Tuesday, January 15, 2008

وسّــــع البنااااااطييييل...ارفع البناااااطيييييل

هى على مااعتقد لما تتجمع زى البنى ادمين مابيقولو تبقى بنطلونات
انما وحيث ان وبم اننى صرصورية فسميتها بنااااطييييل عشان القافية كمان حكمت

من حوالى شهرين كدا وفى حديث هاتفى مع صديقتى الصدوقة قالتلى
شفتى ياسارة اخويا عمل جروب عالفيس بوك واسمها الحملة الشعبية لتوسيع بنطلونات البنات
وانا طبعا سمعت العنوان دا وسخسخت مالضحوك.. اصل اخو صابحتى دا ماشاء الله عليه كلنا متنبأين له بمستقبل صحفى باهر
بس الاسم دا غريب اوى وطريف ولازم يشد انتباه اى حد يقراه
بس انا مليش طولة بالى اوى عالفيس بوك دا وبالتالى مادخلتش وشفت ايه الموضوع
بس الموضوع باين من عنوانه انهم مجموعة من الشباب اللى مرارتهم اتفقعت وجالهم تلوث بصرى من الاشكال الغريبة اللى بقت ماشية فى الشوارع دلوقت ومحسوبين علينا بنات

طب بالله عليكم بنات ازاى والبنت من المفترض يعنى انها عنوان للحياء والاحتشام والرقة والحاجات اللى بتفكرنا بمناديل فلورا اللى كلها حنية
واذ فجأتن يتشقلب الحال وتبقى البنات مثال لقلة الحياء والجرأة وقلة القماش وقلة الوعى وقلة بالمرة اكسرها على دماغ اللى اخترع كلمة موضة


طيب زمان ماكنش فى وعى دينى كافى زى اليومين دول ومن اهم الاسباب كان وجود الاحتلال اللى حاول ان يطمس اى هوية دينية وكمان مافتكرش ان زمان كان في الكم هااااائل من القنوات الدينية والمواقع الدعوية عالانترنت يعنى دلوقت مابقاش فى حد جاهل واعتقد ان الكل تقريبا عارف اللى يصح واللى مايصحش
طيب ياترى العيب من مين.. هل من الاهل اللى مابقوش فاضيين يربو اساسا واللا من المحلات اللى مش بتعرض دلوقت غير الهدوم اللى بترفع شعار قماش قليل وسعر كتييييير
والبنات ينضحك عليهم بكلمتين اساسيتين.. دا عالموضة او دا مستورد
والبنات ياعينى اللى عاوزة تمشى فى السليم مابقتش لاقية حاجة تشتريها

واللا كمان عشان لقمة العيش ومعظم الشركات دلوقت فأى وظيفة بيكون ليهم مواصفات مخصوصة فاللى تشتغل عندهم
مش عارفه انا شركات دى واللا معارض ازياء


انا مش عارفة اقول ايه على اللى الواحد بقى يشوفه وهو ماشى.. نفسى بجد اعرف هى النبات دى مش بتبص فمرايات قبل ماتنزل من بيتهم .. مش مستحية ماللى عاملاه فنفسها دا.. اهلها طيب سايبنها ينزلو مالبيت كدا ازاى

كان فى برنامج تقديم جمال الشاعر وكان مستضيف اخو صاحبتى وبنت كمان معاه عشان يتكلمو عن فكرة الحملة اللى عاملينها دى

اخويا كان قاعد بيتفرج معايا وبيقولى احنا مرة فى الكلية شفنا واحدة لابسة بنطلون ماللى بينشروه فى البلكونة الدور التحتانى ويرموها تنزل لابساه وبلوزة قصيرة وماتقلش تعبير عن البنطلون وكل دا ولابسة حجاب وكمان مش عارفه لافة على وشها جزء مالطرحة المهم يعنى مدارية وشها.. دا اكيد عشان لو حد من اهلها شافها كدا هايتاويها .. داعلى اساس انها بتنومهم قبل ماتنزل مالبيت

