ايوة موريستااااان ماللى شفته فى المواصلة اليتيمة الحيلة اللى بستخدمها لما بنزل القاهرة
الا وهى طبعا وبدون ادنى شك من غير دبابيس
'''متروووووو الأنفاااااااق'''
اسرع وسيلة للنقل تحت الانقاض.. قصدى تحت الارض اللى فوقيها شوارع جميلة ونظيفة ومبانى بتلمع من كتر الفخامة وعربيات بكل الاشكال والالوان منعا للعنصرية واللا الناس بقى ماقلكوش نماذج بشرية للنظام والاحتشام والاحترام تمشى على الارض.. مين اللى جاب سيرة انقاض هنا انا مش عارفه
(تبعنا المترو اللى فوق دا؟)المهم ماطولش عليكو بقى وزى ماكلنا عارفين يامعشر مستقلى المترو ان عربيات الحريم يعنى النساء يعنى الويمين يعنى نون النسوة يعنى محدش يقرب المكان كله ملغم
ودا حصل اثر مشاغبة وقعت من شوية شباب حليوة كانو فى العربية الاولانية اللى المفروض يعنى انها للسيدات فقط بس طبعا لازم يكون فى بنى ادمين خارقين للطبيعة وركبوا في العربية دى ولما السواق اتنرفز من كتر الدوشة وانهم كل شوية يخبطو عليه ظبط المترو انه يقف لوحده وخرج لهم عشان يوريهم العين الدموية
المترو الذيذ عمل مقلب فى السواق وماوقفش فمكانه ودخل فى المحطة -اخر الخط حلوان معاك ياريس- وكسر الحيطان وكانت ماسأة متروهية
وعشان كدا نقلو النصف البشرى الرقيق الحساس الى منتصف المترو للابتعاد عن اى مصيبة تحصل تانى- لاقدر الله
دى اخوانى الاعزاء كانت الاخبار التفسيرية اللى سمعتها واليكم توابع هذه الحركة التنقليه بالتفصيل الممل...جداااا
دلوقت فات على الحدث دا حوالى شهرين بالتمام والكمال..وكل شوية الراجل المجدع بتاع التلافزيون يقول ياخوانا عربيات السيدااااات اصبحت فى منتصف القطاااااار... تنبيه سماعى
وعلى العربيات دى مكتوب الاولى بالاخضر لحد التاسعة مساءاً والتانية بالاحمر يعنى تحذيير هااااام دى ال24 ساعة سيدااااات فقططط... تنبيه بصرى
وعساكر واقفة عند حدود العربيات اللى رايح واللى جاى يقولوله وسعلك سكة كدا ياعم المكان دا متكهرب.. تنبيه امنى
وافتكر يعنى ان الناس مافقدتش الحواس اللى عندها فجأة عشان تحصل البلاوى اللى بشوفها او بسمعها دى
نقول بقى عاللى حصل..وبيحصل..وافتكر انه هيستمر فى الحدوث
<< 1- كنت انا وصاحبتى رايحين نعمل شووبينج وشافت الراجل داخل عربية السيدات معانا ودى اسبهلت.. معقولة يعنى مش شايف العربية..طيب ازاى راجل يركب عربية السيدات ..دى مكتوبة للسيدات فقط..وجاتلها كريزة ضحك
ياعينى يابنتى يمكن جاية من كوكب تانى وانا معملتش حسابى
2- المحطة زحمة جدا وكل ماييجى مترو الاقى العربية بتاعتنا كلها رجالة ونازلين منشكحين اوى.. دى للرجالة بس هع هع
ونص ساعة على ماعرفت اركب بعد ماواحدة راحت جابت عسكرى شكله كان واخدله تعسيلة وسايب الدنيا عجة
3- لما ركبت المترو اخيرا وفتحت كلام مع زميلتى فى المترو اللى اول مرة اشوفها..الصراحة بيعملو واجب مفيش بعد كدا..مابيبطلوش كلام
حكتلى حكايتين يقطعوا القلب بصراحة
الاولى واحد راكب عربية السيدات وشوية رجالة معاه يعنى الراجل مش لوحده
واحدة اتبرعت وقالتله لو سمحت العربية دى للسيدات بس
راح ضاربها وقالها انا اركب على مزاجى
والبت ياعينى سكتت ومابقتش عارفه تعمل ايه..واالناس بقوا يقولوا عيب كدا وهو ابداااا انا محدش يكلمنى بالطريقة دى
دا على ماسمعت يعنى من هذه الزميلة الفاضلة
