Thursday, April 12, 2007

ياللا حالا بالا بالا هنوا ابو الذئاااااب


ازيكوووووووووو جميعاااااااااااااا
انا بقترح نعمل حفله صغنونه هنا فبلاعتى
علشان اخونا العزيز جدا جدا الراقص مع الذئاب
جار علوان ابو البكرى
هيسيبنا ويروح لارض المعارك اللى واخده هدنه مفتوحه
وبالروح بالدم نفديك ياايس كريم
انا بصراحه مش عارفه نتجمع كلنا ازاى فمدونتى هنا
من حيث الاساليب التقنيه والفنيه التكنولوبيه
بس انا حطيت معاد مبدأى كدا للتجمع دا
يوم الخميس الجاى إن شاء الله
يعنى على مالكل يعرف وكمان لو حد حابب يقترح حاجه
وهخللى تحديد التوقيت بالظبط الساعه كام لصاحب الحفله
واللى عنده اى اقتراح يشرفنى بيه
والله الواحد مش عارف يهنى واللا يعيط بس
الجيش دا مدرسه اذا اعددتها اعددت ذئابا طيبة الاعراق
واللا انتو رأيكو اييييييييييييه
انا بصراحه ايدى فى الميه الباردة...نو جييييش
تاراراراراراراراررارارا
اللى ايده كانت فى النار قبل كدا يحكيلنا عن تجربته دى
واكيد هنستنى اخونا الكريم لما يرجع بالسلامه ويحكيلنا عن يومياته
يوميات مجرد راقص مع الذئاب..وبين يوم وليله لقى نفسه بقى ذئب هو كماااان
اتمنى الاقى تشجيع منكو على الفكرة دى وهستنى مشاركاتكم واقتراحاتكم اللى تهمنى كتييييير
وإلى لقاااااااااء
اه بالمناسبه..سعر تذكرة الدخول: كيس عسليه

47 بعبر ياشعب:

Nothing To Lose said...

انا موافقه جدا جدا جدا
رغم انها حفله وداع وانا مبحبش حفلات الوداع
بس الى مصبرنى يعنى انه وداع مؤقت
اسمحلى أعزم نفسى يعنى بنفسى وأكون أول المتطفلين قصدى الحاااضرين:)


تحياتىىىىىىىىىىىىى

عالمى ازرق said...

تلاقيكى عامله الموضوع ده طمعا فى العسليه اللى هتخديها تحلى بيها ازمه البطاله وتقعدى تبعيها
الفكره جميله اهو علشان ميبقاش رايح على الجبهه وكانت نفسه فى حاجه
وكمان علشان اما يجى يعمل بحق الحفله ويحكيلنا بالتفصيل الممل الحياه فى الجانب الاخر من العالم شكلها ايه
المهم بس هيبقى فيه نسكافيه؟

šσяšαяαα said...

مش عارفه اقولكو ايه والله انا كنت حاسه انه محدش هايتحمس للموضوع دا.
حتى قلت اقترح لو هيكون صعب نتقابل فوقت واحد انى مش هرد على التعليقات اللى هتتكتب واللى يقوم بكدا هو الراقص مع الذئاب لان الحفله الالكترونيه دى هتتعمل علشانه,وأنا كدا مجرد ضيف
بس هدخل مجانااااا برضو;)

وعندى اقتراح كمان لو ممكن نتجمع فى الوقت اللى هايتحدد على الشات بوكس عندى..
اعتقد هتكون حاجه لذيذه

ياللاااا عاوزاكو تصحصحو وتشاركووونى بالافكاااار

šσяšαяαα said...

-nothing to lose:
دانتى تنورى من دلوقت وهاحجزلك سويت مخصوص كمان..بس ماتنسيش العسليه
وبسمسم لو سمحتى:)

تحيااااتى
:::::::::::::::::::::::::::

-عالمى أزرق:
أوبس...شكلنا كدا اتفقسنا يامرسى:)
وبعدين يعنى انا مش هاخدها واجرى
مانا هوزع منها على كل الحاضرين والحاضرات.
ونوزع نسكافيه كمان ياستى ولاتزعلى
بس انتى عليكى السكر واللبن:)

نورتونى وتحيااااتى ليكى

الراقـــص مع الذئـــــاب said...

معقولة...الناس ديه كلها جاية عشاني
معقولة الناس دي كلها جاية تودعني
انا هعيط خلاص....مصر امانة يا رأفت

صرصارة...مش عارف اقولك ايه
انا سيابك انتي تحددي كل حاجة طبعا...انتي صاحبة الاقتراح والحفلة والعسلية
وربنا يخليني ليكم ويرجعني ليكم بالسلامة

Nothing To Lose
انا فرحان جدا انك اول الحضور...وطبعا ليا الشرف

عالمى ازرق
فعلا انا كان نفسي في العسلية
علي فكرة...هما يقدروا يخدوا منننا اي حاجة...بس ميقدروش يخدوا العسلية
وطبعا بعد ال45 يوم هاجي احكيلكم عن كل حاجة في الجانب المظلم من الحياة
دا إن رجعت اساسا

-_- said...

