تاجتاجونى آاال كابونى

ماتسألونيش ايه العنوان الغريب دا انا اللى جه فبالى كتبته وخلاص.. اهو نظبط القافية:)

انا كنت نايمة فحالى ولقيت من ييجى شوية ايام كتيرة كدا حد بيخبط عالبلاعة وبيزعق وماسك مايكروفون ماللى بيدوروا بيه عالتاييهن وبيقوللى بصوت عميييق ومخييييف ... ياساااااارة انتى اتاجيتى من خالك الصباغ ولااااازم ولابودن انك تعملى الواجب دا قبل فرز نتائج الواجبات فمارس القااادم..ولقد انور من اعذر
وانا طبعا قلت فعقل باللللى استرها معاااانااااا يااااارب

ولسا هقوم واشيل اللحاف عشان اعمل الواجب التاجى لقيت مـيرمـيـد ومـوجــة ناويين يدبسونى هما كمان فواجب تاجى بس الحمدلله اكتشفت انه نفس تاج خالو الصباغ..
كدا مش هاعطس كتير..حاكم التاجات دى بتجيبلى حساسية فى القرون الانفية عندى

بس لااااازم قبل ماجاوب عالتاج اوريكوا انا شكلى ايه لما قومونى بقوة الميكروفون من البيات الشتوى اللى انا عملاه


وياريت معاها ساوند تراك اغنية شادية
يااااعينى يااااعينى يااااعينى عالولاااااااااا.. اااااه

طيب نبتدى بقى من اول السطر كدا ونستجاوب

1
هل توافق على حزف خانة الديانة من البطاقة الشخصية ؟

اى دونت سينك سو

لانه تحديد الديانة بيتوقف عليه حاجات كتير
زى
وزى
وزى

وحاجات تانية كتير:)

2
ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟

انا ماسمعتش عن الفئة المفئفئة دى غير من بعض الزملاء المدونين
انهم متوغلين فمصر كمان
ورأيى انهم نفعونا فحاجة واحدة بس
عودة سلالة قوم لوط مرة تانية من علامات القيامة
كويس عشان الواحد يبدأ يستعد لليوم دا ويجمع رصيد لابأس به من الاعمال الصالحة

وبالنسبة انها حرية شخصية
مممممممممممممممم
انت حر مالم تضر
بس اللى هما فيه دا قمة الضرر سواء ليهم او للمجتمع ككل
ولذلك ماعتقدش ان دا يبقى تبع اى نوع من انواع الحريات

وعشان يكون فى اعتراف بشىء يبقى معناه انه موجود
وانا بصراحة مش قادرة ابلع ان فى بشر مالنوع دا عندنا
معلش بقى يظهر انى عايشة فغيبوبة
بس مش عاوزة حد يصحينى:)

وطبقا لكل ماذكر يبقى انا على مااعتقد لا اعرف اى احد من هؤلاء وربنا يكفينا شر المرض:)

3
هل تعتقد بوجود إضطهاد للمسيحين فى مصر ؟

إضطهاد؟؟؟؟؟؟؟؟؟؟

وين هنادى يااماااااى
ههههه مش عارفه افتكرت المشهد دا ليه
ماعلينااااااااا
انا شايفة ان كل حاجة فى الدنيا دى ليها شىء مضاد وظهور الشىء المضاد بيكون بشكل نسبى
يعنى لو اخدنا الحرية فمصر
فى ناس هيقولو ان الحرية موجودة وبنسبة مية فى المية
وفى ناس تانية هتقول انها بنسبة ميه فى المية بس تحت الصفر
وكلمة الاضطهاد دى حاسة انها كبيرة اوى وليس لها اى مكان هون..لامؤاخذة يعنى

انا عن نفسى بشوف كل الناس واحد ومش بتفرق معايا ابداً الديانة
طالما فى حسن معاملة واحترام متبادل
والتعصب والجهل موجودين للاسف فكل الاديان

فى حدود شائكة المفروض اننا مانتعدهاش يعنى نتعامل فحياتنا بشكل طبيعى جدا والدين دا شىء خاص بكل انسان
واتمنى بجد اننا نبعد الدين عن اى مشاكل لان الأديان دى شىء مقدس ولايجب المساس بها او خلق مشكلات تحت مظلة الدفاع عن الدين

وشكرا والسلام عليكم:)


4
من هو الشخص الذى تختارة لرئاسة مصر ؟

ابو سويلم بتاع كفر الهنادوة

5
أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟

انا اعرف حاجة واحدة بس
اللى عاوز فعلا انه يعمل حاجة للبلد ويكون جااااااااااااد وبيقول مصر مصر تحيا مصر تلات مرات قبل الاكل
يبقى يستحق انه يشترك معايا فى الحزب
بعيييدااااا عن الدين..مصممين تحشروه فى السياسة ليه
هى سلطة خضار؟؟؟؟؟؟؟؟؟

6
فى رأيك الشخصى .. ما هى أفضل مدونة على بلوجر قمت بزيارتها ؟

لا استطيع ان احدد مدونة بذات نفسيتها
لانهم كتييير جدااا

ربنا يخلليهم للشعب التدوينى:)

7
للذكور فقط : أيهما تفضل كزوجة .. إمرأه عاملة ، أم ربة منزل ؟

ممكن اغلس؟:)

الاجابة الصحيح هى
عدس بجبة

للإناث فقط : هل توافقين على الزواج من رجل مطلق ؟

اى دوزنت سينك سو

8
اذا تزوجت وأنجبت ولدين وبنتين .. أى الأسماء تحب أن تسمى ؟

اشمعزا يعنى ولدين وبنتين

ياللا اللى يجيبه ربنا كويس
واذا جه يوم واصبحت فيه مدام
ان شاء الله ان شاء الله
هختار من الاسامى دى لانه حصر اتنين بس صعب شوية
احب زياد ومروان ويوسف واياد وعبد الرحمن

والبنوتات احب اسمي
حنين ورناد وريما وتالة
ونبقى نعمل قرعة ونختار:)

9
هل تعتقد أن توريث الحكم فى مصر . . سيتم فعلا أم لا ؟

القوى فى الاقوى منه
واى حد ناوى يخلل فى برطمان الحكم احب اقوله
ماكنش انعزر ولاباع جزر ولاخلل الكرسى واعتزر

10
فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

رجعولنا طابا وبقت مصرية فى ايدى تل ابيبية
ونصرونا بالضربة الجوية
ونيمونا وشدوا البطانية
وقشّطونا وبيقولو تخطيطات مستقبلية
واللى عشمان فيهم يروح الجمعية
يقف طابور ويحيى الجمهورية
ويشدله حجرين تسلية
ويستنى بكره اللى عمره ماهاييجى
واهو عمر يفوت والناس تموت
وتعيش وتاخد غيرها ياعنيه

حلوة الاجابة الحلمنتيشى دى واللا نشوف غيرها:)

**********

وختاماً احب اشكر من عميق صمام قلبى كل اللى نورونى ودايما يارب بلاعتى عمرانة بحسكم

