدمار الشامل!!دا حتى خسارة فيهم.. كل سنه وانتو طيبين صحيح(ياربى حتى المولد مش عارفين نتهنى بيه)اه وبالمناسبه دى ناويين يعملو عملة موحده للعرب زى اوروبا.. وماحدش احسن من حد يعنى هما اللى على كل شكل ولون ولسان متحدين وعاملين عملة واحنا ياللى كلنا لون واحد ولسان واحد مع انى بصراحه مش بفهم من كلامهم حاجه بس المهم يعنى احنا عارابون فى الاخر وناويين ان شاء الله نجمع الجنيه والريال والدرهم والليرة ونعملهم عملة واحده وهنطلق عليها( جـــردل)..


ياللا الف مبروك وعقبال البكارى.

ام هند..عدت الست قمة على خير زى كل مرة ولله الحمد
مع زيادة فى القرارات اللى هتشرف اخواتها المركونين عالرف(مافيناش غير لسان وورق العتة بتاكل فيه)




هذا وقد اختتمت القمة العربيه امس بالرياض بتأكيد التمسك بمبادرة السلام خيارا استراتيجيا للعرب..طيب هو اشمعنى الخيار(مافى بصل وطماطم وخس وفجل واللا الجزر ياعينى عليه-بالذات بقى للى لازقين للكمبيوتر زى حلاتى-)يعنى ممكن نسميه جزر استراتيجى علشان كدا فيها تحيز واستبداد(ياجماعه انا هعمل استفتاءاللى عاوز جزر يبقى يصوت)ياربى دايما اخرج عن الموضوع كدا..

حد يبقى ينبهنى ياجمااااعه


ياالا ام هند تانى..مستر عمرو موسى قال ان مدام اللى ماتتسمى ولاتوعى مش عاوزة غير التطبيع فقط انما الانسحاب والمفاوضات ايخى عليهم وياى لسا ناقصين ملح.. قال يعنى هو جاب التايهه


بس شوفو بقى الحته الجامده اللى جايه دى وركزو كويييسسسس


فى المؤتمر الصحفى اللى اتعمل بعد القاع..يوه قصدى القمه جدد فخامه وعظامه وجلاله وسموالامير سعود -وزير االاوت دوور اى الخارجيه السعودى - اكد اللى قاله فخامه وسمو...... وكل حاجه العاهل السعودى بان العراق-رحمه الله- يخضع للاحتلال وقال- بالنص من الاهرام-:لا ادرى كيف يعرف عن بلد يحتوى على جنود ليسو من جنسيته الا بالاحتلال؟؟!!(مع بحلقه العين ورفع الحاجبين)وقال كمان ان اى عمل عسكرى لايتم بدعوة من البلد المعنى فإن هذا يعد احتلالاااااا..الله اكبر
زغرتى يام السعد وارقصى يابهيه وفرقى الشربات يابهانه

ايه دا.. يادى الغم ياللا ادخلو بيوتكو تانى الفرح خلص اصل اللى متتسماش اس اتنين فوجئت بكلام العاهل السعودى (يعنى بحلقت بعنيها ورجعت خطوا لورا من هول الفاجعه)وناويه تطلب ايضاح وتوضيح وتفسير من الرياض.. اخص ياراجل بقى دا كلام يتقال وتزعل ماما منك كدا..




اهم كدا هياخدو القهوة والسكر وشوف بقى هتظبط دماغك ازاى.