صرصارة

احييكي على البوست ده

المفروض فكرتنا تتغير بقى عن الجيش و نتعامل معاه بفخر مش بأنه بهدلة و تضييع وقت بل بأنه شرف و رجولة

مهندس زراعي said...

انا موجود هنا ومعايا كيس العسليه

Anonymous said...

اشطااااااااااط
انا بحب الحفلات
اهم حاجة يكون في دي جي وكدة
وسمعني اغنية بودععععععك للحج فؤاد
وبعديها اديني واحدة ظلموووووه لحليم
وبعد كدة بقي نختم باغنية سايبني ورايح علي فين للعسيلي
انا مسئول الدي جي
يعني برضه ليه لزمة في الليلة
يعني مش لازم ادفع التزكرة ها
لا عسلية ولا بتاع
بعدين انا عايز اقعد في السويت بتاع نوثينج تو لوث
اوك
اشطة يا راقص رايح الجيش
يا عيني عليك يا ولداه
كان طيب كان حنين
معلش يا راقص بقي الله يعوض عليك
وبرزقك بعسكري نابطشية ابن حلال
يظبطك ويفلسعك من الجيش في الزوغان
بس متنساش تاخد معاك استمورننج علي رائ ناون
عشان هناك بيحبوا الاستمورننج
وهناك مبدئ
ابحني تجدني واديني تلاقيني
وسين سنجاري العب اتاري
والجيش بيقولك اتصرف
وعشان نعلي ونعلي ونعلي لازم نطأطي نطأطي نطأطي
كفاية كدة تحفيز وتحبيب في الجيش
ابسط يا عم اهو
عمال ارفع في معنوياتك قبل ما تروح
ان شاء الله
ربنا هيرزقك بشاويش زي الشاويش عطية
بتاع اسماعيل يس
قول امين يا رب
يالا
والسلام ختام
وخلي السلاح صاحي
وانا معزووووووم بالعافية

mohand said...

السلام عليكم
بما ان محمد اخويا
وحبيبي
وكل حاجه ليا في الدنيا
انا ممكن اعمله شات روم في (باذن )
او في الياهو الو الكوم فروج او اي موقع تاني
بس انا قولت بما ان باذن بيسمح للدعوه للي مش مشتركين فيه يعني مش هيحتاج من اي حد اشتراك مجرد انكم تطبعو اللينك وهوه يشتغل علي طوال
لو عجبتكم الحكايه انا مستعد ليها وافتحلكم الروم 12 ساعه او يوم كامل
بما اني كنت مشيت قديم قوي وكان عندي رومات ام اس ان
-------------------
معلومه للصرصوره
لو استخدمنا الشات بوكس بتاعك
اعتقد انه ممكن ينفجر
انا منتظر الرد لو عجبكم الموضوع مستعد افتحلكم الروم يوم الخميس من الساعه 4 بعد العصر وحتي الثامنه من صباح الجمعه
او اي يوم توافقو عليه
لو مش عايزين انا حبيت اساعد بس
مهند المصري
الباحث عن الحقيقة

šσяšαяαα said...

-الراقص مع الذئاب:

يابنى احنا هنقعد نتعااازم ؟؟؟
لا معلش انت اللى هتقول الساعه كام بقى
انا اقترحت اليوم وانت عليك تقترح الساعه
لان الحفله دى هتتعمل علشاااانك
::::::::::::::::::::::::::::::::::::::::

-sharm:

شكرا على مرورك اخى الكريم
واتمنى تنورنا يوم الحفله
:::::::::::::::::::::::::::::::::::

-مهندس زراعى:

بجددددددددددد
ياخساااااارة
يارتنى كنت موجودة وقتها
معلش احجزها دلوقت وابقى هات
كمان كيس وانت جاى يوم الحفله:)
::::::::::::::::::::::::::::::

-masinga:

العسليه هتتجاب هتتجاب

احنا مش بنمشى حاجه بالكوسه هنا:)
::::::::::::::::::::::::::::

-mohandat:

فيك الخير والله
عمرك اطول من عمرى
انا فعلا فكرت بموضوع الشات رووم دا
بس مكنتش عارفه تتعمل ازاى

وبعدين فداكو الشات بوكس بتاعى
طالما هينفجر فى سبيل اللمّه الجميله دى:)

وانا عن نفسى الوقت مش مشكله عندى خااااالص
اى وقت فى الفتره دى هيناسبنى ان شاء الله
بس نشوف محمد هيقرر الساعة كام

وربنا يجزيك كل خير على الفكرة الجميله دى

تحياتى

mohand said...