تانى واحدة انه مرة راجل كبير فى السن وشكله غلبان اوى واحدة قومته وقالتله دى عربية السيدات بس وخللته ينزل عشان هى تقعد مكانه
دا برضو على ماسمعت
زميلة تانية خااالص قالت انو مرة واحدة ضربت راجل بالشوز لما تطاول عليها وغلس اوى يعنى
4- انا بقى جاية اركب فيوم لقيت ستات نازلة وعمالة تكمل خناقة اظاهر انها كانت مشتعله قبل كدا بس المرادى مع ستات برضو
ليييييييييييه بقاااااااااااا.. اقولكم لييييييه
علشان كان فى رجالة فى العربية لما انا ركبت وواحدة ماللى راكبين قالتلو ايه..اكيد حفظتو بقى..ايوة شاطرين...لو سمحت دى عربية السيدات فقطططط.. بس اظاهر كدا والله اعلم ان الراجل تنح وغلس معاها لييييييه.. لان لبسها غير محتشم...والللى اتخانقت معاها كانت بتقولها انها مش محترمة فلبسها اساسا عشان كدا الرجالة مش راضية تسمعلها
والخناقة كانت شايطة اوى لدرجة بعدها واحدة زعقت اوى لراجل كان طالع العربية والراجل ياعينى اتنطر من مكانه ومن كتر الخضة الباب كان هايقفل عليه لولا لحق يفلفص وينفد بجلده
هنا بقى المشكلة لاتكمن فى وجود رجالة
المشكلة هنا حضرات المستشارين.. فى سلوك البنى ادمين
يعنى ايش عرف الانسة واللا المدام ان الانسة دى مسلمة
بالطريقة دى هتكره المسلمين واللى يجيب سيرتهم.. لانه انا كمان ماحضرتش الواقعة من اولها وماعرفش بالظبط ايه اللى اتقال بس واضح انها غلطت فيها كتير
ولو كانت مسلمة يبقى مافتكرش بالاسلوب دا ممكن تفكر انها تغير من نفسها طالما شايفة انه الملتزمات فى اللبس بيتكلمو بالطريقة دى
والحق يتقال البنت طريقتها وسلوكها متحضر جدا وكان كل اللى تقصده انها تفهم الناس دى ان فى حاجة اسمها نظام وان دا مش مكانهم
يبقى ليه نغلط فى الناس ونحكم عليهم بالمظهر وكماااان ننتقدها علنى قدام باقى الزملاء الركاب
ياجماعة انا كلامى هنا بغض النظر بقى الناس لابسة ايه واللا بتاكل ايه واللا بتسمع ايه
ليه بنتعامل بالطريقة دى
ليه بنكره الناس فينا
ليه مصممين كل واحد فينا انه مفيش حد احسن منه وطالما الشكل تمام وعال العال يبقى اكيد انا من جوايا كويس اوى واكتفينا لحد كدا
كل اللى حصل دا من مجرد لخبطة فى روتين الناس كانت متعودة عليه ولما اتغير لحد دلوقت فى مشاكل وخناقات علشان خاطر عربيتين فى المترو
امال بقى لو نظام الدولة اتغير
واللا نظام الدعم اتغير
واللا نظام التعليم اتغير
واللا نظام امريكا اتغير
واللا نظام الكون اتغير
افتكر حتى لو الحاجات دى اتغيرت للاحسن برضو هنتلخبط ومش هنكون مرتاحين
ماحنا كدا دايما.. ماتهنش علينا العشرة.. حتى لو مع النكد
وشكرن... والسلام عليكم
28 بعبر ياشعب:
ههههههههههههههه
سرساره حبيبتي انا قولت لازم ابقي اول واحده
شوفت بقي يامسعد
:)))))
لاحول ولاقوه الا بالله
انتي يابت ياساره انتي هتخليني اقلق عليكي يابت
هبلغ طنط ماتخرجكيش
خلاص ندخل بقي في التدوينه
ايه يابنتي كميه المخانقات دي
اومال انا اما بنزل مصر بقي مش بلاقي حاجات من دي ليه
رزقك في رجلك
:)))
ساره ياحبيبتي
انا ببقي مبسوطه اما الناس تطبق النظام وان عربيه السيدات تبقي للسيدات والرجال للرجال
بس فيه مشكله الناس اتعودت علي كده
واذا كنت انا نفسي اما بركب المترو بقول لاخويه لا ماليش دعوه لاجي معاك لاتيجي معايا
