Tuesday, January 8, 2008

والـله مــااااا يـنفع


السلااااام عليكممم

خلليكم زى مانتم .. والله مانتو قايمين
طيب اتفضل معانا الشاى..دا فتلة وبحليب
لا والله انا مش عاوز اصلى واكل سندوتشين سدوء وعندى حموضة
لا والله ماينفع الكلام دا خالص لازم تقد وتشرب معانا الشاى اهو يدفيك فى البردد دا
شرب الشاى واتكل على الله

ركب الاتوبيس
اهلا استاذ برقوق ازى الصحة وازى الحال
يامرحبا بيك الحمدلله تمام ازى الصحة
وييجى الكومسرى
على فين ان شاء الله
وبيحط ايده فجيبه
لا والله مينفع انا اللى هدفع
انت بتقول ايه راجل والله العظيم ماحد دافع غيرى
ايه انت عامل تكليف واللا ايه دخل فلوسك ياراجل عيب

ننزل من الاتوبيس
يرن الموبايل
الو... ايوة يامبروكة ايه الاخبار دلوقت
الحمدلله يابيه الف مبروك المدام جابت ولد اسم النبى حارسه وصاينه
والنبى صحيح.. احمدك ياااااااارب

تانى الو
الووووو.. حلاوتهم ياختى انا خلاص بقيت ابو سحلول
والنبى صحيح.. ياالف نهار مبروك ياخويا يتربى فعزك
ورحمة الغالية ماحد مزغرط وعامل هيصة فى الفرحة دى غيرى
ان شاء الله كلكم معزومين عندى ناوى ادبح كتكوت محشى بالفريك بالمناسبة السعيدة دى
طيب ياخويا انا هروح اجيب الولاد يفرحوا ويلعبو مع سحلول الصغير

وفالعزومة الكتكوتية
خد يامسعد انت مابتكلش ليه
مش عاجبك الاكل واللا الكتكوت طلع كبير عليك مش قادر تخلصه
لا ياعم ازاى دانا حتى اكلت لليومين الجايين كمان.. خد انت بقى الجناح دا منى ليك
لااااااااااااا والله العظيم وحياة سحلول ابنى ماحد واكله غيرك
ياسيدى انا شبعت اودى فين تانى.. ماعرفش بس لو قمت من غير ماتاكله لاتكون بزعلة كبيرة

الماتش بدأ فى التلافازيون
هو مين اللى هيلعب النهاردة
نادى حارة الفقرى مع نادى غيط ابو سويلم
والنبى صحيح.. دا مفيش اجدع منهم فى عالم الكورة المستطيلة
واثناء الماتش... ها ياللا شوووط... جووووون
عليا الطلاق الواد كماشة دا ماحد بيضرب كورة زيه
لاااااا كماشة مين دا هو مفيش غيره الواد زعتر طب وراس الغالى ابويا ماحد بيضرب الكورة تقوله كوامان غيره
وخلص الماتش بالتعادل اتنين تحت الصفر

والناس مروحين
والله كانت سهرة جميلة يابو سحلول.. نجيلك ففرحه كدا ان شاء الله
تسلم ياغالى عقبال عندك كدا يارب
والنبى لما تروح ابقى سلملى اوى على ابونا الحاج
يوصل ان شاء الله
ـــــــ
ابو سحلول بقى وهو ماشى مرة لقى ناموسيات للاطفال عشان الناموس والذى منه
ايوة يابيه تعالى اتفرج دى ناموسيات صينى ممتازة
بكام الواحدة
30 جنيه بس يابيه
ايه دا ليه ياعنى انا هاخدها ب 20 بس
والله ماينفع يابيه دانا كدا هاخسر فيها
والله بكسب فيها اتنين جنيه بس
عليا النعمة دى واقفة عليا بخسارة
خلاص ياعم يعنى انت اللى بتبيع ناموسيات بس فى البلد
يابيييييه.. يابييييه.. تعالى بس
عاوزها بكام.. هما ال20 جنيه مفيش غيرهم
طيب امرى لله مع انى كدا والله العظيم خسران فيها