السلام عليكم
اشكرك علي المرور عندي
والفكره لسه مطروحه شوفو وقررو وانا تحت امركم
واسمحيلي احط لينك لمدونتك ضمن اماكن في القلب عندي
بعد اذنك طبعا

mohand said...

السلام عليكم
انا اقصد الاماكن المفضله
بس انا مسميها اماكن في القلب

-------------------
انتي كاتبه
ياميت اهلا وسهلا بييكن فى مجتمع الصراصير الاحرار
هي بيكن ديه مش للمؤنث ؟
يعني احنا مطرودين من هنا ولا ايه ؟

الراقـــص مع الذئـــــاب said...

اخي شارم جزاك الله خيرا علي المشاركة..واتمني تواجدك دوما
واقدر جدا قولتك الجميلة بأن الجيش فخر وشرف ورجولة وايضاً هو بهدلة وتضيع وقت وضايع دين وكل حاجة

ابتلاء من الله عز وجل...وامر الله خيرا

--------------------------------
مهندس زراعي
اشكرك علي كيس العسلية
واسعدني مشاركتك
--------------------------------
ماسينجا

لا مفيش دي جي ولله الحمد....انا متطرف ومش بسمع اغاني

علي فكرة انا مش رايح الجيش عسكري (للأسف)...انا رايح كلية الضباط الاحتياط يعني نظام مختلف خالص....جيش من نوع خاص

الله يجازيك عمال أقرأ ردك وانا بضحك...انت لاضم الكلام في بعضه يا ابني؟؟

اسعدني جدا كلامك الجميل

بس بلاش كلمة راقص لوحدها...قول راقص مع الذئاب...
وشرفني تواجدك
-----------------------------
طبعا انا عاوز اقول للجميع هنا إن مهند من الناس اللي انا بعتز بيها جدا ومن غير مبالغة انا بحبه جدا...ربنا يكرمه
مع اننا مقصرين جدا في تقيدم واجب العزاء لأخونا مهند ومعرفناش نقف معاه في محنته
علي الرغم من اننا بقينا زي عيلة واحدة
بس اللي اقدر اقولهولك يا مهند ادام الله ودنا...احبك في الله
-----------------------------
يا جماعة من غير شات ومن غير تجمع والا اي حاجة...مجرد الاهتمام بأخوكم دا في حد ذاته شئ جميل جداااااااااااا

جزاكم الله خيرا

خمسة فضفضة said...

السلام عليكم ورحمة الله وبركاته

انا جيت اهه يا صرصاره ، بس معلش متاخره شويه كنت بشتري انتاج مصنع العسليه كله وعلي ما اتحمل ووصل خد وقت ....يلا معلش


مع السلامه يا باشمهندس محمد ، ان شاء الله يجي توزيعك في حته قريبه
دا طبعا بعد ال45 يوم سجن الاولانيين ، معلش السـ ....اقصد الجيش للرجاله

تحياتي لك وتروح وتيجي بالسلامه ، وبقي افتكرنا في الاجازات

smraa alnil said...

انا راشقة اي هيصة هتلاقيي فيها

وبعدين يا عيني عليك يا ابني
يا عزيز عيني

وبعدين دة انا مشهورة بالعسبية دي
دةمش في اكتر منها عندي
ينفع اجي
بس خايفة الاقي بلاعة تانية

حوريه said...

عزيزتى صورصاراية
يسلم افكارك بس كده العسليه هتغلى و مش هنلاقيها بعد كده .. مافيش حاجة تغلى على عزيزنا الراقص مع الذئاب
عايزين حفلة تكسر الدنيا
و الله هتوحشنا يا باشمهندس يالله بكرة تبقى ضابط و تتنطط علينا و نقولك يا باشا .. و بدل العسلية يبقى ايس كريم
ترجع لنا بالسلامة ان شاء الله خلى بالك من نفسك
صرصارة عسولة خالص تحياتى لكى
فقرةاعلانية
سيزر يدعوكم لقراءة الجزء الثالث من مغامراته .. سيزر / الذئب الجميل صديق الراقص مع الذئاب
nadiataha.maktoobblog.com
حوريه

همسات دافئه said...

هييييييييه:))))))
فكره تحفه وأنا بأه عليا البلالين والزينه بس هامشى بدرى عشان ماليش فى لحظات الفراق دة وعسليتك فى الحفظ والصون ياصرصارتنا الحلوة
بس هوه كان هنا راقص مع الذئاب ياترى لما يشوف الذئاب الى بحق وحقيقى هايعمل فيهم ايه؟

šσяšαяαα said...

