Saturday, June 30, 2012

دموع تنتظر مصير

عنوان عجيب شوية انا عارفة بس النهاردة يوم مش عادى وجوايا اكيد زى معظم المصريين كمية من المشاعر المتضاربة فولتها عالى وممكن تعمل قفلة كهربائية توصل للمريخ

أول ما اعلنوا فوز الدكتور مرسى ... انا اتنطط مالفرحة مع العلم إنى بطلت صوتى وقتلته بالسنجة ياسيدى
لكن فرحة ان الفشيق لن يتمكن من الكرسى ماهى مش ناقصة قرود الصراحة الجبلاية لسا مليانة كتيييير


ويوميها مسكت دموعى بالعافية.. خوف لاعيط مالفرحة وف الاخر اعيط مالمقلب اللى اتدبينا فيه
وكمان إنى مرحتش الميدان ف يوم زى دا احتفل مع مصر.. لانى وياللأسف والألم اسكن حارة المنايفة العوازل.. ولى معهم بوست لوحده

 بالأمس أيضا حين خطب الرئيس محمد حس... لا مؤاخذة مرسى... مكنتش مصدقة اللى بشوفه واسمعه.. بقى عندنا رئيس جدييييييييد
لا وييجى كدا وسط الآلاف عااااادى جداااااااااا
ويقف على منصة مكشوفة جابت للحرس الجمهورى حَوَل علشان مفيش عصفورة تهوب ناحيته
برضو عااااااااااااااااااادى جدااااااااااااااااا كدا


ويتكلم من قلبه من غير خطابات أوتوماتيكية الصنع تتكون من أيها المواطنون.. الأخوة والأخوات
بلا بلا بلا بلا بلا... هيييه وضحكت عليكو.. والله الموفق
وبرضو دا يحصل عااااااااااااااااادى جداااااااااااااااا كدا

لااااا وكماااااااااااان فاتح دراعاته ولا عنتر ابن شهبور وبيقول للخوف انا معرفكش ياد انت مين
نورمااااااال كداااااااا من غير مايكون كل دا مشهد ف السينما ومن اخراج يوسف شاهين الله يرحمه



ومع كل ما سبق لم أتمالك  دموعى قلتلها طيب هاسمح بدمعتين كفاية محدش عارف لسا اللى جاى شكله ايه ويمكن قدام شوية نحتاج مخزون جامد واللا حاجة

النهاردة بقى اليوم الكبير أوى... حلف اليمين ف المحكمة الدستورية وقبلها ف الميدان وبعدهم ف جامعة القاهرة
مش عارفة دا فرحة بالمنصب الجديد واللا بروتوكول التالت تابتة واللا إيه



المهم وبالذات يعنى اثناء الخطاب التاريخى اللى قاله المرادى... بالذات كمان وهو مراعى ربنا أوى ف الفتحة والضمة والقواعد النحوية
وبدء كلامه بالسلام عليكم والكل رد عليه وعليكم السلام ورحمة الله




تحسوا كدا انكم ف بلاد أليس للعجائب وان الأرنب بيتكلم والكوتشينة بتتحرك والساعة بتدق ومحدش مستوعب حاجة

الرئيس المنتخب:
واقف موكبه عاااادى  جداااااا ف المرور



بيعتذر للى تم تأجيل امتحاناتهم ف الجامعة

بيزحلق المجلس العسكرى لثكناتهم بالذوق

بيرد على المحموقين أوى ان مصر بدأت تستنشق الهواء الحر.. وبيقولهم احنا مابنصدرش ثورات لحد 
ومش فاضيين غير لتنمية البلد ف الوقت الحالى

وأكد على وحدة الأمة والتحديات اللى بتهددها.. وأكد ان الهاء عائدة على الأمة بأكملها


هل دا رئيس مصر بجد.. خلاص مش هانبقى شوخليلة تانى ... مش هانطاطى لحد... هانبقى دولة كبيرة بجد 
كووووووووووول دا خللانى ف حالة ازبهلال حاد مع لخبطة دماغ وبقيت زى منصور .. مابجمّعش

