Tuesday, February 12, 2008

تحيا مصر حرة مستقلة

عدى ياليلة ...عدى ياليلة ...عدى ياليلة

وقد عدت الليلة العصيبة ياإخوانى الاحباء ... وها قد اتى الابطال يحملون النصر فوق اكتافهم


هاهم الفراعنة اعزائى المشاهدين يقودون بلدهم الغالى مصر نحو العزة والنصر والفخر والازدهار والانطلاق نحو مستقبل مشرق شمسه آمنة غير ضارة على البشرة وتغنى عن استعمال الصن بلوك

دى كانت مقدمة لتلفزيون البلاعة المحلى والتفاصيل السطر اللى جاى

انا تقريباً يعنى معلوماتى عن الكورة انها كائن جمادى مدور ابيض فى اسود بس اليومين دول بقى يتعمله نيو لوكات كتير
بس الصراحة اول مايكون فى ماتشات للمنتخب بينقح عليا عرق الوطنية بقى ولازم اتابع الاخبار واتفرج وابقى على اعصابى وادعى ربنا انه مايحصليش حاجة مالماتشات دى

واحلى حاجة انك تحس العيلة كلها متجمعة على هدف واحد وهو الفرجة عالماتش وتشجيع مصر.. مهمها اختلفت الاعمار والتوجهات السياسية والطبيخية

يعنى مثلا اختى رسمت علم مصر وعلقته عالباب بيهفهف مع الهوا
واخويا كتب يقول..لاتقوللى دروجبا ولا ايتو الحضرى مين يهدو
ابو تريكة يامزيكا
زيدان+ ابو تريكة= الكاس
وانا من عندى اضيف
حسن شحاتة يامعلم خللى الشبكة تتكلم
ياليالى ياليالى ياليالى والحضرى السد العالى

ياسلام علينا اساتذة فى الشعارات والتأليف وبالذات فى الكورة تلاقى مواهب بصحيح
إلا السد العالى دى.. خلاص الحضرى بقى سد مصر المنيع يعنى لو فى اعتداء غاشم على الوطن هنجيب الحضرى يقف عالحدود عشان يسد مرمى مصر ويتلقى القنابل والمدافع والنووى

كنت مرة راكبة تويوتا.. وسيلة مواصلات حوالى 15 راكب.. وبعدين كان فى ماشت شغال بين مصر وأحد الفرق مش فاكرة مين والناس عمالة تقول للسواق بسرعة شوية يااسطى عاوزين نلحق الماتش.. وهو يقولهم الطريق واقف ياخوانا قدام شوية وهتقولو ياريتنا ماركبنا اساسا.. وانا وبكل هدوء حطيت سماعات النوبايل وشغلت نجوم اف ام .. ولقيت المذيع بيقول مبروك ياجماعة مصر جابت جون وبقينا واحد صفر

قلت طب والله كويس لما افرح بقى الرجالة اللى راكبه دى.. كنت راكبة انا وبنوتة جنب السواق وقلتلها قوليله اننا جبنا جون.. وبعدين قلت هو انا مليش لسان يعنى.. فقمت وبكل شجاعة وقلتله احنا جبنا جون ياسطى مبروك.. وهو رايح متكفل بالباقى وقال للناس.. احنا جبنا جون

وهما طبعا فاكرينها اوشاعة ومش مصدقين لانه السواق ماكنش عارف يجيب اذاعة مشغلة الماتش وانا عملت فيها فذلوكة وقلت ابقى انا المعلق الرياضى .. والناس ماصدقتش اساسا وكل شوية عشان الطريق واقف يخللو السواق يهدى شوية ويسألو اى حد عشان يتأكدوا.. وفعلا كان فى جون واتكبسوا.. بس احلى حاجة بقى السواق.. بيقول هو ماتش ايه دا اساسا