دا يعنى مثال للمحجبة العصرية فى هذا الزمان
جيبة عالركبة وتحتها بوت
بنطلون الله اعلم اتلبس ازاى اساس
بلوزة او بادى استيكومك
واخيرا طرحة مع الطقم الجميل دا عشان تدارى بيها شعرها اللى سايبه نصه بيان بمزاجها


طب والغلابة اللى ماشيين فى الشارع وف الجامعة ذنبهم ايه يشوفوا التلوث البصرى دا


هما صعبانين عليا ايون لكن برضو فى مناظر الواحد لو شافها بيشوفله شارع تانى يمشى فيه
ومن اهم هؤلاء المناظر الشبابية البناطيل اللو ويست.. الشعر المجلجل زى مايكون لازقه بغرا احسن يطير
وبرضووو بيقولو موضة وقال ايه اصل فريق بلو لابس كدا.. طيب كويس مش احنا بس اللى بيتاكل بعقلنا حلاوة المولد

احنا بقينا كدا ليه... اللى بيجرى لينا دا... مين اللى عاوز يشيل مننا احلى تقاليد واصول اتربينا عليها.. ياترى ايه الحل

انا بقول نكتفى بهذا القدر واسيبكم مع رابط الجروب عالفيس بوك للى حابب يتعرف عليها

والجروب بقت عالمية كمان بيجيلهم طلبات يوسعوا الحملة للخليج عشان العبايات هناك بقت عباية بالاسم والشكل موضة برضو:)


بالمرة يعنى وبمناسبة الحجاب اللى بنحترمه جدا

دى صورة عن مدى تقديرنا للحجاب فى مناسبتنا الاجتماعية

اسيبكو بقى مع

الحملة الشعبية لتوسيع بنطلونات البنات

دا الرابط بس تقريبا لازم يكون فى حساب اون
face book

مصدر الصور دى جوجل وموقع الاستاذ عمرو خالد

24 بعبر ياشعب:

Anonymous said...

المفروض كلنا نساهم فى هذه الحمله القوميه لتوسيع بنطلونات الشباب
وايضا الحمله القوميه لرفع بنطلونات الشباب لان الكلام ده مينفعش البنات عاوزين قماش زياده والشباب عاوزين احزمه

mohand said...

السلام عليكم

كل سنه وانتي طيبه


طبعا انتي عندك حق ميلون المية

بس تقولي ايه عقول في راحه


وانا لو قدرت هشارك في الحملة

تحياتي

mohand said...

السلام عليكم
مكنتش قريت اللي قبل ده

ههههههههههههههههههههه
مشخره يا ساره

حمدلله علي سلامتك ورجوعك للسياسة

ToOoKa said...

السلام عليكم
ازيك يا ساره يارب تكونى بخير

والله عندك حق انا بقيت بكره اخرج لانى بقيت بغض بصرى من البنات والولاد اه والله اصل البنات بقه لبسها مستفز والواحد مش عاوز يغلط فيهم حتى لو بينو وبين نفسو علشان هو مش ناقص زنوب

ربنا يهديهم يارب
بس ما تنكريش بردو انو زى ما فى ناس بتتجه للموضه فى ناس بردو بتتجه للحشمه

تعرفى المشكله انو الاحتلال بيغير اسماء الحاجات الوحشه لمسميات احلا واشيك
يعنى اللبس من غير هدوم=موضه
الرشوه=هديه
وهكذا
وفى كلمه دايما بقولها
انا مابقتش عارفه دلوقتى اصنف نفسى تبع الولاد ولا البنات اصلى مش لاقيه نفسى انتمى لحد فيهم
يلا يارب تهدينا وتهديهم
وسلام مربع لاجدع ساره
ToOoka

بنت الصالحين said...

مافيش تعليق غير

حسبنا الله ونعم الوكيل

عصفور المدينة said...

