ايييييييه...ولا حد عارف ربنا بيرزق الواحد بالتخاريف دى منين
كلها مصادفات بحتيه..يعنى انا وبصافى نية كنت بهنى اخوانى الاعزاء بافتتاح مدونتهم الجديدة(انظر البوست اللى قبل كدا)
الاقى وبقدرة قادر يتحول الموضوع لمناقشة حول:- هى ايه الكورة دى؟؟؟؟
وليه الاهتمام اللى ملوش لازمة بيها دا؟!؟!؟!؟
وازاى البنات تشجع النوعية دى من الرياضة.. او يمكن الرياضة عموما
(على العلم بإن خبرتى فى الكورة انها لما بترن فى الشبكة بقوول جووووووووون)
وبصرف النظر برضو عن الموضة اللى طالعة البنات فيها بالهتافات فى الملاعب والضرب على الطبول ولبس العلم لزوم الانتماء الوطنى وعشان ايه نتعصب ونتخانق على بتاعة ملهاش لازمة
بصرف النظر برضو عن المعارك الضارية اللى بتحصل بين جبهة الاهلى وجبهة الزمالك المعادية
(هى مش كلها مصر فى الاخر واللا انا اللى مش واخده بالى)
طيب بلاش الكورة احسن بتجيب حساسية
ليه هربانين من الواقع المرير الاليم المهبب وداخلين هنا نكتب شعر وخواطر وروايات ومواقف مرينا بيها
او بننتقد حال مش عاجبنا بشكل ساخروسايبين المواضيع اللى اهم من كدا فى حياتنا وراكنينها عالرف
سايبين الموضوعية والجدية والحماسة وحرقة الدم فى سبيل نصرة الحق وتحيا الثورة وياعزيز ياعزيز كبة تاخد الانجليز
سايبين السياسية اللى صارت جزء لايتجزأ من حياتنا سواء شئنا ام لا
سايبين الكلام عن احوال الاسلام والمسلمين اللى بيتم اضطهادهمفى جميع انحاء الكرة الارضية واصبح هرم الاسلام الشامخ مقلوب
بعد ماكان بأعلى قمته ولايخفى عليكم الاسباب
سايبين الكلام عن اوضاع بلادنا الداخلية واللخبطة اللى بقينا فيها ولاعارفين اذا كانت البلد بتتقدم بينا زى ما إعلامنا المبجل مابيقول
واللا البلد بترجع بينا الى عصر ما قبل اكتشاف الحجارة
طيب انتو ايه رأيكو فى واحد بيفطر جرايد محشية بالتقارير عن اوضاعنا الداخلية من رشاوى وغش وعمارات بتقع
ومخدرات بتتوزع زى علب الشوكولاته وجرايم قتل وسرقة و و و و و
بعدين يرجع البيت يتغدى على ساوند تراكس من زعيق للمدام ودوشة للاتفال وخناقات للجيران
ونييجى بقى عالعشا نلاقى نشرة اخبارمحبشة بالحرب فى العراق وعليها تسبيكة قتل الفلسطنيين فبعضهم مع خلطة من تفجيرات لبنان والمجاعات فى افريقيا....ألخ ألخ
طيب بزمتكو تدو للراجل دا مدة صلاحية اد ايه وبعدها يتكل من الدنيا؟
انا برأيى لو منه وعايشة كل يوم فى الموال دا ياسيب القارة بحالها واروح انتراكتيكا استجملى يومين مع البييرز القطبية
ياانتحر بطبق مهلبية عليه صوص فنيك مركز
انا كل سطر ماللى كتبته يلزمه بوست مخصوص وعارفة يمكن كله اتلخبط فبعضه ومحدش عارف انا عاوزة اتكلم عن ايه اساسا
:Dاللهم طولك ياروووح).. دا واحد بيقرا البوست وشكله مش طايقنى)
-:طيييييييب خلاصة التهييس اللى فوق دا
عاوزة اخد رأيكو هل احنا فوسط كل المشاكل والبلاوى دى لما نحاول ناخد نفس عميق ونستجم شوية
نسمع اغانى...نشوف مسرحية تضحكنا...نتفرج على ماتش كورة...نفتح مدونات ترفيهية
هل لما نسيب ولو لجزء من اليوم الهموم اللى مغرقانا ونحاول نخرج من الكبت دا نبقى هايفين...مش غيورين على حال بلدنا... مش عاوزين نتحمل المسؤلية؟؟؟؟
بجد عاوزاكو تتحاورو معايا حوار صريح جدا جدا وهيسعدنى مشاركتكم
34 بعبر ياشعب:
الموضوع جامد فعلا جدا...