سحلول بيعيط
واااااااااااااااااااء
عليا الطلاق لو الواد دا ماتهمدش دلوقت لاكون دابحه بكره عالغدا بدل ماجيب كتكوت تانى

**
وهكذا اخوتى الاحباء كانت هذه حلقه من مسلسل عادات مصرية عربية مفيش زيها زى

دا سيناريو عن ناس بتحلف عمال على بطال فى الرايحة وفى الجاية

(مش عارفه كانو بيحلفو برحمة صدام كمان..ربنا يرحمنا جميعا)

عن ابن عمر رضي الله عنهما قال: سمعت رسول الله صلى الله عليه وسلم يقول: ((من حلف بغير الله فقد أشرك ))

هو ليه الحلفان سهل اوى كدا... ليه طلعنا بنحلف كتير كدا
ليه مش قادرين نمسك لسانا عن الحلفان وبالذات الحلفان بغير الله
وبالذات بقى كلمة والنبى اللى احنا بالذات كمصرييين بنقولها 500 مرة فى الدقيقة وماتسألونيش ازاى دى

بنحلف على كل حاجة واى حاجة وفأى موقف ومعظم المواقف دى بتكون هايفة وماتستاهلش
ودا انا بحس انه دليل على ضعف فى الشخصية وعدم ثقة بالنفس

انا اعتقد الحالة الوحيدة اللى نحلف فيها هى الحلف فى الشهادة
والله العظيم اقول الحق ولاشىء غير الحق

انما احنا ماشاء الله علينا

بنحلف فى الحق
وَٱحْفَظُواْ أَيْمَـٰنَكُمْ كَذٰلِكَ يُبَيّنُ ٱللَّهُ لَكُمْ ءايَـٰتِهِ لَعَلَّكُمْ تَشْكُرُونَ

وفى الباطل
إِنَّ ٱلَّذِينَ يَشْتَرُونَ بِعَهْدِ ٱللَّهِ وَأَيْمَـٰنِهِمْ ثَمَنًا قَلِيًلا أُوْلَـئِكَ لاَ خَلَـٰقَ لَهُمْ فِى ٱلآخِرَةِ وَلاَ يُكَلّمُهُمُ ٱللَّهُ وَلاَ يَنظُرُ إِلَيْهِمْ يَوْمَ ٱلْقِيَـٰمَةِ وَلاَ يُزَكّيهِمْ وَلَهُمْ عَذَابٌ َأَلِيمٌ

يقول لما سئل عن الكبائر قال: ((الإشراك بالله، وعقوق الوالدين، واليمين الغموس))


وفى التجارة
الرسول يقول في اليمين أيضاً: ((من اقتطع مال امرئ مسلم بيمين هو فيها فاجر لقي الله وهو عليه غضبان))
النبي يقول: ((ثلاثة لا يكلمهم الله يوم القيامة ولا يزكيهم ولهم عذاب أليم: المسبل، والمنان، ورجلٌ جعل اللهَ بضاعتَه لا يبيع إلا بيمينه ولا يشتري إلا بيمينه))

وبيوصل الحلفان اننا نخرب بيوتنا لما يكون حلفان بالطلاق

لاَّ يُؤَاخِذُكُمُ ٱللَّهُ بِٱلَّلغْوِ فِى أَيْمَـٰنِكُمْ وَلَـٰكِن يُؤَاخِذُكُم بِمَا كَسَبَتْ قُلُوبُكُمْ وَٱللَّهُ غَفُورٌ حَلِيمٌ

كمان فى حلفان بالله تلاته.. طيب ربنا واحد لاشريك له.. ازاى بقت تلاتة مش عارفه

طيب وايه العمال وايه كفارة الحلف باليمين

طبعا الاحاديث والقرآن انا جايباها من مصادر عالانترنت وكمان دى انواع اليمين وكفارتها

1- اليمين المنعقدة .
وهي : يمين على أمر مستقبل وهي تنعقد، وفيها الكفارة إن حنث.

