هى الناس جرالها ايه؟؟؟

نزلت من يومين كدا لمدينة الأشباح الكبرى - قصدى القاهرة الكبرى

ولقيت خير اللهم اجعله خير..الناس ماشية تايهااااااا وبتلّطش ف بعضيها

ونون النسوة لابسين حاجات غريبة كدا..ايشى بنطلون قصير وسايباله خمسة سنتى فوق الشوز يعملوا تهوية من كتر الحر اللى احنا فيه

واللى لابسة عباية سودا قربت تشتكى وتفرقع منها اساسا..وقال ايه قريبتى بتقولى كله بقى يلبس العبايات كدا بس هى سعيدة جدا ان فصل الشتا عامل تقييد شوية على اللبس ومخللى النساء تحترم نفسيتها

بس اللى مزعلنى حاجة واحدة ...كدا بدلة الرقص هايضيع منها تفردها ونجوميتها فى عالم الشخلعة

وسط البلد..بقت كئيبة زى مايكون ضايع منها حاجة..مفيش روح..مفيش الجو الجميل اللى كنت بحبه فيها على الرغم من الزحمة اللى موجودة طول الوقت..الناس بتتريق على حالها وبتتريق على بلدها بشكل غريب فيه لامبالاة كأنهم فعلا أشباح هايمة على المكان ومالهاش اى وجود حقيقى

كنا واقفين فى محل قدامه سينما..وإذ فجأتن نلاقى أكوم من البشر..اتنين اتنين..الى مالا نهاية

بس الصراحة كأنهم فى ماكينة للفشار..طيب البنات مش تظبطت نفسها كدا فى التواليتات قبل ماتخرج..الناس بقى وشها مكشوف ياخواتى

بصراحة هى مابقاش اسمها دور عرض سينمائى (بفتح العين)..دى بقت دور عرض ستاتى(بكسر العين)...وحسرة عليكى يابلد

ونييجى للمترو حبيب قلبى ..ألاقيهم عملوا على كل باب للدخول بالأحمر العريض..ممنوع الصعود..بس واضح ان ثقافتنا الالمانية لم تتغير بعد

واحلى حاجة وانا راجعة لبلدتى العزيزة المعزوزة

العريبات واقفة مش لاقية اللى يركب..وعلى الرغم من ذلك تلاقيهم بيحشروا فى الناس ولاعلب السردين المستودرة ..اصل بتبقى مليانة لحم والخير كتير..والناس فعلا اشباح..مفيش اى رد فعل..مفيش احتجاج رسمى على السواقين وعمايلهم

كله بيقول اهى مواصلة والسلام والمهم انى هاروح..دا على اساس ان الطريق مفروش بالورود..هو فى ورود على شكل برسيم ومطبات على شكل نفايات وحجر وطرق متعرجة..يعنى بلد الامن والامان بصحيح

اخر موقف بقى لذيذ جداااا 

كان معانا علب كانز..ولما خلصناها حطتهم فى الشنطة البلاستيك علشان لما اروح البيت ابقى ارميهم فى سلة المهملات..بم ان البلد الطويلة العريضة دى مافيهاش سلة توحد ربنا

قام الولد اللى بيبقى مع السواق شافهم وكان عاوز يعمل معايا دور مجدعة..وقاللى هاتيهم ارميهم مالشباك

قلتله انا مابرميش حاجة فى الشارع

الشاب ياعينى بصلى بصة وازبهل كانه شاف كائن فضائى

وسألنى: وايه العيب يعنى لو اترمت فى الشارع

بصراحة ..لاتعليق

بى إس:  طبعا البوست دا تقريبا مافيهوش حاجة جديدة

بس انا عاوزة ارجع اكتب ولو هتكون بدايتى مش اد مستوى الزملاء الاعزاء

لكن عالاقل هاكسر القيود والسلاسل اللى مربطانى بقالها سنة وقربت انا كمان اتحول لشبح بسببها

وعلى رأى اللى قال..خوفو بنى الهرم من زلطة

طبعا انا اللى مألفاها الجملة دى:)

صحيح نسيت أسألكم...هو اسمه ايه دا اتجوز واللا أوشاعة؟

كلنــا فداءً للفتة واللحمة

إلى أصحاب القلوب الرحيمة

الخروف الغلبان بيتكتك مالرعب وياعينى مش عارف يعمل ايه

بس شوفوا شهامة الخرفان وجدعنتهم..على الرغم من انه بعد ساعات قليلة هايتحول لـ

فتة معتبرة بالرز والتحبيشة..او كفتة ضانى بالسمن البلدى..او لحمة مفرومة معصجة..ألخ ألخ

لكن شوفوا رد الفعل المتفائل والشجااااع فى الحلقة القادمة..قصدى الصورة القادمة

<

 <

<

الخروف أو المعزة اللذاذ دول بيمسوا ويصبحوا عليكوا ويتمنوا للجميع احلى عيد سعيد مسعود مسعد

بأحلى أسنان من سيجنال توووو

واستمتعوا بالفتة وكلوا واشربوا ووسعوا محيط معدتكم بس ماتفتحوش عالتاسع علشان هما يومين وكله هيبقى بحححح