ممممم
بصى هو انا برايي ان التهيس مطلوب..
لان لو الواحد فضل طول يومه زى مانت كاتبه فى البوست..مش هيقدر يكمل حياته..وهيتخنق من كتر الضغوط...
هو المهم انه يبقى عارف انه بيهيس.. مش بس عشان يهيس..لا عشان لما يرجع لمسئوليته وشغله اللى واجب عليه يرجعله وهو مفضى شحنه من اللى جواه..
وهنا بقى تختلف صور التهييس
فى ناس تهيسها انها تسمع اغانى هابطه..وناس تهيسها انها تشجع الكورة وتلون وشها وبيب بيب اهلى..
وناس تهيسها تخريفى زى وزىك كده.
:)
وناس تهيسها انها ترسم..وغيره وغيره...
يعنى من الاخر التهييس مطلوب جدا..بس المهم مايطغيش على الواجبات..
لكن للاسف مش كل الناس تقدر تفهم كده...
بصي يا ستي
أنا مع تخاريف في اللي قالته، بس فيه مشكلة صغنتته
التوازن
لازم الانسان يبقى متوازن في كل أحواله، يعني لا يبقى نكدي على طول الخط، ولا يبقى مهيساتي دايما
الضياع اللي موجود في الشارع، والتخبط .. سببه الرئيسي ان الشباب بيهرب من مشكلاته بالتهييس، طبعا ده مطلوب، بس لو زاد عن اللزوم بيولد شخصية لا تعي شيئا عن كثير من الأمور الهامة في حياتها
واحدة صاحبتي مثلا لما سألتها أيام حرب لبنان فين سوريا.. قالتلي جنب السودان
التهييس مطلوب بس بشرط الحفاظ على الوعي و الهوية
وبعد اذنكم هاروح اهيس شوية
:)
السلام عليكم
كان مفروض اكون تاني تعليق بس الجهاز بقي منه لله
بالنسبه للاهلي
فانا من اشد المشجعيين للاهلي
وبحب الاهلي قوي قوي
هتساليني والانتماء ده ايه سببه انا معرفش
بحبه لله في لله
----------------------
الهروب من الواقع اوقات بيكون اسلوب لحياة
بس المواجهه مهمه
لكن مش في كل الاوقات
يعني في مواجهات بتسبب مصادمات
والواحد يموت بعدها
يبقي يعيش مهيس ولا يموت فطيس؟
جاوبي بقي
اللهم ما طولك يا روح
انا طبعا توهن من الكورة للجرايد للمخدرات للبييرز اللي في القطب الشمالي
انا حاسس ان الشعب كله بقى تايه و احنا تايهين و الحكومة متوهانا
و الاهم ان احنا اتعودنا خلاص على التوهان ده
كل واحد بقى يقول فيا اللي مكفيني
و سيبك انتي من كل التوهان ده ----الواضح بس في الموضوع البوست الهايل ده
سلاماتي
هو ده الواقع اللي لازم يتغير مع اني مؤمن تماما ان الواقع ده لان يتغير بسولة بس تهييس جامد
بصي يا سرسارة
وصلي عالنبي كده وإسمعيني كويس
صليتي عالنبي.. طب زيدي النبي صلاة
الموضوع يا ستي خايب وعبيط بس قوليلي الأول هو الأهلي هيلعب إمتي
ولا بلاش مش وقته خلينا في موضوعنا عشان منتوهشي .. علي فكرة قبل ما أنسي إنتي سمعتي الألبوم الجديد بتاع تامر.. حلو موت مش كده.. الواد ده جامد أوي زي أبوتريكة كده.. ما علينا.. نكمل كلامنا للكلام ياخدنا وننسي المهم.. بصي يا ستي صلي بينا عالنبي.. معلش صلي تاني مش هيحصل حاجة يعني ..إحنا شعب يحب الضحك والهزار والفرفشة حتي في عز الكرب لازم نضحك.. بمناسبة الضحك شفتي آخر فيلم لهنيدي.. مسخرة.. أنا شفته مرتين وعايز أشوفه تالت.. المهم القصة وما فيها عشان نقصر في الكلام إننا بطبعنا بالنا طويل ونشيل جبال ولا يهمنا نلعب ونهزر آآه لكن وقت الجد بنبقي حاجة تانية بنعمل المستحيل.. بالمناسبة بتقري قصص رجل المستحيل وملف المستقبل والحاجات دي.. تصدقي أنا معرفشي أنام إلا لما أقرا قصة وساعات إتنين طب هقولك حاجة مش هتصدقيها أنا ليه واحد صاحبي لازم يقرا مجلة ميكي قبل ما ينام.. واد أد الشحط بس عنده من مجلدات إكوام إكوام إكوام.. هو إحنا كنا بنقول إيه.. آآه إفتكرت.. أنا مش عايز أطول عليكي شكلك كده زهقتي من الكلام ولا إيه.. بصي نكمل كلامنا ده بعدين.. تعالي بأه دلوقتي نلعب بلاي ستيشن عندي لعبة لسه جايبها طازة هتعجبك أوي..