2- اليمين الغموس .
وهي : يمين على أمر مضى كذباً ، وهي من أكبر الكبائر ، وسميت غموساً لأنها تغمس صاحبها في الإثم ثم في النار ؛ ولا تنعقد ولا كفارة فيها وتجب المبادرة بالتوبة منها .

3- اليمين اللغو .
وهي على نوعين :
- قسم على أمر ماضٍ بغلبة الظن فبان خلافه .لا حنث فيه ولا كفارة .

- قسم مما يجري على اللسان حيث لا يقصد اليمين كقوله : لا والله .. لتأكلن والله . .
وهذه اليمين لا تنعقد، ولا كفارة فيها، ولا يؤاخذ بها الحالف، لقوله تعالى: "لا يُؤَاخِذُكُمْ اللَّهُ بِاللَّغْوِ فِي أَيْمَانِكُمْ "

**
انا بس مش عاوزة اطول عليكم احسن تنامو منى:)
بس الموضوع دا خطير جداااا ولازم كلنا ناخد وقفة مع نفسنا ونشوف احنا بنحلف كتير واللا لا ولو كدا نحاول نقلل من العادة دى لغايت ماننهيها خالص من حياتنا
الموضوع كبيررر كبيييير ولسا فيه نقط كتير ماتقالتش بس اللى عاوز يعرف اكتر اكيد هيلاقى
الحمدلله الخير كتير وربنا مبارك فيه عالشبكة العنكبوتية:)

سمعت نكتة ظريفة اوى بخصوو الموضوع دا بتقول

شبااب سألوا مصري : ليه الشعب المصري بيحلف كتير
قاال : طب والله العظيم دي اشاعه ,, قسما بالله ده افترا ,,, علي الطلاق بالتلاته كدابين ,, وحيااة النبي دول نصابين
:-)))


**وختاماُ اقلكم كل سنة وانتم طيبين بمناسبة العام الهجرى الجديد**

هو الموضوع دا صادف المناسبة انا ماكنتش قصداه

فحاجة كويسة بجد عشان نبدأ من اول يوم فى العام الهجرى الجديد
اننا


نبطل حلفااااااااااااان:)

قال عليه الصلاة والسلام: "ألا إن الله عز وجل ينهاكم أن تحلفوا بآبائكم، فمن كان حالفاً فليحلف بالله أو ليصمت



42 بعبر ياشعب:

Lobna Ahmed Nour said...

اول تعليق ..

انا من اول البوست متضايقة جدا من ابو سحلول اللي عمال يحلف على كل الناس اللي بيقابلهم

بس انتي طمنتيني ان مش انا بس اللي باستنكر حالة ابو سحلول

ربنا يهدينا جميعا

بنت الصالحين said...

ساره حبيبه قلبى

ايه يابنتى التدوينه الحلوة دى ربنا يباركلك يارب
تصورى نا كنت فاكره ان هتكتبى تدوينه عن يومنا النهارده زى ماقولتى
بس كتبتى موضوع حلو
ربنا يباركلك ويرزقكى الاخلاص

ftafeet said...

تدوينه هايله اوى وموضوع هايل اوى ومهم جداااااااااا انا بجد بالاحظها كتير جدااااااااا لاناس كلها شغالين حلفان

على فكره انا كنت بحلف كتير زمان بس كنت بقول ونبى ونبى كده يعنى

بعدين لما عرفت الحمد لله بطلت الحكايه دى خالص خالص

ربنا يهدى ابو سحلول هو كمان

الطائر الحزين said...

الاول جزاك الله خيرا

ثانيا

بنحلف كثير علشان لم نتعود على الصدق



تحياتى

ابن حـجـر الـعـسـقـلانـى said...