واحب اهديلكم اغنية
ماتحرمش العمر من عطفك عليا
ياللى زيارتك مالسما اجمل هدية

ودى منى ليكم

وحشتونى وهتوحشونى جدااااا

الى لقااااااء بإذن الله

عالم سمسم.. للأغبياء فقط

عارفين طبعا كلنا عالم سمسم للاطفال اللى بيعلم اطفالنا الحلوين الحروف والارقام


دا على اساس انهم اطفال صوغننين وعقولهم لسا نونو عاوزة اللى يعلمهم بالهداوة وستيب باى ستيب
علشان طبعا عقولهم تتفتح ونسبة الذكاء عندهم ترتفع ويكونوا واجهة مشرفة للعالم العربى كله

بس اللى اكتشفته ان فى عالم سمسم تانى بس للاغبياء فقط واللى المفروض انهم تجاوزوا مرحلة الطفولة من قورن عديدة..ودا برضو بياخدهم بالهداوة ويقشطهم زى مابنقول بالتدريج اولا بالفلوس
ثانيا بالوقت
ثالثا باختبارات الغباء اللا متناهى اللى بيعرضوها
نفسر بقى التخاريف اللى انا قلتها دى

عالم سمسم دا انا اكتشفته وانا بقلب ذات يوم فى القنوات الفضائية ودا بيحدث نادراً لانى مش من هواة التلافازيون اوى واذا بى الاقى خير اللهم اجعله خير قنوات مخصوصة للمسابقات


والاقى عروسة حلاوة على مااعتقد انها انسان آلى متنكر على شكل بنى آدمة تتمايل يمينا ويسارا كعود القش المسوس
وفى الخلف شاشة يعرض عليها سؤال او فزورة لكى يجيب عليها المشاهدين الكرام
وعلى الشاشة ارقام الهواتف الخلوية والارضية لكل البلاد العربية
مع ساوند تراكس من اغانى العالم العربى خليجى..مصرى..شعبى..عنبى..حنطورى.. الخ
وتجد صوت هذه العروس الحلاوة زى ماتكون بالعة عرسة عالفطار وتقول للمشاهدين
ياللا معانا السؤال الجاى بيقول
ام مريم عندها خوخة ومشمشة وتفاحة يبقى اسم بنتها الرابعة ايه؟
وياللا مستنيين مكالماتكم والجايزة هتكون خمسة الالف دولار للفائز

وتلاقى الاتصالات عمالة ترف عليهم من كل لون وشكل على مستوى الكرة العربية
والكل عمال يضرب اى نوع من انواع الفاكهة لعله يصيب الاجابة الصحيحة
وانا شفت اللى بيحصل دا وجاتلى حالة من الاسبهلال مع كريزة ضحك بتجييلى لما بكون فى قمة الفرسة والغضب وفقعة المرارة

لا والسؤال شغال معاهم اليوم كله وفى ورديات كل كام ساعة عشان الموذيعة اللى واقفة ياعينى رجليها بتورم فبتروح تنقعهم فشوية مية بملح وتييجى غيرها تكمل المسيرة .. دا على اساس انو السؤال عويييص اوى وصعببب جداااا ومحتاج لفك شفراته عشان يتحل


يارب ارحمنا... يعنى احنا بقينا كدا خلاص
عقولنا انتهت صلاحيتها ومش لاقيين غير الهيافات دى اللى نتكلم فيها لا وندفع فلوسنا على امل الدولارات اللى هنكسبها لا وكمان ياريت بيجاوبو صح وكمان على مااعتقد مفيش حد اذا جاوب اساسا بياخد حاجة وكله فى الللمون
وخلاص الوقت مش عارفين نضيعه فإيه وبقينا نستغله فقنوات الرسائل والشات والمسابقات من نوعيه ام مريم
واللا دا هروب من الواقع المرير اللى عايشين فيه وعاوزين نضيع شوية فلوس على الترفيه على اساس اننا خلاص مابقاش عندنا مشاكل ولاعندنا ناس محتاجين مساعدة زى شعب فلسطين اللى محتاج كل قرش علشان يقدر ياكل لقمه حاف ويقدر يجيب شمعة تنورله العتمة اللى عايش فيها

ياألف حسرة على حالنا
ياألف حسرة على تاريخنا اللى شوهناه
ياألف حسرة على أمجادنا اللى ضيعناها
ياألف حسرة على عقولنا اللى موتناها


انا جوايا مشاعر كتير اوى
حزن وأسى
تعجب
غضب
غضب
غضب
يمكن لو قلت غضب كتير الناس دى تفوق مالبيات الشتوى اللى هى فيه..مش عارفه:(

جالى رسالة على الايميل اخدت منها الجزء دا.. حبيت اختم بيه اللى كتبته

سافرت في كل العصور
وما رأيت .. سوى العجب
شاهدت أقدار الشعوب سيوف عارٍ من خشب
ورأيت حربا بالكلام .. وبالأغاني .. والخـُطب
ورأيت من سرق الشعوب .. ومن تواطأ .. من نهب
ورأيت من باع الضمير .. ومن تآمر .. أو هرب
ورأيت كـُهانا بنوا أمجادهم بين العمالة والكذب
ورأيت من جعلوا الخيانة قـُدس أقداسِ العرب
ورأيت تيجان الصفيح تفوق تيجان الذهب
ورأيت نور محمد يخبو أمام أبى لهب
فاغضب فإن الأرض يـُحييها الغضب


تحديييييييييث
معلش مش هقدر بعد كل الرغى دا ماحطش الكلام الحلمنتيشى الجميل اللى افتكر ان كلنا سمعناه

عيني عاللي زمان كانو بيمخمخو
لو ميت زلزال ولا يتلخلخو
اطغطو الطمو صوتو صرخو
خليكو قاعدين انتخو

بنعيد و نزيد في الحضارات
قوم اعمل حاجه وورينا
بقا جدك يبني اهرامات
و عيالك يلعبو في الطينه

اعمل حاجه الله يكرمك
دحنا كنا كبار لينا هيبه
هو انا يعني اللي هفهمك
كتنا سبعه و ستين خيبه

بشبوشتى منور الحتة

الامريكان... والجدعان... وحبايب الجدعان
وسكاكين ومطاوى الجدعان
وأربيجيهات وقنابل الجدعان
وزغرطى ياللى مانتش دريانة
لولولولولولولولولوليييييييييييييي