والمعدة ستعود إلى أدراجها...وكل عام وانتم بخير

دى مابقتش بلاهة وبس...دى مهزلة

طيب بالله عليكو اعلق على الهبل والتخلف والغباء والتعصب دا بإيه

بقى اول مارجع اكتب- اكتب على حرقة الدم دى ياربى...إنا لله وإنا إليه راجعون

زى مايكون قلبى حاسس ان فى مصيبة هاتحصل..الناس كلها كانت عاملة فرح وكل واحد دابحله كتكوت علشان خاطر اننا فزنا..واكتشفت فى الاخر ان ماتش تأهيل للكاس فقط..وانا كتبت فى البوست اللى فات فيما معناه "بلا خيبة علينا

وادى الخيبة قلبت بمصيبة...حتة خبر كاذب نشرته الصحف فى دولة عربية تدعى "الجزائر" خللى الناس هناك تقوم علينا بأزايز البنزين المشتعل وبالطوب وباللى فى ايدهم وارمى على المصريين

بلد المليون شهيد..بلد جميلة بوحريد الى اتعملها فيلم مصرى من اقوى الافلام اللى اتعملت علشان نقول للناس ادى العرب وادى المسلمين اللى بيقاوموا عدوهم وبيحاربوا لاخر نفس واخر نقطة دم

نقوم احنا اللى يسيل دمنا وتتبعزق كرامتنا وياريت فى اوروبا واللا امريكا واللا حتى مصر ..الاسباب هاتكون معروفة

انما فييييييييين..فبلد عربى وزى مابيقولوا شقيق وابن عم وحتى جار فى قارة واحدة

لما الناس تتصل بأهلها يقولولهم مش عارفين نخرج مالبيت والطوب بيتحدف علينا من كل مكان..لما البنت تتصل تقول رجعولى ابويا والام تتصل وتبكى وتقول رجعولى ابنى

لما الراجل يتصل ويقول حوالينا النار ف كل مكان ومش عارفين نخرج.. ولو فضلنا هنا ليوم الاربع هايخلصوا علينا..احنا لازم نسافر من هنا فورا وتغور الغربة واللى بييجى منها

يوم الاربع بقى يحدد مصير آلاف المصريين اللى راحوا الجزائر تبع شركاتهم علشان يخدموا البلد واللى فيها..يقوموا يخربوا المكاتب والشركات وجزاء خدمتنا يخربوا بيتنا احنا ويمرمطونا

:تعالوا نحلل الموضوع بوجهة نظر بعيدة عن التعسف..وهحاول امسك نفسى

- اولا دول مصريين سافروا ورا لقمة العيش..ومعظمهم مهندسين وعمال ..ايه دخلهم بالكورة..واللا هما اللى جابوا الجون فى وش العدو

!!!

-ثانيا الخبر بيقول"نعوش قادمة من القاهرة الى مطار غوارى بو مدين"..طيب لو فرضنا اننا بعتنا الجزائريين فى نعوش واننا دراكولا القرين الواحد والعشرين واننا السفاح بتاع الكابتن سافو..يبقى دا كان هيكون نتيجة اننا اللى اتغلبنا وبالتالى قلنا ننتقم وناخد بالتار من الجزائريين..وهذا لم يحدث

!!!!!

-ثالثا هو احنا كنا بنلعب على نص ارض الجزائر ولما نتغلب هانحتلها ونقعد على تلها..واللا اللعب كله كان علشان كاس عالم فى -الكوووورة- وياريت اساسا نلمسه حتى..مع الامال المعلقة بأننا ننتصر على فطاحل العالم فى كورة القدم

!!!!!!!

رابعا كنت بقول فى البوست السابق اننا سايبين المصايب اللى فوق دماغنا وبنركز فى الكورة..أهو الحمد لله الكورة بقت مصيبة هى كمان..ياللا بالمرة يعنى جت عليها

!!!!!!!!!!

خامسا المصايب دى ملخصة فى 

محليا بين الدولة والشعب وما بينهما 

عربيا بين الدول العربية وسرؤولة

دوليا بين العرب وبالاخص المسلمين وبين الغرب

:بالاضافة الى

كروياً..واللى اصبح بين عرب وعرب علشان كورة

بتتخانقوا ليه ياحلوين..اصلهم غلبونا فى الماتش ياماما 

وبتحدفوا عليهم الطوب ليه ياحلوين..علشان هما ناس وحشة ومش عاوزين يسيبولنا الكاس ياماما

وعاوزين ولادهم يتيتموا ليه ياحلوين..علشان يتعلموا من الدرس ولما نييجى نلعب معاهم تانى يفضولنا الملعب وكل واحد فينا يجيب جون ويدونا عليه تكييف كمان..ياماما

!!!!!!!!!!!!!!!

