Thursday, November 12, 2009

انا رجعت..غصب واقتدار

سلام الله عليكم ورحمته وبركاته


معكم سارة - سورسارة..من البلاعة بعد النيولوك الجديد الطازة
وعاوزة اسألكم: هو حالة اللاوعى الكتابى والإقفال الكى بوردى وسدت النفس اللا إرادية اللى كانت عندى..ولازالت..هل دا فيروس منتشر زى الخنزرة والفرخنة واللا منحصر فقط على السرسرة اللى هى انا؟؟




انا من ساعت أخر بوست وانا قعدت شهرين كدا مش بكتب لكن بعدها الموضوع تطور وتعمق ولقيتنى مش عارفة اكتب اساسا وكل مادخل المدونة اشوفها وادمع شوية وامشى
!!!!!



ووصل الى مسامعى ان التدوين بقى كوكب تانى من كتر الاعداد اللى اشتركت فيه
وان فى ناس برضو زى حلاتى اختفوا وتاهوا وسط الزحام
وناس تانية لسه بتعافر علشان تثبت وجودها
وناس لسا نمنم عاوزة تقتحم الساحة وتخوض المعارك التدوينية


انا كنت بتابع من بعيد..ماهنش عليا بعد العشرة دى انى اقفل المدونة اللى كانت وهاتفضل الملاذ الوحيد ليا وبيتى اللى برتاح فيه
ومن غيرها فعلا كنت زى الشارد المتشرد المشرود المبشور اللى ضيع من ايده ذكريات 3 سنين بحالها..بكل مافيها من حلاوة ومرارة وفرح وحزن وغضب وملل ومرض ووقوف وسقوط ونوم وصحيان وتهييس فى الجد وتهييس فى الهزار


انا اتهزقت الصراحة من ساعت ماقفلت المدونة واخدت دش معتبر من الاصدقاء الصدوقين المدونين
ومن الاصدقاء الصدقوين اللى ملهمش فى التدوين


فات عليا مواضيع كتير ومصايب اكتر حصلت قى الدنيا وكل مااقول هافتح بلاعتى وارمى فيها غيظى وفرستى
احس كأنى جوا بيضة مقفول عليا وبنقر زى الكتكوت بس قشرة البيضة اجمد من حديد عز



وعليها اقفال بعدد الايام اللى بطلت فيها كتابة
.
.
دلوقت نقرى فى القشرة جاب نتيجة..وبفضل اللى ساعدونى وزعقولى وشدونى من ودانى

انا رجعت من تانى

افتقدكم جداااااااااااااا

واشوفكم مع اول بوست من تخاريفى
قريب ان شاء الله

(: --
سورسارة المحطة--







7 بعبر ياشعب:

رفقة عمر said...

يا احلى صورصارة شوفتها بقيت احب الصراصير موووووت
من ساعه ما عرفتك يا صورصرتى الجميله
اوعى تكتبى البوست الجديد بعد شهرين تانى
انتظر البوست الجديد على شوووق
مبارك الافتتاح ويارب مش تنقفل ابدااا
تانى

nigro said...

مييييييين ؟
ساااااارة
حمدلله على السلااااااامة يا سورسارة
أنا ماصدقتكش لما لقيت موضوع جديد عندي في الريدر
ده أنا كنت فقدت الأمل يابنتي
يلا حمدلله ع السلامة
هو فعلا زي ما قلت كده يا سارة
أغلب الرعيل الأول من المدونين العباقرة - و أنا بأعتبرك منهم طبعا - اللي وضعوا حجر الأساس للعالم ده
واللي بدأوا تدوين في 2006 و 2007
اختفوا و بطلوا كتابة
و فيهم اللي قفل مدونته
و فيهم اللي سابها و مسح منها كل البوستات
عارفة يا سارة
أنا كتير قوي بأدخل عند الناس دي و بأزعل قوي انهم سابوا أماكنهم
كانوا بيقدموا فكر حلو بجد
كلهم كانوا مميزين بجد
دلوقت عالم التدوين دخله آلاف
بس صعب قوي تلاقي حد مميز بجد و عند فكر مختلف
دلوقت ممكن تدخلي عشر مدونات ورا بعض ولا تحسي بفرق ولا تحسي بحاجة اصلا

يلا معلش دوشتك

حمدلله ع السلامة يا سارة
نورت بلاعتك و مطرحك


يلا سلام

مهندس مصري بيحب مصر said...

ألف مبروك علينا رجوعك لينا
نورتي عالم التدوين كله من تاني

Lobna Ahmed Nour said...

ويلكم باك نورتي البلاعة يا سورسارة .. خدي "انتي بيوتك " بقى علشان ما تغيبيش تاني .... عايزين على الاقل عشر تدوينات في الاسبوع << شدي حيلك

الطائر الحزين said...

حمدا لله على السلامة

دكتور حر said...

وانا كمان والله

لسه راجع كمان

عين وصابتنا يا صورصارة


عودا حميدا ان شاء الله

šσяšαяαα said...

منورين ياجماعة والله

ان شاء الله هارد على تعليقاتكم بس اليومين دول الحال مكركب شوية

لى عودة ان شاء الله
:)