Sunday, March 25, 2007

اين تذهب هذا المساء....... مسرحيه داسطوووووور يابلادنا

هو ايه اللى بيحصل بالظبط فى البلد دى...انا لاول مرة احس ان الهرم اتقلب واللا الشمس مش ناويه تطل علينا تانى واللا النيل هيسيبنا ويطفش..يمكن يهج للصين.. واللا دماغى بدأت تهيس ومش عارفه بكتب ايه اساسا
هى دى مصر اللى اتكتب فيها اشعار من ايام الفراعنه واللا زوروها وبقت مجرد صورة من الزيت لو جينا نشيل التراب اللى غطاها هتتمحى للابد...
على فكرة انا كنت هكتب كلام ساخر وعبيط كالعاده بس فعلا جوايا كوكتيل رائع من حزن وخوف من بكرة وقلق وارتجاج فى المخ من كتر اللخبطه اللى بتحصل حواليا.
يعنى ايه دستور..طيب مش الدستور دا يعنى كتاب كل اللى فيه بيتكلم عن حمايه المواطن وتوفير وسائل الراحه والامكانيات اللى تساعده انه يبنى وطن كلنا نفخر بيه..وكل دا عن طريق القوانين اللى بينص عليها...هو كلامى دا صح واللا انا فاهمه غلط
طيب ولو غلط امال يعنى دستور وكتاب الوطن...انا كدا حاسه انه كتاب ابله نظريه لكيفيه طبخ الكلام اللى ييجى على المزاج ويطلعلنا اكلات على ذوق الروس الكبيرة مع قليل من الشطه علشان يولعو فى عيشتنا اكتر ماهى ولعه.
وانا اللى كنت عامله فيها سوبر صرصار ورايحه اصوت واقول بأعلى صوتى"لا" ...بلاخيبه عليا قال يعنى كدا هيقلبو الدستور مجله ميكى ونعيش الالوان.
كدا فعلا الاضراب اللى بيتكلمو عليه دا احسن بكتير من ضربة شمس مثلا واللا ضربه اى حاجه تانيه ربنا يكفينا الشر.
واننى من هنا اخوانى الاعزاء اناشدكم بان تطنشو البتاع دا لان الدماغ ناشفه ولما بيتحط فيها حاجه يبقى ياللا السلامه وماانشف دماغ حكومتنا الغاليه...ربنا قادر عالمفترى
وبالتالى سأفضل الجلوس بالمنزل وطبخ دستور على ادى مع شويه سلطه مضافا اليها حرقه دم ومراره وسكر لزوم التحليه.
بس بجد سؤال هام جدا...مين اللى ألف دااستورنا الموقر ويعنى ايه دستور؟
هو دا بتاع دااااسطور يامباركين وبعيد بعيد وسامحو ياسيااااااادى دا جه يغير البلد ويبيعها بس قال لما اخد الاذن الاول
الرضا والسماح ياهال السمااااح... هذا ونوافيكم غدا بالفصل الاول من المسرحيه لان دا كانت المقدمه بس
وياعالم النهايه امتى
عليه العوض ومنه العوض

13 بعبر ياشعب:

واحـــد مـــــن الـنـــاس said...

كل دسطور وانتي طيبة

..........tahayo2at said...

فعلا المرة دي تقييييييييلة
و تدل على تشبث غير عادي بالسلطة

انا عندي حالة اكتئاب غير عادية

زمان كنا مقتنعين ان خلاص ما فيش أمل
بس دلوقتي
نحلف عالمصحف انها خربت

šσяšαяαα said...

-واحد من الناس:
انا بجد فى قمة سعادتى انك شرفتنى فبلاعتى المتواضعه بس ليا عتاب عندك..
ايه الكلام اللى بتقوله دا.. لاهو ممكن يدسترو الداسطور تانى واللا يمكن يعملو اليوم دا عيد قومى يحتفل فيه المصريين بالخيبة التقيله اللى حطت على دماغهم... يالهوى لايحصل بجددددد

-dr.sherbo:
ياشيخ ولاتقيله ولاحاجه
تعرف دلوقت فكرتنى بفيلم صعيدى رايح جاى لما قاله مش دا اللى دهسو الجطر السنه اللى فاتت جام جالله لع دا داس على دماغه بس جام جالله يبجى دا الجطر اللى عملوه مراجيح فى اول البلد..
يعنى البلد هتتعمل مراجيح للى عاوز والساعه بعشرة دولار والحسابه بتحسب
واللى اقصده ان البلد بتخرب ودماغ الراس اللى بتديرها انشف مالحجر الصوان..يعنى ولاحتى سوبر ريد هيأثر فيها.. والامل فى العنب والبلح والتوك توك..
ومين غير حلفان مع ان الحلفان بغير الله لايجوز.. قول لا اله الا الله وحسبى الله ونعم الوكيل وان لله وان اليه راجعون واقابلك فى الاربعين:)

حبيبة الرحمن said...