سادسا لو نسينا اننا اخوات ونسينا اننا مسلمين..طيب حتى يعملوا حساب للإنسانية..واللا مبقاش فى مكان للإنسانية حتى فى الكورة

مابقاش فى عقل ولافى تفكير..سايبين اعدائنا اللى نعرفهم كويس اوى وماسكين ف خناق بعض

طيب مش مكسوفين لما فضحيتنا بقت بجلاجل والعالم كله يعرف ان العرب بيتخانقوا على كورة

والله يألف حسرة علينا..ونستاهل اللى بيجرالنا

وحتى لو المصريين رجعوا..بإصابات بسيطة وجروح سطحية وكسور ممكن علاجها

لكن الموقف اللى حصل مش هايتنسى ايداااا واتسجل خلاص فى التاريخ بالحبر الاسود

وزى ماقال المذيع فى قناة الحياة.."كل دا ممكن يتعالج واللى رجله مكسورة تتجبس ويبقى تمام..لكن اللى مش هايتجبس هو العلاقات المصرية الجزائرية

"لا الكاس ولا دهب الدنيا كله هايعوض عيل عن ابوه

عاوزة اقول للجزائريين

انا عارفة فى منكم معترض عاللى بيحصل دا..لكن للاسف الشديد الحسنة بتخص والسيئة بتعم

وانا عمرى ماكنت متعصبة ولا هاكون..بس ياريت تلاقوا حل للمهزلة اللى حصلت دى

والموضوع مش هايتقفل وهايفضل منقوش فى اى لقاء عادى او سياسى او حتى كروى..دا لو اتكررت تانى اساسا

اعقلووووووو يانااااااااس...فضحتونا وضحكتوا علينا العالم

ودا كله عشان

كورة وكاس

وعجبى عليك يازمن

ومازال مسلسل البلاهة مستمراً

دا مسلسل مصرى أصيل..والوحيد اللى غلب المسلسلات التركية فى عدد حلقاته

فحلقاته تتعدى الكام ألف سنة...من ساعت مابدأ العقل المصرى - والعربى ككل - فى الاضمحلال والتقوقع والتركيز على امور بذاتها

أمور أمور يعنى حاجات جامدة مالعيار التقيييييل

وناخد مثال حى مباشر من أرض الملعب

اتنين وعشرين بنى آدم بيجروا ورا كورة ابيض ف اسود..لأ بس بيلونوها ساعات عشان مانظلمش الناس برضو

ودا حقهم ياجماعة..هى شغلانتهم وأكل عيشهم كدا..يرموا الكورة ويجروا وراها

واللى يجيب جون ياخد تكييف وعلبة شوكولاته جلاكسى وشقة اربع أوض وصالة وملعب صغير عالروف

طيب هى دى شغلانتهم..ولازم يكون فى ناس بتتفرج..وماله ماهو قطع العيش مر

انما الناس مابقتش تتفرج وبس..دى بقت بتعادى بعضها بسبب الكورة..واحتمال تقوم حرب عربية قومية بسبب الكورة..والراجل بيطلق مراته بسبب الكورة..ويولع ف محل جاره بسبب الكورة..ويرمى ابنه مالشباك بسبب الكورة(ممم وسعت دى شوية)...ويجيله ضغط وسكته ويموت برضو مالكورة..ويحطو على قبره كورتين حراسة عشان اللى بيسرقوا الاعضاء

يقولك الكورة هى ملاذنا الوحيد مالمصايب اللى فوق نافوخنا..مانتو تنضفوا الدماغ دى الاول عشان تعرفوا تعالجوا مصايبكم

ويمشوا بمثل..معاهم معاهم عليهم عليهم..يكسبوا الماتش يولعوا الدنيا ويبقى عيد قومى ويبقى اللعيبة ابطال حرب

وهاتك يامدح وأغاااااااانى وزمامييير ومصر هى امى

ويخسروا الماتش برضو يولعوا الدنيا بس يبقى ميتم قومى ويبقى اللعيبة مجرمين حرب

وهاتك ياشتايم وفضايح فيهم ولسانهم شغال زى لامؤاخذة الطور فى الساقية

مش عارفة بصراحة مين اللى بيضحك على مين...واللا هو خلاص بقى طبع عندنا بنييجى فى الهايفة ونتصدر ونصدرها كمان..بس مافتكرش حد هايستوردها

مع احترامى لاى رياضة..على عينى وراسى..بس مش كدا ياجماعة

عندنا مواضيع وقضايا ومشكلات متلتلة على قلبنا وشيلها يهد الحيل عاوزين نتجمع ونشوفلها حل

واللا خلاص نفسنا انقطع ومش بيشتغل غير عالكورة ولعب البلية

انا لم اشاهد الماتش ولم ارى الاهداف..ويااااأسفى فقد اضعت فرصة عمرى لأرى النصر بعينى وأسجد شكرا لله على استرداد كرامتنا وعزتنا وارضنا..لامؤاخذة شكلى سرحت فى الكلام

وبيقولك فى التلافزيون..مصر ذكر اسمها فى القرآن

هو سيدنا يوسف لما قال لأهله ادخلوها بسلام..كان ساعتها فى ماتش كورة ومانعين دخول الناس الملعب واللا ايه مش فاهمة لامؤاخذة

ربنااااااااا قال ادخلوها بسلام..ارض سلام وخير وبركة..ارض ناسها بيعرفوا يدافعوا عن الحق ومايسكتوش على ذل ولا على باطل

جنودها خير جنود الارض..مش فى الكورة ياسادة..فى الدفاع عن الارض والعرض ورد الكرامة اللى اتبعزقت

انا هاروح انام مش عارفة واجعة دماغى ليه..ادينى بهاتى فبلاعتى والارزاق على الله

خدوا الماشز دى وصلتنى..كلها حكم الصراحة

شوف بيقولك ايه:

شنخبت السفاتر لتوعكم..فصارت تقعنش فى طنيس الزلحبص

(صارت: أى أصبحت)

وتصبحوا على خير

انا رجعت..غصب واقتدار

سلام الله عليكم ورحمته وبركاته

معكم سارة - سورسارة..من البلاعة بعد النيولوك الجديد الطازة

وعاوزة اسألكم: هو حالة اللاوعى الكتابى والإقفال الكى بوردى وسدت النفس اللا إرادية اللى كانت عندى..ولازالت..هل دا فيروس منتشر زى الخنزرة والفرخنة واللا منحصر فقط على السرسرة اللى هى انا؟؟

انا من ساعت أخر بوست وانا قعدت شهرين كدا مش بكتب لكن بعدها الموضوع تطور وتعمق ولقيتنى مش عارفة اكتب اساسا وكل مادخل المدونة اشوفها وادمع شوية وامشى

!!!!!