و الله موضوع جميل أحييكى عليه .. لكن أنا كنت متوقع فى أول الموضوع إنك هاتتكلمى عن العادات المصرية الجميلة .. من كرم و مودة و حب للخير .. ما نقدرش ننكر إن كل المواقف اللى انت جبتيها دى مواقف جميلة جدا و معبرة جدا .. لولا ما خالطها من إسراف فى الحلف

لكن تناولك للموضوع جميل .. خصوصا الجزء الأخير اللى عرضتى فيه بعض الجوانب الفقهية للقسم

و كل عام هجرى و أنت بخير

رينـــــــــــا said...

هههههههههههههههههههه
اسلوبك كوميدى جدا
بد تدوينه جميله جدا
والفكرة حلوة وعرفتى توصلى اللى انتى عايزاه بالظبط

سها السباعي said...

بنحلف كتير عشان ماحدش بيصدق حد

وعشان نلزم اللي قدامنا باللي احنا عايزينه يعمله

وعشان احنا عالم بؤ

мσнη∂ιš said...

ميرسي كتير يا سارة ع الكلام ده اللي كله عبر، و كل سنة و انتي طيبة و أمورة و شاطرة في المدرسة، عقبال مانشوفك الأولى في الكي جي تو بقى

سنة سعيدة مسكة و فنيدة
bonne année , plain de santé et de prosperite.

:)

MerMaid said...

سارة يا جميلة

بجد بجد

تدوينة جميلة جدا يا سارة
بجد اشكرك عليها
و بجد الكلام مسرد سرد جميل واقعي تشمله الالفة ايضا

بس ربنا يسامحه اونكل ابو سحلول علي حلفاناته

و كمان النكتة ضحكتني كتير قوي -
-------------------------------
بصي بقي

ماشاء الله اختيارك في الايات كان متقن

جزاكي الله خيرا يا سارة

:)))

نورتــــــــــيني في مدونتي

و في موضوع جديد هناك ابقي شوفيه وقوليلي رايك

:)))

الي اللقاء

عصفور المدينة said...

والله التدوينة دي جميلة جدا والأسلوب مشوق جدا ورائع وأحسنت التقديم

وأعظم اليمين ذنبا هو ذلك اليمين الذي يقتطع بها الإنسان حق أخيه المسلم ويظلمه

وكما نبهت من الأيمان العظيمة اللعب بكلمة الطلاق
حفظك الله ورعاك

محمود الدوح said...

والله اسلوب رائع جدا
نكتة خفيفة فى الاول وشرح فى الاخر

كل عام وكلنا بخير

šσяšαяαα said...


السلااااااام عليكممم
انا بعتذر انى مش هقدر ارد على التعليقات الحين لانى مرهقة جدا بس حبيت اشكركم على التعليقات المشجعة دى واتمنى فعلا اكون كتبت كلام مفيد.. واشوفكم على خير قريبا ان شاء الله

ghalia said...

ازيك يا سارة
سلامتك يا جميل
حلو أوى البوست وربنا يجازيكى ثواب الناس اللى حتعمل بالكلام
لأن موضوع القسم ده فعلا مبالغ فيه أوى
بقينا نحلف على كل حاجة وأى حاجة ومن غير ما حد يطلب مننا نحلف

بس هى حكاية تعود مش أكتر
أنا زمان كنت متعودة أقول كلمة والنبى بس عودت نفسى ابطلها والآن الحمد لله بطلت أقولها خالص
كمان موضوع القسم ده قل أوى ولما بحلف إنى حعمل شئ لازم اقول -ان شاء الله- علشان لو مقدرتش انفذ القسم يبقى مش عليا كفارة
يلا مستنيينك ترجعى ونشوفك على خير ان شاء الله

DR.HAMAS said...

ربنا يكرمك يا اخت سارة

فعلا موضوع مهم موضوع الحلفان ده

الناس بقت ترمى الكلام من غير ما تفكر

و الحساب على الحلفان شديد جدا

ربنا يسترها

و نعرف نضبط ألسنتنا يا رب


جزاكم الله خيرا على الموضوع المهم جدا


د.حمــــــاس

ibn nasser - ابن ناصر said...