بشبوشتى منور الحتة
وجايب مالمصايب ستة
لبسنا ياعرب العمة
وجاب لأولمرت بافتة
وقبل مايقول شااالوووم
كتبلهم عالروشتة
وقال فيها
انجغا انجغا ياختى عليها
محروسة مالعين وماللى حواليها
قتلو دبحوا قطعوا شرحوا
واعمولولنا البرجر واتوصوا
وبعد الشالوم حود على اخوانا العربو
وبالسلام الخليجى المربع استقبلوا
بس بأسعار البترول زعلوا
وقالهم اخص عليكو وعاللى بتعملوا
طب ليه كدا ياكبيرنا واحنا برضو نقدروا
والقهوة العربى المحبشة شربوا
وبالرقص مع هفهفة الشعر روقوا
و بسلام الانوف ودعوه
وجالنا هنا ونور حارتنا
ربنا يكرمه ويزود معونتنا
وراح شرم واتقى شر فرستنا
قال انه جالنا كرمال عيون ريسنا
ولاجل كلماته الحكيمة ونصايحه اللى بتنعشنا
وقبل مايمشى ويسبنا وعدنا بزيارة اخرى لبلدنا
وانا من بلاعة الغلابة اقوله
سكة اللى يروح يامشردنا

المعلم بوشبوش ف تصريح لجريدة الصراصير
بصبح وامسى على جدعان مصر كلهم
واحب اقلهم انى عملت اجدعها دماغ
وبشكركم على حسن تعاونكم معنا
فصداكتنا مع مصر عميكة وهى شريك حيوى لأمريكا

حاولت انى الم نفسى وماكتبش حاجة تانى عن السياسة بعد اعتزالى الكتابة عنها
بس لم استطع وربنا يستر على ولايانا

انا كاتبه الشعر الحلمنتيشى دا ففقرة التسلية عشان تستعدو للموضوع الساخن الملهلب القاااادم

عشان كدا انا كنت قافلة التعليقات لانه دا موضوع ترفيهى والنقاشات الحااادة فى بوست وسع البناااااطيل
على اى حال انا فتحت التعليقات هون برضو

وارجو منكم ايضا الانتقال الى التدوينة اللى بعد كدا

سانك يو:))

وسّــــع البنااااااطييييل...ارفع البناااااطيييييل

هى على مااعتقد لما تتجمع زى البنى ادمين مابيقولو تبقى بنطلونات
انما وحيث ان وبم اننى صرصورية فسميتها بنااااطييييل عشان القافية كمان حكمت

من حوالى شهرين كدا وفى حديث هاتفى مع صديقتى الصدوقة قالتلى
شفتى ياسارة اخويا عمل جروب عالفيس بوك واسمها الحملة الشعبية لتوسيع بنطلونات البنات
وانا طبعا سمعت العنوان دا وسخسخت مالضحوك.. اصل اخو صابحتى دا ماشاء الله عليه كلنا متنبأين له بمستقبل صحفى باهر
بس الاسم دا غريب اوى وطريف ولازم يشد انتباه اى حد يقراه
بس انا مليش طولة بالى اوى عالفيس بوك دا وبالتالى مادخلتش وشفت ايه الموضوع
بس الموضوع باين من عنوانه انهم مجموعة من الشباب اللى مرارتهم اتفقعت وجالهم تلوث بصرى من الاشكال الغريبة اللى بقت ماشية فى الشوارع دلوقت ومحسوبين علينا بنات

طب بالله عليكم بنات ازاى والبنت من المفترض يعنى انها عنوان للحياء والاحتشام والرقة والحاجات اللى بتفكرنا بمناديل فلورا اللى كلها حنية
واذ فجأتن يتشقلب الحال وتبقى البنات مثال لقلة الحياء والجرأة وقلة القماش وقلة الوعى وقلة بالمرة اكسرها على دماغ اللى اخترع كلمة موضة


طيب زمان ماكنش فى وعى دينى كافى زى اليومين دول ومن اهم الاسباب كان وجود الاحتلال اللى حاول ان يطمس اى هوية دينية وكمان مافتكرش ان زمان كان في الكم هااااائل من القنوات الدينية والمواقع الدعوية عالانترنت يعنى دلوقت مابقاش فى حد جاهل واعتقد ان الكل تقريبا عارف اللى يصح واللى مايصحش
طيب ياترى العيب من مين.. هل من الاهل اللى مابقوش فاضيين يربو اساسا واللا من المحلات اللى مش بتعرض دلوقت غير الهدوم اللى بترفع شعار قماش قليل وسعر كتييييير
والبنات ينضحك عليهم بكلمتين اساسيتين.. دا عالموضة او دا مستورد
والبنات ياعينى اللى عاوزة تمشى فى السليم مابقتش لاقية حاجة تشتريها

واللا كمان عشان لقمة العيش ومعظم الشركات دلوقت فأى وظيفة بيكون ليهم مواصفات مخصوصة فاللى تشتغل عندهم
مش عارفه انا شركات دى واللا معارض ازياء


انا مش عارفة اقول ايه على اللى الواحد بقى يشوفه وهو ماشى.. نفسى بجد اعرف هى النبات دى مش بتبص فمرايات قبل ماتنزل من بيتهم .. مش مستحية ماللى عاملاه فنفسها دا.. اهلها طيب سايبنها ينزلو مالبيت كدا ازاى

كان فى برنامج تقديم جمال الشاعر وكان مستضيف اخو صاحبتى وبنت كمان معاه عشان يتكلمو عن فكرة الحملة اللى عاملينها دى

اخويا كان قاعد بيتفرج معايا وبيقولى احنا مرة فى الكلية شفنا واحدة لابسة بنطلون ماللى بينشروه فى البلكونة الدور التحتانى ويرموها تنزل لابساه وبلوزة قصيرة وماتقلش تعبير عن البنطلون وكل دا ولابسة حجاب وكمان مش عارفه لافة على وشها جزء مالطرحة المهم يعنى مدارية وشها.. دا اكيد عشان لو حد من اهلها شافها كدا هايتاويها .. داعلى اساس انها بتنومهم قبل ماتنزل مالبيت

دا يعنى مثال للمحجبة العصرية فى هذا الزمان
جيبة عالركبة وتحتها بوت
بنطلون الله اعلم اتلبس ازاى اساس
بلوزة او بادى استيكومك
واخيرا طرحة مع الطقم الجميل دا عشان تدارى بيها شعرها اللى سايبه نصه بيان بمزاجها


طب والغلابة اللى ماشيين فى الشارع وف الجامعة ذنبهم ايه يشوفوا التلوث البصرى دا


هما صعبانين عليا ايون لكن برضو فى مناظر الواحد لو شافها بيشوفله شارع تانى يمشى فيه
ومن اهم هؤلاء المناظر الشبابية البناطيل اللو ويست.. الشعر المجلجل زى مايكون لازقه بغرا احسن يطير
وبرضووو بيقولو موضة وقال ايه اصل فريق بلو لابس كدا.. طيب كويس مش احنا بس اللى بيتاكل بعقلنا حلاوة المولد

احنا بقينا كدا ليه... اللى بيجرى لينا دا... مين اللى عاوز يشيل مننا احلى تقاليد واصول اتربينا عليها.. ياترى ايه الحل

انا بقول نكتفى بهذا القدر واسيبكم مع رابط الجروب عالفيس بوك للى حابب يتعرف عليها

والجروب بقت عالمية كمان بيجيلهم طلبات يوسعوا الحملة للخليج عشان العبايات هناك بقت عباية بالاسم والشكل موضة برضو:)