ووصل الى مسامعى ان التدوين بقى كوكب تانى من كتر الاعداد اللى اشتركت فيه

وان فى ناس برضو زى حلاتى اختفوا وتاهوا وسط الزحام

وناس تانية لسه بتعافر علشان تثبت وجودها

وناس لسا نمنم عاوزة تقتحم الساحة وتخوض المعارك التدوينية

انا كنت بتابع من بعيد..ماهنش عليا بعد العشرة دى انى اقفل المدونة اللى كانت وهاتفضل الملاذ الوحيد ليا وبيتى اللى برتاح فيه

ومن غيرها فعلا كنت زى الشارد المتشرد المشرود المبشور اللى ضيع من ايده ذكريات 3 سنين بحالها..بكل مافيها من حلاوة ومرارة وفرح وحزن وغضب وملل ومرض ووقوف وسقوط ونوم وصحيان وتهييس فى الجد وتهييس فى الهزار

انا اتهزقت الصراحة من ساعت ماقفلت المدونة واخدت دش معتبر من الاصدقاء الصدوقين المدونين

ومن الاصدقاء الصدقوين اللى ملهمش فى التدوين

فات عليا مواضيع كتير ومصايب اكتر حصلت قى الدنيا وكل مااقول هافتح بلاعتى وارمى فيها غيظى وفرستى

احس كأنى جوا بيضة مقفول عليا وبنقر زى الكتكوت بس قشرة البيضة اجمد من حديد عز

وعليها اقفال بعدد الايام اللى بطلت فيها كتابة
.
.

دلوقت نقرى فى القشرة جاب نتيجة..وبفضل اللى ساعدونى وزعقولى وشدونى من ودانى

انا رجعت من تانى

افتقدكم جداااااااااااااا

واشوفكم مع اول بوست من تخاريفى

قريب ان شاء الله

(: --سورسارة المحطة--

إيميل من دهــب

وصلنى النهاردة ايميل جااااامد جدااااااااااااااا
وطوييييييييييييييييل جدااااااااااااااااااااااا

بس يستاااااااااااااااهل جداااااااااااااااااااااااا

لانه مهم جداااااااااااااااااااااااااااااااااااااااااااااا

وانا عن نفسى فهمت منه حاجات كتيييير جداااااااااااااااااااااا

كانت ملخبطانى جدااااااااااااا زى ماهو واضح فى اخر تخاريفى

وعنوان الملف

 ** شبهات حول قضية غزة وحماس والرد عليها **

:الميل بينقسم لاربع اقسام

أولاً: الشبهات في فتح معبر رفح والنظام المصري

ثانياً: الشبهات المتعلقة بحركة حماس

ثالثاً: الشبهات المتعلقة بالقضية الفلسطينية والفلسطينيين

رابعاً: ردود عامة و توجهات في الحوارات

هو طويل اوى وعشان كدا انا نقلته فملف ورفعته ودا رابط التحميل

كليك وادعيلى

لامؤاخذة لو اسم الملف عنجليزى ..تقريبا الموقع عنده حساسية من العناوين العربى 

:)

بجد ياجماعة ايميل من دهب ياريت كلكم تحملّوه وتنشروه

وشكرررررررا لباشمهندز مصرى عالميل العظمة دا

يجعله فميزان حسناتك وكل اللى هاينشره.. آاامييين

مبروك علينا - الاحتلال

العواف عليكو يااهل مصر الكرام

خلليكو زى مانتو محدش يقوم..هو انا غريبة برضو

خللو المتنبل متنبل واللى هيولع فنفسه ياريت لتر جاز معاه ولو انه دلوقت نادر لتصديره لاخوانا البعدا ..واللى سرحان فى الكابتن كوم امبو ربنا يوفقه ويلاقى لغز ورك النملة المفقود

بصوا بقى ياخوانا... احنا طبعا شايطين من سرئولة واللى بتعمله فينا

وانا طبعا من كتر لخبطة الكلام اللى عمالة بسمعه وبشوفه كل شوية جالى هسهس وصواميل دماغى فكت

وفكرت دلوقت فبدأ تنفيذ حركة انتحار جماعية لدفس الراس العربية فى الرمال

واهو لو مانقطعش نفسهم يبقوا عالاقل اخدو تان مالشمس

 

كنت من شوية عالهاتف مع الاخت المبجلة عاشقة الفردوس ابو العافية من قطاع الاخبار المنزلية وقعدنا نرغى

بتقولى: لسا قافلين المعبر والقوافل والدكاترة المصريين والاجانب اتخشبوا مالوقفة ومش عارفين يدخلوا القطاع

قلتلها قطيعة ياختى تقطع ولاد الحرام اللى خربوا البلد ووكسونا وخلو راسنا اد الرملاية

