وسط البلد
وجمال وسط البلد
وسحر وسط البلد
عملالنا عمل دى واللا ايه
انا بعشقها بكل اللى فيها
لما بروح هناك مش بحب اسيب المكان ابدا وافضل ماشية فيها كدا هائمة على وجهى
كنت هناك فى اواخر العام الماضى وكالعادة طبعا الاماكن الساحرة بالنسبالى لازم القطلها كام صورة قبل ماسيبها
هى الصور على ادنا شوية بس اللى قدرت القطه
الصورة دى من قدام جروبى
اول واخر مرة اتعرف عليه مالداخل
التفاصيل بعد الصور:)
ودى على مااعتقد
ناصية من نواصى ميدان طلعت حرب امال هتكون ايه يعنى
:)
دى بقى انا حبيت اجيب صورة لعمارة من العمارات الموجودة هناك
بجد بحس انها تحف فنية معماية
وكمان كان فى واحدة سايحة بتاخدلها صور
قلت اشمعنى انا يعنى
المصرى اولى بجدران عماراته:)
كان قدامها عربيات امن مركزى وقريبتى قالتلى لو اتقفشتى ماعرفكيش:)
ايه يعنى كأنى صحفياية وبعمل ريبورتاج
ـــــــــــــــــــــــــــــ
نييجى بقى لكابتن جروبى اللى لم يخل فيلم من كلاسيكيات السنما المصرية الا وجاب سيرته
وافتكر دلوقت فيلم لاسماعيل يس
الووووه.. جاروبى..ايوة ياجاروبى
معاكو العمدة عبد الرحيم كابير الراحيميه جيبلى
ومعاها ضربة عصاية على الارض للتحية
المهم يعنى ماطولش عليكو احنا قلنا ندخل ونشربلنا حاجة فجاروبى التاريخى الاثرى
طلبنا اتنين نيسكافيه..جابوا اللبن والسكر والنيسكافيه ناشف كل حاجة لوحدها
هما متخاصمين واللا ايه
قريبتى ماعجبهاش الحال وقالتله طيب غيره لكابتشينو.. اهو مشروب غلبان ومكوناته مش بتتخانق زى النيسكافيه
المهم جابلنا الفنجان وشكله عامل زى مايكون قاطعينه من صورة وجايبينه
شربنا وجينا ندفع الحساب
لقينا الواحد منهم بحوالى11 جنيه
يعنى اساسا محطوط فطبق ومتنكر فشكل فنجان
وطعمه زى مية بقهوة
وعصرنا على نفسنا لمون الارض كله وشربناه
ويبقى سعره كدا
المشكله مش فى السعر..يمكن علشان المكان سياحى والناس اللى فيه من كل شكل ولون والواحد شاف العجب فيه اساسا
كفاية الستات اللى شكلهم مدامات كبيرة ولبسهم محترم جدا ومحجبات وقاعدين بيشربو سجاير عااادى جدا
يمكن جايين هنا مخصوص علشان كدا.. مش عارفه البلد دى جرالها ايه..دا جنان والله
طيب لو قلنا حتى الواحد بعشرين جنيه ماشى بس هو يستاهل..لازم تحديد السعر دا يقابله جودة كمان فى المنتج
انا بقول كدا لانى انا وقريبتى قارننا مكان موجود فى جرين بلازا باليكس
مكان صغنون وقدامه كراسى ومعمول بشكل شيك جدا وتسمع موسيقى جميلة وهادية
انا طلبت فيه قهوة امريكى لانى مالقيتش قهوة تركى مشروبى المفضل من القهوة
فقلت اجرب دا وجابلى مج ولا برج القاهرة وقهوة متفلترة كمان
وقريبتى اخدت كابتشينو بالكريمة تقريبا وقالتلى ان طعمها جميل
وانا كمان قهوتى كانت تحفة والحساب كان كام
15 جنيه بس.. والله ماصدقناش وقلنا هنييجى هنا على طول..كفاية المكان
دا كان من فترة قبل ماننزل مصر ونتشرف بجاروببى
رغيت كالعادة كتير وكلامى فاضى انا عارفه بس من فرستى
يعنى مش علشان الاسم مشهور يبقى نستغله ونقدم المنتجات بجودة اقل
انا بتكلم بشكل عام..المفروض نحسن مش نطنش
هو كان كابتشينو اه بس حتى لو كوباية مية المفروض نخللى بالنا ونراعى العملاء
كنت ناوية ابقى زبون
إنسى ياجاروبى
وجمال وسط البلد
وسحر وسط البلد
عملالنا عمل دى واللا ايه
انا بعشقها بكل اللى فيها
لما بروح هناك مش بحب اسيب المكان ابدا وافضل ماشية فيها كدا هائمة على وجهى
كنت هناك فى اواخر العام الماضى وكالعادة طبعا الاماكن الساحرة بالنسبالى لازم القطلها كام صورة قبل ماسيبها
هى الصور على ادنا شوية بس اللى قدرت القطه
الصورة دى من قدام جروبىاول واخر مرة اتعرف عليه مالداخل
التفاصيل بعد الصور:)
ودى على مااعتقد
ناصية من نواصى ميدان طلعت حرب امال هتكون ايه يعنى
:)
دى بقى انا حبيت اجيب صورة لعمارة من العمارات الموجودة هناك
بجد بحس انها تحف فنية معماية
وكمان كان فى واحدة سايحة بتاخدلها صور
قلت اشمعنى انا يعنى
المصرى اولى بجدران عماراته:)