وقاعدين ف قاعة المؤتمرات.. زوجته بخمارها البسيط وولاده
سبحانك يارب... شتاااان مابين سيدة.. وسيئة 


وبعد أيها المواطنون الأحرار... لا تزال الدموع ف عينى تنتظر المصير... هل سيغادروا فرحةً وسروراً بالقادم الأجمل
أم يغادروا حسرةً وصدمة من القادم ال.... يارب وحياة حبيبك النبى يكون اجمل داحنا شبعنا سواااااااااااد


ياللا مع السلامة يا شعبى الحبيب الصبووور المهااااوووود
مش هانشووووف زيك تااااانى :))
آميييييين



Friday, February 3, 2012

جمعة الغضب ال.. كام؟

سيناريو الغباء يتكرر.. فى ذكرى موقعة الجمل والحصان والحمار ايضا - نسبة للحمير اللى خططوا لكدا - حدثت موقعة الاستاد والكل من ساعتها مشحون بالحزن والغضب ومفيش بيت ف مصر غير ومحروق ماللى حصل ومن النتيجة اللى وصلنا ليها
بأى ذنب يتقتل اكتر من سبعين شاب واطفال كمان علشان تار بايت بين غربان الشرطة والالتراس..والمجلس السمكرى
 واللا علشان اكتشفوا ان مصر فيها رجالة فخلاص لازم يتصفوا علشان مش بيمشى 

معاهم غير الرجالة اللى بطرح


:وعلى لسان بثينة كامل

لا انسي عندما اردنا تكريم الالتراس فاليوم العالمي لمحاربة الفساد "


" أجابوا: لا ننتظر تكريما ولكن لاتنسوننا عندما تنتقم الداخلية منا


:وعموما ربنا كبير وزى ماقال سبحانه وتعالى
"وَيَمْكُرُونَ وَيَمْكُرُ اللَّـهُ وَاللَّـهُ خَيْرُ الْمَاكِرِينَ "
كانوا مستنيين الاهلى يكسب علشان تبان غضب من جماهير المصرى بسبب نتيجة الماتش وف الاخر المصرى هو اللى كسب.. لكن الغباء لا يزال متواجد هما واخدين اوامر بالقتل او بمعنى اصح بالتصفية .. ومابدهاش بقى الاوامر تتنفذ وخلاص امال هما قابضين ومش هيعملوا بسنجتهم يعنى!!
وعندك زفتاوى طالع يقوم الشعب على بعضه بدل مايضرب نفسه طلقه زى ماليابانيين بيعملوا لو مسؤول فيهم خذل رعيته.. بس صحيح لو كل مسؤول ف البلد ماعملش المطلوب منه كدا نص البلد هاتسجل حالات انتحار

واللهو الخفى الفلولى العسكرى السوزانى يفضل ماشى على نفس النهج الغبى دا وهتلاقى البلد كلها قامت عليهم ولا هينفعهم بقى تلفزيون مصرى ولا سى بى دبليو سى ولا حتى قناة الفراعين
والحمدلله الضباب بينكشف ويارب المرادى الناس كلها تفوق ومتتهمش اللى نازلين بيطالبوا بالحق والقصاص والعدالة والعيشة الكريمة بإنهم شوية همج وايه الل نزلهم
وعلى رأى اللى قال لو لم اكن فتاة لوددت ان اكون شابا ثائرا حرا مدافعا عن الطن ضد اى عدو وان رمى العدو ابن التيت قنابله الغازية وخراطيشة التقيها بفؤادى
واسلمى يا بلادى فى كل حين

ونحب ننوه للسادة المشاهدين ان التار دلوقت اصبح مع اللى لحم بوابات الاستاد واللى قطع الكهربا

..وف النهاية كلمتين موجوعين من مصرى موجوع معرفوش



أنا موجوع و مِش قادر 


 أداري الدَمع بالكِتمان


و أنا اللي قيمتي فـ الأخِر !


كإني ماجيتش فـ الحسبان


أنا المِتهان


أنا المَصدوم


أنا المدهوس


أنا المظلوم


أنا إللي كَفَرت من كَسري


عرفتوا أنا مين ؟؟؟




انا المصري ..