بالمرة يعنى وبمناسبة الحجاب اللى بنحترمه جدا

دى صورة عن مدى تقديرنا للحجاب فى مناسبتنا الاجتماعية

اسيبكو بقى مع

الحملة الشعبية لتوسيع بنطلونات البنات

دا الرابط بس تقريبا لازم يكون فى حساب اون
face book

مصدر الصور دى جوجل وموقع الاستاذ عمرو خالد

والـله مــااااا يـنفع

السلااااام عليكممم

خلليكم زى مانتم .. والله مانتو قايمين
طيب اتفضل معانا الشاى..دا فتلة وبحليب
لا والله انا مش عاوز اصلى واكل سندوتشين سدوء وعندى حموضة
لا والله ماينفع الكلام دا خالص لازم تقد وتشرب معانا الشاى اهو يدفيك فى البردد دا
شرب الشاى واتكل على الله

ركب الاتوبيس
اهلا استاذ برقوق ازى الصحة وازى الحال
يامرحبا بيك الحمدلله تمام ازى الصحة
وييجى الكومسرى
على فين ان شاء الله
وبيحط ايده فجيبه
لا والله مينفع انا اللى هدفع
انت بتقول ايه راجل والله العظيم ماحد دافع غيرى
ايه انت عامل تكليف واللا ايه دخل فلوسك ياراجل عيب

ننزل من الاتوبيس
يرن الموبايل
الو... ايوة يامبروكة ايه الاخبار دلوقت
الحمدلله يابيه الف مبروك المدام جابت ولد اسم النبى حارسه وصاينه
والنبى صحيح.. احمدك ياااااااارب

تانى الو
الووووو.. حلاوتهم ياختى انا خلاص بقيت ابو سحلول
والنبى صحيح.. ياالف نهار مبروك ياخويا يتربى فعزك
ورحمة الغالية ماحد مزغرط وعامل هيصة فى الفرحة دى غيرى
ان شاء الله كلكم معزومين عندى ناوى ادبح كتكوت محشى بالفريك بالمناسبة السعيدة دى
طيب ياخويا انا هروح اجيب الولاد يفرحوا ويلعبو مع سحلول الصغير

وفالعزومة الكتكوتية
خد يامسعد انت مابتكلش ليه
مش عاجبك الاكل واللا الكتكوت طلع كبير عليك مش قادر تخلصه
لا ياعم ازاى دانا حتى اكلت لليومين الجايين كمان.. خد انت بقى الجناح دا منى ليك
لااااااااااااا والله العظيم وحياة سحلول ابنى ماحد واكله غيرك
ياسيدى انا شبعت اودى فين تانى.. ماعرفش بس لو قمت من غير ماتاكله لاتكون بزعلة كبيرة

الماتش بدأ فى التلافازيون
هو مين اللى هيلعب النهاردة
نادى حارة الفقرى مع نادى غيط ابو سويلم
والنبى صحيح.. دا مفيش اجدع منهم فى عالم الكورة المستطيلة
واثناء الماتش... ها ياللا شوووط... جووووون
عليا الطلاق الواد كماشة دا ماحد بيضرب كورة زيه
لاااااا كماشة مين دا هو مفيش غيره الواد زعتر طب وراس الغالى ابويا ماحد بيضرب الكورة تقوله كوامان غيره
وخلص الماتش بالتعادل اتنين تحت الصفر

والناس مروحين
والله كانت سهرة جميلة يابو سحلول.. نجيلك ففرحه كدا ان شاء الله
تسلم ياغالى عقبال عندك كدا يارب
والنبى لما تروح ابقى سلملى اوى على ابونا الحاج
يوصل ان شاء الله
ـــــــ
ابو سحلول بقى وهو ماشى مرة لقى ناموسيات للاطفال عشان الناموس والذى منه
ايوة يابيه تعالى اتفرج دى ناموسيات صينى ممتازة
بكام الواحدة
30 جنيه بس يابيه
ايه دا ليه ياعنى انا هاخدها ب 20 بس
والله ماينفع يابيه دانا كدا هاخسر فيها
والله بكسب فيها اتنين جنيه بس
عليا النعمة دى واقفة عليا بخسارة
خلاص ياعم يعنى انت اللى بتبيع ناموسيات بس فى البلد
يابيييييه.. يابييييه.. تعالى بس
عاوزها بكام.. هما ال20 جنيه مفيش غيرهم
طيب امرى لله مع انى كدا والله العظيم خسران فيها

سحلول بيعيط
واااااااااااااااااااء
عليا الطلاق لو الواد دا ماتهمدش دلوقت لاكون دابحه بكره عالغدا بدل ماجيب كتكوت تانى

**
وهكذا اخوتى الاحباء كانت هذه حلقه من مسلسل عادات مصرية عربية مفيش زيها زى

دا سيناريو عن ناس بتحلف عمال على بطال فى الرايحة وفى الجاية

(مش عارفه كانو بيحلفو برحمة صدام كمان..ربنا يرحمنا جميعا)

عن ابن عمر رضي الله عنهما قال: سمعت رسول الله صلى الله عليه وسلم يقول: ((من حلف بغير الله فقد أشرك ))

هو ليه الحلفان سهل اوى كدا... ليه طلعنا بنحلف كتير كدا
ليه مش قادرين نمسك لسانا عن الحلفان وبالذات الحلفان بغير الله
وبالذات بقى كلمة والنبى اللى احنا بالذات كمصرييين بنقولها 500 مرة فى الدقيقة وماتسألونيش ازاى دى

بنحلف على كل حاجة واى حاجة وفأى موقف ومعظم المواقف دى بتكون هايفة وماتستاهلش
ودا انا بحس انه دليل على ضعف فى الشخصية وعدم ثقة بالنفس

انا اعتقد الحالة الوحيدة اللى نحلف فيها هى الحلف فى الشهادة
والله العظيم اقول الحق ولاشىء غير الحق

انما احنا ماشاء الله علينا

بنحلف فى الحق
وَٱحْفَظُواْ أَيْمَـٰنَكُمْ كَذٰلِكَ يُبَيّنُ ٱللَّهُ لَكُمْ ءايَـٰتِهِ لَعَلَّكُمْ تَشْكُرُونَ

وفى الباطل
إِنَّ ٱلَّذِينَ يَشْتَرُونَ بِعَهْدِ ٱللَّهِ وَأَيْمَـٰنِهِمْ ثَمَنًا قَلِيًلا أُوْلَـئِكَ لاَ خَلَـٰقَ لَهُمْ فِى ٱلآخِرَةِ وَلاَ يُكَلّمُهُمُ ٱللَّهُ وَلاَ يَنظُرُ إِلَيْهِمْ يَوْمَ ٱلْقِيَـٰمَةِ وَلاَ يُزَكّيهِمْ وَلَهُمْ عَذَابٌ َأَلِيمٌ

يقول لما سئل عن الكبائر قال: ((الإشراك بالله، وعقوق الوالدين، واليمين الغموس))

