يامرحبا يامرحبا نورك غطا على الكهربا
(بس بحيى نفسيتى بالعودة اخيراااا لبلاعتى)
المرادى انا داخلة حرب مع وصلة النت.. وعاوزة اى مشاكل تحصل فيها تانى
عشان خاطر رمضان بس كنت مطنشة.. انما المرادى لاممكن يحصل فيها حاجة ابداااا
لقد اشتقت كثيرا لعالم التدوين بكل مافيه .. عامللى عمل دا واللا ايه
وبالطبع كل جمهورى الكريم هايصفق لرجوعى برضو.. مش كدا واللا اييييه
عموما زى مانتو شايفيين العنوان.. تصفيق حاااد.. دا المفروض يعنى لكن بلغتنا الحديثة اصبح تسفيك
بالصدفة البحتة خالص نزل عليا وحى الثقافة وقلت اتصفح الجورنال ولقيت المحاور الاعلامى الجليل مفيد فوزى هيقدم تحقيق عن التصفيق
(وهل هو كذب واللا نفاق (مش حاسة ان الكلمتين مختلفين اوى يعنى
وكمان هيتكلم عن متى يجوز التصفيق شرعا
ماكدبش عليكو انا ماشافتش التحقيق دا لكن استوقفنى الموضوع بصراحة
احنا فمصر ولله الحمد بنييجى للدنيا دى مع تسفيك حاااد
تشجيع للماما واحنا ياعينى مطلعين عينها علشان نعزل
وياللا الراس بانت اهى ..اتجدعنى امال.. وهوبااا نييجى للدنيا الجميلة دى مع تسفيك حااد ماللى فى المستشفى كلهم
فى البيت لما نقول حاضر ومانعملش حاجة غلط بابى ومامى يسقفولنا ويدونا شوكولا
ونييجى فى الدراسة .. اللى يجاوب صح الكل يسقفولو والميس تديلو نجمة كمان
ولما نتخرج من الكلية القاعة كلها تتهز من كتر التسقيف بقى امال ايه اتخرجناااا.. وعقبال شهادة العاطلين الدولية
وكمان صحيح لما نجيب جوووون وناخد الكاس.. طبعا انتو عارفين ايه اللى بيحصل وقتها
اللى فاتو دول كانو تصفيق للتشجيع او للفرحة
مممم وفى ايه تانى ياترى؟؟.. اه التسفيك الحااااد اوى بقى لما مدير المدرسة ييقول الخطبة المملة المعهودة
بمناسبة بدأ العام الدراسى وكل عام وانتم بخير
ولما معيد الكلية يلقى محاضرة بمناسبة استيراد الجودة من الخارج ورشها على كليات مصر المتحدة
ولما الفنان اللى ياحبة عينى زاهد الدنيا ومتطوع لله فـ لله علشان يؤدى رسالة الفن السامية
ياخد جايزة الاوسكار العريبة تقديرا لجهوده الذاتية
ولما مرشح مجلس الشعب يشجينا بدموع عينيه وشحتفته ياعينى على احوال المطحونين من ابناء الشعب
ولما .... قاللا اخبار مؤتمر الحزب الوطنى ايه لو حد متابع يعنى
مااااا علينااااا ياجماعة نتكلم دلوقت بقى عن زمن حدوث التصفيق..ماتنسوش الحاااااد
يبدأ هرمون التصفيق فى الافراز داخل اوردة اليد اول ما
واحد ماللى سبق واللى ماسبقش ذكرهم يظهرو ويبانو عليهم الامان
وكل البشر تديلو جرعة تسفيك حاد لحد ما إيديهم تورم.. يريحو ادييهم شوية على ماياخد هو كمان شهيق ويبدأ يشجينا
وطبعا كل مايقول كلمة الايادى المصرية العظيمة تبدأ فى العمل الجماعى للتصفيق
تقريبا محدش بيسمع ولا بيعرف بيقول ايه من قوة الالحان والسيمفونيات العبقرية اللى بتألفها الايدى البشرية
وياريت ياريت على رأى الست.. ياريت بنسقف واحنا مقتنعين واللا عشان الكلام اللى بيتقال عاجبنا وداخل جمجمتنا
اهو دا بقى التصفيق بغرض النفاق اللى على أصله.. اللهم لا نفاق ولا رياء
نفسى الايادى اللى بتسقف عالفاضى والمليان .. واغلب الوقت بيكون عالفاضى .. نفسى تعمل حاجة عليها القيمة
نعمل بإيدينا حضارة تعيش واللى بعدنا يفتكرنا بيها ويترحم علينا.. يقولو دا كان زمن اصيل استغلو كل حاجة فيه صح
مش زمن جدوره مسوسه وبناياته خلاص مستنية تتساوى بالتراب فأى وقت
انا من هنا.. بناشد كل اللى يقرا الموضوع دا إنه يمتنع عن التصفيق ولاى سبب لغايت لما البلد دى تقف تانى على رجليها
وتستاهل اننا كلنا نحييها
بالمناسبة صحيح.. سمعت ان صاحبة السمو الزعيمى امريكا سقفت لبنت عمنا النيل الغلبان مصر علشان ناوية تستخدم الطاقة النووية