Monday, January 30, 2012

فـ الميدان

يوم السبت اللى فات كنت نازلة لمعرض الكتاب وكان معايا صديقتى الصدوقة
ووسط المخاوف والترقب الشديد من تصاعد الاحداث بميدان التحرير وبالذات انه كان اليوم الذى تلى موقعة فك منصة الاخوان ورفع الشوزات والاشتباكات الحادة التى وقعت ما بين الاخوان وباقى ثوار ومعتصمى التحرير
بس قلنا ندووووس ونديها جرعة شجاعة ونروح نشوف ايه النظام
الخوف مش اننا نروح.. الخوف لو فعلا ممكن يحصل حاجة واحنا هناك ومحدش يعرفنا واهالينا هيعملوا ايه 
ف الطريق للتحرير لقطت الصورة دى 


ولما وصلنا لقينا الدنيا طبيعى جدا والميدان مقلوب مزار سياحى على تجمعات نقاشية على خيم الاعتصامات وكل خيمة تابعة لحزب او  حركة سياسية معينة.. اشى ناصرى على اشتراكى..وكلام كبير كدا :)
 دا غير العائلات واطفال صغننين عساسيل وكوبلز 
وكله ماسك الاعلام واللا القلوب اللى بتتباع هناك والكل بيلتقط صور للذكرى الخالدة

دا طبعا غير الميداليات اللى فيها صور الشهداء والعديد من المنتجات المنتشرة مع الباعة الجائلين
والدرة المشوى والبطاطا وحمص الشام والبرتقال
وتى شيرتات الثورة المدججة بالوطنية... وايضا بـ
سبونج بوب


البياع بيقولى دا شغال اكتر من تى شيرتات الثورة
تقريبا سبونج بوب هو مفجر الثورة التانية.. محدش يجيبلى سيرة فينديتا بقى :)


واحنا طبعا مارضيناش نعدى هذه الفرصة الجبارة واشترينا اتنين مطبوع عليهم
 - انا مصرى-
وكمان اشترينا اتنين علم مصر

وبدأنا نتجول ف طلعت حرب و26 يوليو والضواحى المجاورة
ووانا ماشية وماسكة الاعلام واحد ماللى بيوقفوا يقولوا عندنا بدل وبناطيل جينز وكدا وبتاع

فا شافنى شايلة العلم بيقولى هو لسا فى ناس ف الميدان؟؟
بقوله اه
بيقولى وهما ناويين يمشوا امتى؟؟
قلتلوا هما هيمشوا لما هما يمشوا
بيقولى ولو ممشيوس؟؟
 (:قلتله يبقى مش هيمشوا


ولما خلصنا جولتنا ف الشوبينج ورجعنا تانى ع الميدان كان فى مظاهرة للصم والمعاقين
للاسف معرفتش اصورها كويس




ولما بدأوا يوصلوا للميدان كان العصر بيأذن.. سكتوا واستنوا لما الاذان خلص وبدأوا يهتفوا تانى 
وبعدها مش عارفة وصلوا لفين واللا عملوا ايه
كله بيتوه ف الاخر


وبعدها بدأوا ينادوا من المنصة ان فى تجمع لمظاهرة دلوقت والهتاف اشتغل
والثورة قامت من جديد.. هناخد حقك يا شهيد




واحنا كمان بدأنا نتحرك من الميدان .. ورحنا على معرض الكتاب




كان هادى ومفيش فيه اختلاف عن السنين اللى فاتت
او يمكن لاننا مطولناش هناك فيه فامعرفتش ايه الجديد
انا عرفت بعد مارجعت من هناك.. 
:)
ليدو طرة.. لعبة مطروحة ف المعرض 
حسونة.. زوسى.. جيمى.. حبيبو




 والسلم والتعبان




لما خرجت من المعرض عرفت ان فى ف الميدان عاملين زى عرض تثقيفى للزائرى الميدان عن الثورة واهدافها
وكان فى اخوة من تونس وسوريا
وان معظم الثوار نقلوا على ماسبيرو