هههههه
لا وتلاقي الحلفان ايه بقي يعني مزااج
والنعمة
ورسول الكعبة
وربنا المعبود
وفي حاجه مش بفهمها
والخضرة الشريفة!!!!!!!!
وفي طبعا والمسيح الحي
والعذراء الطاهرة
الاخوة المسيحين برضو مشتركين معانا
مش مصرين بقي ولا ايييييه!!!!!
...
ومعلهش ملحقناش نتكلم ف دار الكتب
ايميلي اهو
ibn-nasser@hotmail.com
تحيــاتي

صاحب المضيفة said...

اسلوب جميل وهادي

وفكرة أكثر روعة وجمالا من الاسلوب

ربنا يبارك فيك ويحفظك

كان الله لك ونفع بك

دمت بخير

رئيس جمهوريه نفسى said...

ده بسيط انا بشوف فى المحكمه ناس بتحلف يمين ربنا زى التاكس باطل ولا بيتهزر ليها جفن ولا كانها بتغلط
موضوع الحلفان ده بجد ربنا يجيرنا منه

baskota said...

حيبتى ساره بجد بجد تسلم ايديكى لان الموضوع ده كان مضايقنى من زمان جدا ونفسى ك لالناس تبطل حلفان شويه وخصوصا حلفان النبى لانه فى اللسان زى اللبانه والحمدلله بقالى حوالى 6شهور بجاهد نفسى انى ابطلها واستبدلتها بكلمه بالله عليك ودى طبعا مفيهاش اى حرام ان شاءالله
ربنا يباركلك جدا لانه موضوع هادف جدا وطريقه العرض شيقه جدا ياقمر تسلم ايديكى

احساس لسه حى said...

عزيزتى
الموضوع جامد قوى وياريت الحلف بيكون لغو فى ناس مدمنة حلفان ومشض هتتخلص منه مهما كلن
النكته كمان حكاية واول مره اقراها
مطلوب منك الحضور عندى وقراءة اخر بوست وتعلقى عليه تعليق حاسم وواضح للاهمية يا ريت
سلام

احساس لسه حى said...

عزيزتى
الموضوع جامد قوى وياريت الحلف بيكون لغو فى ناس مدمنة حلفان ومشض هتتخلص منه مهما كلن
النكته كمان حكاية واول مره اقراها
مطلوب منك الحضور عندى وقراءة اخر بوست وتعلقى عليه تعليق حاسم وواضح للاهمية يا ريت
سلام

مروة الزارع said...

بوست رائع رائع رائع

بجد الله ينور عليكى

انا كنت مفقوعة من الناس دى

وكنت بحاول على اد ما أقدر أبطل العادة الزفت دى لحد ما بطلتها

بجد بوست هادف ورائع

جزاك الله خيرا

..............

بوست جديد مهم جدا ليا

رأى حضرتك يهمنى جدا

Anonymous said...

سوسو ياعسل .الموضوع بجد جميل جدا ومهم اوي ان كل الناس يوصل لها الكلام ده واسلوبك في الكتابه وسرد الموضوع حلو اوي في نوع من الاثاره كدا انا مشوفتهاش الا في كلام الجرايد احب اقولك عندنا صحفيه بجد امتعتينا. وربنا يهدينا جميعا

خمسة فضفضة said...

السلام عليكم ورحمة الله وبركاته
ماشاء الله
جزاك الله خير يا ساره

فعلا موضوع غايه في الاهميه

وياريت الناس كلها تعمل بالكلام ده ، اكيد حايتنا هاتتغير كتير اوي

عاوزه اقولك اني بحاول اني اجاهد نفسي كتير اوي في الموضوع ده بس كتير الطبع بيغلب فيارب انجح بقي واتخلص من العاده الوحشه دي

ادعيلي

šσяšαяαα said...