ياخوفى يابدران لايكون تصفيق ماقبل العاصفة
استرها معاانا يااااااارب
*******************************
فقرة اعلانية
صرصارة المفروسة تهنأ جميع الامة الملحوسة بعيد حبينى واخلصى
وهدية منى لكل المحبين.. باقة مخصوص من البصل الاخصر
دا مع شوية فسيخ هيبقى ايه.. غرام وانتقام
اهو حاجة تدخل المعدة بدل الورد اللى بيدخل الرئة
ويجعله عامر ياشعب مصر.. الملحوس
20 بعبر ياشعب:
السلام عليكم
كل سنه وانتي طيبه
رجوع طيب ان شاء الله يا جميل
ومتغبيش تاني
عايز اقولك اني شوفت الحلقة
ومعجبتنيش
لسببين مش هقدر اقولهم
بس الاهم ان التصفيق اوقات بيكون تشجيعي
في الحالة دي تقدري تعتبريه نفاق
يعني مثلا لما ابنك يعمل حاجه كويسه بس متستحقش قوي
انتي تعمليله هليله
علشان بس يتشجع يعمل اكتر
اما التصفيقات اللي انتي قولتي عليها بتاعت المدير والوزير والعضو والغفير
ربنا يرحمنا بقي
حمدلله علي سلامتك
حمدا لله على سلامتك
واهلا وسهلا ويارب ما يسد لك بلاعة
وبعدين نسيتى اللى بيردحوا لبعض بيصقفوا بردة
اما النووى اوعى تكونى مصدقة!!!!!!
سحمدله ع الحلامه
قصدى حمدله ع السلامه
يارب تفضلى فى بلاعتك على طول كده وما تنسدلك بلاعه ابدا
تصفيق حاد بيدبح لعودة الأستاذة صرصارة
السلام عليكم ورحمة الله وبركاته
تصفيييييييييييييييييييييييييق حااااااااااااااااااااااااااد
ايوه كده يا صرصارتي ارجعي نوري البلاعه من تاني ، واوعي تغيبي علينا تاني ، وحشتينا خالص مالص
مستنين مواضبعك الجديده
حمد الله علي السلامه
حمد الله على السلامه يا صورصارتى
انا كنت كتبت تعليق بس مش لقياه :(
ياله خير
اهم حاجة متغبيش كدا يابنتى عننا تانى
السلام عليكم جميعا
انا متشكرة اوى لكل اللى شرفنى وفرح لرجوعى
بجد انتو من احسن الناس اللى عرفتهم
بس اعذرونى انا نفسى مسدودة عن الكتابة مش عارفه فى ايه
بس عموما انا بخير الحمدلله
ربنا يجزيكم كل خير
سلااااااااااام
ممكن أستغل المساحه دى واعمل اعلان صغير
16 نوفمبريا جماعه..مستنياكو يوم الجمعه الجايه الساعه 8 م..قاعة الحمكمة بساقية الصاوى
هانتقابل ونحضر حفلة لفرقة أيامنا الحلوه..واحده من اكبر التجمعات البلوجرية المهمه
تعالوا وقولوا للحبايب
اولا مبروك علي شكل المدونة الجديد و النيولوك
مع انة فوتوشوب علي الاخر
ثانيا انا بس معدي اسلم و اطمن يا فندم
اصلي مقاطع التلفزيون المصري و نص العربي
fe3lan 2e7na 27san nas tesa2af..
bas lel2asaf 2elmawheba de malhash soo2 barra masr!!
اولا: حمدالله علي السلامه
ثانيا: جميل وبسيط التصميم الجديد
ثالثا: ساعات والله التصفيق بيبقي علشان الباشا ينجز ومايطولش
هي تقريبا عاده فرعونيه
السلام عليكم
الصراحه انا اول مره ازور بلعتك العسوله دى ودا والله مش نفاق لانها عجبتنى ماشاء الله
انا اللى لفت نظرى تعليق ليكى فى مدونه وكان بيعبر عن نفس احساسى فحبيت اعرف الشخصيه دى
انا قريت الموضوع وعندى تعليق
هوالتصفيق اكيد مش فى كل احوالو بيكون نفاق لا دى وسيله تشجيعيه حلوه اوى وخصوصا للاطفال
بس احنا للاسف سعات بنبوظ معانى حاجات كتير اوى زى الحرية مثلا
انا بس لو تسمحيلى اعدل اخر جمله عندك وهى انو احنا نصفق للموقف اللى يستاهل او عامتا تخلى مشعرك واحساسك يعبر عن نفسو بحرية عجبو الكلام فعلا يعبر عن تقديرو حس انو اتخنق يقوم يمشى
ببساطه احنا ليه عقدنا حياتنا هى ربنا خالقها بسيطه جدا
وياريت تقبلينى عندك كبنوته عجبها اسلوبك
خلى بالك من نفسك
ســـــلام
تصفيق حاد وعليه شوية طوماطوز للابلة صورصارة حمد الله على السلامة
وبعدين التصفيق ده شىء مميز جدا للشعوب العربية بالذات
وموافقة
^_^