وفى التجارة
الرسول يقول في اليمين أيضاً: ((من اقتطع مال امرئ مسلم بيمين هو فيها فاجر لقي الله وهو عليه غضبان))
النبي يقول: ((ثلاثة لا يكلمهم الله يوم القيامة ولا يزكيهم ولهم عذاب أليم: المسبل، والمنان، ورجلٌ جعل اللهَ بضاعتَه لا يبيع إلا بيمينه ولا يشتري إلا بيمينه))

وبيوصل الحلفان اننا نخرب بيوتنا لما يكون حلفان بالطلاق

لاَّ يُؤَاخِذُكُمُ ٱللَّهُ بِٱلَّلغْوِ فِى أَيْمَـٰنِكُمْ وَلَـٰكِن يُؤَاخِذُكُم بِمَا كَسَبَتْ قُلُوبُكُمْ وَٱللَّهُ غَفُورٌ حَلِيمٌ

كمان فى حلفان بالله تلاته.. طيب ربنا واحد لاشريك له.. ازاى بقت تلاتة مش عارفه

طيب وايه العمال وايه كفارة الحلف باليمين

طبعا الاحاديث والقرآن انا جايباها من مصادر عالانترنت وكمان دى انواع اليمين وكفارتها

1- اليمين المنعقدة .
وهي : يمين على أمر مستقبل وهي تنعقد، وفيها الكفارة إن حنث.

2- اليمين الغموس .
وهي : يمين على أمر مضى كذباً ، وهي من أكبر الكبائر ، وسميت غموساً لأنها تغمس صاحبها في الإثم ثم في النار ؛ ولا تنعقد ولا كفارة فيها وتجب المبادرة بالتوبة منها .

3- اليمين اللغو .
وهي على نوعين :
- قسم على أمر ماضٍ بغلبة الظن فبان خلافه .لا حنث فيه ولا كفارة .

- قسم مما يجري على اللسان حيث لا يقصد اليمين كقوله : لا والله .. لتأكلن والله . .
وهذه اليمين لا تنعقد، ولا كفارة فيها، ولا يؤاخذ بها الحالف، لقوله تعالى: "لا يُؤَاخِذُكُمْ اللَّهُ بِاللَّغْوِ فِي أَيْمَانِكُمْ "

**
انا بس مش عاوزة اطول عليكم احسن تنامو منى:)
بس الموضوع دا خطير جداااا ولازم كلنا ناخد وقفة مع نفسنا ونشوف احنا بنحلف كتير واللا لا ولو كدا نحاول نقلل من العادة دى لغايت ماننهيها خالص من حياتنا
الموضوع كبيررر كبيييير ولسا فيه نقط كتير ماتقالتش بس اللى عاوز يعرف اكتر اكيد هيلاقى
الحمدلله الخير كتير وربنا مبارك فيه عالشبكة العنكبوتية:)

سمعت نكتة ظريفة اوى بخصوو الموضوع دا بتقول

شبااب سألوا مصري : ليه الشعب المصري بيحلف كتير
قاال : طب والله العظيم دي اشاعه ,, قسما بالله ده افترا ,,, علي الطلاق بالتلاته كدابين ,, وحيااة النبي دول نصابين
:-)))

**وختاماُ اقلكم كل سنة وانتم طيبين بمناسبة العام الهجرى الجديد**

هو الموضوع دا صادف المناسبة انا ماكنتش قصداه

فحاجة كويسة بجد عشان نبدأ من اول يوم فى العام الهجرى الجديد
اننا


نبطل حلفااااااااااااان:)

قال عليه الصلاة والسلام: "ألا إن الله عز وجل ينهاكم أن تحلفوا بآبائكم، فمن كان حالفاً فليحلف بالله أو ليصمت

وسط البلد..اه..جارووبى..دا كان زمااااان

وسط البلد
وجمال وسط البلد
وسحر وسط البلد
عملالنا عمل دى واللا ايه
انا بعشقها بكل اللى فيها
لما بروح هناك مش بحب اسيب المكان ابدا وافضل ماشية فيها كدا هائمة على وجهى
كنت هناك فى اواخر العام الماضى وكالعادة طبعا الاماكن الساحرة بالنسبالى لازم القطلها كام صورة قبل ماسيبها
هى الصور على ادنا شوية بس اللى قدرت القطه



الصورة دى من قدام جروبى
اول واخر مرة اتعرف عليه مالداخل
التفاصيل بعد الصور:)




ودى على مااعتقد
ناصية من نواصى ميدان طلعت حرب امال هتكون ايه يعنى
:)



دى بقى انا حبيت اجيب صورة لعمارة من العمارات الموجودة هناك
بجد بحس انها تحف فنية معماية
وكمان كان فى واحدة سايحة بتاخدلها صور
قلت اشمعنى انا يعنى
المصرى اولى بجدران عماراته:)

كان قدامها عربيات امن مركزى وقريبتى قالتلى لو اتقفشتى ماعرفكيش:)
ايه يعنى كأنى صحفياية وبعمل ريبورتاج

ـــــــــــــــــــــــــــــ

نييجى بقى لكابتن جروبى اللى لم يخل فيلم من كلاسيكيات السنما المصرية الا وجاب سيرته
وافتكر دلوقت فيلم لاسماعيل يس
الووووه.. جاروبى..ايوة ياجاروبى
معاكو العمدة عبد الرحيم كابير الراحيميه جيبلى
ومعاها ضربة عصاية على الارض للتحية

المهم يعنى ماطولش عليكو احنا قلنا ندخل ونشربلنا حاجة فجاروبى التاريخى الاثرى
طلبنا اتنين نيسكافيه..جابوا اللبن والسكر والنيسكافيه ناشف كل حاجة لوحدها
هما متخاصمين واللا ايه
قريبتى ماعجبهاش الحال وقالتله طيب غيره لكابتشينو.. اهو مشروب غلبان ومكوناته مش بتتخانق زى النيسكافيه
المهم جابلنا الفنجان وشكله عامل زى مايكون قاطعينه من صورة وجايبينه
شربنا وجينا ندفع الحساب
لقينا الواحد منهم بحوالى11 جنيه
يعنى اساسا محطوط فطبق ومتنكر فشكل فنجان
وطعمه زى مية بقهوة
وعصرنا على نفسنا لمون الارض كله وشربناه
ويبقى سعره كدا
المشكله مش فى السعر..يمكن علشان المكان سياحى والناس اللى فيه من كل شكل ولون والواحد شاف العجب فيه اساسا
كفاية الستات اللى شكلهم مدامات كبيرة ولبسهم محترم جدا ومحجبات وقاعدين بيشربو سجاير عااادى جدا
يمكن جايين هنا مخصوص علشان كدا.. مش عارفه البلد دى جرالها ايه..دا جنان والله
طيب لو قلنا حتى الواحد بعشرين جنيه ماشى بس هو يستاهل..لازم تحديد السعر دا يقابله جودة كمان فى المنتج
انا بقول كدا لانى انا وقريبتى قارننا مكان موجود فى جرين بلازا باليكس
مكان صغنون وقدامه كراسى ومعمول بشكل شيك جدا وتسمع موسيقى جميلة وهادية
انا طلبت فيه قهوة امريكى لانى مالقيتش قهوة تركى مشروبى المفضل من القهوة
فقلت اجرب دا وجابلى مج ولا برج القاهرة وقهوة متفلترة كمان
وقريبتى اخدت كابتشينو بالكريمة تقريبا وقالتلى ان طعمها جميل
وانا كمان قهوتى كانت تحفة والحساب كان كام
15 جنيه بس.. والله ماصدقناش وقلنا هنييجى هنا على طول..كفاية المكان