للمرة التانية

والله مش عارفه اقولكم ايه

بس حالتى النفسية مش ولابد ومش قادرة لا ارد على التعليقات ولا ازور المدونين اللى وحشونى جدااااا ولا انى اكتب بوست جديد

بس حبيت اطمنكم انى لازلت عايشة فى الدنيا:)

اشوفكم على خير ان شاء الله

Ahmed Al-Sabbagh said...

ههههههههه

والله اسلوبك رائع

ده انتى طلعتى مشكلة

انا بحب اوى توصيل القيم للناس عن طريق المقالات الطريفة القريبة من القلب

وسعدت جدا بلقائك فى افتتاح موقع دار الكتب

ويارب دايما متجمعين على الخير

خالو أحمد

Empress appy said...

الله يفتح عليكى بجد واللى بيغظنى فى موضوع الحلفان اكتر حاجه الناس البياعين يقعد يحلف انه خسران وان الحاجه متنفعش بجد بينرفزونى علشان كده بأخد حقن مضاده معايا ليهم او ما اجى اشترى من حد حاجه اقوله بس اتفاق الله يرضى عنك اوعى تحلف فى اى اسعار وبرضه بيغظنى ويحلف

Blank-Socrate said...

الصديقه الغاليه
كل سنه و انت طيبه
احيك على طريقه العرض المبتكرة
خيل لى فى البدايه انها للدعابه فقط
اعتقد انه اسلوب جديد لمعالجه السلبيات
_________________________
الحلفان للتأكيد
الشخص الذى يتمتع بالمصداقيه لا يطلب منه ابدا ان يحلف
فى بعض المرات التى يطلب منى فيها ان احلف ارفض
اما ان تصدق كلامى او ينتهى عند هذا الحد

تــــ(حـنة)ــــر said...

ازيك يا سو
ايه يا بنتى الجمال ده
لأ على اد ما ضحكت فى مغزى فى الأخر
تحياتى ليكي بجد
وربنا يكرمك

Coca said...

ههههههههههههههه
بوست لذيذ ومميز فعلا
بس احنا اتعودنا نسمع كل اللي حولينا بيحلفوا
يارب نغير الطريقه دي
اتمني

Unknown said...

أخلاقنا...اسلامنا
إيمانا منا بأن حال العالم ...لم ولن ينصلح... إلا بالاسلام
وإيمانا منا بأن اسلامنا...لم ولن ينصلح ...إلا باأخلاق
اتفقنا...أو وفق الله بيننا ...لتكوين أول حملة للأخلاق...لتحقيقها...والسمو بها...والعمل بها بإذن الله
...................
من نحن
مجموعة من الشباب ...أهمهم حال أمتنا...وعروبتنا...وأوطاننا
فوفق الله بينناعلى الإجتماع على هذه الحملة...ولنطلقها حتى تصل إلى عنان السماء...علها تشفع لنا يوم القيامة
وبإذن الله ... سوف نعلن في البوست القادم عن المدونات والمواقع التي تدعم هذه الحملة
...................
وقد تم بحمد الله إنشاء مجموعة أخلاقنا إسلامنا البريدية على
yahoo groups
وسننشر بها ان شاء الله ما يتم انزاله من مقالات وفعاليات الحملة
وللاشتراك في الحملة...اضغط على الرابط التالي
http://groups.yahoo.com/group/akhlakona/
Group Email Addresses
Related Link
http://groups.yahoo.com/group/akhlakona/www.ana-insan.blogspot.com

Ma 3lina said...

الموضوع راائع بجد

يعنى كوميديا فى الاول بس متخيلتش انه وراه الموضوع المهم ده

عندك حق الناس لسانها على طول حلفان و المشكلة انه فى الفارغة دايما


مدونتك الانجليزية ؟؟ عاوزين مواضيع جديدة تحياتى

šσяšαяαα said...

مش عارفه ايه التعليقات بتاعتى اللى كلها اعتذارات دى بس انا بعتذر لانى مش هقدر ارد على كل التعليقات لانى كومت الواجب لحد مابقى كبيييير اوى:) بس هذكر كل اللى نورنى واشكرهم فردا فردا

šσяšαяαα said...