كان قدامها عربيات امن مركزى وقريبتى قالتلى لو اتقفشتى ماعرفكيش:)
ايه يعنى كأنى صحفياية وبعمل ريبورتاج
ـــــــــــــــــــــــــــــ
نييجى بقى لكابتن جروبى اللى لم يخل فيلم من كلاسيكيات السنما المصرية الا وجاب سيرته
وافتكر دلوقت فيلم لاسماعيل يس
الووووه.. جاروبى..ايوة ياجاروبى
معاكو العمدة عبد الرحيم كابير الراحيميه جيبلى
ومعاها ضربة عصاية على الارض للتحية
المهم يعنى ماطولش عليكو احنا قلنا ندخل ونشربلنا حاجة فجاروبى التاريخى الاثرى
طلبنا اتنين نيسكافيه..جابوا اللبن والسكر والنيسكافيه ناشف كل حاجة لوحدها
هما متخاصمين واللا ايه
قريبتى ماعجبهاش الحال وقالتله طيب غيره لكابتشينو.. اهو مشروب غلبان ومكوناته مش بتتخانق زى النيسكافيه
المهم جابلنا الفنجان وشكله عامل زى مايكون قاطعينه من صورة وجايبينه
شربنا وجينا ندفع الحساب
لقينا الواحد منهم بحوالى11 جنيه
يعنى اساسا محطوط فطبق ومتنكر فشكل فنجان
وطعمه زى مية بقهوة
وعصرنا على نفسنا لمون الارض كله وشربناه
ويبقى سعره كدا
المشكله مش فى السعر..يمكن علشان المكان سياحى والناس اللى فيه من كل شكل ولون والواحد شاف العجب فيه اساسا
كفاية الستات اللى شكلهم مدامات كبيرة ولبسهم محترم جدا ومحجبات وقاعدين بيشربو سجاير عااادى جدا
يمكن جايين هنا مخصوص علشان كدا.. مش عارفه البلد دى جرالها ايه..دا جنان والله
طيب لو قلنا حتى الواحد بعشرين جنيه ماشى بس هو يستاهل..لازم تحديد السعر دا يقابله جودة كمان فى المنتج
انا بقول كدا لانى انا وقريبتى قارننا مكان موجود فى جرين بلازا باليكس
مكان صغنون وقدامه كراسى ومعمول بشكل شيك جدا وتسمع موسيقى جميلة وهادية
انا طلبت فيه قهوة امريكى لانى مالقيتش قهوة تركى مشروبى المفضل من القهوة
فقلت اجرب دا وجابلى مج ولا برج القاهرة وقهوة متفلترة كمان
وقريبتى اخدت كابتشينو بالكريمة تقريبا وقالتلى ان طعمها جميل
وانا كمان قهوتى كانت تحفة والحساب كان كام
15 جنيه بس.. والله ماصدقناش وقلنا هنييجى هنا على طول..كفاية المكان
دا كان من فترة قبل ماننزل مصر ونتشرف بجاروببى
رغيت كالعادة كتير وكلامى فاضى انا عارفه بس من فرستى
يعنى مش علشان الاسم مشهور يبقى نستغله ونقدم المنتجات بجودة اقل
انا بتكلم بشكل عام..المفروض نحسن مش نطنش
هو كان كابتشينو اه بس حتى لو كوباية مية المفروض نخللى بالنا ونراعى العملاء
كنت ناوية ابقى زبون
إنسى ياجاروبى
46 بعبر ياشعب:
انا أول تعليق يا ساره ....هييييييه برافو عليا الموضوع شكله كده جامد بس هقراه واقولك الكومنننت يا صرصورتى الحلوة
ايه الجمال ده بجد يا صرصاره صور حلوه اشكريلنا الموبايل وكانت هتبقى أحلى لو المكان فاضى لكن هيهات هيهات دى الداون تاون برضو وعلى فكره أنا كمان بحب وسط البلد أووى خصوصا بعد العصر وبحب القاهرة كلها بالليل بعشقها يعنى دى العاصمة برضو يا جدعان
أما بالنسبة لعمك جروببى فهوا معروف عنه كده بس أكيد فى سوء إداره منهم وانهم حتى مش بيطورو فيه وتلاقى مفيش إقبال وبرضو مبيحاولوش يحركو ساكنا زى مبيقولو ما علينا إلا اننا نعمل بالمثل القائل " اللى تعرفه أحسن م اللى متعرفوش" وخلاص نبقى ف السليم ..ولا أيه؟؟؟
قهوه تركى
وقهوه امريكى
وكابتشينو
ونسكافيه
وجروبى
ايه ده ؟؟؟؟؟؟؟
كل ده فى البلاعه
وستات بتشرب سجاير وناقص كمان تشرب شيشه
دى مسخره
اما اقوم احط حته ولعه على النار علشان اشربلى حجر معسل قص البرج
السلام عليكم ورحمة الله وبركاته
هههههههههههههه
معلش يابنتي ، ذنبهم علي جمبهم هما اللي خسرانين
مش جروبي بس اللي بقي كده ، طيب شوفتي كنتاكي بقي عامل ازاي تروحي تلاقي الفراخ طعمها وحش جدا وريحتها لا تطاق وكلها دم ، بقالي اكتر من سنه ماروحتوش
عندك حق بقوا بيستغلوا شهرة المحلات وان الناس هاتيجي علي الاسم وبينسوا الجوده اللي المفروض تكون اهم حاجه
ولعلمك بقي تلاقي محلات تانيه صغيره وبتقدم خدمه وجوده احلي بكتير
