عملت ايه امبارح

دا مش سؤال
دى المشاهد اللى عدت عليا خلال الاربعة وعشرين ساعة وناوية اكتبها
اللى عاوز ياخدله تعسيلة واللا يشربله كوبايتين شاى علشان المشوار طوييييل طوييييل ياولدى وربنا يصبركم بقى:)

امبارح السبت السادس من اكتوبر التاسع من شعبان
كنت مستنية اليوم دا من ساعت ماعرفت بموضوع مستشفى ابو الريش لانى رحت هناك قبل كدا وفعلا الناس دى حالتهم تقطع القلب وتشرحه وتفرمه كمان
انا ملحقتش اجمع تبرعات بس حاولت على اد ماقدر.. عندى فى الشغل نزلت للراجل الكبير المسئول اللى بيقولو عليه رئيس مجلس الادارة.. عرفته بنفسى بم انى عضو جديد فى الحزب وقلتله عالموضوع
رد عليا: طيب اتفضلى انتى وانا هرد عليكى على طول
قلتله: طيب بعد اذنك ياريت قبل الساعة اتنين علشان انا همشى
قاللى: لااااااا انا هرد عليكى حالاااا
وطبعا دلقنى ولا كأنى ماشية وراه فى الشارع وبقوله انا بجرى على يتامى يابييييييه
ناس طيبين اوى هنا الصراحة وبيحترموا كلمتهم اوى زى مانتو شايفين
المهم مافقدتش الامل وقلت فى ناس جاية تاخد كورس دلوقت لما اقول للميس يمكن قلبها يحن
هى كمان قعدت تدينى محاضرات ولازم نتحرى الناس اللى بنديلهم الصدقة وممكن اهالى الاطفال يطلعو مدمنين ياخدو الفلوس يشربو بيها واللا بالذات المستشفيات دول حرامية ومن كتر مابيشوفو عيانين مابقوش يصعبوا عليهم
معلش انا صدمتك بس عشان انتى لسا صغيرة ومتحمسة.. عموما خدى بس لو هاتجيبى بيهم ادوية اوكى

بس بصراحة عملت معايا حركة جدعنة وكلمتلى دكتور صيدلى عشان اروحله اخد منه الادوية وبصراحة لما رحت عملولى تخفيض كمان ربنا يكرمهم.. هو صحيح الادوية كانت فيها اسامى غلط كتير ولخبطت فيهم وهاروح ابدلهم بعد ماجبت الاسامى الصح بس كله يهون
المهم ركبت المترو وابتديت اقابل الزملاء نااافر ناااافر
وكان فى ناس جديييييييدة كتييييييييييير وناس مش مدونين.. العدد كان ماشاء الله كبير اوى بيقولو اكبر من اى تجمع حصل قبل كدا
وبعد مارحنا بشوية العصر أذن فقلت للبنات ياللا نصلى قبل الوقت مايسرقنا
رحنا صلينا وقبل مانمشى لقيت الامام بيقول: صلاة الجنازة على طفل
الجملة دى مش راضية تطلع من ودانى.. ربنا يصبر اهله ويشفى كل المرضى
كان نفسى اصلى بس استنيت الامام يتكلم ماسمعناش حاجة وفى الاخر اتضح انهم خلصو صلاة الجنازة

رجعت تانى للمستشفى وكانو منظمين الموضوع وطلعنا على مجموعات
انا طلعت عشان انزل:).. لانه كان عندى برد وخفت ادخلهم وهما مش ناقصين اساسا
بس كان ايه بقى ولاتقولو كائنات فضائية احتلت المكان.. الناس كلها عمالة تبص علينا واللى تيجى تقول انا بنتى تعبانة بكذا واللى يعدى رايح جاى علينا ويقولنا الجملة الشهيرة جدااا: كل سنة وانتو طيبين.. واللا الامم اللى كانو واقفين عند السور.. الواحد مابقاش عارف مين فيهم اللى محتاج فعلا ومين اللى بيمثل
الواحد حس انه لو معاه ملايين حتى مش هيكفى الناس دى كلها

وفى الاخر اتجمعنا قدام المستشفى واستنينا نروح الفطار الجماعى فوسط البلد
كانت لمة جميييلة جداااااا.. مع انى مليش فى المشويات الخارجية دى بس كله يهون فى سبيل الوطن التدوينى:)
لما خلصنا قالو هنروح نقعد على قهوة فوسط البلد.. الشوارع هناك فااااضية.. ماهو بعد الفطار بقى على طووول لسا الناس ماهضمتش
عديت على ميدان طلعت حرب وافتكرت عادل امام وهو بيقول.. احنا بقينا فى زمن المسخخخخ
الكلمة الحكيمة الوحيييدة اللى سمعتها مالراجل دا

بعد ماتمشيت شوية وهضمت الاكل ركبت المترو وروحت
ولحقت اخر جزء من صلاة التراويح واستنيت الشيخ لما طلع من المسجد علشان كان فى سؤال واقف فزورى
قلتله عن الميساية اللى ادتنى محاضرة قبل ماتساهم بالتبرع
وقلتله ليه الناس بتفترض سوء النية.. ماهو الواحد لو بالشكل دا يبقى مش هنساعد حد
قاللى لا طبعا احنا بندى الصدقة وبنفترض حسن نيه المحتاج
وضربلى مثال: قاللى فيما معناه لو واحد بيبع عنب .. اكيد هيبيع لكل الناس لكن لو عرف ان فى واحد بياخده يصنع منه خمور وبيرضو بيبيع له يبقى ياخد وزر

بعدها رجعت البيت ودماغى مشحونة بكل المشاهد اللى حصلت

دى على فكرة مش تغطية صحفية لليوم.. امبارح دا بصرف النظر عن التجمع وزيارة الاطفال صحصح حاجات وافكار كتير جوايا.. هى ايه مش قادرة احددها بصراحة:)

النهاردة مش عارفه مالى ولا فرحانة ولازعلانة.. يمكن من كتر التفكير فى حاجات كتيرمش عارفة احدد

وختاماً احب اقدم خالص الشكر والتقدير لكل من ساهم ولو بكلمة طيبة فى هذا العمل الخيرى ونلتقى دائما ان شاء الله على خير

"كانت معكم صرصارة العضو المنتخب عن دايرة حزب بلاليع الكاهرة الكبرى"

فاضل ايه فيكى يامالطة

مالطا دى حتة ارض طوييييييييلة عرييييييييييييضة يجى متر فمتر كدا
الناس اللى ساكنين فيها شوية صغيرين خالص ييجى تمانين تسعين مليون اعصار --كلمة نسمة هتبقى صغيرة اوى عليهم
ومنهم اللى ساكن فى فيلل واللى بيستلقى فى صفيح مصدى واللى بانيله بيت عالجبل

اووووم اييييه خير اللهم اجعله خير واذ فجأتن السما مطرت حجر صوغنون خالص دلعو كدا وكل حجراية مفيش اد قولو بيتين فبعض بس

تعاول نتخيل مع بعضينا اللى ساكن فى الفيللا هيعمل ايه ساعتها
هيخلع على اول طيارة
طيب واللى بيستلقى فى الصفيحة المصدية
هيخلع بالصفيحة على اى حتة تانية
واللى بيته عالجبل
هيتهد فوقيه هو واللى معاه واللى مع اللى معاه واللى مع اللى مع اللى معاه
حاجة كويسة خالص

والحكومة المالطية تتميز بسرعة الاداء والدقة فى انجاز المهام الصعبة والمستحيلة والالترا مستحيلة
فأول ماسمعت ان فى كام زلطاية وقعو مالجبل اللى كانوا شغالين فحت فيه قامت جرى مالنوم شالت اللحاف وعملت تمارين الصباح وتسخين لجميع اعضاء مجلسى الشعب والشورى وحضرت اكل الفطار بم انها هتبقى مشغولة فى انقاذ ابناء مالطة المدفونين تحت الانقاض