دا كان من فترة قبل ماننزل مصر ونتشرف بجاروببى

رغيت كالعادة كتير وكلامى فاضى انا عارفه بس من فرستى
يعنى مش علشان الاسم مشهور يبقى نستغله ونقدم المنتجات بجودة اقل
انا بتكلم بشكل عام..المفروض نحسن مش نطنش

هو كان كابتشينو اه بس حتى لو كوباية مية المفروض نخللى بالنا ونراعى العملاء

كنت ناوية ابقى زبون

إنسى ياجاروبى

توينتى تووووو

هلااااااااااااا بيكووووو

طبعاً اى حد هايدخل ويقرا البوست دا هاييجى على باله لاول وهلة انى هاتكلم بقى عن السنة الجديدة

(وأهنيكم برأس السنة( اشمعنى الرأس يعنى.. هى السنة منحازة للعنصرية واللا حاجة؟؟

بصراحة يعنى انا عندى حدث اهم.. يمكن بالنسبالى وعشان كدا حبيت اقولكم عليه

ففى مثل هذا الوقت من العام وقبل منتصف ليل اخر ساعة كان يوم ميلاد

*

*

صرصاااااااااااااااارة اللى هى اناااااااااااااااااااااا

@كل سنة وانا طيبة ودايما معاكم ومصدعاااكم@

النهااااردة وزى مابيقول المعلم حنفى صاحب الباخرة نورماندى اصبح عندى توينتى تو.. تو.. تو

واليوم الرسمى اللى فى الحكومة هو 1-1

رقم بيزيد وعمر بيقل.. ربنا يجعل ايامنا كلها طاعة ليه ولرضاه ويحسن خاتمتنا آآآآميييين ياااااارب

ـــــــــــ

بحب جداااا عيد ميلادى لانه موقعه استراتيجى بين سنة قديمة وسنة جديدة.. بحس كأنه ليل بيودعنا ونهار جديد بيهل علينا مليان بالتفاؤل والأمل وكل حاجة جميلة.. مش عاوزة اتشائم بس اتمنى فعلا تكون السنة الجديدة كدا

وكمان اول مرة احتفل بيه معاكم.. بجد فرحاااانة اوى انى اتعرفت على اجمل عائلة الكترونية وكمان مدونتى بقى عمرها سنة وشهرين وربنا مايحرمنى منكم ويديم المحبة بيننا

وبالمرة بقى اقولكم كل سنة وانتو طيبين وان شاء الله السنة الجديدة تكون احلى وتحققوا فيها كل اللى تتمنوه

(زى ما الممثلين بيقولو.. اشمعنى هما يعنى)

ــــــــــــــــ

انا رسمت تويتى... قالتلى لازمن ترسمينى وانا بديكى هدية عيد ميلادك

مارضتش اكسر بخاطرها الصراحة

وانتو كمان ليكو هدايا عندى

اغنية ليلة عيد لفيروز

happy birth day اغنية عيد الميلاد

وفمدونتى التانية هتلاقو

أغانى بالانجليزى..قلت انزلهم فعالمى المسحور

اتمنى تعجبكم الهدايا البسيطة دى

****

المدونة التانية...!!!؟

لما بيدخل حد جديد المدونة عندى الطبيعى انى اشوف ايه مدونته هو كمان

كليك على الاسم وادخل عند البوابة اللى هى البروفيل

والاقي خير اللهم اجعله خير امم من المدونات وادخل فى متاهة مكونة من مدونة

اتنين

تلاتة

.

.

لحد.. ممممممم .. انتو اكتر مدون لقيتوه عامل مدونات كتير كان كام مدونة؟؟

ـــــــــــ
وانا مش متضايقة من الحكاية دى.. بالعكس كل انسان جواه حاجات كتير مختلفة وبيحب يعبر عنها وماينفعش يتجمعوا فى مدونة واحدة فابالتالى يغير المكان والجو.. يروح البحر.. يتمشى جنب الخضرة..يطلع فوق السحاب وجنب النجوم..وكل دا بيكون من خلال الكتابة

يعنى ينتقل من مرحلة التدوين الاصلى الى التدوين الفرعى ويمكن مدونة من اللى يكونهم جديد تكون هى الرسمية ليه

ــــــــــ

انا عن نفسى عاملة مدونتين

واحدة ابعبر عن نفسيتى بالانجليزى عشان ثقافتى يابانى طبعا:))

والتانية كانت مدونة المسابقات اللى هال عليها التراب بس صعبان عليا احذفها لاننا تعبنا فيها اوى

بس معروف على مااعتقد ان البلاعة هون هى مقرى الرسمى للتدوين والرغى

مش ملاحظين معايا ان معظم اللى بيعملوا اكتر من مدونة وتدخلو تلاقوهم فاضيين او من زمان ماتكتبش فيهم

الواحد بجد بيتوه ومش بيبقى عارف يسجل حضور فى اى مدونة منهم

انا بقترح اللى ليه مدونات كتير يوضحلنا ايه المدونة الرسمية اللى فيهم عشان يبقى سهل علينا الزيارة من غير دوخة

كمان بين قوسين عند العنوان يكون مكتوب نوع المدونة ايه هل هى ترفيهية واللا اجتماعية واللا سياسية..الخ

عشان كل اللى مهتم بحاجة معينة فى المدونات دى يبقى سهل يوصلها ويشارك فموضوعاتها

اتمنى ماكنش غلست بالاقتراحات دى ومن يوافق على الاقتراح رقم خمساشر وتمناشر يتفضل برفع المغرفة.. قصدى يده

.

.

مواااااااااااااااااااااااااااافقة.. توكلنا على الله:))

وخللو بالكو من مدوناتكو.. اعدلو بينهم عشان بيحسوا ان فيه تفضيل وبيشيلو فنفسهم

وانا من هنا مقرى الرسمى بعتذر لمدونتى العالم المسحور انى مطنشاها بس راجعالها تانى قريباااا جداااا بإذن الله

انا عارفه هتقولو ايه الجنان دا هى بتتكلم زى ماتكون المدونات دى بنى ادمين زينا

انا فعلا بحسهم كدا وبحس انى لما بسيب مدووناتى انهم مهجورينوالعنكبوت معشش فيهم وعاوزين حملة تنضيف عشان يرجعوا زى الاول

هاااااااااااااتسى.. بدأت تنضيف مدونتى التانية.. مش عارفه انا ايه كل التراب دا

.