موضوعك جة فى وقتة واحلى حاجة باسلوبك الخفيف كالعادة ...........انتوا زعلانين كدة لية ؟ يعنى هى جت على دى ماكل حاجة بتتغير ( الا حاجة واحدة وانتوا عارفينها) اشمعنى يعنى هو الداسطور مالوش نفس بس بجد ربنا هو اللى يتولانا برحمتة فى اللى احنا فية

سلام
كيتى :)

šσяšαяαα said...

جيجووووووووووو
واللا نقول كيتى ياللا امرنا لله فى التقاليع والاسامى اللى هتبوظكو دى:)
انا دايما باجى فوقتى ياماما بس اتاخرت حوالى شهرين وزياده على ماجيت
انما بعد كدا مش هسيب بلوعتى ابدااا..
هنا احسن بكتيييييير
وتحياتى ليكى

ana ga3an said...

صرصارة هانم
دة احنا حاطين الامل عليكو احنا خلاص عجزنا
ومبقناش نافعين في حاجة غير الجعجعة علي النت
حولي جايز في يوم يحصل حاجة

šσяšαяαα said...

-ana aga3an:
استاذى ومثلى الاعلى;منور منور منور:)
وعلى فكرة الزمن دا مبقاش فيه كبير واللا صغير..الكبير كل يوم بيعدى بيزود فى عمره يعنى مش بإيده والصغير شعره شاب ماللى بيشوفه..والشاب بقى اكبر ماللى بيقولو عليهم معمرين يعنى كله بقى فنفس المركب..مركب الشيخوخه المبكرة والمتأخرة يعنى الكل مابقاش قدامه غير الجعجعه برضو ومحدش احسن من حد:) انا اجعجع اذا انا ابعبع اذا انا مكبوت واتمنى فعلا ان الجعجعه دى تكون مرحله من بعدها نبدأ نجعجع بالفعل مش بالكلام بس..
تحياتى وشرفتنى

@hmed said...

الناس عايشة بقانون الطوارىء خمسه وعشرين سنة - اللي هو مطعون في دستوريته اصلا....وكمان اسمه طواريء ...يعني فترة طارئه ...شهر ..اتنين ....مش خمسه وعشرين سنه .....-يعني يوم ما جه يتعدل ويمشي قانوني تزعلوا...انا مش فاهم انتوا عايزيين ايه...دا بيحمينا من الارهاب الياي والوحش....السياحة مسمار جحا....والاخوان المسلمين ....المسمار اللي جنب مسمار جحا....والتصويت علي كل الاربعة وتلاتين ماده مره واحده يا اما بلاش....الاقتصاد والتنمية والامن والاستقرار...وسلملي على امن الدولة...ومتنساش تمسي على الحرس الجديد يا سيادة معالي دولة امين الشرطة باشا

šσяšαяαα said...

وسلملى على المحشى الدستورى بالخلطه الحزبيه الخروبيه المدشدشيه..
وكيف اقول عنكى ياطوارىء طول مابامبرز متوافر فى الاسواق المحليه.
رحمك الله ياجحا لقد ذهبت ولكن القدر خلق منا 80 مليون جحا...واااااااء

ana ga3an said...

ي مشكلة اصلها خطيرة مش حكاية شباب وعواجيز
اولا يعني اية مواطنة وكام واحد في مصر فاهم يعني اية مواطنة
صلو علي النبي
حقوق المواطنة دستور‏1923‏ الديموقراطي‏,‏ تمكنت المعرضة المصرية في العصر دة من فرض انتخابات حرة أسفرت عن فوز حزب الوفد قائد ثورتهم بأغلبية ساحقة‏,‏ وأجبروا بريطانيا المحتلة علي إصدار تصريح‏28‏ فبراير‏1922‏ باستقلال مصر وإن كبلته التحفظات‏
وترتب علي الفعل دة امور عديدة ليس المجال لذكرها
لكن الدستور دلوقتي بعد التعديلات الهلامية دي
اصبح فرض علي الشعب وليس اختيار
وهو امر لو تعلمون عظيم

šσяšαяαα said...

أكدت وثيقة المبادئ الأساسية للحزب الوطنى الديمقراطى على التزامه بمبدأ المواطنة كأساس للمساواة التامة فى الحقوق والواجبات بين جميع المصريين، كما أشارت ورقة حقوق المواطنة والديمقراطية التى أقرها المؤتمر السنوى الأول للحزب إلى إيمان الحزب بأن إحياء مفهوم المواطنة سيكون له أثر ملموس على تفعيل الشعور بالانتماء وبالوحدة الوطنية، وتشجيع المواطن على المبادرة والمشاركة الشعبية، وعلى ممارسة حقوقه السياسية.
والكلام دا نقلا من موقع الحزب الوطنى سخصيا.
وحد بقى يفهمنى الكلام دا بيقول ايه..انا ثقافتى صرصورية:)
بس الترجمه شكلها هتدينى حاجات جامده وامور عظيمه على رأى استاذى جعان.
انا خايف:(

واحـــد مـــــن الـنـــاس said...

بالنسبة لمبادئ الحزب الوطني

بسم الله الرحمن الرحيم

الاجابة الصحيحة هيا تونس

šσяšαяαα said...

-واحد من الناس:
اهو دا الكلام السليم
هههههههههههههههههه
هههههههههههههههههههههههه
ههههههههههههههههههههههههههههه