وبعد ماحضرت اكل الفطار وحطتة فى التلاجة عشان مايبردش نادهت على العساكر عشان يضربوا ويقفشوا الناس اللى هتتخانق وتدعى عالبلد وعاللى خاربها

فات قولو ييجى خمس ست سبع ساعات يااادوووب على مالحكومة فردت طولها وقامت.. وكااااااااانت المفااااجأة
الناس مختفية تحت الصخور وشغالين بالموبايلات انجدوناااااا الحقونااااا.. وما من مجيب.. اصل الحكومة كانت مشغلة ام بى سريس على اغانى رمضان ومعلية الصوت عشان تعرف تتمزك.. هتمسع ايه واللا ايه الحكومة فاضيالكو هى اياك

كل دا والناس عمالة تتخنق وتموت وولا الات نافعة ولا مجانيق ولا قوات خاصة ولا حتى الالات حشوا الاسنان

ايييييييييه ولادايم الا وجه الله.. ماهو الذكاء له احكام برضو
من كتر الذكاء سايبين اراضى ربنا الواسعة وعاوزين يزودوا مبانى عالجبال
من كتر الذكاء برضو سايبين الناس اللى المفروض انهم ارقى مخلوقات ربنا تموت وتتحرق وتتخنق وتتفعص وتغرق واهو كله توفير .. امال يعنى يسدوا الافواه الجائعة دى منين
وطبعا برضو من كتر الذكاء الخارق العالم كله كان مهتم بالحدث المأساوى دا.. بالنسبالهم مأساوى.. بالنسبة للحكومة المالطية خير وبركة

على جنب المواقع الاخبارية تلاقى متعلقات اخرى لاخبار قديمة عن كوارث متشابهة حدثت فى مالطة زى
قتلى وجرحى فى تصادم جديد للقطارات بمالطة
ارتفاع عدد ضحايا عمارة الاسكندرية المالطية الى 29 قتيلا
تبرئة مالك العبارة المالطية السلام 98

مالطة اتخربت ومش فاضل فيها شبر واحد عليه القيمة.. واللى عالوش دا قشرة ملمعينها عشان نكسر بيها عين اللى بيحقدوا علينا.. على ايه ياحسرة

ونييجى للبشر اللى بيوتهم اتخربت واهاليهم ماتوا ياترى الحكومة المالطية ناوية تعمل معاهم ايه
انا بقترح ان الفلوس اللى ناويين يدفعوها لأخونا المالطى المحبوس ظلما وقهرا وعدوانا وتخليص حق
انا من رأيى يعنى انه يستعوض ربنا فى الاتناشر مليون اللى صرفهم عالغزية اللى اتقتلت
ويروح يبوس راس الكبير عز ابن وز
ويتصدق بكام مليون اورر حلوين كدا للغلابة اللى اتشردوا فى ارض مالطة
او يديلهم كام بيت مالبيوت اللى ناوى يعملها اهو ينوبه ثواب

وهكذا هو الحال فى مالطة.. كانت حلوة وبنت ناس ومتنغنشة.. صابها الفقر والذل والسحابة السودا

يامالطة الف حسرة عليكى
قتلوكى وخربوا اللى فيكى
والكيل طفح عندنا لكن
قلبنا محروق عليكى

هذا هو الموجز.. واول حاجة فيه.. وحشتونى جدااا

السلاااااااااااااااااااام عليكممممممممممم
ايوة هى انا صرصارة.. مش مصدقة نفسى انى فاتحة المدونة بكتب بوست جديد

يااااااااااااااااه الدنيا دى مابتديش الواحد كل حاجة... كان نفسى ابقى معاكم كل يوم واتابعكم دايما واعرف ايه الجديد معاكم وفى الدنيا كلها
انا اساسا لو اطول اكتب كلمة مدونة جنب الجنسية فى البطاقة هعملها


واحب افرحكم واقولكم اولا انى اشتغلت يامينزززز الحمدلله .. وطبعا الشغلانة فى القاهرة تحديدا مصر الجديدة يعنى المنوفية طلعت اوت برضو ادعولى ان ربنا يوفقنى فيه لان بلدى واقفة فزورى برضو عشان خاطر المسافة والمواصلات

يعنى انا داخلة على منعطف تاريخى واحتمال يكون مطب واتكعبل فيه بس الحاجة اللى مصبرانى انى هكون فى القاهرة مركز الاحداث ومركز التدوين يعنى ان شاء الله لو قدرت انى احضر اى مقابلة ليكم زى حفلة توقيع العدد التانى من كتابنا اللى هتكون بكرة
وانا ان شاء الله هاحضر... ياااااااااااه بجد ماتتصوروش مفتقدة كل حاجة فى التدوين
انا قلت اكتب البوست دا اسلم عليكو واهو بالمرة اعلقلى شوية على حاجات حصلت..انا مش عارفه سبت نفسى مالكتابة كل دا ازاى.. مع انى فى بوستات مكتوبة وجاهز عالنشر بس حتى مالقيتش فرصة انى ادوس على زرار
publish
ماعلينا
اول حاجة فى الاحداث البلدية المحلية.. قانون المرور واللى بسببه قعد السواقين فى البيت وباعوا عربياتهم واحنا بقينا نتنشق على عربية حنطور ولو فى عربية الحمدلله بقو يتأمرو علينا ويسيبونا ملطوعين عالموقف.. نفسى افهم ليه

الحدث اللى بعده.. حريق مجلسى الشعب والشورى بصراحة الجملة دى حكمة فعلا: ومن اعمالكم سلط عليكم... مش هى صح كدا واللا ايه
وفى اعتقادى ان حد من النواب الافاضل كان مولع سيجار او بيشرب شيشة بس كان نعسان شويتين تلاتة فساب السوجارة لحد ماوقعت وشبكت فى الكراسى اللى حواليها وطبعا بم ان باقى النواب الافاضل برضو كانوا نايمين فامحدش حس بيهم

ياللا اهو كله فى سبيل الوطن

والحدث التانى بقى وهو حدث رياضى دورة الالعاب الاولمبية
الصين بصراحة اثبتت انها تضرب باقى بلدان العالم بال... وتقعد مطرح اجدعها تخين فيها واعتقد ان اللى اتكبسوا كتير اوى ومصر كالعادة عمالة تنفخ فى الفراعنة لحد ماهايطيروا ويرجعولنا بالزيرو.. بس خير تقريبا خدنا كام ميدالية

والاحداث الخارجية
سمعت ان روسيا مولعة الدنيا بس للاسف معرفتش تفاصيل.. اهم حاجة انى الاقى مرتبة السرير وانام بس امريكا ام قلب حنين عرضت على مش عارفه مين كدا قولو معايا انها تبعتلهم درع مسلح قوى من الجنود الامريكان وهما ماصدقوا وفرحوا اوى وكان ناقص يبوسوا ايد عمنا بوش.. باسته عقربه

والحدث الفنى والادبى بقى وفاة اوكسجين الانتفاضة والقضية الفلسطينية.. الراجل اللى عيشنا معاه مأساة شعبه وكافح عنه لاخر يوم فعمره ربنا يرحمك ياشاعرنا الكبير.. محمود درويش مش هيتعوض بجد.. ومش اى حد نقدر نقول عليه انه مش هيتعوض:(