((إلى من يهمه الأمر:))

عااااااااااااااا
سيبوووونى عليييييه محدش يمسكنيييي
بص بقى احنا خلاص مصممين على الموضوع
وياللا يامهند ابدأ فى التنفيذ وسيبك منه

انا بجد موضوع اننا نتجمع فى شات روم دا دخل دماغى اوى وممكن لو سهل تتعمل الروم دى اننا نتجمع كل فترة وفترة فيها
ممكن كمان نسميها مثلا غرفه"مدونات مصريه"

وبعدين انا متحمسه اكتر كمان علشان اخونا مهند
يعنى ياسيدى لو مش علشانك يبقى علشان نتجمع
كلنا ومهند ونهون عليه الظرف اللى بيمر بيه الايام دى

وبعدين مش بتقولو انكو اكتر من اخوااات
ياللا بقى طبقو الكلام دا رسمى..
انا مبحبش الكلام اللى على ورق:)

بس على فكرة انا اعرف اتنين اخوات اسمهم محمد ومهند:)
ياسبحاااان الله

لما تخلص يامهند ابقى ابعتلنا الرابط بتاع الشات رووم
او انت ابقى شوف يعنى هتعمل ايه وايه الانسب والاسهل
وانا فى انتظااار يوم الخمييييس أى وقت فيه
وفى انتظاااار العسليه اهم حاجه:)

šσяšαяαα said...

-mohandat:
وعليكم السلاااام ورحمة الله
ياسيدى العفو دا شرف ليا انى ادخل مدونتك
انا بدخلها دايما لكن المواضيع اللى قبل كدا دى بتاعت الادويه
وانا مليش فيها بصراحه.. بييجيلى حساسيه(عااااتسيييي:)

وبعدين ياسيدى انت هتحط لينك لرئيس الوزرا:)
انت كدا بتحرجنى بقى انى لما حطيتك مع اجدع ناس ماستأذنتش منك
انا جمعت كل لينكات المدونات المفضله عندى ومجاش فبالى انه لازم ابلغ اصحابها
على العموم انا مستأذنش من حد اساسا واللى مش عاجبه
يجيب معاه كيسين عسليه مش كيس واحد:)

هههههههههههه
انت رحت امريكا مع مستر بيكر واللا اييه
يحيا البيت الابيض المتوسط:)

بخصوص اهلا بيكن بقى:
وانا بكتب العنوان دا افتكرت منى زكى فى مسرحيه"كدا أوكى"
لما كانت بتقول النشيه(النشيد يعنى)
بتاع اهلا بيييكن اهلا بييييكن انا جايه اخدم عندكن
احنا مبسوطيييه واحنا فرحانيييييه
شكرن لكن شكرن لكن
ههههههههههههههههههههههههه

بس ياسيدى حتى تلاقى اول بوست ليا كان اسمه
اهلا بييكن اهلا بييكن انا جايه اصدع ودنكن:)

فالموضوع ليس له ادنى علاقه بنون النسوة
وانتو تشرفونا فى أى وقت ياأولاد آدم قبل بنات حوا كمان
(حتت نفاق عالماشى:)

ياااااااه ايه الرغى دا كله
طيب فى الختام بقى لما تعمل الروم ياريت تعملها
يوم الاتنين او التلات علشان الحق ادخل المدونات
واكتب اعلان بالموضوع ومعاه المعاد واللينك(من اختصاصى بقى وهجرب فيكو:)

šσяšαяαα said...

-خمسة فضفضة:

وعليكم السلاااااام ورحمة الله وبركاته
نورتى البيت يادكتورة:)

ايييون كدا اهى دى الناس الكريمه واللا بلااااش
كدا انا احبك من كل عسليه فقلبى:)
::::::::::::::::::::::::::::::::::

-smraa alnil:

سمووووووووووورة
دا كلام برضو
دانتى نورك هيغطى عالمنطقه كلهااا
ومتخفيش ياستى هسدلك كل البلاعات المجاورة
هسيب بتاعتى بس اللى مفتوحه:)
::::::::::::::::::::::::::::::::::

-حوريه:

تسلميلى ياحوريه واسعدنى مرورك الكريم
انتى الاعسل:)
وان شاء الله هندغدغ الدنياااا
على فكرة: الاعلان دا هعدى المرادى كدا من غير رسوم اداريه
بمناسبة الحفله:)
:::::::::::::::::::::::::::::::::

-واحدة من الناس:

منتظرين البلاليييين
اقصد منتظرينك طبعاااا وهتنورينا

وهو فعلاسؤال وجيييه انا كمان هستنى اجابته:)

mohand said...

