Friday, March 30, 2007

مؤتمر المصطبه العربيه..كلاكيت 19 مرة...هااااااااتسى








ياحلاوة يولاد..والله واتلمو الاخوة الكرامازوف تانى..متجمعين كدا عند النبى دايماوالناس ولاعارفه تروح عمرة المولد والسكك واقفه قال يعنى واخدين معاهم الدمار الشامل!!دا حتى خسارة فيهم.. كل سنه وانتو طيبين صحيح(ياربى حتى المولد مش عارفين نتهنى بيه)اه وبالمناسبه دى ناويين يعملو عملة موحده للعرب زى اوروبا.. وماحدش احسن من حد يعنى هما اللى على كل شكل ولون ولسان متحدين وعاملين عملة واحنا ياللى كلنا لون واحد ولسان واحد مع انى بصراحه مش بفهم من كلامهم حاجه بس المهم يعنى احنا عارابون فى الاخر وناويين ان شاء الله نجمع الجنيه والريال والدرهم والليرة ونعملهم عملة واحده وهنطلق عليها( جـــردل)..


ياللا الف مبروك وعقبال البكارى.

ام هند..عدت الست قمة على خير زى كل مرة ولله الحمد
مع زيادة فى القرارات اللى هتشرف اخواتها المركونين عالرف(مافيناش غير لسان وورق العتة بتاكل فيه)




هذا وقد اختتمت القمة العربيه امس بالرياض بتأكيد التمسك بمبادرة السلام خيارا استراتيجيا للعرب..طيب هو اشمعنى الخيار(مافى بصل وطماطم وخس وفجل واللا الجزر ياعينى عليه-بالذات بقى للى لازقين للكمبيوتر زى حلاتى-)يعنى ممكن نسميه جزر استراتيجى علشان كدا فيها تحيز واستبداد(ياجماعه انا هعمل استفتاءاللى عاوز جزر يبقى يصوت)ياربى دايما اخرج عن الموضوع كدا..

حد يبقى ينبهنى ياجمااااعه


ياالا ام هند تانى..مستر عمرو موسى قال ان مدام اللى ماتتسمى ولاتوعى مش عاوزة غير التطبيع فقط انما الانسحاب والمفاوضات ايخى عليهم وياى لسا ناقصين ملح.. قال يعنى هو جاب التايهه


بس شوفو بقى الحته الجامده اللى جايه دى وركزو كويييسسسس


فى المؤتمر الصحفى اللى اتعمل بعد القاع..يوه قصدى القمه جدد فخامه وعظامه وجلاله وسموالامير سعود -وزير االاوت دوور اى الخارجيه السعودى - اكد اللى قاله فخامه وسمو...... وكل حاجه العاهل السعودى بان العراق-رحمه الله- يخضع للاحتلال وقال- بالنص من الاهرام-:لا ادرى كيف يعرف عن بلد يحتوى على جنود ليسو من جنسيته الا بالاحتلال؟؟!!(مع بحلقه العين ورفع الحاجبين)وقال كمان ان اى عمل عسكرى لايتم بدعوة من البلد المعنى فإن هذا يعد احتلالاااااا..الله اكبر
زغرتى يام السعد وارقصى يابهيه وفرقى الشربات يابهانه

ايه دا.. يادى الغم ياللا ادخلو بيوتكو تانى الفرح خلص اصل اللى متتسماش اس اتنين فوجئت بكلام العاهل السعودى (يعنى بحلقت بعنيها ورجعت خطوا لورا من هول الفاجعه)وناويه تطلب ايضاح وتوضيح وتفسير من الرياض.. اخص ياراجل بقى دا كلام يتقال وتزعل ماما منك كدا..




اهم كدا هياخدو القهوة والسكر وشوف بقى هتظبط دماغك ازاى.




على العموم ياجماعه ماما اتبسطت اوى من الاعلان اللى طلعته القمقومه وعشان كدا

عزماكو كلكو على الغدا ياللا اتفضلو وبالهنا والشفا...نياهاااااااااااا


10 بعبر ياشعب:

حبيبة الرحمن said...

جزررررررررررررررررررررررررررر

لولولولولولولى.. ياخسارة الفرح خلص وانا اللى كنت فاكرة انى ههيص فية مش مشكلة بقى نستنى السنة اللى جاية اللى شبة السنة اللى بعدها و اللى بعدها.........الخ فلتحيا القمة العربية
هو الغدا فين؟؟؟ :D

šσяšαяαα said...

ايون كدا انا عاوزة التصويت يسمع الخيار عشان يعرف انه الجزر هو الجزر وسيظل جزرا وسنظل ناكله ونعمله عصير ومربى.
تعجبنى ياباشا وخللى الهيصه عللينا المرة الجايه..لو فى جايه بقى وعليكى خير

وبعدين غدا ايه اللى انتي جاية تقولى عليه؟
انتى عارفه معنى الهامبورجر الامريكانى دا ايه؟!!

blackguitar said...

ياختى البلد كل مالها وحالها بيتعدل والحمدلله
الرغيف سعره زى ماهو
صحيح دول بيحبونا اوى

šσяšαяαα said...

امال يابنى
انت مش واخد بالك العيش الكايزر المحشى
خيره فيه وواخد مقاسه تمام يعنى
ولا سندوشت وصايه:)

mohand said...