هههههههههههههههههههههههههههه
يلا بقي فكرتينا يابنتي بالايام دي
هييييييييه دنيا
لا بس انا اتحرق دمي
يعني ايه راجل يمد ايده علي واحده
ليه يعني
كانت جابتله العسكري
سلام ياساره ياحبيبتي
حمدا لله على سلامتك
هذا السلوك عام وليس فى المترو فقط
تحياتى
تحياتي للطرح يا صرصاره
هي دي المشكله اللي بندن فيها
مشكلة التعميم واللا موضوعيه في الحوارات
على رأيك
اومال هنعمل ايه لما التغيير يكون كبير
ربنا يستر
تحياتي
عمار يا مصر
بجد المشكلة مش فى التغيير ولا فى الناس بس
المشكلة اولا فى اللى قايمين على النظام
_ نظام المترو _ يعنى متلاقيش غير عسكرى على رصيف طولة ميقلش عن 000 معرفش قد اية بس طويل
ولو حصل ولا اقولك كفاية
حرام
مترو
بنظام
سارة
ازيك و اخبارك ايه
موضوع جميل و هايل طبعا عن مواصلة ليها اهمية في حياتنا في القاهرة بوصفها الاسرع و الاكثر رقيا ، دا بافتراض كده
عارفة
اول امبارح دخلت التذكرة لقيتها بايظة
و المكنة سحبتها
فبانده على الراجل اقوله على المشكلة
قالي عدي ورا اي واحد
و مر اربع رجالة و احاول اعدي ورا حد فيهم .. ابدا .. المكنة تقفل عليا .. قالي معقولة يا استاذ مش عارف تدخل و را حد
استغربت
هو انا المفروض اعرف ادخل و را واحد
و ما عدتش لحد ما فتحلي المكنة اعدي
ههههههههههه
خالص تحياتي
احمد
صرصاره حبيبتى وحشتينى جدا
بقالك مده غايبه
حمدلله على السلامه
احنا فى السويس معندناش مترو
علشان كده
معندناش عربيه ستات
بس البنت اللى ضربت الراجل بالشوز
واخده حقها تمام
ده حال عام في كل حتة وفي كل مصلحة في مصر
ربنا يكون في عوننا كلنا
تحياتي
السلام عليكم ورحمة الله وبركاته
اولا وحشتينى جدا جدا يا ساره
وحعديهالك انك ولا بتسألى حتى لو برنه
لانى عارفه انك مشغولة
اما بالنسبة للموضوع
عاوزه أقولك انو مافيش حاجة حتتغير من يوم وليلة كده علشان البلد تتغير أكيد أحنا اللى حنتغير الاول ومش حنصحى من يوم وليلة ونلاقى كل حاجة بقت أحسن
بس للأسف هنا مافيش أحترام لا للقانون ولا لمشاعر الناس
الناس بقت بتتلكك علشان تتخانق وطلع غيظها فى اى حد
احنا بقينا للاسف وحشين اوى مع بعض
فى الرحمة والتسامح والود
مافيش بلد حتتقدم وأهلها ماعندهمش ثقافة تعامل وأحترام
ياريت كل واحد يبدأ بنفسو
بس بجد فرحانه انك رجعتى تكتبى
ومش عوزاكى تزعلى منى لو قصرة فى حقق انتى عارفه انك فى بالى
أتمنالك التوفيق والسعادة
سلام يا أحلا سارة
أختك توكا
:)
الواحد بيشوف فى المترو دة بلاوى
طب معلش أنا هاحكى تعليق كدةعلى الماشى
فيه رأي بيقول إن الحاجة الحلوة الوحيدة فى جعل عربيات السيدات فى منتصف المترو هو إن بقى فيه عربيتين رجالة من قدامها و من وراها .. يعنى كدة هانقدر نبص على السيدات من ناحيتين بدل ما كنا بنبص عليهم من ناحية واحدة
ابقوا خدوا بالكم بقى من العالم دى
صوصو يا قمر
اتمنى ان يكون غيابك خير ان شاء الله وتكوني انتي بخير يارب
ثاني شيء الناس بقت عصبيه اوي محدش طايق حد مش بره البيت بس وجوه البيت لا الراجل طايق مراته ولا مراته طيقاه ولا طيقه العيال
هو النظام طبعا صح واننا نطالب بيه مش عيب
انما العيب اننا نهين بعض او نطالب بالنظام ده باسلوب بدائي غير تحضري وباهانه
يعني الهانم اللي ضربت شخص بالشوذ دا جزء من اخلاقها هي بتعرضه على الجميع