واللا البيج راس لما قال الحتة دى بتاعت سرئولة وومش هندخل ولاهنخرج حاجة غير لما نقولهم

ياشيخ روح اسند طولك الاول واللا خدلك حبوب تقوية لعضلات لسانك اللى اتفكت دى

افتكرت وانا بكلمها دكتور عندنا فى الجامعة لما كنا شوباب بقى ودمنا حامى وعاوزين يفتحولنا الحدود عشان نروح نحارب

(ماهى دى مش اول مجزرة تتعمل ودمنا يغلى فيها.. بس عادى بيرجع يبرد تانى)

المهم قاللنا هو انتو فاكرين يعنى لما يفتحولكم الحدود وتلاقوا الرصاص والقنابل زى المطرة هتعملو ايه

اخرتكم هتجروا زى الكتاكيت وكل واحد فيكم يقول انا عاوز اروح عند امى

مانتو ماشفتوش الحرب شكلها ايه.. ماشفتوش ازاى يموت زميلك اللى جنبك وتمشى طول الطريق شايل جثته

قالتلى: فعلا الاطفال فى فلسطين اشجع من الف راجل عندنا

وهو صحيح فين الرجالة اللى عندنا اللى بيعيطوا عشان مهند ونور ام لمبة سهارى

واللا فين الستات اللى كل همها انها تخلف اولاد وتعدهم انهم يكونوا شهداء زى الست الفلسطينية اللى كان كل همها دا

ولما اولادها كلهم استشهدوا هى اللى بقت ماسكة السلاح

قلتلها انا كنت ف رفح من كاااااااام سنة والحال هناك كرب

اهمال غير عادى

الناس اللى عالحدود حالتهم صعب

العلم المصرى متقطع ميت حته

واللا لما رحت شرم.. ارض الفساد زى مابقول عليها

العربيات معظمها ارقام عبرى.. حسبى الله ونعم الوكيل

يعنى العالم دى تروح وتيجى ونبوس الايادى كمان

امال رجعنا طابا ليه

واللا رجعنا سينا ليه اساسا

طالما هما كدا كدا راجعين ليهم تانى

مصر كلها راجعة ليهم تانى

على رأى عاشقة الفردوس لما قالت انه مخطط قدييييم ومكتوب دولتهم مالنيل للفرات

جم ياخدوا النيل

اتردموا فيه

جم ياخدوا الفرات

الحمدلله بفضل القرد ابو شوز خدوه

جم ياخدو مصر تانى

مممممممممم.. طيب فى حتة قماشة متر فمتر خامة غزاوى نفرتكها الاول ونولع فيها وبعدين نروح مصر

وبصراحة انا مش لاقية وقت اسهل من دا انهم يشرفونا فيه

وبالذات ان الركن السيناوى كله مش طايق البلد .. وعندهم حق هو فى حد بيعبرهم واللا بيعبر الاقاليم كلها اساسا

هما اللى عايشين فيهم بتوع المخدرات والسلاح والذى منه.. بس سرئولة تدى اشارة الاقتحام

هتلاقيهم بيهللو ويزغرطو وانتو فينكم من زماااان..ايييييييييه فين ايام النضافة والنظام والجمال والفخامة والرواقة.. يامرحبا يامرحبا

الحمدلله ماتأخرتوش علينا كتير

 مع الاعتذار للسيناوية واللى احب عندى من المنايفة كلهم.. بس للاسف اللامبالاة اللى ميعشين الناس دى فيها تخللينى اتوقع انهم ممكن يعملو كدا

المهم ماطولش عليكو ولا على نفسى

البلد دى لو فضلت كدا.. وواضح اوى انها هتفضل كدا

يبقى علينا السلام

انا معنديش حاجة زيادة اقولها عن اللى بيحصل فغزة لان المدونين الحمدلله قايمين بالواجب

ربنا يجازيهم كل خير

واحب اذكر بعض منهم عشان اللى حابب يشوف اللى بيكتبوه

مدونة نهر الحب.. او اوتار

جبهة التهييس الشعبية

بت خيخة.. ولو انى مفتكرش

قوس قزح

كوكب آبى

رئيس جمهورية نفسه.. حمدلله عالسلامة

ودا بوست كتبه مهندس مصرى

حول غزة والمعبر نحكى علهم يفهمون

بوست رائع وشكله تعب اوى فيه ربنا يكرمه هو وكل اللى بيحاولو يوصلو كلمة حق

وانا بالنسبالى حبيت اشارككم السيناريو القادم

صحيح.. عاشقة الفردوس بتقترح حملة لرعب السرئوليين

cam frog على غرف الشات.. بال توك.. سكايبى.. الضفدعة كام..قصدى

اللى مشترك عليهم او اى غرف شات يدخل باسماء يهودية ويشوف الغرف بتاعتهم ويبعت كلام يخوفهم زى مثلا ان فى واحد هيفجر نفسه..اى افتكاسات مرعبة يعنى

انا حبيت اوصل اللى هى قالته لانها امنتنى انى اوصله.. مش عارفه الفكرة دى ناجحة واللا ايه

