Friday, August 22, 2008

هذا هو الموجز.. واول حاجة فيه.. وحشتونى جدااا

السلاااااااااااااااااااام عليكممممممممممم
ايوة هى انا صرصارة.. مش مصدقة نفسى انى فاتحة المدونة بكتب بوست جديد

يااااااااااااااااه الدنيا دى مابتديش الواحد كل حاجة... كان نفسى ابقى معاكم كل يوم واتابعكم دايما واعرف ايه الجديد معاكم وفى الدنيا كلها
انا اساسا لو اطول اكتب كلمة مدونة جنب الجنسية فى البطاقة هعملها


واحب افرحكم واقولكم اولا انى اشتغلت يامينزززز الحمدلله .. وطبعا الشغلانة فى القاهرة تحديدا مصر الجديدة يعنى المنوفية طلعت اوت برضو ادعولى ان ربنا يوفقنى فيه لان بلدى واقفة فزورى برضو عشان خاطر المسافة والمواصلات

يعنى انا داخلة على منعطف تاريخى واحتمال يكون مطب واتكعبل فيه بس الحاجة اللى مصبرانى انى هكون فى القاهرة مركز الاحداث ومركز التدوين يعنى ان شاء الله لو قدرت انى احضر اى مقابلة ليكم زى حفلة توقيع العدد التانى من كتابنا اللى هتكون بكرة
وانا ان شاء الله هاحضر... ياااااااااااه بجد ماتتصوروش مفتقدة كل حاجة فى التدوين
انا قلت اكتب البوست دا اسلم عليكو واهو بالمرة اعلقلى شوية على حاجات حصلت..انا مش عارفه سبت نفسى مالكتابة كل دا ازاى.. مع انى فى بوستات مكتوبة وجاهز عالنشر بس حتى مالقيتش فرصة انى ادوس على زرار
publish

ماعلينا
اول حاجة فى الاحداث البلدية المحلية.. قانون المرور واللى بسببه قعد السواقين فى البيت وباعوا عربياتهم واحنا بقينا نتنشق على عربية حنطور ولو فى عربية الحمدلله بقو يتأمرو علينا ويسيبونا ملطوعين عالموقف.. نفسى افهم ليه

الحدث اللى بعده.. حريق مجلسى الشعب والشورى بصراحة الجملة دى حكمة فعلا: ومن اعمالكم سلط عليكم... مش هى صح كدا واللا ايه
وفى اعتقادى ان حد من النواب الافاضل كان مولع سيجار او بيشرب شيشة بس كان نعسان شويتين تلاتة فساب السوجارة لحد ماوقعت وشبكت فى الكراسى اللى حواليها وطبعا بم ان باقى النواب الافاضل برضو كانوا نايمين فامحدش حس بيهم

ياللا اهو كله فى سبيل الوطن

والحدث التانى بقى وهو حدث رياضى دورة الالعاب الاولمبية
الصين بصراحة اثبتت انها تضرب باقى بلدان العالم بال... وتقعد مطرح اجدعها تخين فيها واعتقد ان اللى اتكبسوا كتير اوى ومصر كالعادة عمالة تنفخ فى الفراعنة لحد ماهايطيروا ويرجعولنا بالزيرو.. بس خير تقريبا خدنا كام ميدالية

والاحداث الخارجية
سمعت ان روسيا مولعة الدنيا بس للاسف معرفتش تفاصيل.. اهم حاجة انى الاقى مرتبة السرير وانام
بس امريكا ام قلب حنين عرضت على مش عارفه مين كدا قولو معايا انها تبعتلهم درع مسلح قوى من الجنود الامريكان وهما ماصدقوا وفرحوا اوى وكان ناقص يبوسوا ايد عمنا بوش.. باسته عقربه

والحدث الفنى والادبى بقى وفاة اوكسجين الانتفاضة والقضية الفلسطينية.. الراجل اللى عيشنا معاه مأساة شعبه وكافح عنه لاخر يوم فعمره ربنا يرحمك ياشاعرنا الكبير.. محمود درويش مش هيتعوض بجد.. ومش اى حد نقدر نقول عليه انه مش هيتعوض:(