بصراحة كان بطل اليوم دا.. معقولة سواق ملوش فى الكورة.. راجل مصرى وطنى ملوش فى الكورة.. دا لدرجة انو الناس كانت عاوزة تنزل وتروح تركب التويوتا اللى سواقها مشغل الراديو على الماتش.. عالم دماغ بجد

فماتش النهائى بقى طبعا استعدينالو نفسيا واكليا.. انا على اعصابى من اول اليوم..واخويا راح جاب لب وسودانى وماما عملت مهبلبية واستعدينا وكله تمام

وطبعا كل اللى شاف الماتش اكيد كان مجهز جنبه الاسعافات الاولية وانبوبة اوكسجين احتياطى
وانا بقى قمت عملت شاى عشان ابلع بيه السودانى وكل مالاقى سوداناية محروقة اقول لا دا كاميرونى مش هكولها..وانا اساسا مش بحب السودانى المحروق

وماما كل مالكورة تقرب مالجون تقول بسم الله الرحمن الرحيم يارب يامسهل.. وفمرة كان الجون دا بتاعنا وهى من شدة الاعصاب مش واخدة بالها..اخويا يقولها هو اى كورة تقرب عالجون تدعى.. دا الجون دا هيدخل فينا .. طبعا ماما زى معظم المصريات ملهاش فى البتنجان الكروى بس عاوزة تفرح بجون مصرى وخلاص

اهم حاجة انه عدى من غير ضربات الجزاء..ماخبيش عليكم انا المرة اللى فاتت فى النهائى قعدت اعيييط وطلعت بره لحد ماطمنت خلاص ان احنا اللى كسبنا.. المرادى بقولهم دا لو حامل فى الشهر التانى زمانها ولدت

بس انا سمعت فعلا انه فى واحدة معرفتش توصل للمستشفى من زحمة الشوارع تانى يوم لما كان المنتخب الوطنى بتاعنا راجع بالسلامة ووضعت النونو فى العربية
وان واحدة داسو عليها وكسروا رجلها
وان واحد مات ففيصل
وان حاجات كتيرة فى الشوارع اتكسرت

هو احنا مانعرفش نعمل حاجة ابدا بنظام وعقلانية شوية
فى المظاهرات بنخرب الدنيا
وفى الفرح برضو بنخرب الدنيا
هنبطل الهمجية دى امتى مش عارفه
دى بقت خلاص سمة من سمات الشعب المصرى

ياللا انا مش عاوزة احرق دمى ولادمكو وخللينا كدا فرحانين كام يوم قبل مانفوق من غيبوبة الفرح دى ونرجع للنكد تانى

انا فعلا فرحانة اوى عشان فزنا بصرف النظر انها كورة يعنى ولا بنينا ناطحة سحاب ولا عالم جديد من عندنا اخد جايزة نوبل

بس كان فى روح جميلة اوى بينهم ومنظر الجون اللى جبناه دا مش هنساه ابدا
كان فيه ارادة بجد واصرار غير عادى ان الكورة دى هتدخل المرمى يعنى هتدخل المرمى
بقيت اشبهها بحالنا دلوقت ليه كلنا مانبقاش عندنا الاصرار دا اننا ندخل اهدافنا اللى فى الحياة جوه عقولنا ونصر على اننا نحققها


وكمان فكرت فيها اننا كعرب فرحنا اوى كل الناس فرحو معانا وعلشانا فكل العالم اساسا
لأ وكمان الجوايز المادية والحج لكل افراد اسرة كل لاعب
والخرافى اللى اتبرع بمليون دولار
والناس اللى اقل مبلغ دفعوه بالمليون
علشان المنتخب المصرى
هما تعبوا اوى واطحنوا ويستحقوا
بس
انا ليه مش بشوف كدا لو فى ناس محتاجة فعلا
ليه مش بشوف كدا لو بلد محتاجة وما اكترهم

ليه مانتفقش على اهداف لينا كعرب اننا نحققها
واهمها طبعا اننا نرجع البلد المسروقة مننا ونساعد شعبها انه يقوم على رجليه