.

سؤال الحلقة

ــــــ

ايه اكتر شهر سجلتو فيه اكبر عدد من المواضيع

ولو عندكم اكتر من مدونة.. ايه المفضلة بالنسبالكم

وتصبحوا على خير

**

هاااااااااااااااتسى..... التراب اشتغلللل

اهداء..من خرفانى الاعزاء

اتحاد الخرفان العالمى للاذاعة والتلافازيون

:جاءنا البيان التالى

من حكمدار العاصمة الى خرفان المزرعة

استخبواااااا... العييييد جااااااااااى

ــــــــــــــــــــــــــــــــــــــــــــــــــــــــــــ

بس احنا خرفان مانخافش ولو مين

وإن جانا جزار وسانن سكين

وبيغريبنا بعودين برسيم

هنمشى وراه مستسلمين

ماهو اكل العيش مر واحنا مساكين

ناكل ونشبع حتى حين

نسلمه رقابينا واحنا مبسوطين

تطلع ارواحنا ترفرف عالفتة

**وتقولكم :** كـل سنـة وانتـم طيبين

......................................................

شعر والقاء صرصارة بمصاحبة اوركسترا الخرفان الدولى

ثم ماذا بعد>>ما خدوش يا بااااابااااا؟؟؟

بصراحة مش عارفه اشكركم ازاى على التعليقات والمشاركات الفعالة اللى لقيتها منكم
حسيت ان الموقف اللى كتبته تحول الى قضية قومية معاصرة:))

الكل تناول الموضوع تقريبا بوجهة نظر واحدة مع نسبة بسيطة خالفت الرأى دا

طبعا كل واحد كان ليه طريقة فى التعبير عن رأيه ولكن اتفقوا على ان جواز الصالونات هو افضل طريقة

وبم ان فى مقارنة يبقى معناه ان فى حاجتين او اكتر بنقارن بينهم

انا اتكلمت عن حاجة وباقى الزملاء الافاضل تفضلو وقالو الباقى والحمدلله مافضليش حاجة اكتبها فى البوست دا:))

دا شىء يسعدنى طبعا.. بس انا بعد اذنكو فى بعض النقاط هتكلم عنها واسمحولى لو غلست وطولت شويتين

انا هعمل دلوقت شجرة وفروع وطرق وكبارى.. هقسم الموضوع لحاجات كتير

*

*

اولا

نتكلم عن الشكل او الهيئة لانه مش هياخد وقت

الشكل بينقسم لجميل وغير جميل..بلاش قبيح دى

طبعا الجمال بنسب.. والبنت الجميلة اللى بتزين الجمال دا بالاخلاق والتعليم والثقافة لما هيتقدم لها واحد عن طريق القنطرة مافتكرش انها بالمواصفات دى وهتترفض.. بالعكس دى الكورة فملعبها واحتمال ان العريس هو اللى يترفض

لكن لو بنت جمالها متوسط او اقل لكن برضو اخلاق وتعليم.. تفتكرو هينفع معاها جواز الصالونات

للاسف شباب كتييير جداااا اهم حاجة عندهم الشكل.. معلش لكن دى الحقيقة

وكل اللى هينوب البنت دى هنا انها هتنجرح.. لانه هيشوف الشكل ومش هايدقق كتير بقى فى الاخلاق والمستوى الاجتماعى

لانه هيقول اكيد فى الاجمل

اللى زى البنت دى محتاجة تتعامل اكتر من الناس علشان يعرفوها وتخللى ثقتها بنفسها وسلوكها مع الاخرين اللى دايما بيكون ليه حدود

هما اللى هايوصلو لان اللى هايتقدملها هيكون عارفها كويس وعارف اخلاقها

*

*

ثانيا بقى

احنا عندنا مجتمعين .. مجتمع ريفى ومجتمع مدنى

فى المجتمعات الريفية.. البنت ماتعرفش فيها غير ابوها واخوها وغير كدا هاتتطخ بالنار

انا ماقصدش التعبير دا الحرف وانا عارفه كويس ان اصبح فى تقدم وتحضر والكلام دا كله

لكن لازلت الخطوة هنا محسوبة على البنت.. لدرجة لو قابلت زميل ليها مثلا واللا قريبها وسلمت عليه بحسن نية تبقى كدا اجرمت

بالتالى هنا علاقتها باولاد ادم تعتبر معدومة.. وهنا مش هايناسبها غير طريقة الصالونات

على فكرة انا عارفه كتير هيقول البنات دلوقت فأى مجتمع اصبحوا للاسف عاوزين ضرب النار

لكن انا هنا بتكلم عن القاعدة واللى اتمنى انها ماتكنش هى شواذ القاعدة

تحدييييييث: انا زى ماذكرت فى الجملة السابقة انى عارفة ان الاحوال دلوقت مابقتش زى زمان والبنات فى الريف اختلفو كتير
لكن احب اوضح بس ان اللى اختلفو وتلفو بتكون مستوياتهم الاجتماعية بسيطة جدا عشان كدا بيكونو زى قنبلة موقوتة وتنفجر.. لكن فعلا لغايت دلوقت البنت اللى من عيلة ومعروفة كويس بتكون الخطوة محسوبة عليها لان المجتمعات الريفية بيكون الناس عارفين بعض كويس ودا ابن فلان ودى بنت فلان.. ودا اللى انا قصدته ..اتمنى اكون وضحت رأيى

المشكلة هنا ان التربية بتكون مشددة جداا ودا اللى بيخللى فى خوف وعدم وعى بكيفية التعامل مع ابن ادم كإنسان زيه زيها

لانها مع بلوغ المرحلة الجامعية بالذات لانها دى اللى بيكون فى الانفتاح على العالم الخارجى

هنا البنت بتكون على نياتها اوى وتبدأ فى مرحلة الحلم الجميل اللى بتشوفه فى المسلسلات والافلام

والله يجازى اللى كان السبب

المهم المرحلة دى اللى هتدور فيها على الشاب المناسب اللى بتحلم بيه

وهنا الشباب الحلوين هيبدأو فى مرحلة اصطياد فرائسهم من البنات اللى مالهاش فى البطاطس

برضو مع الاعتذار للملتزمين اللى ملهمش فلعب العيال دا

تبدأ هنا طريقة التعارف المسبق اللى قلنا الجامعة كمثال ليها

بعد تبادل نظرات الاعجاب ثم المصارحة بالمشاعر الحنينة اوى تبدأ مرحلة المقابلات

افتكر الطريقة دى تكون ارتباط الكورنيشات مش الصالونات

لان الكورنيش الحقيقة بيبقى مثال حى مباشر للمقابلات دى.. وزى مابيقولو: على عينك ياتااااجر

هنا البنت نيتها سليمة وصافية مثل اللبن الحليب وكل اللى فبالها انها اخيرااا عثرت على فتى الاحلام