فى مجال الفنون بقى فيلم احمد حلمى ... عيطنى لانه بيكلم النفس اللى جوه كل واحد.. يمكن لانى زيه بتخيل ناس على طول وبكلمهم.. انا عندى انفصاااااااام:) الراجل دا عبقرى ماشاء الله واهم حاجة ان افلامه نضيفه لو عرفت ادخل الفيلم دا تانى هدخله

وبالنسبة اللاغانى.. المطربين دول يروحو ينامو احسن
محمد منير واغنيته كان فاضل هى الوحيدة اللى فيها حاجة .. هى ايه مش عارفه:)


اه وبالمناسبة رحت حديقة الازهر مرتين.. ماشاء الله تحفة رائعة.. ياريت بس تفضل عالجمال والنظام اللى هى فيه
انا صورت كتير اوى وهبقى انزل الصور فى اقرب وقت ان شاء الله لانها جميلة وهتعجبكم واتمنى اللى مارحش هناك يروح

ياللا ادينى عملت كوكتيل منعش فى الحر دا
انا عارفه انها اخبار قديمة بس معلش انا اللى اتأخرت فى الكتابة

وقبل الختام طبعا أهنى جمييييييييع اهلى المدونين برمضان وربنا يجعله شهر خير ويرزقنا فيه بالصيام والقيام وصالح الاعمال


وياربت ياريت ياريت الناس ماتمثلش على بعض عشان خاطر انهم فرمضان.. يعنى نخللي دايما معاملاتنا مع بعض باحترام وبذوق
واللى متغاظ ومفروس من حاجة يحاول انه يكون هادى.. الناس مالهاش ذنب
وياريت كمان اللى نفسه يتخانق يبقى يجيب عضاضه يطلع فيها غله
وياريت بقى الكلام دا كله مايبقاش فرمضان بس لانه عيب اوى اننا نكون ملايكة لمدة تلاتين يوم وبعدين نقلب تانى 360 درجة
مش عارفة احنا بنضحك على مين بالظبط
يارب الناس تفهم ان كل الشهور واحد وان رمضان مميز عنهم لانه اوكازيون للحسنات وسباق لاعمال الخير.. دا غير طبعا قمر الدين حبيبى.. فى حد بيبحب ياكله من الكيس زى حلاتى:)

بس كل الحاجات دى برضو طول السنة.. يااااااريت كلنا نفهم كدا
وانا عارفه ان فى ناس كتير زيى نفسهم ان البلد دى تتغير وناسها تبقى احسن
ربنا يصلح الحال
اشوفكم على خير ويارب كلكم تكونو موجودين فى الحفلة بكرة ان شاء الله

18 بعبر ياشعب:

بنت الصالحين said...

وانتي كمان وحشتينا اوي ياساسو

ربنا يكرمك يارب وييسرلك امورك كلها

وان شاء الله ابقي اعرف منك الجديد بقي

:))

بلغنا الله واياكِ رمضان

ماتغيبيش تاني

دكتور حر said...

حمدالله عالسلامه

بوست يدوخ

لكن ممتع

واضح انك متابعه جيده

وبعدين المنايفة لازم يوزعوا خبراتهم عالقطر كله

حقهم علينا

وانا كمان شغال في مصر الجديده

واللهم بلغنا رمضان

فاتيما said...

حمدلله ع السلامة يا ستى

الطائر الحزين said...

مبروك الشغل
وكل عام انت بخير

мσнη∂ιš said...

اخص اخص اخص ع الرذالة و الصياعة، كده تشتغلي و متدينيش و لا حتا رنة، أنا زعلان منك يا بت يا صرصاره، أنا عايز الربع جنيه بتاعي حالا، بس ماشي نعديهالك المرة دية و ألف مبروك ع الشغلانة الجديدة

صاحب المضيفة said...

حمد لله على السلامة يا صرصارة هانم


وشكلك صحيح متابعة جيدة للأحداث


منتظرين جديدك على طول


ورمضان كريم

عصفور المدينة said...

مبروك يا سارة وحمدا لله على السلامة
وربنا يكرمك وتاخدي الجنسية
:)

خالد كامل said...