----------------------------------
وهكذا يا بنتي هو ده حالنا.. وهي دي حياتنا وكلامنا.. شعب للأسف هايف .. الناس بره بتنافس بض عشان يكون ليهم الريادة وإحنا في الضياع.. مش عايزك تزعلي إن فيه ناس ضد الكورة والطرب والفن هما معذورين خايفين محبطين ومحروق دمهم علي حالنا.. طبعا التنفيس مطلوب والتهييس مطلوب بس أنا واحد من الناس حاسس إننا بنهيس وبس إلا من رحم ربي.. وعارف إن فيه كتير مثقفين وواعيين وبيحسبوها كويس لكن للأسف المغيبين والجهلاء أكتر بكتير
آسف للإطالة لكن أهو ده برضه شئ من التنفيس أشكرك إنك فتحتيه بموضوعك العميق ده
دمتي بخير
هوا للاسف احنا ما بنعملش اى حاجه بجد
حتى تهييسنا علشان كده ما فيش نتيجه صح
ولا شغل صح ولا تهييس صح
استنى له بس كل ده يا خبر عشان ايه يا لهوى طب ماشى خلاص اتفقنا خلاص هات انت العده وتعالى اتفرج على ياااه نست طب اوكى حلوة حته اللحمة دى طيب خلاص ها ماشى
تهييييييس بقى
السلام عليكم ورحمة الله وبركاته
ايه الكلام الجامد ده يا صورصارتي ، شكلك كده كنتي واخدالك نفسين بيروسول قبل ماتكتبي البوست ده
شوفي يا ستي ، الراجل ده اللي انت حكيتي عنه ، وللي يومه مليان مصايب من اول ما يصحي لحد ما ينام ،
اذا ما فصلش شويه في النص ان شاء الله حتي ربع ساعه ياخد فيها نفسه ، ويطلع شويه من مود البلاوي والكوارث اللي هوه فيه ده اكيد ومؤكد هايحصله حاجه
فعشان يقدر يواصل لازم يفصل شويه دي حتي التلاجه بتفصل ......ودي حاجه طبيعيه مع كل الناس الطبيعيين
في ناس بقي مش بتفصل شويه ، لا دي بتركن كده علي طول ويستحلوا التهييس اللي بيبقوا فيه ويفضلوا مغيبين عن الواقع من حواليهم ، ودي بتبقي طريقه من طرقهم للهروب من المشاكل بدل ما يواجهوها ويحاولوا يحلوها،
وساعات بيعملوا كده لانهم مش بيبقوا قادرين يحلوا مشاكلهم دي
وهي دي بقي الحاله المرضيه
العينه دي بقي في منها كتير اوي اليومين دول ،والناس نتاج الظروف المهببه اللي احنا عايشين فيها واللي مش خافيه طبعا علي حد
تحياتي
A little bit of relief from time to time is necessary to get through all these troubles and chaos.
Football is a kind of venting since most of the people share this interest and hence...it's a mutual topic to discuss and enjoy!
السلام عليكم
هو انا اروح الجيش وامشي ارجع الاقي الحجات الجامدة ديه
ايه يا بنتي الحلاوة ديه
مع ان الوقت ضيق اوي بس بجد انا ركزت اوي في موضوعك وقراته اكتر من مرة
بجد ربنا يكرمك وينير بصيرتك يا سارة
علي فكرة انا كنت محتاج حاجة زي كدا
انا في غيبوبة ومعرفش ايه اللي بيحصل ومش متابع اي حاجة
يعني رجعت عرفت حجات خلتني اتمني إني اعيش علي طول زي ما انا عايش
كل اللي بيشغلني وبفكر فيه يومي بس اعديه ازاي....