عارفه المثل اللي بقول الصيت ولا الغني
اهي الناس بتاع جروبي وكنتاكي وغيرهم معتمدين علي كده
أكتب إليك هذا التعليق من منزلنا وأنا أشرب فنجان القهوة التركي الصباحي بتاعي تحت البطانية والذي تكلفته ربع جنيه
الناس دول رايحين يقعدوا شوية فبيدفعوا تمن القعدة انتي مشكلتك كنت عايزة تشربي حاجة بجد فخدتي بالك من الكلام ده
هو لازم القعدة بالمشاريب
ابقى اسألى بعد الكدة القعدة بكام والمشاريب بكام
وشوفى مين الارخص
لكا تلاقى القعدة ارخص ابقى هاتى الترمس معاكى
ولو لقيتى المشاريب ارخص ابقى هاتى شوية كراسى وافرشى ادام المحل
تحياتى
ههههههههههه تصدقي نزلت وسط البلد اكتر من ميه مره بدون مبالغه ومادخلتش المدعو جاروبي ده ولا مره
اغلب القعدات بتبقي في الامريكين او ام كلثوم
:)دي قهوه في الاخر عند الاسعاف
وسط البلد فعلا بتحسي فيه انك رجعتي خمسين سنه لورا
تحسي انك ماشيه وسط طرابيش من تاني:)
بس جروبي كده يرفع عليكي قضيه اساءه بالسمعه:)
معلش متاخره شويه بس والله لسه واخد بالي
كل سنه وانتي طيبه يا جميل وعقبال 2222 مش توينتي تو
وايه الموقع الاستراتيجي ده:)
يلا كمان كل سنه وانتي طيبه علشان اليوم ده بس
يارب السنه الجايه تبقي احلي عليكي وتحققي فيها كل احلامك
تحيااااااااااااااااااااااتي
شوف منظر مبانى زمان وجمالها وروعتها دى مرت عليها فو الميه سنه ولسه بتالقها وشموخها بتعبر عن المن الجميل والناس الجميله انا كمان من محبى وسط البلد جدا مع انى اقامتى الاساسيه مشفى القاهره بس انا باعشق وسط البلد وكبرى قصر النيل
وبعدين انى عايزة تقعدى فى جروبى وتتدفعى ااقل من كدة دة جروبى
اللى قعد فيه عبد الوهاب فى وعبد الحليم حافظ فى يوم من عمرى
انتى دخلتى التاريخ
هما الاسعار عندهم علشان شهرته مش مهم بقى تشربى ميه ولا شبه قهوة
المهم تتدفعى وخلاص
انبسط م البوست تخيلى حاسيت انى كنت معاكى
السلام عليكم
انا بس كنت عاوزه اقولك انك وحشتينى اوى والله ومعلش انتى عارفه الامتحانات يارب تخلص على خير
انا كنت عاوزه اطلب منك طلب وليكى حق القبول او الرفض
كنت عاوزه ايميلك
وطبعا مش حينع تكتبيه فى البلوج بس انتى ممكن تدخولى البلوج بتاعى وتكتبيه فى تعليق وهو مش حيظهر لانو انا عامله خاصية مافيش حاجة تتنشر غير لما اوافق عليها الاول
طبعا ليكى حق الرفض وصدقينى والله مش حزعل
بس حتى لو بعتى ايميلك انا مش حعرف اكلمك غير بعد الامتحانات ان شاء الله
وارجو النظر فى طلبى
اختك المحبه
ToOoOoOoOoOoOKa
تسلم ايديكى وتسلم صورك ياصرصوره انا بجد مبسوطه جدا للموضوع ده وياريت كلنا ندور على كل جميل قى بلدنا ونتكلم عنه ونبعد عن السلبيات اللى تقريبا كده والله اعلم فى ناس متخصصه انها تظهرها زى الفيلم الى انا لسه شايفاه دلوقتى فيم يعقوبيان وكان بيتكلم عن مساوئ البلد بس ومجابش سيره حاجه عدله فيها مش ممنك تكون دى بلدنا بس لان مصر مليانه حاجات جميله جدا وبجد الصور تحفه جدا وياريت تتحفينا دايما كده
عرض رايق
لكن اكتر حاجه بتضايقني
الواحدة اللي بتشرب سجاير
وخصوصا لما بتكون محجبة
ربنا يستر على ولايانا
مستجدة :
هلا مستجدة بأول تعليق عندى عموما وبالبوست دا خصوصا:)
وبعدين يابنتى هو الموبايل من غير نظرة فنية تصويرية هيبقى ليه قيمة
ومين طبعا مش بيحب القاهرة بالليييل بس هنفضل فيها لبليل ازاى:(
انا ياختى ماكنتش اعرف كدا عن جروبى انا كنت بعدى واسلم عليه من بعيد لبعيد
ومشكلتى انا بعكس المثل دا او تقدرى تقولى بحب اجرب دايما واشوف الجديد
هو كويس ساعات وغلس ساعات تانية زى ماحدث هنا بهذا البوست
وتحياتى ليكى
::::::::::::::::::::::::::::::::::::::::::::::::::::::::::
فرنسا هانم :
ايوة وممكن قهوة سعودى كمان
بس عندك تمر واللا نستورد نخلة مالسعودية:))
بس انا معرفش عن خالتو فرنسا انها بخيلة
بقى تولعى النار وتشربى حجر بحاله من غيرنا
انا عاوزاه بنكهة الاناناس لو سمحتى:)
خمسة فضفضة :
وعليكم السلااااام ورحمة الله وبركاااته