وكله على الله

وانا مستنية الفرج.. لما السرئوليين يهلو ابقوا صحونى

صورة وصلتنى ولاتعليق

توينتى سريس مع باقة ورد- وأجدعها زير لـ2008

اولا توينتى سريس لانه طبعا السنة اللى فاتت كانت توينتى تو

وكل ماالسنين بتعدى بتقع معاها ورقة من شجرة عمرى

: يعنى كل اللى يدخل هنا يسيب مناديل فلورا ناعمة وقوية عشان ناوية أغنى 

ماكنش يومك يانقاوة عينى

ثانيا باقة الورد مش ليا

دى للاخت الفاضلة 2009

اللى كلها بالظبط نص ساعة وتهل علينا

والواحد مش عاوز يتشائم .. بس ياريت لو فى رحلات لكوكب زحل لانى مش مستعدة اقضيها ع الارض اكتر من كدا

وثالثا بقى الكل يستعد لرمى القلل وانا عشان كريمة هتبرع بأكبر زير فخار منقوش بأجود انواع الطين البلدى

ورابعا اسمحولى اقدم لكم نشرة اخبارية مختصرة عن ال365 يوم اللى فاتوا من عمرى

هناااااااااااااا محطة البلاعة الاخبارية والساعة الان حداشر ونص .. التوقيت اللى صرصارة نزلت فيه الدنيا وقالت وااااااااء

بالنسبة للنشرة العملية

صرصارة ولله الحمد عدت كورس جامد جدا كان لمدة 8 شهور وبقت دلوقت

international trade marketing specialist

بس الحمدلله برضو سبع صنايع والبخت لسا بندور عليه

وبالنسبة للنشرة الاجتماعية

صرصارة ومن اول السنة برضو اتعرفت على اجدع واجمد وافظع واروع مدونين فى القطر المصرى.. ودا كان تعارف تعدى حدود الشاشة والعالم الافتراضى ووصل الى عالم الواقع بكل فوله وطعميته

وتتمنى دايما اننا نفضل عيلة كبيرة تتمدد وتنتشر وينضم ليها العديد والمزيد من ابناء الجيل البلوجرى

بالنسبة للنشرة السيكولوجية:

صرصارة والى حد ما جمعت ثقتها بنفسها وعرفت مين اللى بيحبها عشان هى صرصارة وبس

ومين اللى بيحبها عشان هى صرصارة وممكن تساعد ف أزمة أو رأى وبعدها تاخد صابونة

ومين اللى مش بينزل من زور ولابس ماسك على كل لون ياباتسطا ومع ذلك لازم صرصارة تكون كويسة وعسولة عشان ماما تحبها وتجيبلها شوكولا

وكمان عرفت ان الدماغ الصرصارى دماغ حر اصيل دهب عيار 36 ومش اى حاجة تليق عليه وان المستوى الصرصارى مش هينزل لبيع ملابس بسبعة ونص وتعالى بص لانه اللى اندفع فيه مش قليل

ولكن مع كل ذلك صرصارة لازالت وسط كل ماتكتبه من كلام يقال عليه بيسخسخ مالضحك الا انها تخفى وراءه خجل صرصارى من النوع الزائد عن اللزوم وايضا تقلل من الشأن الصرصارية لمنعها من الاصابة بعدوى الغرور..كفانا الله شره

بالنسبة للنشرة العاطشفية:

صرصارة اخدت مقلب معتبر والحمدلله ربنا سبب الاسباب عشان تعرف المعدن الاصيل من المسوس

 واستقرت على اعتزال وجع الدماغ دا والاخد بحكمة المعلم دعبس بتاع الانابيب واللى بيقول

نو مان نو كراى

ولكن واضح ان 2008 حبّت تصالحنى فابعتتلى قلب دهب مليان ياقوت ومرجان وصرصارة فرحانة اوى بيه وبتدعى ربنا انه مايصحيهاش من الحلم الجميل دا

بالنسبة للنشرة العالمية:

موجود هنا فى الارشيف الصرصارى اى خبطة سياسية دولية هزت الكوكب.. ولو فى اى حاجة ناقصة فهى بتقدم اعتذارها لان السنادى كان نشاطها التدوينى محدود يادوب مترين فربع متر

وفى الختام نتمنى للجميع عام (هجرى-ميلادى) سعيد مديد مفيد جديد لطيف ظريف خفيف على القلب والرئة

والسلام عليكم

ملحوظة:

كل سنة وانتى طيبة يابلاعتى.. عيد ميلادك عدا من شهر ..عقبال تمناشر سنة واحنا سوا مع بعضينا وعساسيل وامامير 

نعـــى.... وقصيــدة

مساء النكد والقهر والسواد اللى مش ناوى ينزاح بقى ويورينا نور الشمس ومعاه فرحة الانتصار ولو حتى يوم واحد وبعدها نتنكد تانى

ماهو بقى مكتوب علينا نتحول من جيش صلاح الدين لجيش من المذلولين ومن الفئران المدفوسة فجحورها ومتغطية بالجبن والذعر والهوان

هو احنا هنفضل لحد امتى نتفرج

ونعيط لحد ماتنشف دموعنا ونستورد عبوات دموع معدنية من الخارج

وهنفضل لامتى نصرخ فى السما ومحدش يسمع صوتنا

هنفضل لحد امتى محبوسين فى القمقم دا, والقفل بتاعه مع الرؤساء والحكام والقادة اولياء امورنا اللى المفروض يراعونا ويحافظوا علينا وعلى كرامتنا اللى اتبعزقت وبتتبعزق فى الوحل كل دقيقة

