Wednesday, March 28, 2007

دعوة للصمت الرهييييييييييييب


ادعو للصمت.. حين يغيب نبض القلب

ادعو للصمت..حين تتساقط اقنعه من احببت

ادعو للصمت..حين تشعر بالغربه والجميع حولك

ادعو للصمت..حين يعتريك الالم من عذاب مايسمونه الحب

ادعو للصمت..حين تتجول فى الشوارع ورغم الزحام تشعر وكأنها مأوى للاشباح

ادعو للصمت..حين تتلاشى الفرص لبناء مستقبلك الذى تتمناه وتحلم به

ادعو للصمت..حين تفقد اقرب الناس اليك وتتلاشى فرصه ان يعودوا من جديد

ادعو للصمت..حين تجد عيون حزينه تطلب فقط حق الحياه ولايمكنك مد يد المساعده

ادعو للصمت..حين تجد امواج البحر مليئه بالغضب والثورة لحال من حولها

ادعو للصمت..حين تستمع لموسيقى هادئه واشعار مليئه بالشجن

ادعو للصمت..حين ترى الناس يتخبطون من حولك كسراب طير ضل عن قائده

ادعو للصمت..حيت تتأمل القمر رمز العشاق والنجوم من حوله كجنود تحميه

واظل اقف فى صمت رهيب انتظر دفىء الشمس عله يأتينى بالامل المفقود


16 بعبر ياشعب:

@hmed said...

دانتي كده هتنفجري
خديها مني نصيحه....ادعي للصراخ احسن :)

smraa alnil said...

ايه المدونة العسل دي بجد
انتي تحفة
انتي خليتي اقرا موضعات منها

بس نصيحة مني احنا كدة كدة محترفين الصمت
فمش طالباها كبسة بقي

خلي الشعب يهيص
بجد
ان شالله هتلاقيني رشقالك كتير

šσяšαяαα said...

-ahm@d:
مانت ماتعرفش اللى فيها..انا من كتر الزعيق والصويت صوتى راااح وعشان كدا انا اتخرست وقرنى فوق رقبتى.
-smraa:
والله ياجماعه دا كتير عليا المفاجأت دى
كل الحبابيب منورنى كدا..انا كدا اتغر:)
وانا على فكرة مليش فى البؤس دا حتى لما احب اعبر عنه بيكون بشكل ساخر بس المرادى انا صدعت من الرغى والجعجعه فقلت ادى جزء صغنون للصمت..ناخد دقيقه حداد كدا عالماشى:)
وانا كل اللى عملته انى سبت رجلى الغلبانه مع نفسها تطلع اللى جواها من غير تفكير واهو طلعت الكلام دول..
حظكو كدا بقى وعالعموم المرة الجايه نخلليها دعوة على الغداء..هو دا اللى هيبقالنا:)

šσяšαяαα said...

وانتى ياسمراء تشرفينى فأى وقت.. رشقت سيادتك يافندم ولارشقت الورد فى صحراء مدغشقر.
انا كداهعيط

الأرمـوطــي said...

بوست رائع فعلاً اسلوبك اكتر من ممتاز

šσяšαяαα said...

شكرااااااا قرموطى على مرورك
ايه دا.. اوعى تكون الكارموطى بتاع نزلة السمان اللى بشبوش بيدور عليه؟؟!!
لاياعم احنا ماشيين فى السليم وداخلين جوا الحيط كمان.
لا بس باين عليك مش سهل..كفاية انك كعبلت البت بتاعت تيتانك وتلاقى كابريو انتحر دلوقت.. يواد ياقاسى انت:)

blackguitar said...

ايه ده؟ ايه الكلام الكبير ده؟؟
هما اخترعوا كلام جديد ولا ايه؟؟؟؟
ولا ده مش عربى
طيب مش تنزليه بالترجمه عشان افهم ايه الحوار
هو مش الصمت ده هو اللى بنسقيه فالشاى ولا ايه؟؟؟؟
يالهوى لو كانوا هيغلوه
مش كفايه غلوا الفطير

حبيبة الرحمن said...

رائع رائع رائع........بجد كلماتة جامدة ومؤثر جدا واللذيذ ان انتى تقريبا جايبة كل حالات الصمت فعلا كل ما افتكر موقف الاقيكى كاتباة .........هو متكامل

فى مواقف بتحتاج صمت بس انا فاهمة قصدك ان الصمت دة جاى بعد الانفجار والصراخ وفقدان الامل وبيبقى الكلام ملوش لازمة ....(صح ؟؟؟؟ )

بس بجد كل الكلام اللى مكتوب متكامل وبيحصل للواحد كتير

raspoutine said...