والدنيا بره مليانة هموم ومصايب
اللهم خفف عنا واصلح احوالنا
دمتي في خير اختي الكريمة
صرصارة ارجووووووكي ارجوووووووكي ارجووووووكي ابعتيلي صورة الصرصار اللطيف اللي كنتي حاطاها قبل كده جمب اسمك في المدونة بدل الدبدوب دا ارجوووووووكي
ابعتيهالي على hanazain@hotmail.com
سوسو
أدعوك للمشاركة في استطلاع راي
اكثر 10 مدونات تاثيرا في قرائها
عل مدونتك واحدة منهم
http://6ef.blogspot.com/
صورصارتى هاتى بوسه
بجد البوست جامد جدا
وتقريبا دا نفس فكرتى فى ردى على بوست كان كاتبه مدون محمد فوزى وكان بيتكلم اننا المفروض نفيد ونستفيد من التدوين وكان ردى شويه مشابه لفكرتك
انا معاكى جدا ان التدوين بيكون تنفيسس عن كل اللى بنشوفه فى حياتنا ومن اخبار نسمعها وان مش المفروض ان التدويت يتحول ابدا لمساحات نكتب فيها مقالات واخبار لان دا موجود اوردى على النت بالعبيط
ومن حقنا اننا نبقى احنا ولو لجزء بسيط من اليوم
احنا بهزرنا بفرحنا بحزنا بعيد عن مشاكل الحياه اللى محوطانا
انا دى رأى
مع احترامى لباقى وجهات النظر الاخرى
""""""""""""""""""""""""""""""""""
دا بوست الاخ محمد فوزى للى عايز يقراه
http://ensangded.blogspot.com/2007/06/blog-post_18.html
بصى يا ستى، موضوعك جميل و شاغلنى بجد، بس بيتهيئلى ان التهييس واجب و مفروض علشان المرارة ما تتفقعش و العمر الافتراضى ما يخلصش بسرعة، بس المهم انه ما يبقاش حياتنا ،طيب و حياتنا نعمل فيها إيه ؟ و الله ما عارفة ... ما هو اللى بيتكلم و بيعمل بيتضرب و بيتاخد على دماغه و بيودوه ياخد حمام شمس من المصدر الرئيسى، و لو ما اتكلمش و كبت فى نفسه يا اما هيموت يا اما يطلعه فى شكل التهييس ده، يمكن التهييس ده هو اللى بيفكرنا بفايدة حياتنا الأساسية، يمكن هو اللى بيشحن طاقتنا علشان نستمر فى الحياة، بصى بقى ... أنا مش عارفة
بالعكس انا شايف ان الترويح مطلوب عشان نعرف نتعامل مع الهموم العامه و الشخصيه و الغرق في الهم يخلي الواحد يكتئب و ميعرفش الحل تقفل معاه يعني فعشان كده الترويح عن النفس مطلوب جدااا ..
تحياتي
تخاريف:
كلام سليم وفعلا احسن حاجه الاعتدال فى كل شىء بنعمله
واتمنى ان الناس تاخد بالها بجد
تحياتى لتخاريفك:)
::::::::::::::::::::::::::::::::::::::::::::::::::::::
egyptian:
انت لخصت الكلام فكلمة واحده
التـــــــــــــــوازن
هى دى
والهروب فى الزمن دا ممكن بس مش هروب بلا عودة
وبجد كارثة انه توصل بينا حالة اللا وعى لدرجة الجهل بابسط الاشياء
واتفضل باب التهييس مفتوح :))
::::::::::::::::::::::::::::::::::::::::::::::::::::
mohand:
كل الاهلاوية بيحبو الاهلى..يمكن عشان هو الحاجة الوحيدة
اللى فى البلد دى ناصفانا شوية
وبتسرى عنا
ونهيس نهيس بس نعيش ونخللى عقلنا فى حالة استعداد دائم للعمل:)
s h a h :
مش قلتلكو هنلاقى جماهير كرهتنى فى البوست دا:)
والف سلامة عليك من التوهان.. هو توهان اه لكن لابد منه:))
واللى عنده اصرار بجد انه يغير الحالة دى هيغيرها
سلامات وسعدت بمرورك
:::::::::::::::::::::::::::::::::::::::::::::::
ابراهيم عز الدين:
بإذن الله لو صممنا اننا غيره هيتغير بس نبدأ بنفسنا قبل اى حد
شكرا ليك وشرفتنى