ليه مش بيحصل كدا غير فى الكورة وبس

انا فرحانة اوى عشان الكاس
وزعلانة اوى عشان عقلنا تايه

ومبروك لمصر


الصور دى من منتدى فلسطينى كاتبين فيه تهنئة بفوز المنتخب المصرى

**تحديييييييييييث**

اغنية شااادية الرااائعة.. لفيت عليها وكعوب الكيبورد دابت بس الحمدلله وصلتلها
اللى عاوز يحملها هدية منى بمناسبة انها بتفكرنا بمصر
اللى مش طايق البلد يحمل ويسمعها
:)
دووووووس هناااااااا

Friday, February 8, 2008

تاجتاجونى آاال كابونى



ماتسألونيش ايه العنوان الغريب دا انا اللى جه فبالى كتبته وخلاص.. اهو نظبط القافية:)

انا كنت نايمة فحالى ولقيت من ييجى شوية ايام كتيرة كدا حد بيخبط عالبلاعة وبيزعق وماسك مايكروفون ماللى بيدوروا بيه عالتاييهن وبيقوللى بصوت عميييق ومخييييف ... ياساااااارة انتى اتاجيتى من خالك الصباغ ولااااازم ولابودن انك تعملى الواجب دا قبل فرز نتائج الواجبات فمارس القااادم..ولقد انور من اعذر
وانا طبعا قلت فعقل باللللى استرها معاااانااااا يااااارب

ولسا هقوم واشيل اللحاف عشان اعمل الواجب التاجى لقيت مـيرمـيـد ومـوجــة ناويين يدبسونى هما كمان فواجب تاجى بس الحمدلله اكتشفت انه نفس تاج خالو الصباغ..
كدا مش هاعطس كتير..حاكم التاجات دى بتجيبلى حساسية فى القرون الانفية عندى

بس لااااازم قبل ماجاوب عالتاج اوريكوا انا شكلى ايه لما قومونى بقوة الميكروفون من البيات الشتوى اللى انا عملاه


وياريت معاها ساوند تراك اغنية شادية
يااااعينى يااااعينى يااااعينى عالولاااااااااا.. اااااه

طيب نبتدى بقى من اول السطر كدا ونستجاوب

1
هل توافق على حزف خانة الديانة من البطاقة الشخصية ؟

اى دونت سينك سو

لانه تحديد الديانة بيتوقف عليه حاجات كتير
زى
وزى
وزى

وحاجات تانية كتير:)

2
ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟

انا ماسمعتش عن الفئة المفئفئة دى غير من بعض الزملاء المدونين
انهم متوغلين فمصر كمان
ورأيى انهم نفعونا فحاجة واحدة بس
عودة سلالة قوم لوط مرة تانية من علامات القيامة
كويس عشان الواحد يبدأ يستعد لليوم دا ويجمع رصيد لابأس به من الاعمال الصالحة

وبالنسبة انها حرية شخصية
مممممممممممممممم
انت حر مالم تضر
بس اللى هما فيه دا قمة الضرر سواء ليهم او للمجتمع ككل
ولذلك ماعتقدش ان دا يبقى تبع اى نوع من انواع الحريات

وعشان يكون فى اعتراف بشىء يبقى معناه انه موجود
وانا بصراحة مش قادرة ابلع ان فى بشر مالنوع دا عندنا
معلش بقى يظهر انى عايشة فغيبوبة
بس مش عاوزة حد يصحينى:)

وطبقا لكل ماذكر يبقى انا على مااعتقد لا اعرف اى احد من هؤلاء وربنا يكفينا شر المرض:)