فى مجال الفنون بقى فيلم احمد حلمى ... عيطنى لانه بيكلم النفس اللى جوه كل واحد.. يمكن لانى زيه بتخيل ناس على طول وبكلمهم.. انا عندى انفصاااااااام:) الراجل دا عبقرى ماشاء الله واهم حاجة ان افلامه نضيفه لو عرفت ادخل الفيلم دا تانى هدخله

وبالنسبة اللاغانى.. المطربين دول يروحو ينامو احسن
محمد منير واغنيته كان فاضل هى الوحيدة اللى فيها حاجة .. هى ايه مش عارفه:)

اه وبالمناسبة رحت حديقة الازهر مرتين.. ماشاء الله تحفة رائعة.. ياريت بس تفضل عالجمال والنظام اللى هى فيه
انا صورت كتير اوى وهبقى انزل الصور فى اقرب وقت ان شاء الله لانها جميلة وهتعجبكم واتمنى اللى مارحش هناك يروح

ياللا ادينى عملت كوكتيل منعش فى الحر دا انا عارفه انها اخبار قديمة بس معلش انا اللى اتأخرت فى الكتابة

وقبل الختام طبعا أهنى جمييييييييع اهلى المدونين برمضان وربنا يجعله شهر خير ويرزقنا فيه بالصيام والقيام وصالح الاعمال


وياربت ياريت ياريت الناس ماتمثلش على بعض عشان خاطر انهم فرمضان.. يعنى نخللي دايما معاملاتنا مع بعض باحترام وبذوق
واللى متغاظ ومفروس من حاجة يحاول انه يكون هادى.. الناس مالهاش ذنب
وياريت كمان اللى نفسه يتخانق يبقى يجيب عضاضه يطلع فيها غله
وياريت بقى الكلام دا كله مايبقاش فرمضان بس لانه عيب اوى اننا نكون ملايكة لمدة تلاتين يوم وبعدين نقلب تانى 360 درجة
مش عارفة احنا بنضحك على مين بالظبط
يارب الناس تفهم ان كل الشهور واحد وان رمضان مميز عنهم لانه اوكازيون للحسنات وسباق لاعمال الخير.. دا غير طبعا قمر الدين حبيبى.. فى حد بيبحب ياكله من الكيس زى حلاتى:)

بس كل الحاجات دى برضو طول السنة.. يااااااريت كلنا نفهم كدا
وانا عارفه ان فى ناس كتير زيى نفسهم ان البلد دى تتغير وناسها تبقى احسن
ربنا يصلح الحال
اشوفكم على خير ويارب كلكم تكونو موجودين فى الحفلة بكرة ان شاء الله

عندكوش حاجة تتلبس؟

الصيف هل قبل الاوان

والايس كريم ظهر وبان

وموسم التسوق اوانه حان

والموضة السنادى على كل لسان

وماللى شفته هيجيلى جنان

ومن فرستى بندغ فى اللبان

وربنا يسامح اللى قال
قول للزمان ارجع يا زمان..بفكر اعملها اغنية.. ماعلينا

ليه بقى ربنا يسامحه.. اقولكم ليه

انتو خدتوا بالكو ماللبس المعروض فى المحلات والا لوحدى اللى من كوكب اخر

البلوزة مش عارفه وشها من قفاها والبناطيل شكلهم معلقينها فى الشمس قبل العرض عشان تكرمش وتتلبس بطريقة الوقف عالسور ثم القفز للدور التحتانى للوصول للهدف اللى هو لبس البنطلون واعملو حسابكو على فريق نجدة تحسبا لكسر رقبة او تهشم فى العظام.. انا بقول بلاش البنطلون احسن

طيب ملاحظين برضو اختفاء الكم واستبداله بالبودى لحد مابقينا عاملين زى(مع خالص احترامى ليهم) عمال السقالات وهيلة هيلة صللى عالنبى

واللا الفساتين اللى عاملة زى الجلاليب البيتى والجيبات سليلة الميكرو والمينى

طيب زمان وكانو رايقين وواخدين عالكعب العالى والمخطرة

دلوقت ونظرا للمساواة ولظروف الحياة المبهجة اللى خلت البنت تشتغل وهى بتدرس كمان بقى دلوقت ماينفعش الكلام دا.. واضح ان فى مؤامرة ضدنا عشان مانخرجش مالبيت ونقضى الدراسة كمان من منازلهم

ماحنا صحيح لو رضينا نلبس لبس المهرجين دا هنبقى ماشيين فى سيرك كبير على راى يوسف وهبى مع شوية تعديلات

ياترى هما مش لاقيين خلاص تصميمات جديدة ومشيو على راى اللى بيقول من فات قديمه تاه

واللا هو عيب فى القماش والقطن المصرى انقرض وبقينا عايشين عالستان دلوقت

وقد سألنا مصدر مسئول فى هذا الموضوع..وقد صرح بالآتى:

بيقولو فى نقص فى القماش ووزارة شبر واقطع لانتاج الملابس اصدرت تصريح ان هو دا اللى موجود عندنا واللى مش عاجبه يلبس ملاية لف وبالمناسبة لو لبستوها هتبقوا كدا سبقتوا الجيل القادم عشان هى دى موضة صيف 2015

ياسلااااااااام.. شايفين الاصالة والعراقة خلاص هنرجع تانى للبرقع والملاية اللف

ومعاها شريط اغنية شويكار بتاعت يام ملاية لف اسم الله تقتل مية والف حدالله..

انا ناوية احجز نسختى قصدى ملايتى من دلوقت

للحجز والاستعلام.. 21 ش حارة الموضة .. محل دعبس ديور للملايات اللف.. الرف الاولانى على ايدك الشمال

منوفى..أفتخر واللاّ نو أفتخر؟

بيقولو ان الواحد لازم يفتخر بأصله وفصله ومفاصله وغضاريفه اللى كانت نشأته فيها
ومن هذا المنطلق فقد رفعوا شعار كان لافف عليا فماشز عالياهو بتقول
منوفى وافتخر.. واللى مش عاجبه ينتحر.. يكتب على قبره مات منقهر لانه حاول يتحدى منوفى وما قدر
واضح انهم منايفة واخدينها بالدراااااع

انا بقى جلست افكر وافكر ثم وقفت افكر وافكر
انا منوفياية صحيح بس ولاحبها بييجرى فى الشريان ولاحتى ف صفيحة دموية واحدة

فأنا ايها الزملاء الاعزاء منوفى الهوية صحيح لكن اسكندرانى الهوى..عشقى الاول والاخير.. روحى فيها زى السمك ف ميتها المالحة
اكلها بدقة واعيش جنب بحرك يااليكس.. بس نقول ايه للنصيب والقدر..بعدك عنى خلانى اروح للمركز الرئيسى اللى فيه معظم المصالح الا وهو كايرو الكبرى.. بلد التلوث اللى بيدخل الانف بالكيلو مع كل شهيق..بلد الخناقات اللى خلتنى احس ان الناس فيها متكهربة وعلى اى لمسة تشوط فأى حد قدامها.. الحمد لله ماحدش شاطنى

بلد الزحمة والعربيات اللى بستنى فى الشمس لحد ماتحمص علشان اعدى طريق طوله قد عود القصب

البلد اللى كل ماجى اتقدم لشغلانه فيها ويلاقو المنوفية منورة فى الورقة تلاقى وشهم انقلب مية وستين درجة مع نبرة صوت كلها شفقة وعطف ياعينى عالبنت المكافحة اللى بتييجى من قارة المنوفية عشان تشتغل فى القاهرة ويختموا الكلام ب
هتقدرى تشتغلى للساعة 10 بالليل لو فى شغل كتير.. طيب عندك اقامة فى القاهرة.. هيبقى صعب عليكى اوى مش كدا.. طيب نتمنالك حظ سعيد فمكان عمل تانى.. بيبقى نفسى اقول اى حاجة لكن وقتهم ضيق اوى الله يكون فعونهم