وضعتها تدوينة مختارة
برضو البنات الفاهمين العاقلين اللي زي حضرتك عليهم دور انهم يوعوا ويفهموا وينصحوا ويصححوا مفاهيم ويعالجوا مخاوف

أنا شفت الجروب من مدة وضحكت برضه

мσнη∂ιš said...

ليه كده يا صرصارايتي؟؟ عايزة تحرمينا من المناظر الخلابة !! ههههه
slim أدي أخرة بنطلونات السليم

merci beaucoup pour ce sujet qui touche profondement l'un des graves problemes vecu de nos jours, merci encore une fois, wsalimili ba2a 3ala The SLIM Jeans

PS: فين الربع جنيه بتاعي ؟؟؟

خمسة فضفضة said...

السلام عليكم ورحمة الله وبركاته

بارك الله فيك يا ساره
عند حق في كل كلامك بس الناس اللي زي دول بيبقي صعب جدا انك تغيري تفكيرهم المريض ، هما فاكرين انهم صح والدنيا كلها غلط

ربنا يهدي

لحظة said...

يا مين يسمع ويا مين يشوف

على فكرة الحملة دي ياريت تضمولها الجيبات الضيقة قوي من تحت الوسط اللي اكيد برضد اتلبست بالبتاعة دي الي بيلبسوا فيها الجزم - اكرمكم الله- مش عارفة اسمها ايه

لان المحجبات برضه بيلبسوها كده وهي ماتفرقش عن البنطلونات كتير

شبه العباية الفرنسية اللي في الصورة

تحياتي لانك ضحكتيني بجد

موجة said...

عايز اعلق على قصيدة
بوش
رائعة
جميلة
تحفة
ممكن اسمك الثلاثي على ورقة من نص الكراسة
هههههههههه
ايه يا بنتي ده كله
للدرجادي بتحبي الراجل
بوست جميل بجد
خالص تحياتي
احمد

صاحب المضيفة said...

حملة جميلة وفكرة أجمل وواقع مرير

يارب يكون لها صدى حلو بين الناس ونحاول نغير النيلة المنتشرة بين البنات اليومين دول

شكرا جدا على الافادة الرايقة دي
وشوية صور حلوين جدا

ربنا يهنيكي ويسعدك

دمت بخير

Unknown said...

السلام عليكوا
مدونتك جميلة بجد

بس عايزة اعلق ع البوست الجيد ما فيش مكان للتعليقات ليه ؟

السقا said...