:::::::::::::::::::::::::::::::::::::::::::::::::
قنديل:
ادينا بصينا ياعم قنديل
وصلينا على النبى الف مرة..احلى حاجة بصراحة
جزاك الله خيرا:)
الاهلى هيلعب يوم مايكون فى ماتش ان شاء الله:)
والالبون جامد طحن
وفعلا احلى النكت بتكون على البلاوى اللى احنا عايشين فيها:)
وهنيدى بقى ظريف اوى بصراحة
نديلة الجايزة الاولى فى التهييس:)
وانا على فكرة من عشاق ملف المستقبل ومجلة ميكى وعلاء الدين
ومش غريبة انه كتير لسا بيقرا الحاجات دى
وحكاية البلاى محطة دا انا مليش فيه..اخرى سوليتير:D
بعدين هزعل من ايه واللا على ايه..على رأيك كله محروووق دمه
وحتى لو كلامنا مش عقلانى اوى زى المثقفين والناس الجامدة دى
لكن احسن بجد من الكتم جوانا
وبجد تعليقك اسعدنى جداااا:)
والشكر لله ياسيدى..احنا فى الخدعه دايما
تحياتى ودمت بألف خير
khaled:
طمعها صح الصح
بريزيدن:D
::::::::::::::::::::::::::::::::::::::::::::::::::::
3abdo me7tas:
لحمة راس
فته كوارع
شربة خضار
توابع التهييس:D
::::::::::::::::::::::::::::::::::::::::::::::::::::
خمسة فضفضة:
وعليكم السلاااااام ورحمة الله
اها فضفوضتى هو البيروسول بس الجرعة شكلها كانت زايدة
وكلامك كله سليم وتمام ومظبوط ومية ومية :)
عارفة حكاية الراجل دا فكرتنى بمسرحية المتزوجون لما كان بيحكى على صاحبه الصامت الصامد:)
اللى بعدها ربنا مايوريكو اللى جراله:D
وربنا يسترها معانا بجد
تحياتى ليكى
hurricane_x:
and i am glad u enjoyed my topic:))
by the way..which football team u join?:D
::::::::::::::::::::::::::::::::::::::::::::::::::
الدانسـر مع الوولفز:D
وعليكم السلااااام ورحمة الله
(اتفضلو الشاى:D)
ربنا يخليك بجد يامحمد ويوفقك لكل خير
انا مكنتش متوقعة ان الناس تهتم بالموضوع وتحب تشارك فيه بالشكل دا
الحمد لله تخاريفى ساعات بيبقى ليها لازمة:))
وبجد ربنا بيحبك انك فعالم تانى منفصل عن المصايب دى
وامين يارب تخفف عنا وتصلحلنا الحال
تحياتى اخى الكريم ودمت بألف خير
::::::::::::::::::::::::::::::::::::::::::::::::::
hana zain:
انا بعتها ياعسولى ولو مش وصلت ابقى شوفيها فى
ال junk mail
منة الله:
نروح نستطلع وماله:))
شكرا ليكى ياعسولى
:::::::::::::::::::::::::::::::::::::::::::::::::::
رينـــــــــــا:
اهلاااااا رنوووونى
بجد تعليقك اسعدنى جدا لانه حسيت مش انا لوحدى اللى بناقش الموضوع دا
وان شاء الله اشوف موضوع الاخ محمد فوزى واتشرف بمدونته
تحياتى ياعسولى
:::::::::::::::::::::::::::::::::::::::::::::::::::
بيقولو سايكو:
دا كدا مش هياخد شاور
دا هيسيح اساسا ويتعبى فعلب:))
ومش عارفة ليه بس يابنتى ماكلامك زى الفل اهه:)
تحياتى ونورتينى
::::::::::::::::::::::::::::::::::::::::::::::::
انتظار مؤقت:
ايوة ونجيب مروحه عشان الترويح يبقى شغااااال على طوووول
universal :D
وربنا يكفينا شر الاكتئاب
تحياتى ليك
مساؤو تهييس
بصي يا صرصاره
معتقدش ان الواحد سنفع يقضي حياته كلها جد في جد
عشان لو عمل كده هيتحول لأله
او نظام روتيني بحت
لازم نهييس
و كل واحد حر يهييس ازاي
المهم ان التهييس يبقي في حدود اللياقه و الأحترام للذات قبل الآخرين