خلاص..بقى دا السيناريو الدموى اللى اتعودنا عليه من اكتر من ستين سنة

ومن قبلها كمان

كل شوية يضربوا ويقتلوى ويدبحوا ويأسروا

واحنا نشجب وندين ونستنكر ونرفض وفنفس الوقت

بنبوس القدم ونبدى الندم على غلطتنا فى حق الغنم

.......أه..... الغنم

الغنم الوديع اللى الديابة بتوع فلسطين عمالين ياعينى ينهشوا فيهم وييهوشوا عليهم بالبمب والصواريخ المصنوعة بحديد مصدّى

ماهما الديابة بتوع حماس اللى سبقوا بالضرب وبالنار

وعلى رأى الغلبان المسكين اللى اتكلم باسم الجيش الاسرائيلى المقهور وقال لمذيعة قناة الجزيرة وهو بيرد على حماس:" ضربنى وبكى وسبقنى واشتكى"... قالها بالحرف الواحد

وطبعا عشان كدا احنا كمان ضربنا لان الديابة بتوع حماس خانوا العهد اللى كان بينا وضربونا على خوانة

طيب معلش حقكم علينا ..ماهو احنا نستاهل برضو

نستاهل اننا سايبنكم لبلاويكم ومصايبكم

سايبينكم على هواكم وبنساعدكم كمان على الجرم اللى بترتكبوه كل ثانية فحق اخواتنا

لا...أسفة انى اقول علي الفلسطيين اخواتنا

مانتو فعلا لو اخواتنا يبقى كان المفروض اننا نكون معاكم ونساندكم ونرفع عنكم محنتكم

أسفة اننا مش اخواتكم...أسفة اننا إديناكم ضهرنا ودايرين ورا الهيافات

ورا هز النواعم... ورا بنا الفنادق والملاهى..ورا بيع البترول والغاز الطبيعى للى ماصين دمكم علشان يشحنوا ويفرغوا رصاصهم في قلوبكم

أسفة ان كل متحدث باسم دولته العربية سايب المصيبة اللى احنا فيها وعمال يتكلم عن بطولات وشهامة زعيمه والمواقف المعادية اللى بيتخدوها ضد اسرائيل

ودايرين يهزقوا فى المصريين اللى لولا قضيتكم كان زمانا ملوك العالم.. ولولا السادات كان زمانا زيكم عايشين فى غابة اليهود

دلوقت بيفتكروا السادات وبيترحموا عليه بعد ماتهموه بالخيانة

ودلوقت بيهينوا فى مبارك ويهزقوه وبرضو يتهموه بالخيانة والتواطؤ مع اسرائيل

---------طب وباقى العرب فين لما احنا اللى خونة وولاد

انا بعتذرلكم باسم المصريين الغلابة المقهورين الفقرا اللى زيكم ومش لاقيين اللقمة الحاف ومع ذلك قلبهم معاكم وشايلين همكم

وياريت بإديهم حاجة يعملوها لانهم ببساطة مش قادرين يحرروا نفسهم .. وفاقد الشىء للاسف لايعطيه

أسفة اقولكم اننا كمان مغلوبين على امرنا

أسفة اقولكم ان مجرد دموعى ودعواتى مش هييجى حاجة جنب حجر بترموه فوش الدبابات

دا اللى بإيدى... دا اللى بإيدينا........ وحسبى الله ونعم الوكيل

****************************************************

-أشلائكم هدية كل عام-

قصيدة او مجرد كلام مش عارفه بس اللى اعرفه انه خارج من اشواك محبوسة فقلبى

فوق التلال المحتلة

يجلس ملك الظلام

يجتمع بطاولته الخفية

يستمع لمباركة الحاخام

ينتظر شروق الشمس

يترقب خروج الطلاب

انتهى وقت الدراسة

وحان وقت القتال

يستعد ليزين الشجرة

برؤوس وأشلاء الاحرار

النساء يوقدن الاوانى الفارغة

الرجال سلاحهم الاحجار

الاطفال يصرخون جوعا

والشيوخ يدعون الإله

يترقبوا لحظات الموت

يستعدوا لمفارقة الحياة

تُطلق رصاصة وتُرمى قنبلة

تزأر الدبابة بعلو الطائرة

هيا اسرعوا لجمع الزينة

اجلب لى هذه الذراع

وتلك القدم لتثبيت الشجرة

ورأس الطفل مكان النجمة

ولاتنسوا آبار الدماء

فهى نبع الاحتفال

بمرور عام آخر

من تواصل الاحتلال

فلنحتفل بزيادة الآلام

فلننثر رائحة الموت

فأشلائكم هدية الميلاد

أشلائكم هدية كل عام

شـــوز الوداع...وعجبى

الزمان
مش عارفة بالظبط بس افتكر من كتييير

المكان
احدى البيوت العراقية فى قبيلة بنى زيد القحطانية

مشهد واحد:
منتظر الزيدى يتناول فطوره ويحبس بالشاى العراقى
وبعدها يمسح فردتين الشوز الاسود بتاعه مقاس 43 ويلمعهم عالسنجة

وعلى انغام ام كلثوم:
فااااااااااااات المعااااااااااااااااد
وبقينا بعااااااااد بعاااااااااااااااااد بعاااااااااااااااااااااااااااااد
والنااااااااار الناااااااار بقت
دخاااااااااااان ورماااااااااااااااد
فاااااااااااااات المعااااااااااااااااد
ويرد عليها منتظر:
لاااااااااااا ياسومة المعاد مافتش هو صحيح فاضله شهر ويتكل من الرياسة لكن لسا فى تنتوفة نار مشعللة جوايا ولااااازم اطفيهاااااااا