اولا يارب تشوفي ردي وتردي عليه .
ثانيا انا معارضك مليون المية .
ليه بقى ؟
اقول لك ليه ...
انتي مش سايبة البنات في حالها ليه ؟
وبعدين انتي بنت زيهم ازاي تظلمي بني جنسك ؟
وبعدين الاخت ام بنظلون ضيق دي هي شرياه منين ؟
مش من محل مصري يعني على ارض مصر اذا كان رغيف العيش ناقص مش عاوزة البناااااااااااااااااااااطيييييييييل يقل قماشها ؟
وبعدين انتي ماوصلكيش الخبر ان لك بنطلون من دول بينزل معاه صابونة هدية ؟
اما بقى البادي او مش عارف اسمه ايه ده ماله في ايه ؟
ضيق حبيتين تلاتة طيب يا ستي غير وبركة اهو لو تخينة يلم جسمها حبة علشان لو ركبت جنبي في المواصلة ماتخدش حيز واعرف اقعد .... اصل اللي انتي ماتعرفهوش ان البنت من دول بتعمل محترمة ولو الواحد لمساها غصب عنه تعمله فضيحة .
اما حكاية قصير دي تخيلي بنت لابسة بادي او بلوزة طويلة على بنطلون ضيق تبقى عملت ايه دارت المكشوف تاني .
وبعدين ماهو الناس ممكن تتريق وتقول اخدت من البنطلون حطيت في البلوزة .
تعالي بقى للطرحة انا حا اتكلم عن المجمع النظري باسكندرية علشان ما اظلمش باقيت الجامعات والكليات
واللي حا اقوله ده على فئة معينة احسن انا عارف الشيطان دا ابن ابليس حايصور لكم حاجات وحشة ويقولكم ان بنات المجمع النظري كلهم كده ...
مالهم بقى ؟
اقول لك انا مالهم ....
كنت قاعد في قاعة صغيرة مع بعض الزميلات اللي الحمد لله انكشفوا على حقيقتهم .. طلبت من فلانة اني اقفل الباب لاني كنت قريب منه اوي ... فاعترضت لاننا في القاعة ممنوع نقفل علينا الباب لو بنات بس ممكن لو ولاد بس ممكن لكن الاتنين ممنوع ... المهم واحدة قامت قفلته وقبل ما اقوم اطلع برة قالت لي الاخت فلانة ماتفتحش ... ولما بصيت لها كانت الفاجعة الكبرى فكت طرحتها وقال ايه بتعدلها المهم انا ارتبكت شوية وبصيت في القاعة مالقتش ولاد غيري ... التفت لها وقلت لها انتي هبلة انتي ايه اللي بتعمليه ده ... قالت انها اصلا مش محجبة وانا بتلبس الطرحة علشان المجتمع ابن ...... (ولفظ كده مش حلو ) طبعا انا قلت ربنا يهدي ... ( حتى ما خصصتش الدعاء ليها او ليهم او بمعنى ادق لهن وقلت ربنا يهيدكم لاني حسيت اني بتكلم مع ابليسة صغيرة )
المهم سيبتهم وطلعت برة وفتحتت الباب وماقفلتهوش طلعت ورايا اخت اخرى قالت لي انت زعلت قلت لها لا ابدا .... انا ازعل من حد له قيمة .
وسبتها ومشيت .
اعتقد كده عرفتي الطرحة دي ليه ؟
وفي سبب اخر علشان لو شعرها مش حلو ولا حاجة تداريه .
خلاصة القول في واحد صاحبي علق على البنات المحجة نص كم دول وقالي عليهم راقصة درجة تالتة .
انا بقول ربنا يهديهم يارب .
ويهديكي وتبطلي تظلمي في الناس .





واخيرا اعتذر ان كان فيه كلام مش حلو اتقال لاني بجد مخنوق اكتر منك او من الجاعة بتوع الفيس بووك دول بسبب اللي الواحد بيتعرض له كل يوم نازل الكلية .

šσяšαяαα said...

Anonymous :

وهو المطلوب اثباته سعادتك:)

:::::::::::::::::::::::::::::::::::::::::::::::::::::

mohand :

وعليكم السلاااام ورحمة الله

وانت طيب يافندم

لا دى عقول فى التوهان والجنان

وموضوع بوش انا فتحت التعليقات فيه بس انا مش هنزل بوستين مع بعض تاااانى تووووبة

والله يسلمك وربنا يسترها:)

šσяšαяαα said...

ToOoKa :

وعليكم السلاااااام ورحمة الله

انا كويسة الحمدلله ياتوكة تسلمى ع السؤال

كلامك كل سليم جداااااا ربنا يحفظك ياعسولى ويهديكى لكل خير دايما

ههههههههههههه بس عندك حق الواحد من اللى بيشوفه مابقاش عارف اللى ماشى دا ولد واللا بنت

وربنا يهدى

وسلاااام مثلث لاحلى توكة:)

::::::::::::::::::::::::::::::::::::::::::::::::::::::::

عاشقه الفردوس :

فكرتينى بفيلم الراجل اللى محبوس وكل شوية يقول
حسبى الله ونعم الوكيل

وانا بضم صوتى معاكم برضو:)

šσяšαяαα said...