كويس انهم على قد مابيقدروا بيحاولوا يوعوا الناس ويعرفوهم هما ليه موجودين وايه اللى بيطالبوا بيه


بس للأسف
 الثورة التانية مختلفة اختلاف كلى وجزئى 
دلوقت الشعب بقى زى مكعبات البازل متعرفش تجمعه صح غير لما تكون فاهم كل شكل فيهم
وكل مانحاول نجمعه.. نلاقى اللى بينحكش البازل وبيرجعنا تانى لنقطه الصفر
الميدان زى ماقلت ف الاول..اصبح مزار سياحى
وانا من الناس اللى راحت واتصورت وصورت حاجات معروضة هناك
واتهزقت وهى بتتصور :) 
.. كان فى راجل معدى وانا بتصور وقالى ادى اللى خدناه مالصورة 
 الناس تييجى تمسك العلم وتتصور وخلاص
بس عرفت انه دا الطبيعى بتاعه.. بيهزق ف الثورة واللى عملوها :)


الثورة بدأت تبهت.. الثورة بتتسرسب من ايدينا 
انا لو عليا كنت فضلت ف الميدان ومشيت مع المظاهرة اللى بدأت واحنا خارجين منه
لكن ما باليد حيلة.. دانا رحت هناك ومحدش يعرف لانى ممنوعة من التحرير


واكيد فى ناس زيى كتير.. والقسم التانى معتصم او بيقضى باقى يومه هناك وبعدين يرجع بيته
والغالبية خلاص بدأت تعيش حياتها زى اى يوم .. خلصت المطالب.. خلص حماس الثورة.. كله رجع يدور ف الساقية من جديد


منهم لله اللى ظلمونا وكسروا شوية التفاؤل اللى كنا عايشين عليه
وحق الشهيد... ربنا قادر يرجعه


وكل ثورة وانتو مصريين :(












 لما صورت البنوتة دى حسيت انى غلطت لما قلت التفاؤل بقى بح




قلتلها اقرا معاكى.. اتكسفت وقامت.. بس فرحت بيها اوى ربنا يبارك فيها


الأمل فى الجيل دا


ولسا فيكى حاجة حلوة يا مصر



Wednesday, January 25, 2012

مع اول ذكرى لبدء الثورة...حقك عليا



السلام عليكم ورحمة الله وبركاته
وحشتينى اوى ومش عارفة اكتب اقولك ايه...بقالى دلوقت ستنين ويوم واحد بالظبط من اخر مرة كتبت فيها بوست هنا
انا اول ماشفتك قدامى بكيت ولحد دلوقت الدموع بتنزل من عينى وانا بكتب.. حقك عليا


انتى ايوة مجرد صفحة للبعبعة لكن انا حساكى زى اى كائن حى .. حاساكى زعلانة منى وبتعاتبينى ازاى اهملتك بالشكل دا