على العموم ياجماعه ماما اتبسطت اوى من الاعلان اللى طلعته القمقومه وعشان كدا

عزماكو كلكو على الغدا ياللا اتفضلو وبالهنا والشفا...نياهاااااااااااا


Wednesday, March 28, 2007

دعوة للصمت الرهييييييييييييب


ادعو للصمت.. حين يغيب نبض القلب

ادعو للصمت..حين تتساقط اقنعه من احببت

ادعو للصمت..حين تشعر بالغربه والجميع حولك

ادعو للصمت..حين يعتريك الالم من عذاب مايسمونه الحب

ادعو للصمت..حين تتجول فى الشوارع ورغم الزحام تشعر وكأنها مأوى للاشباح

ادعو للصمت..حين تتلاشى الفرص لبناء مستقبلك الذى تتمناه وتحلم به

ادعو للصمت..حين تفقد اقرب الناس اليك وتتلاشى فرصه ان يعودوا من جديد

ادعو للصمت..حين تجد عيون حزينه تطلب فقط حق الحياه ولايمكنك مد يد المساعده

ادعو للصمت..حين تجد امواج البحر مليئه بالغضب والثورة لحال من حولها

ادعو للصمت..حين تستمع لموسيقى هادئه واشعار مليئه بالشجن

ادعو للصمت..حين ترى الناس يتخبطون من حولك كسراب طير ضل عن قائده

ادعو للصمت..حيت تتأمل القمر رمز العشاق والنجوم من حوله كجنود تحميه

واظل اقف فى صمت رهيب انتظر دفىء الشمس عله يأتينى بالامل المفقود


Sunday, March 25, 2007

اين تذهب هذا المساء....... مسرحيه داسطوووووور يابلادنا

هو ايه اللى بيحصل بالظبط فى البلد دى...انا لاول مرة احس ان الهرم اتقلب واللا الشمس مش ناويه تطل علينا تانى واللا النيل هيسيبنا ويطفش..يمكن يهج للصين.. واللا دماغى بدأت تهيس ومش عارفه بكتب ايه اساسا
هى دى مصر اللى اتكتب فيها اشعار من ايام الفراعنه واللا زوروها وبقت مجرد صورة من الزيت لو جينا نشيل التراب اللى غطاها هتتمحى للابد...
على فكرة انا كنت هكتب كلام ساخر وعبيط كالعاده بس فعلا جوايا كوكتيل رائع من حزن وخوف من بكرة وقلق وارتجاج فى المخ من كتر اللخبطه اللى بتحصل حواليا.
يعنى ايه دستور..طيب مش الدستور دا يعنى كتاب كل اللى فيه بيتكلم عن حمايه المواطن وتوفير وسائل الراحه والامكانيات اللى تساعده انه يبنى وطن كلنا نفخر بيه..وكل دا عن طريق القوانين اللى بينص عليها...هو كلامى دا صح واللا انا فاهمه غلط
طيب ولو غلط امال يعنى دستور وكتاب الوطن...انا كدا حاسه انه كتاب ابله نظريه لكيفيه طبخ الكلام اللى ييجى على المزاج ويطلعلنا اكلات على ذوق الروس الكبيرة مع قليل من الشطه علشان يولعو فى عيشتنا اكتر ماهى ولعه.
وانا اللى كنت عامله فيها سوبر صرصار ورايحه اصوت واقول بأعلى صوتى"لا" ...بلاخيبه عليا قال يعنى كدا هيقلبو الدستور مجله ميكى ونعيش الالوان.
كدا فعلا الاضراب اللى بيتكلمو عليه دا احسن بكتير من ضربة شمس مثلا واللا ضربه اى حاجه تانيه ربنا يكفينا الشر.
واننى من هنا اخوانى الاعزاء اناشدكم بان تطنشو البتاع دا لان الدماغ ناشفه ولما بيتحط فيها حاجه يبقى ياللا السلامه وماانشف دماغ حكومتنا الغاليه...ربنا قادر عالمفترى
وبالتالى سأفضل الجلوس بالمنزل وطبخ دستور على ادى مع شويه سلطه مضافا اليها حرقه دم ومراره وسكر لزوم التحليه.
بس بجد سؤال هام جدا...مين اللى ألف دااستورنا الموقر ويعنى ايه دستور؟
هو دا بتاع دااااسطور يامباركين وبعيد بعيد وسامحو ياسيااااااادى دا جه يغير البلد ويبيعها بس قال لما اخد الاذن الاول
الرضا والسماح ياهال السمااااح... هذا ونوافيكم غدا بالفصل الاول من المسرحيه لان دا كانت المقدمه بس
وياعالم النهايه امتى
عليه العوض ومنه العوض