عصفور المدينة :

استاذنا عصفور انا مش عارفه اقول لحضرتك ايه بجد
متشكرة جدااا واتمنى يارب تدويناتى المواضعة تكون بالشكل دا واللى يخللى حضرتك تضمها لتدوينات مختارة
دا شرف كبير ليا

بس المشكلة انو ماحدش بقى يسمع وكل واحد يقول دى حرية شخصية والكلمة دى على لسانهم من قبل حتى الواحد مايقول حاجة اساسا

وربنا يهدى الجميع

تحياتى لحضرتك

:::::::::::::::::::::::::::::::::::::::::::::::::::::::::

мσнη∂ιš :

طيب يامهندس لما اشوف اخرت الفرنساوى اللى بتكتبهولى دا ايه:@

w mesh haslemlek 3la 7aga
w mafesh rob3 gneeh:P

šσяšαяαα said...

خمسة فضفضة :

وعليكم السلاااام ورحمة الله وبركاته

هو فعلا بيكون صعب ان الواحد يقنعهم بحاجة
يعنى انا كان فى موقف واحدة ماشية وشعرها تقريبا كله باين
وبعدين جيت اقولها لقيت شعرها من قدام كمان باين
يعنى حاطة الطرحة ديكور
فقلت اقلها ايه دى بقى كنت فاكراها مش واخدة بالها
تفتكرى واحدة بالشكل دا كانت مش واخدة بالها فعلا؟

ربنا يهدينا كلنا

:::::::::::::::::::::::::::::::::::::::::::::::::::::::

لحظة :

هههههههههه حلوة تلبيسة الشوزات دى:)

ايوة هى الحملة واخدة العنوان دا بس تقصد كل انواع اللبس الغير لائق

تحياتى واشكرك على المرور

šσяšαяαα said...

موجة :

ههههههههه عاوز اسمى ليه انت من جهة امنية

ومتشكرين والله على هذا الكلام

تحياتى ليك

::::::::::::::::::::::::::::::::::::::::::::::::::::::::

صاحب المضيفة :

هو واقع مرير بس بإذن الله يتصلح الحال للافضل

العفو يافندم ويارب بس الناس تسمعنا

تحياتى ودمت بألف خير

šσяšαяαα said...

عاليا حليم :

وعليكم السلااااام ورحمة الله

نورتينى ياعاليا وانا فتحت التعليقات فى البوست لو تحبى تنورينى تانى

تحياتى ليكى

:::::::::::::::::::::::::::::::::::::::::::::::::::::::::
السقا :

اولا انا ايه اللى مش هيخلينى اشوف ردك وارد عليه
على الرغم من ان كلامك ملخبطنى ومش عارفه انت موافق بس بتتريق وللا انت فعلا معارض
وبعدين انا مش بظلم البنات طالما انا مش بدعو لحاجة ضد مصلحتهم او فيها ضرر
بالعكس انا بدعو ان ينصلح حالهم وحال الشباب كلهم
وعلى الرغم ماللى انت ذكرته ان فى بنات الحمدلله محترمين جدا وغيورين على اخواتهم زيى واكتر

وموضوع الطرحة دا مش الكل لابسها طبعا لغرض ان المجتمع تفكيره كدا او عشان مش عارفه شعرها ماله
الفئة دى اعتقد بتكون مريضة نفسيا وعندها انفصام لانها مش عارفه اساسا هى عاوزة ايه واللا هى بتعمل ايه وان كان صح واللا غلط لانه مفيش رقيب عليهم

وانت مخنوق ليه من الجروب االلى عالفيس بوك مش واخدة بالى بصراحة ايه وجهة نظرك

وعموما نورتنى وتحياتى ليك

السقا said...