السلام عليكم
انا مش عارف اقول ايه
بس يا محمد انت اخ وكلكم اخواتي والله
وانا لسه عند وعدي
ولو عايز يا عم انا مستعد
بس يا صرصوره هوه اللي يحدد الميعاد واليوم مش انا
انتو بلغوني وانا اعمل باذن الله
بس اصل الروم لازم تتفتح 24 ساعه
يعني لازم اعملها في نفس اليوم واقعد ناس فيها
فهمتي
يعني يومها هنزل الينك بتاعها من الصبح
واخلي ناس قاعده تستناكم
عموما بس اللاقي محمد اون لاين وهكلمه
اوك؟
-------------
بالنسبه لموضوع بيكين والصين وكده عادي يعني انا كنت بهرج بس

واشكركم للتواصل
مهند المصري
الباحث عن الحقيقة

zordeak said...

انا جبت العسلية ومستنى الحفلة

انا اكتئبت اول مسمعت حكاية الجيش دى

اصل انا بعيد عنك عندى هسس من الموضوع ده



مش عايز افضل طالع عين اللى خلفونى فى طب

وبعد ما اخلص وابدأ بقى اشوف مستقبلى

اتهفلى 3 سنين جييش محترمين


هتبقى مصيبة


ربنا يسترها علينا يا رب


:D

Dr.khaled said...

هيا الحفلة يوم الخميس الجاي
ولا كانت الخميس اللي فات؟؟

ههههه
الجميل في الموضوع
انهم هيقلعوه الفرو اللي على جسمه-لانه ذئب-
وهيلبسوه
....حاجة على جسمه مصنوعة من مادة مجهولة الهوية
وكمان هيلبسوه حاجة في رجله..اسمها مرعب(البيادة)
برضه مصنوعة من مادة مجهولة الهوية ووزنها يجي خمسة كيلو متر او اكتر

المهم
مبروك يا سيدي على الجهادية
ويا رب تموت شهيد في سبيل الله
وتتجوز الحور العين
وتخش الجنة يا عم

متنساش تسمع سلوكيات المسلم في الجيش للشيخ حسان وللاستاذ وجدي غنيم
يا.......
يا عسكري
انتم السابقون ونحن ان شاء الله بكم لاحقون...نسأل الله لنا ولكم العافية

sara said...

استنوا هنا....خياااااااااااااااااانه
انا لسه مكتشفه الموضوع دا دلوقتي
يعني يوم الاحد 15/4
شكلكم عملتو الحفله دي من غيري يا خونه

وانتي يا ناثنج ياواتيه
مش تقولي علي الموضوع دا
مش مسمحاااااااااااااااكم

عاااااااااااااااااااااااااااااااااا

حوريه said...

صرصارتى الجميلة
شكرا لكى يا قمر انك عديتى الاعلان من غير رسوم عشان خاطر الراقص مع الذئاب الذاهب للجهادية و عشان خاطرك انتى كمان و بناء على تليفونات و اميلات ادعوكى و جميع اصدقائنا لقراءة الجزء الرابع من سيزر و الامواج الغاضبة و الدعوة برضة بعسلية تسلم لحبيبتنا صورصارايه... فى انتظاركم قبل الحفله انشاء الله عشان خاطر الراقص مع الذئاب بمدونة ناديه طه الشهيرة بحورية
nadiataha.maktoobblog.com

šσяšαяαα said...

-mohandat:

والله انت اعلم منى فى الموضوع دا
وعلى العموم لما نشوف المعاد هيرسى على امتى
ابقى اكتبلى الرابط يوميها وانا قبلها بيوم هادخل
كل المودنات اللى نعرفها بإذن الله واقلهم واللى عاوز
يشاركنا يبقى ييجى ياخد الرابط من عندى او عندك
او عند محمد لو هتضيفوه انتو كمان.

واهلا بيكن فى اى وقت:)
:::::::::::::::::::::::::::::::

-zordeak:

خلاص هانت الحفله كلها كام يوم وتتعمل ان شاء الله

وماتزعلش نفسك بالجيش دا
دى حاجه بسيطه ياراجل وكلنا فداء العرش:)

تحياتى ليك
:::::::::::::::::::::::::::::

-خالد وليس بخالد:

لا الحفله لسا الخميس اللى جاى ان شاء الله
وفى انتظارك انت والعسليه:)
::::::::::::::::::::::::::::

-none:
لاتبكى يااختى العزيزة
فلاتزال الفرصة امامك لحضور الحفله
يارب هى بس تتعمل على خير:)
::::::::::::::::::::::::::::::

-حوريه:

ممممممممممم
انا مش هتكلم خاااااالص
ولما نشوف اخرتها مع كابتن سيزر:)
والعسليه دى ليا انا وبسسسسس
ممكن تخليها لب سوبر عندك:)

mohand said...