السلام عليكم

لمه واحده بتجمعنا كلنا
الشبكه العربيه للسرقه الدوليه

ولا عزاء للشبكة التانيه


بس انصحك متحاوليش تطلعي بحاجه مفهومه من القمة
لانها كل شويه يتلمو وكل واحد يتخانق مع التاني ويمشو

كولو علي الله ويا بخت من قدم شئ بيداه التقاه وهنيالك يا فاعل الخير والثواب

بشحت اه مش فاهمه غلط
اصل هوه ده حالنا بعد كام سنه
وهنعمل قمة للتسول
متقلقيش

مع فائق تحياتي
مهند المصري
الباحث عن الحقيقة

Blank-Socrate said...

مبروك للعرب مبادرة الجزر الاستراتيجى

الراقـــص مع الذئـــــاب said...

جميل اوي موضوع القمة العربية
انتي عارفة ان اي واحد في الشعب العربي ممكن يقول البيان الختامي بتاع اي قمة عربية هتتعمل في المستقبل
ودي قالها الراجل المطرقع (اللي احنا بنقول عليه مطرقع) القذافي
اما بخصوص الخيار وليه اختاروه وفضلوه عن البصل والتوم والفجل والجرجير فأنا عن نفسي مش هتكلم في الموضوع دا عشان الرقابة...لأن الاختيار كان لأسباب اخلاقية...والاختيار كان اتباعا للمثل الشهير ((الدنيا زي الخيارة يوم في ايدك ويوم في السلطة))...بس برضو انا اعتقد ان الجزر ينفع....انا عموما بش بحب اتكلم في السياسة كتير
بس الشئ لوزم الشئ
انا فكر استضيف القمة اللي جاية عندنا في البيت...والله اخلي امي تعملهم صنية مكرونة بالبشمل احنا عندنا اكرام الضيف زي اكرام الميت
يعني مش هنخلي نفسهم في حاجة

معلش ردي طويل بس هختمه بكلام الشاعر الجميل احمد مطر عن تخيله لأجتماع الرؤساء العرب:


أنا لو كنت رئيساً عربيا
لحللت المشكلة…
و أرحت الشعب مما أثقله…
أنا لو كنت رئيساً
لدعوت الرؤساء…
و لألقيت خطاباً موجزاً
عما يعاني شعبنا منه
و عن سر العناء…
و لقاطعت جميع الأسئلة…
و قرأت البسملة…
و عليهم و على نفسي قذفت القنبلة

واحـــد مـــــن الـنـــاس said...

ربنا يخليلنا الريس ياااااارب
ويكرمه ويديله كباب وكفتة زي ما هو عايز

اللهم اديله جرجير

كملي الدعاء يا صرصارة :)

بس بوست هايل صراحة

Shreef said...

قمة مين..صباح الجزر..و متفرحيش اوي العملة الموحدة مش لينا دول لدول الخلللليج..و ابقي سلميلي على الزعما..وحلوة الصور اللي انتي حاطها بصراحة..الصور كانت تكفي..سلام

šσяšαяαα said...

-mohandat:
ولا للشبكه التالته كمان
وبعدين انا لوقلت بفهم منهم حاجه ابقى ام لمعه المصريه
فقط ابتسم لنشرة الاخبار وارقع بالصوت من جواك
وبعدين ياسيدى مبادرة لتيفه منك لعمل قمه للمتسولين
احجزلى معاك بقى فى الصف الاولانى الله يكرمك:)
ومع فائق تحياتى
ـــــــــــــــــــــــــــــــــــ

-blank socrate:
الله يبارك فيك
وعقبال مبادرة الوز العراقى والديوك الشركسيه
ـــــــــــــــــــــــــــــــــــ

-الراقص مع الذئاب:
عيب علينا والله نقول عليه مطرقع دا لسانه بينقط حكم.
وادى ياجماعه مبادرة من اخوكم هنا لاستضافه القمه
دا شىء هايل وياريت كمان بعدها تختم بمؤتمر المتسولين اللى
اشار اليه الاخ مهند واهو بالمرة هيكون الغدا جاهز
وسعادتك تطول زى ماتحب يافندم...
انا هعمل الصفحه دى استرتش مخصوص علشانك.
واحب اختم حديثى بمناسبه تشريفك ليا وبمناسبه الشعر
اللى جميل فعلا واقول:
جالو عليناااا ديااابه واحنا يانااااس غلاااابه
يامؤتمرنا غنى بلوتنا عالرباااااابه
وشكرا:)
ـــــــــــــــــــــــــــــــــــ

-واحد من الناس:
من عنيا ياباشا
اللهم خلله اكتر ماهو مخلل
اللهم اديله بطيخ من غير بذر لسهوله الهضم
اللهم كببه وجزره وسلطنه
وكفايه كدا احسن هنروح فى داهيه:)
ـــــــــــــــــــــــــــــــــــ

-shreef:
مساء الفجل
وبعدين كل العرب اخوه يعنى العمله جايه جايه
الصور حلوة اه بس اودى لسانى دا فين
امال رغايه عالورق وبسسسسس
تحياااااتى ليك وشكراااا عالمرور