بصي يا ستي نوضح الكلام
1. انا بتريق على اللي بيحصل طبعا انا ايه اللي حايخليني اتريق عليكي او على حد بيقول حاجة صح .
بس انا عرض تريقتي ده في اسلوب تبرير هزيل وسخرية من فعلا يستحقون لقب ناقصات عقل ودين .
2. اما موضوع الطرحة فاكيد طبعا مش كلهم وقد أكون أخطأت في التعبير ووصل لك من كلامي انها عموما يعني ( الانسان غير معصوم من الخطأ وبعدين الناس بتغلط في حياتها وفي امور الدين مش حا اغلط انا في اسلوب كلام لمجرد وصول معلومة خلط يااااااااستي ) .
3. انا مش مخنوق من الجماعة بتوع الفيس بووك انا بقول ان الواحد مخنوق من اللي بيشوفه اكتر منك و من الجماعة بتوع الفيس بووك يعني الجماعة معطوفين عليكي اي انا مخنوق اكتر منك ومنهم بس الالف جت زيادة فأصبحت (ال و او )



سوري قد اكون معقد وقد اكون غير معقد
المهم فيا حاجة يا صح يا غلط .

Anonymous said...

de group el nas hatftkro tafh bas hwa mesh tafeh awe bas e7na men el group da bn7awl n7l el 7agat el w7sha fe el shabab we bnklam 3an el bantloooon ely nazel aweeee we bardo el banat mesh zay el fol awe bardo hanklm 3ala el 7agat el kwaysa we el w7sha 3shan n3rf n7l el 7agat de isa 2ol ya raaaaaaaaaaaaaaaaaaab
bas 2ol r2yk hena enta we as7aabk r2yk yhamna aweee

da el link yalaaaaaa

http://www.facebook.com/group.php?gid=9490340644

Anonymous said...

بجد انا مش عارفة اقولك ايه البلوج والمواضيع يجننه الواحد ميرسى اللى فعلا عنده هم وعايز ه يمشى يدخل على البلوج ده

ahmed saker said...

عندك حق والله
الواحد احيانا بيكون ماشى في الشارع ميعرفش ده ولد و لا بنت لان فيه ولاد برضه بيلبسوا زي البنات
و هناك حديث للرسول الكريم "صلي الله عليه و سلم " يلعن فيه المتشبهات بالرجال من النساء و المتشبهين بالنساء من الرجال ولكننا اصبحنا في زمن عجيب
اصبحنا نصدق كلام يأتي الينا لا نعرف مصدره و ننكر كلام سيد الانام
صلي الله عليه و سلم و شكرا
والسلام عليكم و رحمة الله و بركاته

Dr. Ibrahim said...

طبعا اولا الفيس بوك اللى يعرف هو ايه الفيس بوك يبقى قل على الدنيا السلام
انا هقول بس اللى عامله طالب جامعة من جامعة هارفارد عنده23 سنة تقريباً وكان عامله مشروع ليه فى الجماعة والباقى عن الفيس بوك هيبقى كلام جامد ومش مكانه هنا
المهم
عن الحملة طبعا انا بأحرج لما البس بنطلون ضيق أو أفتح صدرى زرار زيادة بقول يا واد يا هيما عيب والرجالة عندنا فى الناحية بيقولوا للى يعمل كده اختشى عيب -- بس ده كان زمان
مابالك انا راجل امال الستات تعمل ايه الدنيا اتقلبت يا رجالة والمرسى ابن الزناتى اتقتل يا ردالة وجه على البى بى سى بالنجلش
هههههههههه
دا اللى يفقع كمان الستات اللى ايام الجاهلية وكانوا كافرين مكانوش بيعملوا كده
مابالك بقى الآن وهما مسلمين
انتى بس خلى أى ممثلة تلبس والبلد تقلد
مناظر غاية فى القرف والقزازة (حلوة الكلمة دى اكتبوها يمكن تنفعكم هههههه) وقلة الأدب والله لما واحدة تمشى بنطلونها عامل كده ولا فتحة صدرها ولا جاكى شان مش عارف ايه ده من المسئول لا أعلم فكلكم مسئول عن رعيته وكلكم راع
وحسبى الله ونعم الوكيل
والسلام للجميع
فى رعاية الله