السلام عليكم
بعد المدولات
وبعد الكلام
والنقاش
والحوار بيني وبين محمد
اتفقنا ان الميعاد هيكون الساعه 12 ليله الجمعه يعني

يعني اخر ساعات يوم الخميس
وانا هحط الرابط بتاع الروم عندي في المدونه يوم الخميس بعد 12
وهتلاقو الرابط برضو عند محمد
وعند صوصوره كمان


تنبيه من دلوقتي
الموقع اللي انا عملته مش محتاج ريجستر علشان تدخلو تتكلمو فيه
بس هيطلب منكم نيك نيم وهيكتب جنب اسمكم جيست

وعموما انا هقولكم الطريقه في نفس اليوم

اخوكم
الباحث عن الحقيقة
مهند المصري



منور يا صرصوره

الراقـــص مع الذئـــــاب said...

السلام عليكم ورحمة الله وبركاته

دكتورة خمسة فضفضة بنفسها ومعاها كمان عسلية
كدا هتحسسينا بقي اننا لينا قيمة بجد

جزاكي الله خيرا علي دعائك
انا فعلا في قريب من بيتنا حتي في 45 يوم...هقعد لمدة 9 شهور في فايد في كلية الضباط الاحتياط....اول 45 يوم حبس وبعدها هنزل اربع وخميس وجمعة كل اسبوع

بعدها بقي اتوزع قوي اساسية بعد ما اعلق رتبة ملازم اول...من وقتها بقي هستريح وجيشي هيبقي دلع

جزاكي الله خيرا مرة تانية علي مرورك الكريم
---------------------------

وكمان سمراء النيل
ايه الحلاوة ديه يا جدعان
تعالي انتي بس وهاتي العسبية وملكيش دعوة
عندنا رجالة تاكل الزلط

جزاكي الله خيرا علي مرورك الكريم
----------------------------------

استاذتنا الجميلة وكاتبة الروائع الاستاذة نادية محمد طه

ربنا يكرمك يارب علي كلامك الجميل
متخفيش يا ستي انا مش هتنطط عليكم...عشان انا نفسي ابقي عسكري صغيور ياخد سنة ويغور
مش ظبوط هلفوت يقعد في الجيش لغاية ما يموت
علي فكرة يا جماعة سيزر دا الذئب اللي في الصورة بتاعت البروفيل بتاعي زي ما اطلقت عليه كاتبة الروائع هذا الاسم

لكي تحياتي
----------------------------------
واحدة من الناس

اجمل حاجة البلالين والزينة عشان انا غاوي افرقعهم بعد ما الحفة تخلص...وسعات قبل ما تبدأ اساسا

ومتخفيش عليا...الذئاب اصدقائي

جزاكي الله خيرا علي المرور
--------------------------------

مهند وصرصارة
مش عارف اعمل معاكم ايه
بجد يعني ربنا يجازيكم خير علي تعبجم اللي مخلي وشي يحمر من الكسوف

-------------------------------
zordeak
شرفني جدا تواجدك وكلماتك يا دكتور
وربنا يبعده عنك يارب وينجيك منه
بس الدكاترة واي بالطوا ابيض راشقين للأسف...ومعاهم الغلابة المهندسين
ربنا ييسرلك الامور وركز بس انت في دراستك وشد حيلك

جزاكي الله خيرا علي مرورك الكريم

دمت في خير
--------------------------------

حبيب قلبي الدكتور الكبير اوي الدكتور خالد

مش لازم تفكرني بالبيادة والافرول المموه الله يكرمك
انا بنام وهلوس بيهم
لا تنساني من صالح دعائك
اللهم اكتب لنا موتة في سبيلك وتوفنا وانت راض عنا

جزاك الله خيرا علي تنبيهك لسماع شريط الشيخ حسان عن سلوكيات المسلم في الجيش...ياريت لو عندك لينك للشريط تبعتهوالي

جزاك الله خيرا علي مرورك والشاركة الغالية جدا

-------------------------------
none
لا يا ستي لسا شوية
العلقة...ٌصدي الحفلة يوم الخميس إن شاء الله
ويكفي مشاركتك وردودك الجميلة
دمتي في خيرا اختنا الفاضلة

الراقـــص مع الذئـــــاب said...

اخي الجميل مهند
لن توفي كلمات الشكر لك ولكل الاخوة والاخوات حقوقكم علي
كل ما يسعني قوله واقدر عليه هو جزاكم الله خيرا واني احبكم في الله

raspoutine said...

انا موافق والعسلية جاهزة

عبدالله said...

صرصاره و ابو الذئاب معا يقدمان احلي عروض مسرحيه ماقبل الجهاديه
:)
يادماغك يا صرصاره بس جميله منك فكره حلوه
المهم كيس العسليه الي هتفضل لازم نحدد من دلوقتي هنتضرف فيه ازاي

ربنا يعينك يابتاع الذئاب اهي مرحله جديده ابتدت في حياتك وابقي قابلني لو استفدت منها حاجه شويه احباط بقي عادي يعني

:))))))

تحياتي

Lion king said...

صرصارة ازيك
مبروك الجيش لأبوالذئاب
وعلى فكرة الجيش جامد جدا
انا مدخلتوش بس اتفرجت عليه في التلفزيون
:)

Ma 3lina said...