ولو ابواب الدنيا فتحت فوشى بيبقى الراتب بصراحة حاجة كدا تلتميت ربعميت جنيه يعنى يادوب اسلك بيهم سنانى بعد مصاريف المواصلات وياريتها شغلانة عليها القيمة اطلع منها بخبرة واللا حتى بقرطاس لب
كل دا علشان خاطر انى من المنوفية .. طيب اللى مش لاقى فيها مجال عمل يناسبه يعمل ايه.. يبيع جبنه قريش وبيض بلدى؟

ولما اتعرف على ناس واقولهم بالصدفة انى من المنوفيه.. عينكو ماتشوف الا النور
اااااااااه ماحنا مانقدرش نتكلم.. من ايام احمس وانتو حاكمين البلد.. تقولش احنا اللى عزمنا الهكسوس عشان يحتلونا
دانتو مش سايبين مكان فى البلد غير وراشقين فيه
دانتو بينضرب بيكم المثل فى البخل والحرص والمكر واللوع مع شوية امثال بقى ماللى قلبكو يحبها

على الرغم من ان المحافظة دى زيها زى باقى الاقاليم.. محاطة بالاهمال والتنطيش والتنفيض.. يعنى هى مش مسأله جنسيتك ايه منوفى واللا برتغالى.. دى مسألة نفوس بشرية

انا يمكن مش بطيق المنوفية ايوة لانى مش لاقيه فيها حاجات كتير بتمناها

لكن

البلد دى ارضها كلها خير وهواها عالاقل نقى وبعرف اخد نفسى من غير ماتخنق

البلد اللى ناسها مضيافة بشكل غير عادى .. بيعزموا عليك حتى لو عندهم عيش حاف
مش زى اماكن كتير العزومات فيها نظام انجليزى.. لا وكدا احنا اللى بخلا

الفلاحين اللى مش عاجبين دول هما اللى أكـّلو باشوات مصر وهما اللى رووا ارضهم بدمهم عشان غيرهم ياكل خيرها عالجاهز


هما اللى اتشنقوا فدنشواى .. هما اللى فكروا ازاى نرجّع ارضنا.. هما اللى لغايت دلوقت بيودوا اولادهم الكتاب عشان يحفظوا القرآن فأوقات كتير بيودوا اولادهم كى جى انجليش عشان يقولو مامى وبابى

هما اللى عالرغم من قلة دخلهم بيخدموك من غير مايستنوا مقابل.. لمجرد انك بتحب الناس
هما اللى بيشتغلو فى اى حرفة علشان يكّونوا نفسهم من وهما صغيرين..فى المصانع وشغل السجاد وجمع المحصول


هما اللى مابيعجبهمش الحال المايل واللى دلوقت بقوا يقولواعلى كدا تخلف

هما اللى على الرغم من انهم اتعلموا واخدوا مراكز كبيرة لكن كتير منهم لسا محافظ على تقاليدو واللى لو قابل زميلته واللا قريبته مايقفش حتى يسلم عليها علشان الناس ماتتكلمش

هما اللى منهم زى الدكاترة زكى مبارك اللى عمل بيته مدرسة وشرفنى انى كنت طالبة فيها

هما محتاجين حد يرعاهم مش يقلل من عزيمتهم كأنهم من قبائل العصر الحجرى ويحسسهم انهم ديكتاتوريين الشعب مع انهم هما كمان من الشعب وبيعانوا زى مابيعانى الشعب واللى بيحصل للشعب مش علشان الصدف بتييجى ضد المنايفة يبقى كل المنايفة كدا

الناس كلها فيها الحلو وفيها الوحش زى قفص الفاكهة تلاقيية كله من نفس النوع لكن فى منه المفعص والاخضر والطايب والبايظ مع انهم كلهم تفاح ومع ذلك الناس مابطلتش اكل تفاح

يمكن كلامى غلط.. يمكن فعلا المنايفة فيهم كل الصفات الغلسة واللى بسببها تحول اسم المنوفيه الى تل ابيب
بس انا كشاهد عيان وعالاقل بالنسبالى مش لاقية حاجة ماللى بتتقال دى.. يمكن انا موجودة فقطعة ارض منوفياية منعزلة عن اماكن الحدث.. الله اعلم

اللى خلانى اقول الكلام دا انى اتعرفت بالصدفة على دعاء مواجهات..مدونة منوفياية واللى طلعت كمان اخت واحدة كانت دفعتى فى الكلية
دعاء من اول مواجهة وهى نشراها بالصوت الحيانى... منوفى وافتخر

فأنا فكرت كدا.. وقلت اكتب البوست دا وبعديه اشوف اذا كنت انا كمان منوفى وافتخر واللا لا
تفتكروا أفتخر واللاّ نو أفتخر؟

متااااااهـة

النهاردة نزلت وسط البلد قلت افسحنى شوية وانطلق مع نفسى وسط عالم بنى الانسان

سِبت قرون الاستشعار تودينى وتجيبنى فى الشوارع لحد ماوصلت لنفس النقطة اللى بدأت منها واللى هى كالعادة ميدان طلعت حرب.. مكانى المفضل فى كايرو

طول الفترة اللى فاتت دى واللى يمكن قللت فيها من الكتابة لكن عالاقل لسا ببعبع .. انما للاسف اتضح ان الكتابة بس من غير ماتعدى وتمسى وتصبح على كل الجيران وعلى اعز ناس عرفتهم بجد صعب اوى ومأثر فنفسيتى لدرجة انا مستغرباها

من اول السنة وانا دبست نفسى فمحاول فاشلة لتطوير الذات وربنا يعديها على خير

لكن بجد العالم الافتراضى اللى كونته هنا والناس اللى عرفتها واللى كلفونى بنزين وطيران لو المدونة بعيد وفطار وغدا لو المدونة فى الحارة اللى جنبى وعاوزة موتورجل.. العالم دا صعب امحيه من خيالى على الرغم من انه مش معايا لو حصل صدفة وقلت لحد وبابتسامة عريضة انى بدون وتقابلنى علامة استفهام اعرض تيجيلها كدا من نوع دبل اكس لارج واللى بتحسسنى كأنى فى جبل تلج اتفرتك ونزل فوق دماغى

يعنى ايه بتدونى؟؟.. واقعد اشرح الميكانيزم الخارقة اللى كل اللى فيها كى بورد وماوس

بس كى بورد بتقول كل اللى بحس انى عاوزه اقوله وماوس بيوصلنى لكل اللى اتعرفت عليهم واللى بحب دايما ارميلهم السلام واغلس عليهم بتعليقاتى

هتقولو وايه علاقة وسط البلد بكدا.. دا سؤال وجيييييه

وسط البلد شوراع زى متاهة لما بنحط الفار ونسيبه يلف ويرجع تانى لنفس نقطة البداية او يخرج

انا كنت عاوزة ابقى الفار لانى فعلا عايشة فمتاهة دلوقت ومش عارفه هل هاطلع منها على خير واللا هوصل تانى مكان مابدأت

كنتوا دايما على بالى وانا ماشية وعديت على المكتبه اللى نزّلت اول كتاب لينا.. ان شاء الله اتقابل بكرة (اللى بقى النهاردة خلاص:) مع باقى الشعب اللى ماجابوش العدد وكنت اتمنى اكون معاكم الاسبوع اللى فات بس محصلش نصيب

تعرفوا انا بتخيل نفسى دلوقت زى اللى قاعد على جزيرة ومنعزل عن باقى العالم.. كان فاكر انه كدا هيقدر يعيش برضو.. بس اتضح انه مش مجرد الاوكسجين اللى هيخيله يعيش