بس انا عاوزاكى تعرفى انه مكنش سهل عليا خالص.. انا حاسة كأن حاجة غالية اوى وضرورية لحياتى ضاعت منى.. او انا اللى ضيعتها بإيدى
كتاباتى زمان كان كلها حماسة وخفة دم ولماضة .. كنت بخرج واتعايش مع الشعب والمواطن المطحون واشغل قرون الاستشعار على اى خبر او قصة او موقف شفته يستفزنى واجرى عليكى واكتب كل اللى جوايا
انا فعلا غلطت لما استسلمت لحاجات وقفت سريان حياتى لمدة سنتين
وزى دلوقت من سنة بدأت افوق وارجع تانى اتنطط واعافر ونزلت غصب واقتدار ارمى ورقى واتقدم للبنوك..ملقتش غير شغل العافية يمكن يجيب نتيجة
والنتيجة جت بسرعة اوى.. كانوا لسا اول يومين ف الثورة والملامح كانت مش واضحة او كان الاعلام مبينها شوية زوبعة ف فونجان :)
لكن بعدها كل شىء انكشفن وبان.. وكانت ثورة هزت ارجاء المعمورة وعطلت البحث عن وظيفة
وكلنا فرحنا بيها وطلعت ع السطوح وقعدت ازغرط وازعق ف الناس فوووقووووووا اللى كابس على نفسنا غااااااااار
واللى جاى يابلدى احسن...وخلااااااااص جه زمن الحريييية
كنت لسا قبلها بعلق عند صديقة فلسطينية كاتبة ع الفيس بوك عن موقف مصر مع اسرائيل وانا دخلت قلتلها انتوا محتلين من شعب تانى
انما احنا الاحتلال بتاعنا من ناس للاسف زينا... يعنى مصيبتنا اكبر بكتير
والحمدلله انتصرنا والاحتلال مشى.. هيييييييييييه
لا استنوا مين دا اللى مشى؟؟؟؟
مشى وانتقل الى جحيم طرة مثلا.. واللا لمنتجع المركز العالمى مثلا برضو.. واللا للجلوس على عرش البلاد تحت مسمى الجيش اللى حمى الثورة؟؟؟
كنا فرحانين بالجيش.. ايد واحدة.. مين اللى اتصور جنب الدبابة.. ومين اللى خلاها خلفية لصورة فرحه.. ومين اللى جاب المولود بتاعه وشيله للعسكرى علشان ياخد البركة
ومين اللى طلع واحتج وقال انا متصورتش جنبها.. وعملوا كمان بيدج ع الفيس بوك
كل دا جمييييل ويوحى بالتفاؤل... لكن

اهى لكن دى اللى دايما تطلعلنا زى اللقمة ف الزور.. نفسى نعيش من غير لكن
الشعب يريد اسقاط لكن
اسقطنا النظام.. لكن.. لا يزال متشعب كخلايا السرطان وسوس السنان وعاوزله تمويت عصب
وشوف انت يا مواطن تمويت العصب - لاقدر الله - بياخد كام جلسة
طالبنا بحقوق الشهداء ومصابى الثورة.. لكن.. لم يتم تحقيق اى تغيير
اللهم الا.. التوقيت الصيفى.. اكواد الموبايلات.. وحاجة تالتة مش فاكراها
اه.. وزيادة المعاشات.. لا والله كتر خيرهم
احنا ايوة كلنا بشر ومحدش كامل غير ربنا .. لكن برضو ربنا قال وقل اعملوا
فين بقى اللى اتعمل؟؟؟؟
ناس ماتت وناس نور عينها انطفى علشان خاطر الثورة اللى فى مننا بيحتفل بيها
وبمناسبة الاحتفال بيها كـ عيد من الاعياد القومية.. واللى معناه انها خلاص اصبحت مجرد انتصار تاريخى اتحقق وكل عام وانتم بخير
بهديلكم الصورة دى .. نتيجة النهاردة ومكتوب فيها.. عيد الشرطة!!
معلش لو فى صورة مش واضحة لكن حبيت اوضح انها اكتر من نتيجة
و"ارفع راسك فوق".. انا قاصدة اطلعها ف الصورة
:)




عموما واضح ان الثورة لسا موصلتش للمطابع سواء اللى بتطبع النتايج او اللى بتطبع المناهج
لانهم لسا بيكتبوا عن انجازات الجمال النائم على سريره النقال 




مبارك صاحب اول ضربة طلعت من نافوخ الشعب
وطول ما هما لسا بيلبسونا السلطنية.. وبيشوهونا وزودا الانقسام بينا اكتر من لما بدأت الثورة 
كان مجرد انقسام مابين عادات العرب واحترام الكبير.. وبين انه هو هو الكبير اللى خربها وقاعد على تلها ف شرم الشيخ
ودلوقت الانقسام تشعب بفضل جهود الاعلام والمجلس ذو النية الصافية المنقاة لاخر قطرة دم
بقى فيه اخوانى وسلفى وعلمانى وليبرالى وكنبى ومواطن
لخمونا ف ازاى نلملم نفسنا تانى ونرجع راجل واحد ضدهم
لكن
طول ماحنا صاحيين وفينا الروح.. هانطلع روح اى ظالم واى واحد بيستغفلنا
ولسا الثورة مانتهتش علشان نحتفل.. القصاص.. الحرية.. العدالة.. التطهير..النظام والتحضر
لسا ثورتنا حية لم تمت بعد طول ما احنا عايشين وايمانا بيها بيرويها