اهلا سارة فينك كود وحشتنا و الله خفة دمك و كلامك الجميل و يلا ظبطي خط النت علشان ترجعي تاني...و بعدين يا سيتي انتي مضايقك التسفيق الحاد و الله ساعات بكون علشان نظهر الاحترام لشخص ما و عايزين نبيله اد ايه بنحبه بجد و ساعات او غالبا بمعنى اصح ما بيكون نفاق فا من الاخر حسب النية بئى بس انتي عارفة حتى اللي بيسقفوا نفاق اللي بيسقفوله اصلا بيكون عارف انهم بينافقوه ولاهما طايقينه ولا هما طايقينه فا من الاخر كله نفاق في نفاق..يلا ما علينا ولا تزعلي نفسك و يارب نشوفك على خير دايما ان شاء الله...سلام
دى اول مرة ليا ازور المدونة
بس عجبتنى جدااااا
بالنسبة لموضوع التسفيك الحاااااد
والله ساعات التسفيك بيبقى حاجة مهمة
للتشجيع مثلا او الثناء على حاجة
وعلى راى الاخ مهند
بس مدونة جميلة
اتمنى اشوفك فى مدونتى قريبا
وينكى
انتو بتغيظونى ياجماعة والله انا نفسى احضر معاكم مرة قبل ماموت
بس ماتعرفوش تخللو الوقت بدرى عن كدا
عاااااااااااااااااااااا
::::::::::::::::::::::::::::::::::::::::::::::::::::
ana ga3an
اولا الله يبارك فى حضرتك
وسعييدة جداااااااا بالزيارة دى والله من زمان مانورتنيش
بعدين التصميم انا جايباه كدا مالموقع وفوتو شوب بقى واللى كوفى شوب مش هتفرق:D
ونورتنى بجد واتمنى تكرر الزيارة
::::::::::::::::::::::::::::::::::::::::::::::::::::
hurricane_x
yes ma3a el asaf al shadeed
not available anywhere else
just here in masr
ta7ya masr!!!!
حصان بري
اولا الله يسلمك يافندم
ثانيا متشكرين جدا على هذا الاطراء
ثالثا احنا هنلزق كل عادة عندنا بالفراعنة واللا ايه
لالالالالالالالالالالالالا
ماعتقدش الناس دى كان ليها فى الهيافة اوى كدا:DD
:::::::::::::::::::::::::::::::::::::::::::::::::::::::
ToooKa
وعليكم السلاااااااااام ورحمة الله
نورتيييييينى ياتوكة والله وشكرا على كلامك العسول دا
وانا سعيدة ان يكون فى ناس بتوافقنى فى رأى بكتبه
وكلامك جميل جدا وفعلا اللى عاجبه يسقف مش عاجبه الباب يفوت ديناصور
:D
وتسلميلى ياعسولى واتمنى تنورينى دايما
سلااااااااااااام
::::::::::::::::::::::::::::::::::::::::::::::::::::::::::::
dr-hema
داكتورنا الكبير اوى اوى
مين قالك انى بحب الكاتشب
مش كاتشب دى برضو
والله يسلم سعادتك يافندم
وكويس والله اننا لقينا حاجة تميزنا:))
shreef
اهلا شريييييييف
ربنا يخليك والله على كلامك وهحاول اشوف حكاية النت دى انا اتخنقت والله
وانا عارفه انه فى حاجات كتير ليها اكتر من معنى
بس للاسف احنا بقينا نسىء الاستخدام
ومساء النفاق:)))
:::::::::::::::::::::::::::::::::::::::::::::::::::::::::::::::
Whatever?!!!
تسلميلى يارب واتمنى ماتكنش اخر زيارة
وانا بتمنى بس اننا نستغل اى حاجة نعملها استغلال سليم حتى لو كان مجرد تصفيق
وان شاء الله هزورك قريبا
سلاااااااااااام
صرصارتي ياقمر
وحشاني مووووووووووت ووحشاني بلاعتك جدا
اديني الحمدلله رجعت انا كمان ويارب يارب يجعلها اخر الغيبات
عارفه موضوعك ده فكرني بايه
فكرني لما كنا زمان في المدرسة والمدير يطلع يهزئ فينا وبعد مايخلص الاقي قله كده مكنوش فاهمين ولا مش سامعين اصلا هو بيقول ايه يقومو مسكفين تسكيف حاد :D
بيسكفو لمجرد ان ده المدير وان هو حاجه كبيرة في المدرسة
مابالك بقه بلد بحالها
وبعدين بقه قريت كده خير اللهم اجعله خير ان نفسك مسدودة عن الكتابه
والله اقتلك يعني انتي لما ترجعي نفسك تتسد
سلكيها وسلكي بلاعتك امتعينا بكتاباتك :p
ايه دا يعنى انا هكتب تحت تهديد السلاح
قمووووورة ناوية تقتلنى يامينز
انا هووون وربنا مايقطعلنا تدوين ابدا يارب
بس حلوة اوى جماعة المسقفاتية الالين دول
ههههههههههههههه
والمدير ماشكرهمش بعدها بعلقة واللا حاجة؟
Post a Comment