اتفضلو معانا الكابتشينو والله.. امال يعنى تنفقع مرارتى لوحدى:)
وكنتاكى معروف عنه كدا برضو هو اسم ومنظر وخلاص
انا قليل اوى ماباكل بره بس لو كدا ممكن اى مكان عادى يعنى مش لازم مشهور ومتسجل انه فايف ستارز
بس ماكدونالدز انا جربته كذا مرة وهو من المطاعم المشهورة اللى جودته ها يعنى بنت ناس برضو:)
اتمنى بس انهم مايفقلوش نايمين على ودانهم لانهم كدا اكيد بيخسروا ناس كتير
وتحياتى ليكى
::::::::::::::::::::::::::::::::::::::::::::::::::::::::::::
عصفور المدينة :
قهوة تركى...عااااااااااااا
طيب ممكن حضرتك تبعتلى فنجان عالبريد الدولى السريع:)
انا ياعينى غلابة وبيجيلى الضغط لما بشوف قدامى حال معووج
انا شفت احوااال وكل ذنبى انى كنت عاوزة اشرب حاجة سخنة
شربت مية ملونة وقعدة خنيقة كلها سجاير وجرسونات شكلهم من ايام القرن الحجرى
الطائر الحزين :
هههههههههههههههههههههههههه
دى بالمشاريب والمأكولات كمان
هناك فى فى المدخل جاتوه وحاجات تتاكل جنب المشروبات
لولا اننا كنا لسا جايبين من العبد ومجاش فدماغنا الموضوع دا كنا اخدنا منهم
حتى قريبتى قالتلى ماتاكليش منهم ممكن حد يغلس ويقلك خدى من هنا
قلتلها طيب عند بقى وهطلع ماللى جايبينه واكل وابلع بالمية الملونة اللى جايبينها دى
وبالفعل.. حد يقدر يتنفس اساسا:))
:::::::::::::::::::::::::::::::::::::::::::::::::::::::::
حصان بري :
ولا انا هى كانت المرة دى وبسسسس.. حتى هبقى اشوف شارع تانى امشى منه:))
وانا عارفه قهوة ام كلثوم ودخلتها مرة.. حسيت انى رجعت للزمن دا وانى بقيت معاهم
وبعدين مين دا اللى يرفع عليا قضيه
بس انتو خللو بلاعتى فى الامان كدا وربنا هيستر ان شاء الله:))
وولا يهمك يافندم..لسا الشهر مفتوح تقدر تهنى فأى يوم:))
وكل سنة وحضرتك طيب
رفقة عمر :
المبانى فعلا تحفة رائعة ماشاء الله
بتحسى بدفى وجمال غريب وانتى ماشية وسط المبانى دى
والمشكلة بقى فجروبى مش السعر .. هو مكان سياحى وعالمى ومفيش منه اتنين
انما الخدمة ليه بالشكل دا.. السعر مش هيفرق لو كانت الخدمة افضل
وطالما انبسطتى من البوست وحسيتى انك معايا يبقى ان شاء الله الخروجة الجاية تكونى معايا:)
::::::::::::::::::::::::::::::::::::::::::::::::::::::::::::
ToOoKa :
وعليكم السلاااااااام ورحمة الله
اهلاااااااا توكتى اخباراتك ايه
يارب تكونى ماشية تمام فى الامتحانات
وانتى كمان ليكى وحشة كبييييرة
انما يابنتى ايه الكلام دا كله.. كل دا عشان ايميلى
والله انا بعتبركم زى اخواتى وبقيتم جزء من عيلتى فعلا يعنى بكون سعيدة اوى لما ارغى معاكم كدا وكمان بقى عالايميل وتبقى حفلة:)
وطلبك تم يافندم وفى انتظارك وربنا يوفقك يااارب ونسمع عنك كل خير
baskota :
تسلميلى يارب يابسكوتى واهلا بيكى تانى معانا فمجتمعنا التدوينى:)
المشكلة فى الفيلم انو لو حد مش مصرى شافه هيقول ان دى مصر
انا بصراحة ماشفتش الفيلم بس كتير اشتكو منه انه بيسىء للبلد
ربنا يصلح الحال ونشوف بلدنا افضل من كدا
وربنا يخليكى ودايما منورانا
::::::::::::::::::::::::::::::::::::::::::::::::::::::::::
صاحب المضيفة :
ايوة فعلا الموضوع دا غايظنى اوى
طيب لو واحدة مش محجبة ماشى وللاسف برضو كان موجود منهم
انما سيدات زى اللى انا شفتهم بجد كانت بالنسبالى مأساة
مش عارفة انا ايه اللى ناقص فى البلد دى كمان يتعمل
وربنا يستر فعلا
:D
الصور جميلة
و المدونة جميلة
كل سنة و انتي طيبة عشان عيد ميلادك
سلام
----------
هو ايه اللي جاب كلمة الرافعي هنا ؟
ان لم تزد شيئا على الدنيا كنت انت زائدا عليها ؟
:D يعني هو انا هزود لما اعلق ؟
طيب :P
أولا باحييكي على الصور جدا لاني باعز التصوير جدا
ثانيا
انا عملت زيك وقلت مرة اروح اتشرف بعم جروبي
لاقيت الخدمة نيلة
والمكان متواضع
حاول اشم عبق التاريخ
ماشمتش غير التراب
والايس كريم اللي اخدته
لو اخدته على عربية في الشارع كان هيبقا الذ
وفي الاخر الحساب مش فاكر بكااام