انا كنت جاى عشان اشكرك على زيارتك ليا فى مدونتى
وقريت كلامك اللى فى البوست الاخير
لكن الصمت عمره ما كان حل لاى مشكلة ولا لاى وضع كنا فيه
على فكرة من فترة كده سمعت اغنية لمطرب مشهور بالاغانى الشعبية اسمها دقيقة حداد المطرب ده الله يكرمه مسبش حد فى الدنيا الا لما وقفنا عليه دقيقه حداد الاغنية كلها تعب وشوية نقوم وشوية نقف مرة على الاب ومرة على الصاحب ومرة على الصاحبة
افتكرت الاغنية دى لما قريت البوست بتاعك

يا مصر اكتب إليكي رسائلي said...

بمناسبة ذكرى المولد النبوي الشريف ،
يسعدني انت انتهز الفرصة لأتقدم بخالص التهاني
وأطيب التمنيات القلبية
لكم والأسرة والأصدقاء ، وكل عام وانتم بخير

عاشقة الوطن said...

سرسورة
دعوة للصمت
بوست فى منتهى الروعة
وجميل جدااا جدااا
فعلا فلنصمت جميعا ولنرى ماالجديد الذى سيطرأعلينا

تحياتى الشديدة لمدونتك وليكى

Anima said...

كده حيطول صمتك كثييييييييييييييير

Blank-Socrate said...

تصفيق حاد
و ترحيب بمدونه جديدة جميله مميزة

كلامتك رائعه
و تعليق بسيط دائما خيبه الامل عند حدوث ما هو اقل مما ننتظر او نتوقع
لذا اعتقد من الافضل ان نراجع كل افكارنا و طموحتنا و نحاول ندخل فى الحسابات ان فى ناس كتير من اللى حوالينا مش واخدين بالهم اننا معاهم اصلا فى الدنيا

و ان اول مرة تعلقى عندى فى موضوع خطيبتى حببتى ... مفقوسه قوى ....لما نتعرف الاول D:

šσяšαяαα said...

-black guitar:
هما غلو الفطير؟؟؟؟؟
دانا كنت هروح دوار العمده اخطفلى
كام واحده اكلهم بالعسل
كدا هيظبطونى متلبسه..وااااااااااء
ــــــــــــــــــــــــــــــــــــــــــــــــــ

kitty:
كتكوتى المكتكته
شكرا شكرا شكرا
وصح وتمام وميه ميه وهو دا اللى اقصده
بالظبووووط
قشطه عليك يامعلم يافاهمنى
ــــــــــــــــــــــــــــــــــــــــــــــــــ

raspoutine:
العفو وانا اتشرفت بمدونتك كتير
وفعلا الصمت مش حل لكن احساس
انا حسيته ولقيتنى بكتب عنه
وزى ماكيتى قالت
ان الصمت دة جاى بعد الانفجار
والصراخ وفقدان الامل وبيبقى
الكلام ملوش لازمة.
وانا فعلا افتكرت الاغنيه دى لما كتبت اخر جمله:)
انا اتهريت الاغنيه دى كل مامشى
اسمعها هى للمغنى.....تصدق نسيت اسمه:)
عموما انا سعيده جدا لمرورك واتمنى
ماتكنش اخر مرة
ـــــــــــــــــــــــــــــــــــــــــــــــــــ

يامصر اكتب رسائلى:
وانت بألف خير وصحه
ودايما سباق كدا
لو استنيت يومين بالعدد كنت هتلاقينى
مهنيه الشعب كله:)
ياللا عمرك اطول من عمرى وشكرا لمرورك
ـــــــــــــــــــــــــــــــــــــــــــــــــــ

عاشقه الوطن:
انتى اللى اروع وشكرا لمرورك
وخلليها دعوه للصمت وللتأمل
كله على سطوح بيوتكو وتأملو
تأملو
تأملو
هااااااا
هل من جديد:)
ـــــــــــــــــــــــــــــــــــــــــــــــــــ

anima:
وماااااااااااااله
هو احنا ورانا حاجه:)
ــــــــــــــــــــــــــــــــــــــــــــــــــــ

blank-socrate:
يعنى نشحن امل بكارت 100
علشان لو الرصيد نقص ل50 واللا حاجه
نبقى عملنا حسابنا:)
وبعدين ليه يعنى الإحناج دا بس
فقستنى ماشى انما مش تسيحلى بقى
فى المكان:)
تحياتى

Shreef said...

ما اجمل تلك الكلمات..من الاخر كفى بالصمت لغة

šσяšαяαα said...

اذا كان الكلام من فضه
فالسكوت من ذهب
وانا ناويه اخزن كام طن ذهب كدا عالماشى:)