وكذلك البني آدم اللي مد ايديه على انثى دا ما ينفعشي يطلق عليه راجل طبعا
والاستاذه اللي بتدعي الالتزام والاخلاق كان من باب اولى حد يوجه لها سؤال .. هل تصرفها دا يرضي الله ومن اخلاق نبينا واللي وصانا بيه رسولنا ؟؟
((ولو كنت فظ غليظ القلب لانفضوا من حولك))
صدق الله العظيم
وربنا يتولانا برحمته وبعفوه وبرضاه
ويحسن ختامنا ويعينا على حسن عبادته وطاعته
شكرا يا صوصو
يا اسم غاااااااالي اوووووي
طب ايه رايك ان انا كنت في مصر امبارح و لقيت العرية الأولى في المترو لسه مكتوب عليها للسيدات فقط و بقيت متلخبط و مش عارف اركبها و لا لأ
ركبت العربية التانية
بس اللي اتخانقت مع البنت دي غلطانة
النصيحة في العلن فضيحة
السلام عليكم ورحمة الله وبركاته
وانت ايه اللي بينزلك القاهره يا بنتي دا من خرج من داره اتقل مقداره
وكمان رايحه تركبي المترو ، طب اركبي تاكسي ولا ميكروباز ولا حتي الاتوبيس المكيف اللي بيقولوا عنه
:-)
عموما عاوزه اقولك ان مافيش حد بيراعي النظام ولا القانون في البلد دي
ولو حاجه مكتوب عليها ممنوع هاتلاقي ميت واحد بيعملها
ولا عزاء لعربية الستات
سلام ياقمر
حمدالله ع السلامة الاول...عودون أحمد..ومحمد ...ومحمود كمان
.
على فكرة ياسارة انتى اللى غلطانة....نسيتى انك فى مصر
.
اما تلاقى الناس بتتخانق فى كل حتة ومحدش مراعى اى حاجة ولا نظام ولاغيره
.
اكيد وشوووور يبقى انتى ف ام الدنيا
.
بس فعلا" لو الناس اتعلمت النظام حاجات كتيير هتتغير
ده بيدل على اننا شعب عمرنا لاحنتفتح عقليا ولا فكريا ولا اى حاجة خالص حنفضل طول عمرنا عايشين فى البطيخ
يعنى تقولى شمال يروح فوق
وتحياتى ليكى
مترو تاكس اتوبيس طيارة هليكوبتر حتى
مادمت فى مصر
المقروصة
ربنا معاك
السلام عليكم
ازيك يا سارة
هحكيلك علي موقف حصلي في المترو بخصوص عربية الحريم ديه
كان في محطة شبرا...وبعد المغرب كدا لقيت المترو جاي فاضي ورايق نقيت عربية فاضية ورايقة اوي ومحدش فيها...مركزتش بصراحة هي في الاول والا في الاخر
المهم المترو بدأ في الزحام بعد كل محطة يعدي عليها..بس اللي بيركب كلهم من ذوي الاظافر الطويلة....وبدأت واخدة فيهم تبصلي اوي...اوي....اوي
خجلت وحطيب وشي في الارض من الكسوف ووشي احمر اوي
وقلت في نفسي اكيد شخصيتي جذبتها اوي
طبعا
اتنين تانيين وشوشوا بعض وبصولي جامد اوي
وتخيلت نفسي فتي اعلانات
المهم العربية كلها كانت بتبصلي....
لغاية ما طلعت واحدة كبيرة كدا وزي والدتي
قلتلي
لو سمحت....انا قلت هتخطبني لبنتها بقي...العربية كلها معجبة بيه...اكيد دي قررت تسبقهم وتفوز بيا
لقتها قلتلي نفس الجملة بتاعتك
وسعتها حجات كتيرة اوي وضحت ادام عنيا
وعرفت سبب النظرات اللي كانت بتحيط بيا
واتمنيت ان الارض تنشق وتبلعني من الكسوف
فعلا من غير قصد بتبقي موقف محرج
اما بالقصد فبتبقي مش حلوة
بس اللي يحرق الدم بقي ان بيبقي ليكوا عربيات مخصوص
تركبوا ليه بقي العربيات التانية
والا هي غلاسة وخلاص
وطبعا موقف الاخت اللي اتخنقت مع التانية عليه كلام كتير
ربنا يهدي
سارة
ربنا يستر عليك
بس مدونتك تحفة بجد
ارجو تتقبلى مرورى
Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Monitor de LCD, I hope you enjoy. The address is http://monitor-de-lcd.blogspot.com. A hug.