قلت ما علينا
اهو برضه الواحد يموت وهوا شاف عم جروبي
وياخسارة يا جروبي
و الله شكلى كدة هابقى من الزوار المستديمين لمدونتك ..بصراحة الموضوع جميل و الصور رائعة.. أصل أنا من عشاق وسط البلد .. الميدان دة لوحده فيه مكتبتين كبار .. دار الشروق .. و مكتبة مدبولى
و بمناسبة جروبى .. و الله أنا سمعت - و العهدة على الراوى - إن كيلو "المارون جلاسيه" (ماعرفش مكتوبة صح و لا غلط) فى جروبى بربعميت جنيه
أنا والله ماعرف هو إيه المارون جلاسيه دة .. و مش عارف إذا كانوا بيقيسوه بالكيلو و لا بالمتر .. لكن اللى اعرفه هو إنى عمرى ما فكرت أشترى أكل تمنه ربعميت جنيه (دة لو كان المارون جلاسيه بيتاكل مش بيتبروز أو يتحنط) .. لكن و الله ممكن تضرب فى دماغى أعدى على جروبى أشترى لى أربعة جرام "مارون جلاسيه" عشان أحللهم ..أهو من باب العلم بالشىء.. و الحكمة ضالة المؤمن
حاجة تانية .. مافيش أجدع من كوباية شاى بالنعناع على قهوة بلدى شعبية .. تمن الكوباية بيبقى خمسة و سبعين قرش لو شاى عادى .. أما لو شاى ليبتون فتلة .. يبقى الموضوع مختلف .. و الكوباية بتبقى غالية .. بتبقى بجنيه
الحقيقه اول مره اجي مدونتك بس شكلها ظريفه وشكلك دمك خفيف .. وشكلي هتابع المدونه باستمرار .. ان شاء الله
الحقيقه انا وسط البلد بيمثل لي ذكريات كتير .. فيها الحلو وفيها الوحش
بس انا هتكلم على جزئية العمارات اللي هناك لاني بطبيعة شغلي باحب الجو ده وباحاول اني انفذ تحوير ليه بشكل معاصر
ولو هتكلم في نقطة العمارات والشكل الجمالي يبقى هتكلم مية سنه لاني بجد مقتنع ان منطقة وسط البلد وجاردن سيتي والمنيل القديمه من اكتر الطرز المعماريه حلاوة وشياكه
بخصوص جروبي .. انا عن نفسي لما بافكر اروح اي كافيه باحب اروح كوستا او بينوس .. وساعات سيلينترو .. انما جروبي والامريكين والحاجات دي مش داخله مزاجي
نصيحه .. روحي كوستا .. حاجاتهم حلوة واسعارهم معقوله والمكان نفسه شيك والناس كلها كويس
جربي ومنتظر تجربتك الجديده في كوستا
سلامووووووووووز
AbdElRaHmaN Ayyash :
ربنا يخليك يافندم وتسلم يارب من كل سوء
وحضرتك طيب وبصحة وسلامة
بعدين انا كاتبه ان لم تزد على الحياة
مش على التعليقات:))
بس طبعا تعليقاتكم تهمنى جدا..رأى العملاء دائما فى المقدمة:)
نورتنى واتمنى تكرر الزيارة
:::::::::::::::::::::::::::::::::::::::::::::::::::::
أُكتب بالرصاص :
يااااااااااااه عالغيبة
والله فرحت اوى لما حضرتك كتبت عندى.. ازى الصحة وازى الحال
والحمدلله ان الصور عجبتكم..على فكرة لو حضرتك كنت شفت البوستات اللى قبل كدا كان فيهم كذا موضوع فيه شوية صورة مش بطالين:)
وكويس ان حضرتك دخلت المكان .. كنت فاكرة ان انا الوحيدة اللى اتصدمت بالواقع دا:)
تحياتى لحضرتك ونورتنى
ابن حـجـر الـعـسـقـلانـى :
ههههههههههه انا فاكرة المارونج لاسيه دا كان فؤاد المهندس بيغني
ياحتة مارونج لاسيه والاسم تقريبا شوكولاته
والبنت العسولة اللى كانت معاه دى تقوله
شوكولاته اللاته كاوان لاته
هههههههههههههههههههه
وهذه هى معلوماتى عن الاخ مارونج
ولو الكيلو ب400 جنيه بقول اجيبلى حمام واطيره احسن:))
وفعلا مفيش اجدع من كوباية الشاى الشعبية :)))
ماله البيت مش عارفه..اعمل الشاى وبنعناع كمان:))
تحياتى ليك واتفضل الشاااااى:))
:::::::::::::::::::::::::::::::::::::::::::::::::::::::
Soooo said :
ان شاء الله استاذ سوووو..دايما بلاعتى مفتوحة لحضرتك فأى وقت:))
هو حضرتك مهندس معمارى؟
على اى حال هى تصميمات المبانى رائعة ماشاء الله
ربنا يبعد عنها عوامل الزمن:))
وان شاء الله لما انزل القاهرة اروح كوستا
هو معروف فعلا وانا شفته كتير بس مش دخلت هناك قبل كدا
وهبلغ حضرتك باخر الانباء
:))
تحياتى ونورتنى
البركة فى القليل الصراحة
بس دى جزاة اللى يروح جاروبى
مالها قهوة الحاج عتريس ؟؟
أم نص جنيه الكوباية
قعدة محترمة
و تسمعى الست أم كلثوم
يا سلاااااااااام