دا اوكسجين.. وتدوين.. واتصال بالاخرين

اى ميس يو اال... وحتى لو فى جزيرة بس مش هتمنعنى من انى اعدى للبر التانى واجيلكم

يمكن كلامى ملخبط .. يمكن عشان من صميم ميم بطين واذين قلبى

يارب تكونو بخير جمييييييييييعاااااااااا.. لحد مااطمن عليكم بذات نفسيتى:)

تصبحوا على خير

هى غزّاية واللا أكتر

ياسلااااااااام ياجدعاااااااااااان
اما الجمجمة البشرية دى عليها حركااااات
ولا تقولى بقى تعابين ولا تعالب
ولا حرباية ولا عقارب
ولا حتى موسولينى ولا شارون
ألخ ألخ

عالاقل كل ماسبق ماللى فوق متخصصين فى صنع الجرائم على اختلاف الطرق والابتكارات
يعنى ناخدهم كدا ناااافر نااافر ونشوف مدى تطابق صفاتهم الحيوانية مع صفاتنا البشرية

- الثوعبان.. دا بيتدحلب وبيتسحلب لحد مايوصل للفريسة ويقوم واخدها دراع كدا من بتوع مصارعة الوزن التقيل ويفضل يضغط ويعصر( طب والله دا ينفع اوى فغسيل الهدوم.. نبقى نشوف الموضوع دا بعدين).. المهم يستمر ويستمر لحد مالفريسة تسلم نمر وتنتقل الى معدة اخينا
الانسان بقى بيعمل ايه.. مثلا يفضل مستنى زميله فى الشغل لما يغلط واللا يعمل مصيبة ويقعد يستفزه ويهدده ومايسيبوش لحد مايرفع الراية البيضا او يسيبله الشغل ويخلع( مجرد مثال برىء)

- عمك الثعلب بقى داهية وجنى مصور.. مككككار وبياكل عقل الهدف الاول قبل ماياكله هو شخصيا
فى بنى البشر.. ممكن تلاقى مثلا واحد يستلقط موظف واللا راجل ملو هدومه كدا خارج مالبنك ووراه لحد مايركب..يقعد جنبه وياخد ويدى فى الكلام لحد مالراجل يأامن له..ماحنا شعب عشرى بقى ..يقوله الجو ياأخى حر اوى مع ان الصيف لسا ماهلش..انا معايا عصير تاخدلك واحد تطرى على قلبك.. يقوم التانى طبعا مالعطش مستسلم امام ازازة العصير وهى شفطة ويروح عمنا فى تاسع نومة.. وانتو اكيد خمنتوا الباقى(سنياريو من الجورنان:)

- طنط حرباء بقة تتلون وتتشكل على حسب البيئة المحيطة والمناخ الجوى اللى بتعيش فيه عشان عاوزة تعيش وخلاص امال هى الحياة دى بتيجى بالساهل كدا
كتير اوى من الاناسين (حلو الدلع دا:) بياخدوا الحرباية قدوة للتأقلم مع الظروف المحيطة.. المهم المصلحة فى الاخر والباقى على اقرب باسكت وارمى( مع الاعتذار للى مالهمش فطنط حرباية)

- نييجى للعقرب.. المعلم الكبير.. والكبير مش بالحجم لامؤاخذة.. دا بالدمااااغ والدماغ الصاحى اوى اوى (انا قعدت وسط معلمين قبل كدا واللا ايه!)
دا بقى بيهاجم من الاخر.. هى حِتة شكّة من اخر الديل وكل يبقى تمام ياريس.. مع انه مايبانش عليه من اول نظرة
يعنى فى التطبيق البشرى يكون قدامك اخوك وصاحبك وعشرة العمر بس هتديله ضهرك وتلاقى السم بيتسرسب يا إما ليك شخصيا يابمقلب يطلع من البطين ويخترق النخاع الشوكى وصولا للجمجمة

- اخر اتنين بقى مش بنى حيوان ولا حاجة.. دا المعلم شارون وحبيبه موسولينى.. دول بقى مننا ايوة..بس بيجيبو مالاخر قتل تيك أواى كدا زى لامؤاخذة مابتشوفوا الخرفان فى المدابح يوم العيد

ومن كل ماسبق نستنتج ان الجرائم شغالة على ودنه من اول قابيل لحد برعى اللى غز صاحبه بالازازة عشان مارضيش يغششه
انا بصراحة زعلانة منه فحاجة واحدة بس.. انه ماسمعش كلام مامت اللمبى اللى كله حكم

واد يا لمبي.. خد بالك.. قلمك في إيدك.. مطوتك في جيبك.. عينك في ورقة اللي جنبك

كان المفروض انه يغزه بالمطوى مش بحتة ازازة.. هو دا مقامه برضو
فالغز اعزائى بفتح الغين يعنى فى المصطلحات الحديثة
- حتة مطوة قرن غزال (أو اى حاجة تقضى الغرض) تخترق جسد الانسان اللى مابقاش يسوى فص ثوم مش بصلة حتة


فيصبح هذا الانسان اللى هو ارقى مخلوقات ربنا اللى اول ماشطح نطح وقبل مايفتح عنيه قتل اخوه
يصبح هذا المخلوق اللى يادوب يميزه عن الحيوان حتة عقل معقد التركيب ولسان قادر يتكلم بيه عشان يإذى غيره وايد يمدها عشان يسرق ولما يتنرفز على غيره يقوم غزّه غزّاية جايب اجله عشان خاطر يشفى غليله من ابن عمه اللى عاكس البت بتاعته مع انه ياعينى كان فاكرها واحدة لسا مش متشفرة بس طلعت متشفرة والكود بتاعها مع الحِمش اوى ابن عمه
(على راى اسمها ايه دى فى الباشا تلميذ
يصبح جسد انسان
وعقل تعلب
وتفكير عقرب
وحركة تعبان
وتصرفات حرباية
وجرائم موسولينى

والله كويس بقى عندنا هجين يغلب ابو الهول

وفى النهاية بتقدم بخالص الشكر للاخ برعى اللى ألهمنى لكتابة هذا الموضوع واللى مافتكرش انه غريب عليكو
وايضا بشكر الافلام اللى طلعت منها باللغة الجميلة اللى اتكلمت بيها دى

وصبح صبح ... بقينا فزمن المدبح

بويات باكين للبنات الحلوين

انا حقودة جدا
انا غلاوية اوى
انا......طيب بلاش اتكلم عن نفسى كتير

اللى بيخااااااف يطلع بره... قصدى لما يقرا يكون عامل حسابه ومشغل العربية ويخلع
عشان هنا هيكون فى ضرب وبهدلة وانا طبعا خايفة عليكو.. تقولولى هاتنضربى من مين وانتى غلبانة وفحالك وبتمشى جوا الحيط
اقولكم هانضرب من انصار حرية المرأة وانصار حطى البويا لتبدين امرأة مشرقة

طبعا فى اعتقادى انه مفيش ولابنوتة وهى صغنونة ماكانتش بتلعب بالروووج وتحط اولن الطيف على وشها وتلبس كعب عالى.. ومن اعتقادى ايضا ان دا كان مجرد تقليد اعمى للماما عشان تشوف نفسها ليدى زيها
ولكن لما لحظات البراءة والطفولة دى تنتهى ونكبر ونكون انسات عسولات فى مننا بيستمر فى هذا التقليد واللى بيصبح عادة لايمكن الاستغناء عنها

وفى مننا بيقاطع هذه العادة لانها يمكن ماكانتش بتلعب بالروج اساسا وهى نونو او لانها بتاخده من منطلق دينى واخلاقى يمنع الفتاة من الزينة خارج البيت

عدة الشغل.. فول اوبشنز:)