مدونتى اقولهالك تانى.. حقك عليا
بلدى اقولهالك لاخر يوم ف عمرى.. حقك راجع بإذن الله











Sunday, January 24, 2010

هى الناس جرالها ايه؟؟؟



نزلت من يومين كدا لمدينة الأشباح الكبرى - قصدى القاهرة الكبرى


ولقيت خير اللهم اجعله خير..الناس ماشية تايهااااااا وبتلّطش ف بعضيها
ونون النسوة لابسين حاجات غريبة كدا..ايشى بنطلون قصير وسايباله خمسة سنتى فوق الشوز يعملوا تهوية من كتر الحر اللى احنا فيه
واللى لابسة عباية سودا قربت تشتكى وتفرقع منها اساسا..وقال ايه قريبتى بتقولى كله بقى يلبس العبايات كدا بس هى سعيدة جدا ان فصل الشتا عامل تقييد شوية على اللبس ومخللى النساء تحترم نفسيتها

بس اللى مزعلنى حاجة واحدة ...كدا بدلة الرقص هايضيع منها تفردها ونجوميتها فى عالم الشخلعة


وسط البلد..بقت كئيبة زى مايكون ضايع منها حاجة..مفيش روح..مفيش الجو الجميل اللى كنت بحبه فيها على الرغم من الزحمة اللى موجودة طول الوقت..الناس بتتريق على حالها وبتتريق على بلدها بشكل غريب فيه لامبالاة كأنهم فعلا أشباح هايمة على المكان ومالهاش اى وجود حقيقى


كنا واقفين فى محل قدامه سينما..وإذ فجأتن نلاقى أكوم من البشر..اتنين اتنين..الى مالا نهاية
بس الصراحة كأنهم فى ماكينة للفشار..طيب البنات مش تظبطت نفسها كدا فى التواليتات قبل ماتخرج..الناس بقى وشها مكشوف ياخواتى
بصراحة هى مابقاش اسمها دور عرض سينمائى (بفتح العين)..دى بقت دور عرض ستاتى(بكسر العين)...وحسرة عليكى يابلد


ونييجى للمترو حبيب قلبى ..ألاقيهم عملوا على كل باب للدخول بالأحمر العريض..ممنوع الصعود..بس واضح ان ثقافتنا الالمانية لم تتغير بعد


واحلى حاجة وانا راجعة لبلدتى العزيزة المعزوزة
العريبات واقفة مش لاقية اللى يركب..وعلى الرغم من ذلك تلاقيهم بيحشروا فى الناس ولاعلب السردين المستودرة ..اصل بتبقى مليانة لحم والخير كتير..والناس فعلا اشباح..مفيش اى رد فعل..مفيش احتجاج رسمى على السواقين وعمايلهم
كله بيقول اهى مواصلة والسلام والمهم انى هاروح..دا على اساس ان الطريق مفروش بالورود..هو فى ورود على شكل برسيم ومطبات على شكل نفايات وحجر وطرق متعرجة..يعنى بلد الامن والامان بصحيح


اخر موقف بقى لذيذ جداااا 
كان معانا علب كانز..ولما خلصناها حطتهم فى الشنطة البلاستيك علشان لما اروح البيت ابقى ارميهم فى سلة المهملات..بم ان البلد الطويلة العريضة دى مافيهاش سلة توحد ربنا
قام الولد اللى بيبقى مع السواق شافهم وكان عاوز يعمل معايا دور مجدعة..وقاللى هاتيهم ارميهم مالشباك
قلتله انا مابرميش حاجة فى الشارع
الشاب ياعينى بصلى بصة وازبهل كانه شاف كائن فضائى
وسألنى: وايه العيب يعنى لو اترمت فى الشارع