هو انا الصراحة مروحتش قهوة عتريس
و لا سمعت عنها قبل كدة
بس هى أحلى برضه
ههههههههههه
مش عارف ليه فى الأغلب الحاجة اللى بتكون غالية زيادة عن اللزوم مش بتبقى حلوة أصلا
ده حقيقى فى أغلب اللى بنشوفه
يمكن احنا عشان عارفين انها غالية فبنتوق انها فوق الخيال و بننصدم انها عادية جدا
او ان المكان نفسه بيبقى له حساب لوحده غير المشروب
و ده فى الأغلب
على العموم شكرا على الصور اللى حافظينها
و على التجربى الحلوة بتاعتك
سلامات
للأخت سارة
اللى مش صرصارة اطلاقا
جزاكم الله خيرا
د.حمـــــــاس
السلام عليكم
والله اظن انهم بيقتلوا كل حاجه حلوه تتعلق بالماضي وروعته واصالته كان في زمان جروبي وكان ايضا فيه عمرافندي وكان فيه حجات حلوه كتيره ماتت للاسف
هتسأليني هما مين اللي قتلوا؟
هقوليك معرفش
علي فكره انا برده بحب منطقه وسط البلد جدا جدا معرفش ليه برده
ربنا يستر ومتتحولش المنطقه بعد 10 سنين لجراج عربيات ولامجموعه فنادق للاجانب
ربنا يستر ونلاقي بلد نعيش فيها اصلا
وجزاكم الله خير
فى حركة دنيئة من موقع البلوجرز البلوجر يمنعنى من التدوين ويضع موقعى فى قائمة الحظر وممنوع اى تحديث فيها بحجة اننى من المواقع المزعجة وحسبى الله ونعم الوكيل
DR.HAMAS :
هى البركة فمفيش اى حاجة خالص احسن برضو اهو كله توفير:)
هههههههههههههههه بس قهوة عتريس دى اكيد اللى ففيلم نحن لانزرع الشوك:))
على فكرة الواحد مش متعود يروح اماكن مشهورة اوى عشان مجرد اسمها
كتير بتكون اماكن مش معروفة اوى زى التانيين بس فعلا زى مابتقول الخدمة بتكون افضل
الموضوع ان قريبتى كانت عاوزة تدخل جروبى.. اسكندرانية بقى مقدرش اقولها لا:))
بس هى حرمت اساسا وحتى قالتلى خسارة فيهم البقشيش:))
بس زعلتنى والله يعنى الصور حافظينها بس اكيد المكان مهما شفته برضو بيعجبك
واللا ايه
والعفو يادكتور ودايما منورنى كدا
::::::::::::::::::::::::::::::::::::::::::::::::::
الفاتح الجعفري :
وعليكم السلاااااام ورحمة الله وبركاته
ايوة فعلا هو دا اللى بقى يحصل للاسف:(
واللى قتلو الحاجات دى ناس يهمهم مصالحهم وبس
ومش مهم الارتباط التاريخى وانهم يزودو على المكان مش يهملوه
وكلامى بشكل عام ومثال كمان زى ماحضرتك قلته عمر افندى
وربنا يستر فعلا ويفضل المكان زى ماهو
بل وياريت يتطور للافضل كمان
وجزانا الله واياكم كل خير
نورتنى يافندم واتمنى تكرار الزيارة
طــــــــائر الحــــــــرية:
ازاى الكلام دا وليه طيب???:((
دا لسا الاستاذ عصفور المدينة كان بيحذر من الموضوع دا واننا نعمل مدونة بديله على موقع مختلف
ربنا يصلح الحال وتكون المشكلة خطأ غير مقصود
عارفة ياسارة انا بعدى كل اسبوع على جروبى مرة واحدة على الاقل
فكرت كتير انى ادخلة بس حسيت انى هشرب مقلب كبير فى حياتى
بعدى منة واروح اقعد على قهوة زهرة البستان
واشرب شاى وبجنية بس
واقعد اكتب لو معايا قلم وورق
او اقرا جرنال او اى حاجة
الا صحيح كان فى مينم تشارج فى جروبى ولا لا
ما شاء الله عليكى
بجد روحة حلوه
ربنا يحفظك يارب
بس المشكلة فى الزحمة دلوقتى الواحد ميعرفش يمشى فى مكان مش زى الأول
هههههههههههههه
عندك حق بجدددددد
عارفةةةةةةةةة انا رحت جروبى قبل كدة وحصل نفس الموقف بالظبط
وانا خارجة برضة قلت لة نفس الكلمة
انسى يا جروبى
انا اصلا بعشق الكافيهات جداا
وبحب اكتشف الجديد او اغير
وياما لاقيت حاجات مايعلم بيها الا الله
مالها كافيهات المطرية والمرج يعنى
الواحد بيقعد 3 ايام هناك فطار وغدا وعشا ب 10 جنية
نياااااههههاااا
روحى بقى جربى الامفتريون قصدى (المفتريون) بتاع مصر الجديدة
مرة من سنتين كدة اتجننت فى عقلى وقعدت هناك
وحصل نفس الحوار بالظبط
ودفعونى 60 ج فى كوكتيل حمضان عبارة عن جوافة بس وحاجة حمرة مجهولة التكوين وشربتة عافية + حتة كيك افشة فى بعضها تخبطها فى الحيطة ترد
هههههههههههه
كانت ايام بقى
تعالى انتى المطرية ومالكيش دعوة
هقعدك قاعدة ولا فى نيويورك
هعهعهعهعهع
.............