مشهد اتنين:
الام فى وداع ابنها
يعنى يابنى لازم تعمل العملية الاستشهادية دى.. دانت لسا يادوب 29 سنة والحياة قدامك
مش كفاية ابن عمتك وابن خالتك واخو جوز بنت خالك اللى راحو فى شربة قنبلة
منتظر بيرد:
ياأمى انا فاض بيا الكيل خلاص وحتى لو لسا شباب .. اللى حصلنا وبيحصل فينا دا يخللى اللى عنده سنتين يشيب
الام بتنهيدة حارة مولعة ياعيني والدمع بيفر من عنيها:
خلاص يابنى روح ربنا يوقفلك فكل خطوة مؤيد ويبعد عنك شر المستخبى

مشهد تلاتة:
بعد ما تناول الكاوبوى الامريكى بشبش الغديوة المعمولة مخصوص عشانه والمكونة من فطيرة الدهب بالزتون الاسود المهبب
مع عصير البترول بالبلح العراقى
جه معاد المؤتمر الصحفى بينه وبين نورى الملكلك زير وزراء العراق
وبعد مارموا اجدع تماسى على الموجودين من صحفيين ومصوريين ..و بودى جاردات
بدأ الريس بشبش يتكلم ويادوب لسا جاى يقول:


ياجماعة انا مش عارف اقولكم ايه والله على التضحيات الجامدة والملاين اللى ماتت فى سبيل ان امريكا تعيش وتنغنغ من خيركم وخير العرب اللى دورهم كلهم جاى واحد واحد بس عشان احنا دولة نظام فاماشيين بالدور ياجماعة مش عاوزين لخبطة كله هياخد حقه من القنابل والمفرقعات وابو غريب وام جلامبو
وانا هنا عشان نعمل اتفاقية حرامية الامن بينا وبين العراق وهننقل الاف بى اى والسى اى ايه ومخابرات البنتاجون عندكم وكل دا عشان بياض عيونا.. قصدى سواد عيونكم

دا كله كان فى نص دقيقة لانه ملحقش يتهنى ببنص الدقيقة التانى ولقى خير اللهم اجعله خير فردة شوز اسود عيار 43 متلمعة بورنيش صدام للاحذية الفاسدة وطايرة فوق نافوخه




يامااااميييي..الحقنى ياعمو نورى العيال الوحشة بتحدفنى بالشوز..واااااااااء


ولسا جاى يصلب طوله من اول فردة لقى اختها بتحصلها ومالحقتش تخبط فوشه المسمسم المسبهل
بس لمست العلم ابو نجوم

ودى للى ماتو واتيتمو بسببك يا............


مشهد اربعة:
جراد من الحرس والجتت العريضة المنكعين تنقض كالوحوش المفترسة نحو الصحفى منتظر الزيدى وينهالو عليه باللكمان والضربات وجروه مثل البنى ادمين .. لانهم هما اللى بقوا ينجروا فى الزمن دا:-(


ونورى المكلكع يعتذر لبوش بالنيابة عن جميع العراقيين.. يعتذر لنفسه ياخويا ايش حشره هو فباقى مخاليق ربنا

وبشبوش المنفوش المسبهل المستعبط كعادته بابتسامته الباردة المستفزة وكأن اللى انضرب بيها دى وقية طماطم وبيضتين
يقول للجماهير الغفيرة:
انا كويس ياجماعة ماتقلقوش عليا.. دى جزمة وعدت
وبعدين اخونا دا شكله عاوز يلفت الانتباه وخلاص ..هاييجى ايه دا جنب المصايب اللى انا عملتها وحفرت بيها اسمى فى التاريخ
دول حتى فردتين مقاس عشرة لاراحوا ولاجم.. وانا بقولكم اهو انا مابحسش ومابتهددشششش

بس اللى ميعرفوش ان الجزمة دى مقامها عالى اوى عندنا والضرب بيها معناه غالى اوى برضو وبالنسبالى انا فرحانة انها مصابتهوش وانه نزل تحت عشان ماتخبطوش.. دا معناه ان الشوز دا مقامه اعلى من مقامك ياسى الامبرا-طور

واحد من ممثلين امريكا بيقولك بطريقة امريكانى شيك
have a nice vacation

واحنا كمان قولناها على طريقة منتظر


هذه جزمة الوداع يا.......بوش


واحب افكركم بالصورة دى اللى نشرتها فموضوع زيارة بوش لينا

دى زغروطة البلهاء
قلت اجيبها هنا لانه هو انسب واحد يزغرط فى المناسبة دى:-)
وماشربش الشاى...اشرب أزوزة انا

كلمتين جد بقى:
ياريييييت اللى يعرف يعمل لوجو عليه صورة حلوة كدا لمنتظر ومعاها كلمتين جامدين عشان نحطها فكل المدونات
الله يكرمكم عالاقل نفضل فاكرينه ونحييى ذكرى الحادث الجامد دا وماتبقاش شعلة حماس فوقتها وبعدها كله هيشد اللحاف وينام كالعادة
ياترى حد ممكن يساعدنى فكدا؟