ايه دا الذئب رايح الجييييييييييييش

يا عينى عليك يا بنى

انا متضامنة معاكم و لازم نعمل حفلة وداع

ايه دا مش هيكمل سلسلة افكار النصب اياها مال هغتنى ازااى

ربنا معاه و ان شاء الله تبقى اخر الاحزان

Dr.khaled said...

اخي الراقص مع الذئاب
اتفضل يا استاذ
ده رابط المحاضرة بتاعت الشيخ محمد حسان هي بالفيديو على فكرة


اضغط هنا

الراقـــص مع الذئـــــاب said...

raspoutine
جزاك الله خيرا علي المشاركة وعلي العسلية

--------------------------------
عبد الله

جزاك الله خيرا علي مرورك الكريم
ربنا يكون في عون الجميع إن شاء الله

----------------------------- LionKing™

ايوة الجيش جامد جدا يا مان....حاجة اوريجينال خالص
وانا سمعت كمان انهم هينزلوه mp3 عشان الناس اللي معندهاش تي في

اسعدني مرورك
ومشاركتك الجميلة
لك تحياتي

---------------------------------

Ma-3lina
جزاكي الله خيرا علي المرور
متخفيش قبل ما امشي هنزل حلقة جديدة من يوميات النصاب عشان اسيبكم وانا مطمن عليكم

تحياتي لمشاركتك الجميلة
دمتي في خير

الراقـــص مع الذئـــــاب said...

الدكتور الجميل خالد
ربنا يكرمك يارب علي تعبك وعلي الاستجابة الجميلة وإضافة لينك الدرس الجميل للشيخ الجميل محمد حسان بارك الله فيه وفيك ونفعنا بعلمه إن شاء الله

والله اني احبك في الله يا خالد

جزيت خيرا وزوجت بكرا وانجبت عشرا


سلام

kaed said...

معلش تانى هيا الحفلة دى علشان إية أصل أنا فهمى على قدى ومش فاهم حاجة
انا كل اللى فهمتة إنكم حتدونا عسلية مش كدة و لا إية

mohand said...

السلام عليكم
خلاص مفيش اي مشاكل الروم اتعملت وكل حاجه زي الفل ان شاء الله
ويوم الخميس بالليل
بعد الثانية عشر ان شاء الله
هيكون لينك الروم وطريقة الدخول موجوده في بوست عندي في المدونه ومدونة الراقص ومدونه صرصورة ان شاء الله
السلام عليكم

Dr.khaled said...

يا استاذ الراقص
احبك الذي أحببتنا من اجله

جمعنا الله واياكم في الجنة..........والاخوة والاخوات المدونين

ايه بكرا وعشرا...دي
انت هتعمل لي زي الشيخ مسعد انور
بيقول ايه

زوجك الله بالحور العين ورزقك عشرة اولاد من الطين
وربنا ييسر

المهم
شد حيلك يا بطل
والله الفترة قصيرة اللي عرفتك فيها لكن ربنا المستعان

وبنشكر الاخت صاعبة المدونة على استضافتها
والحمد لله على كل حال
اخواني
لا تنسوا ان تتوبوا اليوم وتدعوا لي معاكم اني اتوب
وفقكم الله

šσяšαяαα said...

هيييييييييييييييييييييييه
هيييييييييييييييييييييييه
هيييييييييييييييييييييييه
اخيراااااااااااااااااااااااا
اشهد ان لااله الا الله
مبرووووووووووووك
انا مستنيه اليوم دا بفارغ الصبررررر
ان شاء الله هتكون حفله رااااائعه

عاوزة اعرف بقى ازاى اعمل الكود
اللى بيكون لينك : زى عنوان للمدونه
بيكون لينك لما يتكتب فى بوست او تعليق

كماااااااااااااان

عندى اقتراح وشوفو هيبقى كويس واللا ايه
انا فكرت ففوكيرة كدا
اننا ممكن نعمل كلمه سر
زى مثلا الفيل فى المنديل:)
كل واحد يفكر فى كلمه سر اول مايدخل الروم
يقولها علشان ممكن اى حد يدخل بنيك نيم
مش بتاعه.
وانا عملت ايميل علشان اللى عاجباه الفكرة يبعتلى
الكلمه اللى اخترها وعاوزين كلمات سر عسوله كدا
عاوزين الحفله دى تكون كلها دمها خفيف وعسوله:)
وانا هكون موجودة فى الروم واللى يدخل يعرف
الكلمه اللى اختارها وانا طبعا هتأكد منها من الايميل اللى وصلنى

ممكن يكون هبل انا عارفه بس انا عاوزة كله كدا يفكر
فى افكار مجنونه ودمها خفيف عشان نعمل فقرات حلووة

وااادى الايميل:
sorsaraa_blogspot@yahoo.com

واللى هيكون معظم الوقت فى الروم ممكن يعمل برضو
ايميل علشان نبعتله الكلمه عليه

šσяšαяαα said...