بصراحة ..لاتعليق






بى إس:  طبعا البوست دا تقريبا مافيهوش حاجة جديدة
بس انا عاوزة ارجع اكتب ولو هتكون بدايتى مش اد مستوى الزملاء الاعزاء
لكن عالاقل هاكسر القيود والسلاسل اللى مربطانى بقالها سنة وقربت انا كمان اتحول لشبح بسببها

وعلى رأى اللى قال..خوفو بنى الهرم من زلطة
طبعا انا اللى مألفاها الجملة دى:)



صحيح نسيت أسألكم...هو اسمه ايه دا اتجوز واللا أوشاعة؟

Thursday, November 26, 2009

كلنــا فداءً للفتة واللحمة

إلى أصحاب القلوب الرحيمة




الخروف الغلبان بيتكتك مالرعب وياعينى مش عارف يعمل ايه
بس شوفوا شهامة الخرفان وجدعنتهم..على الرغم من انه بعد ساعات قليلة هايتحول لـ
فتة معتبرة بالرز والتحبيشة..او كفتة ضانى بالسمن البلدى..او لحمة مفرومة معصجة..ألخ ألخ
لكن شوفوا رد الفعل المتفائل والشجااااع فى الحلقة القادمة..قصدى الصورة القادمة
<
 <
<



الخروف أو المعزة اللذاذ دول بيمسوا ويصبحوا عليكوا ويتمنوا للجميع احلى عيد سعيد مسعود مسعد
بأحلى أسنان من سيجنال توووو
واستمتعوا بالفتة وكلوا واشربوا ووسعوا محيط معدتكم بس ماتفتحوش عالتاسع علشان هما يومين وكله هيبقى بحححح
والمعدة ستعود إلى أدراجها...وكل عام وانتم بخير



Monday, November 16, 2009

دى مابقتش بلاهة وبس...دى مهزلة


طيب بالله عليكو اعلق على الهبل والتخلف والغباء والتعصب دا بإيه
بقى اول مارجع اكتب- اكتب على حرقة الدم دى ياربى...إنا لله وإنا إليه راجعون

زى مايكون قلبى حاسس ان فى مصيبة هاتحصل..الناس كلها كانت عاملة فرح وكل واحد دابحله كتكوت علشان خاطر اننا فزنا..واكتشفت فى الاخر ان ماتش تأهيل للكاس فقط..وانا كتبت فى البوست اللى فات فيما معناه "بلا خيبة علينا
وادى الخيبة قلبت بمصيبة...حتة خبر كاذب نشرته الصحف فى دولة عربية تدعى "الجزائر" خللى الناس هناك تقوم علينا بأزايز البنزين المشتعل وبالطوب وباللى فى ايدهم وارمى على المصريين

بلد المليون شهيد..بلد جميلة بوحريد الى اتعملها فيلم مصرى من اقوى الافلام اللى اتعملت علشان نقول للناس ادى العرب وادى المسلمين اللى بيقاوموا عدوهم وبيحاربوا لاخر نفس واخر نقطة دم
نقوم احنا اللى يسيل دمنا وتتبعزق كرامتنا وياريت فى اوروبا واللا امريكا واللا حتى مصر ..الاسباب هاتكون معروفة
انما فييييييييين..فبلد عربى وزى مابيقولوا شقيق وابن عم وحتى جار فى قارة واحدة

لما الناس تتصل بأهلها يقولولهم مش عارفين نخرج مالبيت والطوب بيتحدف علينا من كل مكان..لما البنت تتصل تقول رجعولى ابويا والام تتصل وتبكى وتقول رجعولى ابنى


لما الراجل يتصل ويقول حوالينا النار ف كل مكان ومش عارفين نخرج.. ولو فضلنا هنا ليوم الاربع هايخلصوا علينا..احنا لازم نسافر من هنا فورا وتغور الغربة واللى بييجى منها
يوم الاربع بقى يحدد مصير آلاف المصريين اللى راحوا الجزائر تبع شركاتهم علشان يخدموا البلد واللى فيها..يقوموا يخربوا المكاتب والشركات وجزاء خدمتنا يخربوا بيتنا احنا ويمرمطونا