فعلا العيب فى النظام
احنا شعب معندوش نظام
ولا بنحترم النظام
وده عادة من عادات المجتمع
لازم تتغير
عشان نتقدم
ههههههههه
هقولك علي حاجه بس ده سر حربي يعني
انا مش بركب مترو كتير الصراحه مع اني قاعد في القاهره اغلب الوقت
ومكنتش اعرف ان عربيه الستات بقت 24 ساعه
وف مره كنت مع اختي وركبنا المترو علي الساعه 10 فلقيت كل العربيات زحمه جدا ولقيت المترو وقف قدامي علي عربيه الستات
فاااااااااااااضيه
وفيها راجل او اتنين والباقي ستات
تعملي ايه لو مكاني ؟
:) دخلت
لقيت لاختي كرسي ووقفت انا
شايف العربيه كلها بتتغامز وانا عامل مطنش الصراحه:)
وبعدين واحده اتجرأت ووقفت بتقول العربيه دي للستات بس وانا هنادي للعسكري يطلعكم بره
الاسلوب غاظني الصراحه فانفجرت فيها
وطبعا صاحبك فاكر نفسه علي حق:)
قلتلها الساعه 10 يا فندم والعربيه دي للستات بمواعيد مش علي طول ثانيا انا معايا بنات ثم انا مدخاتش غير لما لقيت رجاله في العربيه
وانا ميتقاليش هجيبلك عسكري
لو جبتي وزير الداخله مش هتحرك خطوه
الست اتقفلت ومعرفتش تتكلم الصراحه:)
بعدين بقي عرفت انها بقت 24 ساعه
:) لا وكنت منفعل قوي
:)مبهدلينا في الزحمه وفي الاخر تطالبوا بالمساواه واللهي احنا غلابه
يابنتى الناس مابقاش عندها دم اصلا
بصى انا قاهريه ومتروهيه بحته وباشوف من ده كل يوم
الرجاله بتركب العربيه عند
وبنفسي باسمعها
فى عربيه السيدات تلاقى اتنين رجاله واقفين قدام الباب
ياعم دى عربيه حريم بسيابنى ماهى مليانه رجاله اهيه.. اركب بس
وقدام عنيا شفت خناقه للسما بسبب الموضوع ده
واحده منقبه اتشتمت
عيال صغيره بتغلس على مدام وبنتها
وكأن مالناش الحق اننا نطالب بحقنا فى اننا نتزنق مع بنات زينا
ولما تروحى تشتكى للامن يضربوا الطرشه
الأمن بيبقى واقف وبيتفرج وبيضحك ولا كأن فيه اى حاجه
حد يقولى بس ايه اللى ممكن نعمله عشان نمنع التصرف ده وانا هاكون اول واحده تعمله
السلام عليكم ورحمة الله وبركاته
وحشتينى يا ساره ووحشتنى أكتر البلاعه
ياريت تنوريها بكتباتك أكيد فى نص ساعه فاضيه فيهم
والله وحشتينى يا مضروبه معلش انا والله بخلص رصيدى كلو على أمى انا عارفه انى مقصره بس انت عارفه انتى أيه بالنسبالى
المهم انتى عامله ايه دلوقتى وأيه أخبار المشروع
يلا خلى بالك على نفسك ونشوف موضوع جديد قريب ان شاء الله
سلام يا جميل
أختك توكا
أيه يا سارة ؟ الغيبة طالت
hey there
one note for that post:
for the girl
to be shy
is an ethic
not related to religious matter
وحشتينا يا سارة
ومفتقدينك اوى
ياريت ترجعى بسرعة بقى
خالو احمد
إحنا كده الظاهرة دى بيسموها عندنا accommodation
أى تأقلم أو تكيف زى ما الجسم بيتكيف نتيجة الحرارة أو البرودة فى الصيف والشتا احنا
بقى المصريين بنتكيف مع الحاجة الغلط مع العكس
بنمشى بظهرنا
و نمشى عكس الدنيا كلها ماهيا ماشية -- مفيش فايدة على رأى سعد زغلول بيك
Post a Comment