دلوقت لو استعارنا شنطة من انسة ..انا بقول استعارة يعنى زى الشطار نسيب الموبايل والمحفظة مكانهم..ونبتدى ندور عن الاتى:

صوباع روج.. بقا دلوقت يتعمل استيكة
اى شادو.. بالظبط زى الوان المية لو حد هنا فنون جميلة
بودرة الوجه.. دى طبعا ملهاش اى علاقة ببودرة التلك
قلم الكحل.. ابن عم القلم الكوبيا بتاع زمااااااان
الماسكرا.. لو حد يعرفلها معنى يقوللى
وطبعاااااا المراية ..امال هنظبط كل دا ازاى

وياللا بينا دلوقت نبدأ عملية التجميل بباكين( شركة الدهان الاولى بمصر:).. قصدى عملية الدهان
هنصب الاساس اللى هو البودرة وهى بديل للاسمنت لانه دا طبعا وش مش عمارة
ونبدأ نمحّر الوش بالسفنجاية ونوزع كويس عشان ماتكلكعش
وبعدها نحدد الشبابيك اللى هما العيون بالكحل عشان نبدأ ندهن
هنحط البويا بشكل فنى تقنى بتوزيعها على انحاء العين مع الالوان المتناسبة
الاحمر والاخضر والابيض.. دى اكيد واحدة بتحب البيتزا:)
وبعدها ييجى الروج ليضفى منظرا متألقا.. على فكرة لسا بياكلو منه تلاتة كل يوم:)

طبعا تكلفة العمارة دى... يوه قصدى الوش الجميل دا بعد الدهان مش هتكون كبيرة اوى
ليييييييييييه... عشان احنا دايما بنستخصر نجيب حاجة عليها القيمة طالما محلات اتنين ونص وتعالى بص فاتحة
وطبعاااااااااا مفيش اى حاجة باتنين ونص تجيب اى فايدة لينا وبالذات لما نحطها على وشنا وجوا عنتينا

الاساسى ان على مدار الايام ادوات التجميل..هما بيسموها كدا.. بتأثر على البشرة بشكل سلبى وبتسبب بلاوى سودة وتجاعيد احنا فى غنى عنها

إيديييلووووو

وطبعااااااا فى ناس هتقوللى مافى محلات كبيرة وماركاااااات عالمية موثوق فيها
اقولهم .. كله كيماوى ياماما ومفيش احسن من الاورجانيك

يعنى دلوقت نحط الوان عشان ندارى السواد اللى تحت عنينا او عشان احنا سمر وعاوزين نبقى ابيض من كلوديا شيفر او عشان دا دليل على الانوثة والرقة والجمال واننا وصلنا لمرحلة الجواز.. ياللا ياعم شييييل
كمان كام سنة كدا هتحطى البويا عشان تدارى التجاعيد المبكرة والبقع السودا اللى ملت وشك وماتعرفيش ياعينى جتلك منين

فى اوروبا والدول المتقدمة.. على رأى واحد مش فاكراه.. مش بيهتمو خااااالص بالمسائل دى
ليييييييه.. مش علشان هما بييض وحلوين ولا علشان عيونهم زرقا ومش بيلبسو عدسات ملونة اقرب ماتكون لقطعة ازاز ملونة مكسورة مرمية فى الطريق واحدة عنيها سودة وخنقاها لقطتها من الشارع وحطتها فى عنيها عشان تبقى زرقا.. بعدها راحت تركب عين بلاستيك لان طبعا عنيها...طااااارت

الناس دى بتبص على الاساس مش بتهتم بالرتوش... نسيت اقولكم العمارة اللى دهناها كانت من غير عمدان-تعالو نشوف ايه اللى كنا المفروض نعمله
الاساس اللى بيعملوه انهم بينضفوا وشهم كل يوم وبيعرفوا ياخدو وقت لنفسهم ويبعدوا عن اى ضغوطات لانها طبعا بيكون ليها تأثير على الوجه اللى بيبان عليه اى تعب او عصبية

يعنى الاساس هو النضاااااااااااافة
كونى نظيفة.. لتكونى جميلة ومشرقة.. وسيبك من كلام بتوع اتحاد المرأة البلياتشو
لو معندكيش ثقة كافية بنفسك لانك مش جميلة بصى على اتنين من اهم سيدات العالم دلوقت
كندوزة روزة.. حبيبتى لازم ادلعها
وأوبرا وينفرى.. دى حبيبتى بجد
الاتنين سمر.. يعنى انتى جنبهم كلوديا شيفر اللى بتموتى نفسك عشان تبقى زيها
بس الاتنين الناس كلهم بتقفلهم على رجل طبعا مع اختلاف الافكار والمراكز والشخصية لكل واحدة فيهم

انا خلصت كلامى بس عارفه انتو بتسألو هى ليه اتكلمت عن الموضوع دا
اقولكم ليه
لان زى معظم بنات مصر..بيفتكروا ان مجرد وضع الوان على الوش هيخللى الناس تبصلهم بشكل مختلف وتديهم ثقة بنفسهم لانهم خلاص كبروا وادوات التجميل اصبحت جزء من شخصيتهم

حاولى تحبى نفسك وماتداريش عيوب الوجه بقناع بتشيليه اول مابتدخلى البيت وترجعى تانى انتى بدون قناع
نفسك هى اللى هتدوم معاكى وهى الاساس اللى المفروض تخللى بالك منه وتراعيه كويس
زوديها بالثقة والعناية والحب هتلاقى الجمال اللى جواكى من غير ماتحسى بيحل مكان القناع اللى كل يوم بتحطيه وبشوية مية بتشيليه

ليا صديقة اتجوزت قريب وكان فرحها بسيط جدا بمعنى الكلمة حتى فى لبسها ومكياجها
لانها ببساطة لم تضع اى نوع من الميك اب والكل كان مستغرب جدا للتصرف دا
تفتكروا هى عملت كدا ليه مع ان كل بنت بتستنى اليوم دا بالذات عشان تحجز عند كوافير مش عارفه مين وتعمل الوان الطيف عشان تختفى ملامح وشها الحقيقى
مش كتير ممكن يقتدوا بصاحبتى انا عارفة البنات لانى منهم:)
بس انا عن نفسى عملت مقاطعة ومن زمن عن وضع اى نوع من انواع البويا حتى لو فى مناسبة ( ماحنا فى المجتمع دا محللين البويا فى المناسبات عشان يمكن ربنا يعدلها واللا حاجة:) مش كدا واللا اييييييييه

مستنية رأيكم فى المقاطعة دى... وياريت يبقى معاكم بوكيه ورد لانى هكون فى قسم العظام.. الكعب العالى دغدغ عضمى.. يرضيكو كدا؟

وياله من موريستااااان

ايوة موريستااااان ماللى شفته فى المواصلة اليتيمة الحيلة اللى بستخدمها لما بنزل القاهرة
الا وهى طبعا وبدون ادنى شك من غير دبابيس
'''متروووووو الأنفاااااااق'''
اسرع وسيلة للنقل تحت الانقاض.. قصدى تحت الارض اللى فوقيها شوارع جميلة ونظيفة ومبانى بتلمع من كتر الفخامة وعربيات بكل الاشكال والالوان منعا للعنصرية واللا الناس بقى ماقلكوش نماذج بشرية للنظام والاحتشام والاحترام تمشى على الارض.. مين اللى جاب سيرة انقاض هنا انا مش عارفه

(تبعنا المترو اللى فوق دا؟)