تحياتي
بصي يا استاذه
اولا حكايه الكورة مافيهاش خناق لأن احنا اصلا مش فالحين فيها لما يبقى الزمالك والاهلي دول فريقين ايه ما شاء الله فريق عالمي نبقى نتكلم ونقول الاول على العالم بينافس التاني ونعد نتخانق بس انا مع اني مشجعه للاهلي الا ان الفريق في مساوئ كتييييييييير
اولها ان احنا بنقول انه فريق محترف طب ليه بد=ل هو فريق محترف بيعد ياخد كل اللاعيبه الحرفين في الفرق التانيه طب مايدرب هو فريقه ويخليهم احسن
لكن هو مش بياخد بالسياسه دي هو بياخد ان اللي معاه فلوس ياخد كل حاجه اللاعيبه والجماهير وكله بقا
اما حكايه السياسه والتوهان اللي احنا فيه اعتقد ان احنا اللي بايدنا نفوق من الغيبوبه الطويله اللي احنا خدناها احنا نمنا كتييييييير اووي مافيش مشكله ان احنا نهزر ونلعب بس خلاص في حدود احنا وصلنا لأسوء حاجه بقينا الاسوء في كل حاجه
لو عدتهم مش هخلص
بس طبعا مافيش مشكله في التهييس زي مالكل عايز
بجد بجد بوست يجنن و الله فكرته كانت فى دماغى من فترة .. باين عليكى قارئة افكار ..
شوفى يا ستى .. التهييس دلوقتى لابد منه و الا كلنا هنضرب رسمى لان ماااافيش فايده .. فالاحسن الهروب للكورة و الاغانى و التخاريف
على فكرة انا متابعة كتاباتك على طول بس الكمبيوتر عندى مش مساعدنى
سلم اديكى ياريت تنورينى بالزيارة
حوريه
nadiataha.maktoobblog.com
مررت لألقي السلام
:)
تحياتي اختاة
احنا شعب فاشل
بلا هويه
و لاعقل و لا ضمير
احنا أسوء الشعوب اخلاق
نحيا فى ذلنا و فشلنا نقتل بعضا بعضا
نجوع
و نجوع
و نترك القطط السمان
و عندما نثور
نقتل الاقباط
و عندما نثور
نلعن الاهلى و الزمالك
و عندمانثور
نلعن هيفا و دينا
العرى عرينا و ليته عرى جسدى
عندنا عرى اخلاقى و عرى انسانى
احنا فشله
السلام عليكم
انا اهلاويه بالوراثه
بصى بقى حكايه الكوره ديه واهلى وزمالك وكلام من ده
عشان ديه الحاجه الواحيده اللى نقدر نتكلم فيها من غير ما اللى بالى بالك يقولوا لنا انتوا عايزين ايه
يمكن تسميه نوع من الهروب
او اى حاجه الواحد يهتم بيها عشان يقدر يحس ان فى اى حاجه من حقنا
انا معاكي مع التهيس طبعا
بس مش في كل وقت
هقولك ساعات الواحد بيحس انه هيموت خلاص من كتر الخنقه ومش قادر يستحمل وساعنها بيلاقي نفسه بيهيس من غير وعي
وبيني وبينك دا بيخفف كتير جدا جدا من علي كاهل الانسان
حلوه كاهل دي؟
هههههههههههههههههههه
تسلم ايدك يا قمر
واسفه عي التأخير
ماهو بصى بقا مع احترامى لكلام سيادك وليكن ما يكون .. هو مين عمل ايه بقا عشان انا كمان مهيسة بقالى كتير كدة
يلا خير ان شاء الله
اهلا بيكى فى نادى التهييس العالمى
أريااااال أرياااااااااال أووو أووو
•«ρяoιd»•™:
ايوة هنبقى آله ونتحرك بالريموت :))
وفعلا ان عندنا حرية وانطلاق فى التهييس بس زى ماقلت لازم يكون فى حدود
اللياقة والاحترام لينا ولغيرنا
تحياتى ليك
:::::::::::::::::::::::::::::::::::::::::::::::::::::::::::::::::::
وشوشنى:
فعلا بقينا الاسوء فى كل حاجه ولله الحمد
وكلامك كله جميل بجد ماشاء الله عليكى
تسلميلى ودايما منورانى
:::::::::::::::::::::::::::::::::::::::::::::::::::::::::::::::::::
حورية:
ايوة قارئة فنجان...قصدى افكار:)))
خللى بالك بقى:)))...نياهاااااا
ولما نشوف اخرت هروبنا دى ايه بس المهم نفوق فى الاخر
وعلى فكرة انتى بجد وحشااانى جدااا والكمبيوتر عندى نفس الموال وعارفه كتير دلوقت زعلانين منى
بس ان شاء الله هتلاقونى عندكممم قريبااااا
صاحب البوابة:
وعليكم السلام ورحمة الله
مرحبا بك اخى الكريم ودمت بألف خير:)
::::::::::::::::::::::::::::::::::::::::::::::::::::::::::::::::::::::
Blank-Socrate:
احنا فعلا شعب فاشل لكن فى دايما لكل قاعدة شواذ
واحنا بإدينا نقدر نكون من شواذ القاعدة وبالتالى يتقلب الحال ويبقى الفشلة هما اللى خارجين عن القاعدة
وحتى لو بنعيش فى ذل وفشل دايما بتييجى اوقات نرجع فيها كرامتنا ونكون من احسن الشعوب
والجرائم مش عندنا بس دى فكل مكان ومش بتفرق بين الهوية والدين..كلنا بشر فى الاخر لكن للاسف عايشين بقانون الغاب
::::::::::::::::::::::::::::::::::::::::::::::::::::::::::::::::::::::::
نسرين - أمة الله:
وعليكم السلاااااام ورحمة الله
مين اللى بالى بالك دا...انا فى السليم ياباشا:))
بعدين هو احنا محرومين من حقوقنا واللا حاجه لا سمح الله
كله تمام ومية مية
تحياتى ليكى ونورتينى
gohayna:
انا فعلا لما بجيب اخرى خلاص بهيس بشكل غير عادى
ودا بيخفف كتير عن كاهل البتاع اللى بتقولى عليه دا:))
تسلميلى ياجهينتى وانا كمان اسفة على تقصيرى معاكى
::::::::::::::::::::::::::::::::::::::::::::::::::::::::::::::::::::::::
علاء:
بإذن الله ادخل واشوف الموضوع
:::::::::::::::::::::::::::::::::::::::::::::::::::::::::::::::::::::::::
إنـســانـة:
لا مفيش دا خناقة مع ولاد ابو اسماعيل وولاد ابو ابراهيم
وكله دلوقت بقى فى المشرحة:))
وبرسييييل برسيييييل...هع هع
صرصارة هانم مين قال ان ديه تخاريف انتي اصبتي كبد الحقيقة و الكلاوي و المعدة و كل الاعضاء..في حاجات كتير بنعملها في حياتنا لما بنشوفها من منظور عقلاني شويه بنحس انها في قمة التخلف لكن احنا مش عايزين الجانب العقلاني احنا عايزين الجانب المتخلف بمعنى ان ان احنا مش عايزين كل حاجة نوزنها بميزان العقل و المنطق لان العقل هيفوت لانه مش هيقدر يستوعب كم المفارقات السخيفة اللي بتاقبلنا في حياتنا كل يوم لابد من التهييس حتى يرتاح العقل...مشاكل الدنيا بئت اصعب من الواحد يتحملها من غير ما يروح عن نفسه سواء بئى بكورة بأي حاجة و السلام..البني ادمين تعبوا و عايزين يرتاحوا من البلاوي ديه و جزء من التعب ده عبارة عن يأس من ان الاحوال السيئة اللي الشخص بيمر بيها ديه تتعدل..في تخاريفك يا صرصارة هي عين العقل السليم مش المفوت...سلام
السلام عليكم
هناك موقف مشابة فعلة الصحابة زمان لما كانوا يجلسوا مع الرسول صلى الله علية وسلم ويستمعوا له ويحفظوا على يدية ما نزل من القرآن وتعتريهم الحالة الإيمانية فيذهبوا الى البيوت يداعبوا الاولاد والازواج ويهتموا بشئون حياتهم فاسرعوا اليه صلى الله عليه وسلم واتهموا انفسهم بالنفاق فقال لههم لا انا ايضا مثلكم انما ساعة وساعة
هؤلاء هم من سعى قلبهم الجهاد وضرب اعناق المرتدين و الرحمة بالحيوان
نصيحة ياريت كل منا يوسع قلبة
تحياتى
Post a Comment