-mohandat:

اخيرااااااااااا يامهند
ربنا يجزيك كل خير والله على تعبك دا
وياريت عشان الغلاسه تكمل بالمرة:)
لو تعرف سؤالى ازاى احط لينك فى البوست
ويكون على شكل كلمه واحده
ياريت تقوللى
وفى انتظاررررررر اللينك
::::::::::::::::::::::::::::::

-الراقص مع الذئاب:

مبرووووووووك
وبعد مداولات ومشاورات رسيت على المعاد

تلاقيك نشفت ريق مهند على ما اخترت الوقت:)

وياللا عاوزينك تفكر فى فوكيرات للحفله

واللا مش فالح غير فى فوكيرات عمنا النصاب بس:)

عاوزين المواهب دى تطلع فى الحفله كماااااان

ياللا اشوفكو على خير ان شاء الله جميعااااا
::::::::::::::::::::::::::::::::

-raspoutine:

ايوة كدا هى دى الناس الجاهزة واللا بلااااش
معاك ايس كريم شوكولاته بالمرة:)
::::::::::::::::::::::::::::::

-عبد الله:

هههههههههههههه
مسرحيه ايه بس انت شايفنا فدار الاوبرا:)

وكيس العسليه ابقى اعملّه اتاتش على الايميل:)

تحياتى
::::::::::::::::::::::::::::::

-lionking:

منورنى والله واتمنى تشرفنا فى الحفله

تحياتى
:::::::::::::::::::::::::::::::::

-ma-3lina:
ياللا يابنتى نعمل ايه بس

كلنا لها:)
:::::::::::::::::::::::::::::::

-kaed:

اه انت فهمت اللى على مزاجك يعنى:)

لا بقى ياسيدى مش صح انت اللى هتدينا العسليه
وبسمسم لو سمحت:)
:::::::::::::::::::::::::::::::

-خالد وليس بخالد:

الشكر لله وحده

انا يشرفنى معرفة كل اخ واخت فيكم

وربنا يكرمنا جميعا ويهدينا لكل مايحبه ويرضاه

mohand said...

السلام عليكم
بالنسبه للسؤال اللي انتي سالتيه ده
انا بعمل كده في الوورد
وبعد كده انسخها واحطها في المدونه
مش عارف ان كان في طريقه تانيه ولا لا
عموما لو عندك وورد
تعملي ايه
تكتبي الكلمه
وتظلليها
وتدوسي عليها كليك يمين
ارتباط تشعبي
تدوسي علي الاختيار ده
هيجيلك خانات
هتفهمي تحطي اللينك في تاني مكان
وتدوسي اوك
هتلاقي الكلمه تحتها خط
تاخديها كوبي
وتحطيها
------------------
عايز اتفق معاكي علشان هنعمل بوست تعليمي للدخول
علشان محدش يقول معرفتش ادخل والله
هو موقع بسيط وسهل جدا

mohand said...

السلام عليكم
الطريقه التانيه
وانت بتكتبي البوست ظللي الكلمة
ودوسي علي علامة السلسلة اللي جنب لون الخط علي طوال
هيفتحلك مربع
تحطي اللينك في تاني خانه علي طوال
وتدوسي اوك
هتلاقي بقي تحتها خط
وبقت مرتبطة ان شاء الله

اخوكي
مهند المصري

šσяšαяαα said...

جزاك الله خيرا انا كنت هموت واعرف بتتعمل ازاى

وبالنسبه للبوست التعليمى انا معنديش مانع وشوف انت ناوى تعمله ازاى وانا معاك

ممكن تبعتلى الافكار اللى حابب تعملها للبوست على الايميل اللى انا كتبته
وانا هتابعك من خلاله بإذن الله

كراكيب عادل said...

لو نستغل الجيش في التعمير ونستغل الثروة البشرية الي عندنا هنتغير كتير

نفسي كل شاب يعمل واجبة ناحية مصر

šσяšαяαα said...

احنا الموارد البشريه عندنا اعتقد انها اكتر من الرمل فى الصحرا

بس مركونة عالرف ولسا مش لاقيه اللى يهتم بيها ويرشدها للصواب اللى نقدر نحقق بيه واجبنا ناحية بلدنا

شكرا على مرورك وشرفتنى
ومتنساش الحفله:)

حبيبة الرحمن said...

استنونىىىىىىىىىىىىى

انا جايه معاكم بس اتاخرت علشان بجيب عسليتين عسليه بسمسم لسارتى

وعسليه بالسودانى لابو الذئاب

معلش على التاخير كان ورايا امتحانات ولسه مخلصاها انهارده حظكوا حلو :)