المهم ماطولش عليكو بقى وزى ماكلنا عارفين يامعشر مستقلى المترو ان عربيات الحريم يعنى النساء يعنى الويمين يعنى نون النسوة يعنى محدش يقرب المكان كله ملغم
ودا حصل اثر مشاغبة وقعت من شوية شباب حليوة كانو فى العربية الاولانية اللى المفروض يعنى انها للسيدات فقط بس طبعا لازم يكون فى بنى ادمين خارقين للطبيعة وركبوا في العربية دى ولما السواق اتنرفز من كتر الدوشة وانهم كل شوية يخبطو عليه ظبط المترو انه يقف لوحده وخرج لهم عشان يوريهم العين الدموية
المترو الذيذ عمل مقلب فى السواق وماوقفش فمكانه ودخل فى المحطة -اخر الخط حلوان معاك ياريس- وكسر الحيطان وكانت ماسأة متروهية
وعشان كدا نقلو النصف البشرى الرقيق الحساس الى منتصف المترو للابتعاد عن اى مصيبة تحصل تانى- لاقدر الله

دى اخوانى الاعزاء كانت الاخبار التفسيرية اللى سمعتها واليكم توابع هذه الحركة التنقليه بالتفصيل الممل...جداااا

دلوقت فات على الحدث دا حوالى شهرين بالتمام والكمال..وكل شوية الراجل المجدع بتاع التلافزيون يقول ياخوانا عربيات السيدااااات اصبحت فى منتصف القطاااااار... تنبيه سماعى
وعلى العربيات دى مكتوب الاولى بالاخضر لحد التاسعة مساءاً والتانية بالاحمر يعنى تحذيير هااااام دى ال24 ساعة سيدااااات فقططط... تنبيه بصرى
وعساكر واقفة عند حدود العربيات اللى رايح واللى جاى يقولوله وسعلك سكة كدا ياعم المكان دا متكهرب.. تنبيه امنى
وافتكر يعنى ان الناس مافقدتش الحواس اللى عندها فجأة عشان تحصل البلاوى اللى بشوفها او بسمعها دى


نقول بقى عاللى حصل..وبيحصل..وافتكر انه هيستمر فى الحدوث
<< 1- كنت انا وصاحبتى رايحين نعمل شووبينج وشافت الراجل داخل عربية السيدات معانا ودى اسبهلت.. معقولة يعنى مش شايف العربية..طيب ازاى راجل يركب عربية السيدات ..دى مكتوبة للسيدات فقط..وجاتلها كريزة ضحك
ياعينى يابنتى يمكن جاية من كوكب تانى وانا معملتش حسابى

2- المحطة زحمة جدا وكل ماييجى مترو الاقى العربية بتاعتنا كلها رجالة ونازلين منشكحين اوى.. دى للرجالة بس هع هع
ونص ساعة على ماعرفت اركب بعد ماواحدة راحت جابت عسكرى شكله كان واخدله تعسيلة وسايب الدنيا عجة


3- لما ركبت المترو اخيرا وفتحت كلام مع زميلتى فى المترو اللى اول مرة اشوفها..الصراحة بيعملو واجب مفيش بعد كدا..مابيبطلوش كلام
حكتلى حكايتين يقطعوا القلب بصراحة

الاولى واحد راكب عربية السيدات وشوية رجالة معاه يعنى الراجل مش لوحده
واحدة اتبرعت وقالتله لو سمحت العربية دى للسيدات بس
راح ضاربها وقالها انا اركب على مزاجى
والبت ياعينى سكتت ومابقتش عارفه تعمل ايه..واالناس بقوا يقولوا عيب كدا وهو ابداااا انا محدش يكلمنى بالطريقة دى
دا على ماسمعت يعنى من هذه الزميلة الفاضلة

تانى واحدة انه مرة راجل كبير فى السن وشكله غلبان اوى واحدة قومته وقالتله دى عربية السيدات بس وخللته ينزل عشان هى تقعد مكانه
دا برضو على ماسمعت

زميلة تانية خااالص قالت انو مرة واحدة ضربت راجل بالشوز لما تطاول عليها وغلس اوى يعنى

4- انا بقى جاية اركب فيوم لقيت ستات نازلة وعمالة تكمل خناقة اظاهر انها كانت مشتعله قبل كدا بس المرادى مع ستات برضو
ليييييييييييه بقاااااااااااا.. اقولكم لييييييه

علشان كان فى رجالة فى العربية لما انا ركبت وواحدة ماللى راكبين قالتلو ايه..اكيد حفظتو بقى..ايوة شاطرين...لو سمحت دى عربية السيدات فقطططط.. بس اظاهر كدا والله اعلم ان الراجل تنح وغلس معاها لييييييه.. لان لبسها غير محتشم...والللى اتخانقت معاها كانت بتقولها انها مش محترمة فلبسها اساسا عشان كدا الرجالة مش راضية تسمعلها
والخناقة كانت شايطة اوى لدرجة بعدها واحدة زعقت اوى لراجل كان طالع العربية والراجل ياعينى اتنطر من مكانه ومن كتر الخضة الباب كان هايقفل عليه لولا لحق يفلفص وينفد بجلده

هنا بقى المشكلة لاتكمن فى وجود رجالة
المشكلة هنا حضرات المستشارين.. فى سلوك البنى ادمين

يعنى ايش عرف الانسة واللا المدام ان الانسة دى مسلمة
بالطريقة دى هتكره المسلمين واللى يجيب سيرتهم.. لانه انا كمان ماحضرتش الواقعة من اولها وماعرفش بالظبط ايه اللى اتقال بس واضح انها غلطت فيها كتير
ولو كانت مسلمة يبقى مافتكرش بالاسلوب دا ممكن تفكر انها تغير من نفسها طالما شايفة انه الملتزمات فى اللبس بيتكلمو بالطريقة دى
والحق يتقال البنت طريقتها وسلوكها متحضر جدا وكان كل اللى تقصده انها تفهم الناس دى ان فى حاجة اسمها نظام وان دا مش مكانهم
يبقى ليه نغلط فى الناس ونحكم عليهم بالمظهر وكماااان ننتقدها علنى قدام باقى الزملاء الركاب

ياجماعة انا كلامى هنا بغض النظر بقى الناس لابسة ايه واللا بتاكل ايه واللا بتسمع ايه

ليه بنتعامل بالطريقة دى
ليه بنكره الناس فينا
ليه مصممين كل واحد فينا انه مفيش حد احسن منه وطالما الشكل تمام وعال العال يبقى اكيد انا من جوايا كويس اوى واكتفينا لحد كدا

كل اللى حصل دا من مجرد لخبطة فى روتين الناس كانت متعودة عليه ولما اتغير لحد دلوقت فى مشاكل وخناقات علشان خاطر عربيتين فى المترو

امال بقى لو نظام الدولة اتغير
واللا نظام الدعم اتغير
واللا نظام التعليم اتغير
واللا نظام امريكا اتغير
واللا نظام الكون اتغير

افتكر حتى لو الحاجات دى اتغيرت للاحسن برضو هنتلخبط ومش هنكون مرتاحين
ماحنا كدا دايما.. ماتهنش علينا العشرة.. حتى لو مع النكد

وشكرن... والسلام عليكم

تحيا مصر حرة مستقلة

عدى ياليلة ...عدى ياليلة ...عدى ياليلة

وقد عدت الليلة العصيبة ياإخوانى الاحباء ... وها قد اتى الابطال يحملون النصر فوق اكتافهم


هاهم الفراعنة اعزائى المشاهدين يقودون بلدهم الغالى مصر نحو العزة والنصر والفخر والازدهار والانطلاق نحو مستقبل مشرق شمسه آمنة غير ضارة على البشرة وتغنى عن استعمال الصن بلوك