على فكرة انتى فهمتى البوست الاخير بتاعى مش صح
انا معرفتش اوضح اسفةةةةةةةة
خشى تانى شوفى التحديث وقوليلى رأيككككك
هستناكى
السلام عليكم
ازيك يا سارة
ايه يا بنتي اللي وداكي المكان دا....دا انا بخاف اعدي من جنبه اساساً
وجالك قلب يا مفترية تدفعي 11 جنيه في كوباية كبشتينوا (ايوة هو اسمه كابيشتينوا)...بس مش مشكلة
يكفيكي شرف التجربة...واهي حاجة تبقي تحكيها للناس في اي قاعدة
سلام
محمود الدوح :
ماهو موقعه استراتيجى يعنى هتشوفه هتشوفه
وكويس والله عملت طيب انك مادخلتش
انا دخلت وشربت المقلب بالنيابة عنك:)
لا انا مشفتش حكاية المنيمم تشارج دى
كفاية المنيمم اللى دفعناه:))
تحياتى ليك ونورتنى
::::::::::::::::::::::::::::::::::::::::::::::::::::
الحشرى :
ربنا يخلليك يافندم واهلا بيك فمدونتى
هى الزحمة مشكلة فعلا بس جمال المكان بينسى اى حاجة:))
تحياتى
مروة الزارع :
دانتى زى حالاتى تمام بتحبى التجارب المثيرة مع الكافيهات:))
بس مش عارفه مين المفتريون دى.. ياللا منك نستفيد
واووووكى انا جاااااااااى المطرية اهو استنيييينى:)
بس هاجى المدونة عندك الاول:)
::::::::::::::::::::::::::::::::::::::::::::::::::::::::
الراقص مع الذئاب :
وعليكم السلاااااام ورحمة الله وبركاته
هلا محمد انا تمام الحمدلله اخبارك انت ايه؟
نعمل ايه بقى اهو قلنا نشوف عمنا جاروبى من الداخل
وياريتنا مادخلنا:))
ياللا بقى اهو قرش كبشتينو يفوت ولاحد يموت
لا انا مش بحكى الحكاواى دى غير معاكو.. انتو اللى طلعت بيهم مالدنيا
اهىء اهىء
وكل كابشتينو وانت طيب:)
انا رحت جروبى مرة واحدة بس فى حياتى كان تقريبا من سنة ونص كدة
القاعدة كانت عجبانى كان عاجبنى الجو اللى بيفكرنى بايام زمان
لكن فعلا الجودة كانت مش ولابد
وانا بتفق معاكى ان فعلا وسط البلد بحس انها عملالى عمل بحبها اوى وبحب انزل اتمشى فيها واشوف الناس
كل سنة وانتى طيبة ياسورسارة
علشان عرفت من البوست اللى فات اك كملتى اتنين وعشرين سنة
وعقبال مية سنة يارب
سلام
اختك خيخة
عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم
العزيزة صرصارة
أولا أنا مكسوف جدا لتقصيري الشديد لكن في الحقيقة الفترة الماضية كنت مشغول أوي.. معلش سماح
ثانيا أشكرك كثيرا علي ترددك الدائم وتعقيباتك اللطيفة في مدونتي.
ثالثا البوست بتاعك ده جميل أوي.. زود الحنين والشوق اللي في قلبي للحبيبة أم الدنيا
أشكرك مرة تانية
ايه يابت ياساره ده ازاى وامتى وفين وليه
وحداشر جنيه يامفتريه
ليييييييييييييييييييييييه
كنتى تعالى عندى وانا اعملهال وهاخد منك تلاته جنيه بس ولا اقولك اتنين جنيه ونص بس
ليه ؟!! علشان عايزة اشترى من محل اى حاجه بتنين ونص
بس صورك رائعه ربنا يباركلك ياساره ويكرمك يارب
سلام ياقمر
بت خيخة وأى كلام :
خيخة عندنااااااا.. يامرحبا يامرحباااا
ياه شفتى سنة ونص ولسا فاكرة ان الخدمة مش كويسة هناك
مش عارفه انا الناس دى مش ناوية تفوق
وانتى طيبة وبصحة وسعادة دايما يارب
افتكر انك كابرى زيى:))
سلاااااام ونورتينى
::::::::::::::::::::::::::::::::::::::::::::::::::::::
نقطة مية :
انا شفت البوست عند صاحب البوابة وكان نفسى اشارك والله:(
على اى حال ربنا يوفقه يارب
وجزاك الله كل خير على مساندتك لاخونا العزيز
قنديل :
يااااااااهلاااااااااااا باستاذ قنديل
حمدلله عالسلامة والله انا فرحااانة اوى بزيارتك دى
وانا عارفه ان حضرتك مشغول ربنا يعينك يارب
بتشكرنى على ايه حضرتك عارف انا بعز مدونتك اوى
كفاية كانت من اوائل المدونات اللى عرفتها وحضرتك كنت دايما بتنورنى وبتشارك بتعليقاتك الجميلة واللى انا فعلا مفتقداها
والحمدلله ان البوست عجب حضرتك وربنا يرجعك لينا بألف سلامة
تحياتى ودمت بألف خير