انما الولد ناصح وكل اللى همه انه ماشى مع بنت لزوم الكماليات.. يعنى معاه موبايل واسكتش للمحاضرات على اساس انه بيروح يعنى وعلبة السجاير المستوردة والام بى ثرى بالاضافة الى البنت بتاعته

والبنت فرحنالى اوى انها ماشية مع راجل طول بعرض عاملى فيها شمشون الجبار

ولما ييجى وقت الجد بقى.. الف مبروك اتخرجنا وكل حى بقى يروح لحاله

لكن ازاى تروح لحالك واللى بينا يامرسى

مرسى يقول: بينا مين يابهانة انتى عاوزة تجبيلى مصيبة..دى كانت مرحلة وعدت يابنت الناس

تقوله مش المفروض بعد كدا انك تتقدملى

تيييجى بقى الاسطوانة اللى من ايام انسان الغابة

هو انا لاقى ااكل نفسى لما اجى واتقدملك..بعدين اهلك هيرضو بواحد مش لاقى شغل

او لو كان بيشتغل هيقول.. هما اهلك هايوافقو على واحد مرتبة مش عارفه كام مليم

لا ماعطلكيش انا مش اد المسئولية دى

وهنا تنهاااااااااار بهااااااانة

نركن بهانة شوية على مااعصابها تهدا

*

*

بيقولو ان فى ناس بتتعرف على بعض وفعلا بيحاربو الحياة علشان ارتباطهم دا يكون رسمى وعلى نور

دلوقت فى بنات كتير راضية بالحياة البسيطة ومفيش حد بيبتدى كبير

يعنى بيكفيهم دبلة للشبكة وباقى الحاجات دى ربنا بييسر الحال فيها

وإيد على إيد تساعد

يعنى الشاب لو فعلا كان عاوز البنت دى وشاريها كان اتقدم لاهلها وحتى لو اترفض يبقى يكفيه شرف المحاولة وكمان يبقى عرفهم انه فعلا شارى بنتهم وجى مالباب زى مابيقولو

نرجع بقى لبهانة وعاوزة اقولها كلمتين

انا بتخيل ان البنت زى شوكولاتة متغلفة.. غلاف الشوكولاته لو اتشال مرة واتلف عليها تانى عمره ماهيكون شكله زى (ماكان فى الاول ولا زى باقى الشوكولاته اللى فى الطبق(تشبيه متخلف انا عارفه

زى مثلا الارض والغلاف الجوى.. لو كل واحدة تتخيل انها ماشية وحواليها غلاف من التربية الغير متعصبة والعادات السليمة اللى اتربت عليها...اكيد الغلاف دا هيكون حاجز انه يمنع اى حد من الاقتراب منه

*

*

شوفتو ادينى تفرعت لنقاط عديدة ونسيت اتكلم عن المجتمع المدنى

هنا بصراحة البنت مش هتفرق كتير عن بنت الريف بس فى حاجة انا لاحظتها

البنت فى المدينة عمرها بيتقدم من غير مايكون فى ارتباط وبتبدأ تخاف من مواجهة الحياة لوحدها

يعنى مثلا لو كانت بتشتغل وملهاش قرايب كتير حواليها ووالدتها هى اللى بتراعيهم

هنا بيكون كل اللى شاغلها انها تلاقى انسان يحميها ويحسسها بالامان

ولدى برضو انا بوجهلها كلامى اللى قلته لبهانة

**الـــزواج**

لو بطريقة الكورنيش عمره ماهيمشى بما اننا فى مجتمع للرجال فقط

بطريقة الصالونات فى احتمال انه يمشى

بطريقة التعارف فقط كزملاء فى العمل بس يكون فى مصارحة مباشرة

يعنى ييجى يقول انا عاوز اتقدم,, وهى اكيد هتكون واخده فكرة عن الانسان دا بس طبعا فحدود

لوموافقة خير وبركة وتقول لاهلها ويتفضل يزورهم

مش مواقفة يبقى الموضوع يخلص بدبلوماسية وتكون علاقة زمالة ليس اكثر

*

*

فى بقى حاجة انا شايفاها خطيرة.. ساعات وبدون اى مقدمات ييجى الشاب يقول للبنت انا عاوز ارتبط بيكى وجاد فى الكلام دا

تجرى بسذاجتها تبلغ اهلها على اساس انه هاييجى ويتقدم واهو ظل راجل ولا ظل هرم خوفو

هنا بقى يطلب منها تقابله بعدها..دا من غير مايكون جه البيت لسا ويقولها كام حجة حلوة كدا منعته ان مايجيش

زى مثلا انا قلت لاهلى وقالو انت لسا مش جاهز دلوقت واتخانقت معاهم عشانك

وهى برضو زى العبيطة لامؤاخذة تصدقه

ويطلب منها بقى يخرج معاها.. نروح السينما.. وهات ايدك فى ايديا

والله يجازى اللى كان السبب برضو

وهنا بقى مبرراته انها قالت لاهلها وهو قال لاهله وكدا الحمدلله بقوا فى النور وكله تمام

ياحلاوتى... والله مش عارفه اقول ايه

انا بس عاوزة اقول للشباب امثال الاخ مرسى واللى فاكرين انهم كدا مش بيغلطو لانه راجل

دى مش رجولة ابدا انك تتعامل مع البنت كمجرد آلة للتسلية لانك فى الاول والاخر بشر زيها

ومفيش مساواه هنا اكتر من المساواه فى الذنوب والاعمال الصالحة

الكل فى الاخر هيتساوى ودايما افتكر انك كما تدين تـُدان

وانتو يابنااااااااااااات ياحلويييييين

خللو فبالكو دايمااا ان اللى يسيب حاجة عارف كويس ان ربنا مش راضى عنه وهو بيعملها

يبقى لاااازم يكون مؤمن ان ربنا ان شاء الله هيعوضه بالاحسن منها

والمرادى هتكون فى النور

ومن الباب

وعلى سنة الله ورسوله

وكل عام وانتم بخير

************************************

عذراً للاطالة بس لقيت النـُص كلمة اللى بينشرها استاذ احمد رجب فى الاخبار بصراحة ماينفعش انى ماكتبهاش

لانى كنت هكتب تدوينة عن الموضوع دا لكن قلت الرحمة حلوة وكفاية الرغى اللى كتبته

الموضوع هنا عن اللخبطة اللى اتعودنا عليها فى التقويم الهجرى

:وعن الموضوع دا بيقول

الفلك علم معترف به عالميا ماعدا عند العرب الذين يحددون اول رمضان والاعياد برؤية الهلال فى كل بلد

وقد يتم اهدار كل الحسابات الفلكية الدقيقة لان عالما دينيا جليلا شاهد هلال رمضان

وهو فى الحقيقة- كما جاء فى مذكرات احد العلماء- قد شاهد شعرة مقوسة بيضاء فى اعلى حاجبه فظنها الهلال

وأمجاااااااااد ياعرب.. أمجاااااااااد

**

يااااريت الكل يدخل عند مهند ويشوف موضوعه الاخييييير

(دعـوة للمشـاركة)