دى كانت مقدمة لتلفزيون البلاعة المحلى والتفاصيل السطر اللى جاى

انا تقريباً يعنى معلوماتى عن الكورة انها كائن جمادى مدور ابيض فى اسود بس اليومين دول بقى يتعمله نيو لوكات كتير
بس الصراحة اول مايكون فى ماتشات للمنتخب بينقح عليا عرق الوطنية بقى ولازم اتابع الاخبار واتفرج وابقى على اعصابى وادعى ربنا انه مايحصليش حاجة مالماتشات دى

واحلى حاجة انك تحس العيلة كلها متجمعة على هدف واحد وهو الفرجة عالماتش وتشجيع مصر.. مهمها اختلفت الاعمار والتوجهات السياسية والطبيخية

يعنى مثلا اختى رسمت علم مصر وعلقته عالباب بيهفهف مع الهوا
واخويا كتب يقول..لاتقوللى دروجبا ولا ايتو الحضرى مين يهدو
ابو تريكة يامزيكا
زيدان+ ابو تريكة= الكاس
وانا من عندى اضيف
حسن شحاتة يامعلم خللى الشبكة تتكلم
ياليالى ياليالى ياليالى والحضرى السد العالى

ياسلام علينا اساتذة فى الشعارات والتأليف وبالذات فى الكورة تلاقى مواهب بصحيح
إلا السد العالى دى.. خلاص الحضرى بقى سد مصر المنيع يعنى لو فى اعتداء غاشم على الوطن هنجيب الحضرى يقف عالحدود عشان يسد مرمى مصر ويتلقى القنابل والمدافع والنووى

كنت مرة راكبة تويوتا.. وسيلة مواصلات حوالى 15 راكب.. وبعدين كان فى ماشت شغال بين مصر وأحد الفرق مش فاكرة مين والناس عمالة تقول للسواق بسرعة شوية يااسطى عاوزين نلحق الماتش.. وهو يقولهم الطريق واقف ياخوانا قدام شوية وهتقولو ياريتنا ماركبنا اساسا.. وانا وبكل هدوء حطيت سماعات النوبايل وشغلت نجوم اف ام .. ولقيت المذيع بيقول مبروك ياجماعة مصر جابت جون وبقينا واحد صفر

قلت طب والله كويس لما افرح بقى الرجالة اللى راكبه دى.. كنت راكبة انا وبنوتة جنب السواق وقلتلها قوليله اننا جبنا جون.. وبعدين قلت هو انا مليش لسان يعنى.. فقمت وبكل شجاعة وقلتله احنا جبنا جون ياسطى مبروك.. وهو رايح متكفل بالباقى وقال للناس.. احنا جبنا جون

وهما طبعا فاكرينها اوشاعة ومش مصدقين لانه السواق ماكنش عارف يجيب اذاعة مشغلة الماتش وانا عملت فيها فذلوكة وقلت ابقى انا المعلق الرياضى .. والناس ماصدقتش اساسا وكل شوية عشان الطريق واقف يخللو السواق يهدى شوية ويسألو اى حد عشان يتأكدوا.. وفعلا كان فى جون واتكبسوا.. بس احلى حاجة بقى السواق.. بيقول هو ماتش ايه دا اساسا

بصراحة كان بطل اليوم دا.. معقولة سواق ملوش فى الكورة.. راجل مصرى وطنى ملوش فى الكورة.. دا لدرجة انو الناس كانت عاوزة تنزل وتروح تركب التويوتا اللى سواقها مشغل الراديو على الماتش.. عالم دماغ بجد

فماتش النهائى بقى طبعا استعدينالو نفسيا واكليا.. انا على اعصابى من اول اليوم..واخويا راح جاب لب وسودانى وماما عملت مهبلبية واستعدينا وكله تمام

وطبعا كل اللى شاف الماتش اكيد كان مجهز جنبه الاسعافات الاولية وانبوبة اوكسجين احتياطى
وانا بقى قمت عملت شاى عشان ابلع بيه السودانى وكل مالاقى سوداناية محروقة اقول لا دا كاميرونى مش هكولها..وانا اساسا مش بحب السودانى المحروق

وماما كل مالكورة تقرب مالجون تقول بسم الله الرحمن الرحيم يارب يامسهل.. وفمرة كان الجون دا بتاعنا وهى من شدة الاعصاب مش واخدة بالها..اخويا يقولها هو اى كورة تقرب عالجون تدعى.. دا الجون دا هيدخل فينا .. طبعا ماما زى معظم المصريات ملهاش فى البتنجان الكروى بس عاوزة تفرح بجون مصرى وخلاص

اهم حاجة انه عدى من غير ضربات الجزاء..ماخبيش عليكم انا المرة اللى فاتت فى النهائى قعدت اعيييط وطلعت بره لحد ماطمنت خلاص ان احنا اللى كسبنا.. المرادى بقولهم دا لو حامل فى الشهر التانى زمانها ولدت

بس انا سمعت فعلا انه فى واحدة معرفتش توصل للمستشفى من زحمة الشوارع تانى يوم لما كان المنتخب الوطنى بتاعنا راجع بالسلامة ووضعت النونو فى العربية
وان واحدة داسو عليها وكسروا رجلها
وان واحد مات ففيصل
وان حاجات كتيرة فى الشوارع اتكسرت

هو احنا مانعرفش نعمل حاجة ابدا بنظام وعقلانية شوية
فى المظاهرات بنخرب الدنيا
وفى الفرح برضو بنخرب الدنيا
هنبطل الهمجية دى امتى مش عارفه
دى بقت خلاص سمة من سمات الشعب المصرى

ياللا انا مش عاوزة احرق دمى ولادمكو وخللينا كدا فرحانين كام يوم قبل مانفوق من غيبوبة الفرح دى ونرجع للنكد تانى

انا فعلا فرحانة اوى عشان فزنا بصرف النظر انها كورة يعنى ولا بنينا ناطحة سحاب ولا عالم جديد من عندنا اخد جايزة نوبل

بس كان فى روح جميلة اوى بينهم ومنظر الجون اللى جبناه دا مش هنساه ابدا
كان فيه ارادة بجد واصرار غير عادى ان الكورة دى هتدخل المرمى يعنى هتدخل المرمى
بقيت اشبهها بحالنا دلوقت ليه كلنا مانبقاش عندنا الاصرار دا اننا ندخل اهدافنا اللى فى الحياة جوه عقولنا ونصر على اننا نحققها


وكمان فكرت فيها اننا كعرب فرحنا اوى كل الناس فرحو معانا وعلشانا فكل العالم اساسا
لأ وكمان الجوايز المادية والحج لكل افراد اسرة كل لاعب
والخرافى اللى اتبرع بمليون دولار
والناس اللى اقل مبلغ دفعوه بالمليون
علشان المنتخب المصرى
هما تعبوا اوى واطحنوا ويستحقوا
بس
انا ليه مش بشوف كدا لو فى ناس محتاجة فعلا
ليه مش بشوف كدا لو بلد محتاجة وما اكترهم

ليه مانتفقش على اهداف لينا كعرب اننا نحققها
واهمها طبعا اننا نرجع البلد المسروقة مننا ونساعد شعبها انه يقوم على رجليه

ليه مش بيحصل كدا غير فى الكورة وبس

انا فرحانة اوى عشان الكاس
وزعلانة اوى عشان عقلنا تايه

ومبروك لمصر


الصور دى من منتدى فلسطينى كاتبين فيه تهنئة بفوز المنتخب المصرى

**تحديييييييييييث**

اغنية شااادية الرااائعة.. لفيت عليها وكعوب الكيبورد دابت بس الحمدلله وصلتلها
اللى عاوز يحملها هدية منى بمناسبة انها بتفكرنا بمصر
اللى مش طايق البلد يحمل ويسمعها
:)
دووووووس هناااااااا