UNIQUE :

عاشقه الفردوس :

ftafeet :

هى مشكلة فعلا موضوع الحلفان دا

وادينا بنحاول نقلله

وشكرا يابنات على التعليقات الجميلة

šσяšαяαα said...

الطائر الحزين:

ابن حـجـر الـعـسـقـلانـى:

رينـــــــــــا:

لو بقينا صادقين فكل حاجة اكيد فعلا مش هنحتاج نحلف

وبشكركم جدا على المشاركة

šσяšαяαα said...

سها :

мσнη∂ιš :

MerMaid :

اتمنى ان يكون فى ثقة بين الناس عشان مايحلفوش كتير:)

ونورتونى بجد اشكركم على الكلام الجميل دا

šσяšαяαα said...

عصفور المدينة :

محمود الدوح :

ghalia :

تسلمو يارب على الكلام الجميل دا
والحمدلله ان التدوينة عجبتكم
ويارب دايما اكون عند حسن الظن

šσяšαяαα said...

DR.HAMAS :

ibn nasser - ابن ناصر :


صاحب المضيفة :

فعلا الحلفان منتشر بين كل الناس باختلاف اديانهم

وشكراا كتيير على المشاركة والكلمات الجميلة دى

šσяšαяαα said...

رئيس جمهوريه نفسى :

baskota :

احساس لسه حى :

تسلمو ياجماعة واتمنى فعلا اننا نبطل هذه الظاهرة المنتشرة والمتوغلة:)

تحياتى ليكم

šσяšαяαα said...

مروة الزارع :


nino said :

خمسة فضفضة :

لكم جزيل الشكر على هذه المشاركات الفعالة:)

وربنا يهدينا للخير دايما

تحياتى ليكم

šσяšαяαα said...

Ahmed Al-Sabbagh :

appy :

Blank-Socrate :

هو الموضوع معقد فعلا ويغيظ بالذات اللى بيحلفو فى التجارة دول

وفعلا الواحد يقول اللى عنده
واللى عاوز يصدق يصدق مش عاوز بقى
يشوف حد تانى يحلفله:)

نورتونى وتحياتى ليكم

šσяšαяαα said...

Tamr7na :

coca :


Ma 3lina :

الحمدلله ان التدوينة عجبتكم واتمنى تكونو استفادتم منها

وتحياتى ليكم

ـــــــــــــــــــــــ

أنا إنسان :

ان شاء الله نتواصل معاكم وربنا يجزيكم كل خير

Dr. Ibrahim said...

فعلا الحلفان عمال على بطال دليل على ضعف فى الشخصية وعدم ثقة بالنفس وعلى فكرة بقى واحد زميلى حلف ماهو عامل حاجة وعملها فراح سأل الشيخ عن الكفارة وكده قال الكفارة مش الصيام بس لا
الصيام لو مش قدار على حاجة الا وهى
إطعام 10 مساكين كل واحد بمقدار 10 جنيه او إلباسهم بملابس والصيام كفارة فى حالة واحدة لو انت مش قدار تتدفع او تلبس وقال لنا الاية دى
قال اللَّه تعالى (المائدة 89): {لا يؤاخذكم اللَّه باللغو في أيمانكم ولن يؤاخذكم بما عقدتم الأيمان فكفارته إطعام عشرة مساكين من أوسط ما تطعمون أهليكم أو كسوتهم أو تحرير رقبة، فمن لم يجد فصيام ثلاثة أيام؛ ذلك كفارة أيمانكم إذا حلفتم؛ واحفظوا أيمانكم}.
تصوروا بقى وفعلا زميلى كان محوش 400جنيه و دفع 70للشيخ عشان يتصرف فيهم للمساكين
وده عشان يتعلم وانا كمان من الموقف ده ان الموضوع كبير ولا هوادة فيه
ومش أى حاجة نحلف عليها
تقبلوا تحياتى وإحترامى