مبروك على الشغل
و بجد سعيد انى اتعرفت عليكى النهاردة فى حفل التوقيع
و ان شاء الله لما أفوق من غيبوبة النوم اللى عندى دى هبقى أخد لفة فى البلوج أبص على اللى فات
تحياتى ليكى
سلام

Anonymous said...

حمد الله على السلامة و مبروك الشغل :)
و قمر الدين أساسى يتاكل من اللفة ماما ما بتلحقش تعمله عصير مننا :)))))
كل سنة و انت طيبة و يجعله فى ميزان حسناتك ان شاء الله

مهندس مصري بيحب مصر said...

عاااااااااااااااااا
انا مليش دعوة
إهئ
أنا كنت عايز أحضر الحفلة
:(
دا انا عقبال ما أرجع في الأجازة السنة الجاية حيكون فاتني كتير قوي
الف حمد لله على سلامتك
بالنسبة لمصر الجديدة ربنا يجعل شغلك الجديد ده فاتحة خير عليكي
بالنسبة لروسيا حاجة بسيطة كانت كاسحة جورجيا اللي هزرت معاها هزار بايخ بس اللي يهزر يستحمل نتيجة هزاره
إنما أمريكا عايزة تحط قواعد صواريخ إعتراضية - مضادة للصواريخ العابرة للقارات - و بيسموها الدرع الصاروخية
عايزة تحط منها في بلوندا و روسيا قالت لو اتحطت حنعتبرها تهديد لنا و حنضربها بالنووي
بس يا ستي آدي كل الحكاية
شفتي انا في السعودية بس متابع برضه
:)

mostafa rayan said...

فرحان اني اتعرفت عليكي في الساقية
مبروك الشغل ورحم الله عمنا محمود درويش
بالنسبة لفيلم حلمي هو مش لوحده في واحد عبقري اسمه ايمن بهجت قمر كتب السيناريو الجامد دة وكمان في مخرج جامد اخرجه وكل باقي فريق العمل
تحياتي ليكي

خمسة فضفضة said...

السلام عليكم ورحمة الله وبركاته

حمد الله علي السلامه ياساره ايه يا بنتي الغيبه الطويله دي

كل سنة وانت طيبه وارجعي بقي نوري البلوجسبوت

سلام

Ahmad Hegab said...

welcome back We Ramdan Kariim

(احمد سكر ) said...

ماشى ياصرصوره

بوست لذيذ

ومهضووم

تحياتى

سكر

غروب said...

يا اهلا يا اهلا ....اول زياره ليه وفي حجات كتير لفتت نظرى اولها طبعااااااا ان اسمك على اسمي ..

ثانيا موضوع قمر الدين ....متتصوريش بحبه اد ايه بس مش من الكيس لا يتعمل عصير الاول بشربه ف رمضان وغير رمضان ومحدش بيقدر يمد ايده عليه غيري والا هو عارف مصيره

ثالثا: دمك خفيف وطريقتك ف الحكى حلوه وادعيلي احصلك ف الشغل نفسي انزح على قاهره المعز للاقامه بها ...صحيح المنصوره بلدى ام الدنيا والقاهره يااما بكيت فيها من الاحرج خصوصا ف ركوب المترو لكن برضه هى الام:

عموما بيناونى دلوقتى عشان الغدا هكلمك تانى لما اقرا البلوج كله

باى سمسم بلاش ساسو لانها بتاعتى فاهمه ولالالالالالالالالالاهاااااااااا؟؟؟؟؟؟؟؟؟

شفـقــة و إحســــان said...

انتى اسلوبك حلو اوى جدا خالص
بس ازاى احنا ما شوفكيش فى الحفلة
لا المرة اللى جاية لازم نتعرف عليكى

ToOoKa said...

السلام عليكم ورحمة الله وبركاته

مبروووووووووووووووك
وكل سنه وانتى طيبه يا جميل

وشدى حيلك فى رمضان
ويارب يارب يارب اسمع عنك كل خير

أختك توكا

šσяšαяαα said...

اشكركم اشكركم اشكركم

كل الحبايب اللى زارونى
وكل الناس الجميلة اللى اتعرفت عليها حديثا

وكل الناس اللى لسا ماتعرفتش عليهم

انا حاسة انى مش بغيب

انا هعيط:)

ورمضان كريم عليكم جميعاااا