:تعالوا نحلل الموضوع بوجهة نظر بعيدة عن التعسف..وهحاول امسك نفسى
- اولا دول مصريين سافروا ورا لقمة العيش..ومعظمهم مهندسين وعمال ..ايه دخلهم بالكورة..واللا هما اللى جابوا الجون فى وش العدو
!!!
-ثانيا الخبر بيقول"نعوش قادمة من القاهرة الى مطار غوارى بو مدين"..طيب لو فرضنا اننا بعتنا الجزائريين فى نعوش واننا دراكولا القرين الواحد والعشرين واننا السفاح بتاع الكابتن سافو..يبقى دا كان هيكون نتيجة اننا اللى اتغلبنا وبالتالى قلنا ننتقم وناخد بالتار من الجزائريين..وهذا لم يحدث
!!!!!

-ثالثا هو احنا كنا بنلعب على نص ارض الجزائر ولما نتغلب هانحتلها ونقعد على تلها..واللا اللعب كله كان علشان كاس عالم فى -الكوووورة- وياريت اساسا نلمسه حتى..مع الامال المعلقة بأننا ننتصر على فطاحل العالم فى كورة القدم
!!!!!!!

رابعا كنت بقول فى البوست السابق اننا سايبين المصايب اللى فوق دماغنا وبنركز فى الكورة..أهو الحمد لله الكورة بقت مصيبة هى كمان..ياللا بالمرة يعنى جت عليها
!!!!!!!!!!

خامسا المصايب دى ملخصة فى 
محليا بين الدولة والشعب وما بينهما 
عربيا بين الدول العربية وسرؤولة
دوليا بين العرب وبالاخص المسلمين وبين الغرب
:بالاضافة الى
كروياً..واللى اصبح بين عرب وعرب علشان كورة

بتتخانقوا ليه ياحلوين..اصلهم غلبونا فى الماتش ياماما 
وبتحدفوا عليهم الطوب ليه ياحلوين..علشان هما ناس وحشة ومش عاوزين يسيبولنا الكاس ياماما
وعاوزين ولادهم يتيتموا ليه ياحلوين..علشان يتعلموا من الدرس ولما نييجى نلعب معاهم تانى يفضولنا الملعب وكل واحد فينا يجيب جون ويدونا عليه تكييف كمان..ياماما
!!!!!!!!!!!!!!!

سادسا لو نسينا اننا اخوات ونسينا اننا مسلمين..طيب حتى يعملوا حساب للإنسانية..واللا مبقاش فى مكان للإنسانية حتى فى الكورة
مابقاش فى عقل ولافى تفكير..سايبين اعدائنا اللى نعرفهم كويس اوى وماسكين ف خناق بعض
طيب مش مكسوفين لما فضحيتنا بقت بجلاجل والعالم كله يعرف ان العرب بيتخانقوا على كورة
والله يألف حسرة علينا..ونستاهل اللى بيجرالنا


وحتى لو المصريين رجعوا..بإصابات بسيطة وجروح سطحية وكسور ممكن علاجها
لكن الموقف اللى حصل مش هايتنسى ايداااا واتسجل خلاص فى التاريخ بالحبر الاسود
وزى ماقال المذيع فى قناة الحياة.."كل دا ممكن يتعالج واللى رجله مكسورة تتجبس ويبقى تمام..لكن اللى مش هايتجبس هو العلاقات المصرية الجزائرية
"لا الكاس ولا دهب الدنيا كله هايعوض عيل عن ابوه


عاوزة اقول للجزائريين
انا عارفة فى منكم معترض عاللى بيحصل دا..لكن للاسف الشديد الحسنة بتخص والسيئة بتعم
وانا عمرى ماكنت متعصبة ولا هاكون..بس ياريت تلاقوا حل للمهزلة اللى حصلت دى
والموضوع مش هايتقفل وهايفضل منقوش فى اى لقاء عادى او سياسى او حتى كروى..دا لو اتكررت تانى اساسا


اعقلووووووو يانااااااااس...فضحتونا وضحكتوا علينا العالم

ودا كله عشان

كورة وكاس


وعجبى عليك يازمن