:::::::::::::::::::::::::::::::::::::::::::::::::::::::::
عاشقه الفردوس :
هههههههههههه انتى ناوية تفتحى محل كل حاجة باتنين ونص وتعالى بص:)))
ههههههههههههه ماشى انا جاااااااااااى
شكلى كدا مش هشوف بيتك اساسا
يخرب بيت الفقر:))
وتسلم ياجميل على كلامك دا ولكى ايضا هذا الدعاء
سلااااااااااااام
أوباااا
مالك بقى ومال وسط البلد
تعرفى
انا عملى على بعد خطوات من الصورة بتاعة جروبى
فى شارع قصر النيل
وانا بعشق وسط البلد جدا جدا
والبانر عندى لقطة فى وسط البلد
طيب بالمناسبة
يوم الخميس
فى مكتبة البلد فى شارع محمد محمود
افتتاح موقع دار الكتب
مع الزميل الاخ مصطفى الحسينى
ياريت تشرفى
كل سنة وانتى طيبة
وربنا يكرمك ويبعد عنك البيرسول :) رخامة
أحمد الصباغ
كل سنه وانتم طيبين
وحبيت أعزمكم على حفل افتتاح دار الكتب بتاعت صاحب البوابه , زميلنا البلوجرى الفظيع
ودا هايكون يوم الخميس 10 يناير الساعه 6 مساءا فى مكتبة البلد , 31 شارع محمد محمود بالتحرير
عاوزين تواجد مكثف هناك
مستنيينكواااااااااااا
Ahmed Al-Sabbagh :
مالى ازاى .. دانا روحى هناك اساسا:) المكان دا له سحر خاص غير عادى
وبالنسبة للموضوع الافتتاح انا نفسى والله احضر بس المشكلة فى الوقت
:(
هحاول وربنا ييسر الحال واقدر اجى
تحياتى لحضرتك ونورتنى فبلاعتى المتواضعة:)
وكل سنة وحضرتك طيب
::::::::::::::::::::::::::::::::::::::::::::::::::::::::::
وينكى :
وانتى طيبة ياونكوكا
لا وانتى كمان بتساعدى فى الاعلان
ماشى ياستى ربنا يكرمك ويجزيكى كل خير
ادعى بس انى اقدر اجى
سلااااااااام
جروبي
فكرتيني بالذي مضى
اول موعد مع ابو العيال اخدني وقعدني عند جروبي وقعدنا في كنبة بني وانتي داخلاه كدة على شمال قليلا في الوش وقالي تشربي ايه وكنا الساعة عشرة صباحا ياستي فطلبت شاي
جالنا الشاي ومعاه طبقين جاتوه محترمين بجد بس والله لا قربتله ولا هو قربله والنهاية اخدوه بحاله وانا هعيط من جوايا ودفع زوجي المسكين كام 35 جنيه ودة كان من 8 سنين تقريباواصل دة شاي كمبليت ومرة تانية اخدنا عصير لمون وبرده بالغصب طبقين حلويات فرنسية كدة حاجة مسح زور برده نفس الفلوس بس اكلناهم بقى بس لو سمحتلي الفرصة هروح اصل زوجي بيحب القاعدة على كنبتهم لما عيطت على الجاتوه قالي ولا يهمك القاعدة على الكنبة دي بالفلوس مصرنا حلوة اوي والله
عام هجري مبارك عليك ياام دم زي السكروعلى فكرة انا عندي شقة قريبة من هناك عند مسرة كدة اما تيجي تروحي قوليلي وانا استناكي
nonoymm :
والله هو المكان فيه عبق التاريخ اه بس فيه اهمال غير عادى
وبإذن الله لما انزل مصر اقولك ونتقابل
نورتينى واتمنى تكرار الزيارة
انتي جيتي على الجرح والله
انتي عارفة ان من الاساسيات اللي أعملها اول ما انزل مصر لازم انزل اتمشى في شارع طلعت حرب
و متعتي اقعد في جروبي و اتغدى هناك طبق الفيليه مع الخضار السوتيه و احلي بالايس كريم اللي محطوط في الاطباق الاستانلس اللي المعلقة هيا نفسها اللي كان بياكل فيها عبد الحليم
و افضل اتفرج على اللي رايح و اللي جاي, متتحامليش على جروبي بس هو المشروبات عنده فاششلة شوية
بحس فعلا في وسط البلد اني قاعد في وسط منطقة تاريخية كلها اثار بجد
بوست يجنن
تعيشوا وتاخدوا غيرها دانا اروح اعمل كابتشينو للحارة كلها ب22 جنيه
وانا على رأى عادل إمام مقبلش فى الموضوع ده اقل من عشلاين جنيه و600جنيه ضرائب شكلهم دفعكوا الضرائب بتاع المحل
اه بالحق لبسوكوا العمة مختوش فواتير
لا غلطانين
ههههههههههههه
طبعا لازم فى أى مكان الخدمة الجيدة مقابلها اى مبلغ بس اهم حاجة تكون خدمة على مستوى مش عشان رايح اقعد فى مكان اسم بس والأخر الاقى الخدمة أى كلام اعمل ايه باسم المكان ينصرف فين ده وهى دى مصر
Post a Comment