3
هل تعتقد بوجود إضطهاد للمسيحين فى مصر ؟

إضطهاد؟؟؟؟؟؟؟؟؟؟

وين هنادى يااماااااى
ههههه مش عارفه افتكرت المشهد دا ليه
ماعلينااااااااا
انا شايفة ان كل حاجة فى الدنيا دى ليها شىء مضاد وظهور الشىء المضاد بيكون بشكل نسبى
يعنى لو اخدنا الحرية فمصر
فى ناس هيقولو ان الحرية موجودة وبنسبة مية فى المية
وفى ناس تانية هتقول انها بنسبة ميه فى المية بس تحت الصفر
وكلمة الاضطهاد دى حاسة انها كبيرة اوى وليس لها اى مكان هون..لامؤاخذة يعنى

انا عن نفسى بشوف كل الناس واحد ومش بتفرق معايا ابداً الديانة
طالما فى حسن معاملة واحترام متبادل
والتعصب والجهل موجودين للاسف فكل الاديان

فى حدود شائكة المفروض اننا مانتعدهاش يعنى نتعامل فحياتنا بشكل طبيعى جدا والدين دا شىء خاص بكل انسان
واتمنى بجد اننا نبعد الدين عن اى مشاكل لان الأديان دى شىء مقدس ولايجب المساس بها او خلق مشكلات تحت مظلة الدفاع عن الدين

وشكرا والسلام عليكم:)


4
من هو الشخص الذى تختارة لرئاسة مصر ؟

ابو سويلم بتاع كفر الهنادوة

5
أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟

انا اعرف حاجة واحدة بس
اللى عاوز فعلا انه يعمل حاجة للبلد ويكون جااااااااااااد وبيقول مصر مصر تحيا مصر تلات مرات قبل الاكل
يبقى يستحق انه يشترك معايا فى الحزب
بعيييدااااا عن الدين..مصممين تحشروه فى السياسة ليه
هى سلطة خضار؟؟؟؟؟؟؟؟؟

6
فى رأيك الشخصى .. ما هى أفضل مدونة على بلوجر قمت بزيارتها ؟

لا استطيع ان احدد مدونة بذات نفسيتها
لانهم كتييير جدااا

ربنا يخلليهم للشعب التدوينى:)

7
للذكور فقط : أيهما تفضل كزوجة .. إمرأه عاملة ، أم ربة منزل ؟

ممكن اغلس؟:)

الاجابة الصحيح هى
عدس بجبة

للإناث فقط : هل توافقين على الزواج من رجل مطلق ؟

اى دوزنت سينك سو

8
اذا تزوجت وأنجبت ولدين وبنتين .. أى الأسماء تحب أن تسمى ؟

اشمعزا يعنى ولدين وبنتين

ياللا اللى يجيبه ربنا كويس
واذا جه يوم واصبحت فيه مدام
ان شاء الله ان شاء الله
هختار من الاسامى دى لانه حصر اتنين بس صعب شوية
احب زياد ومروان ويوسف واياد وعبد الرحمن

والبنوتات احب اسمي
حنين ورناد وريما وتالة
ونبقى نعمل قرعة ونختار:)

9
هل تعتقد أن توريث الحكم فى مصر . . سيتم فعلا أم لا ؟

القوى فى الاقوى منه
واى حد ناوى يخلل فى برطمان الحكم احب اقوله
ماكنش انعزر ولاباع جزر ولاخلل الكرسى واعتزر

10
فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

رجعولنا طابا وبقت مصرية فى ايدى تل ابيبية
ونصرونا بالضربة الجوية
ونيمونا وشدوا البطانية
وقشّطونا وبيقولو تخطيطات مستقبلية
واللى عشمان فيهم يروح الجمعية
يقف طابور ويحيى الجمهورية
ويشدله حجرين تسلية
ويستنى بكره اللى عمره ماهاييجى
واهو عمر يفوت والناس تموت
وتعيش وتاخد غيرها ياعنيه

حلوة الاجابة الحلمنتيشى دى واللا نشوف غيرها:)

**********

وختاماً احب اشكر من عميق صمام قلبى كل اللى نورونى ودايما يارب بلاعتى عمرانة بحسكم

واحب اهديلكم اغنية
ماتحرمش العمر من عطفك عليا
ياللى زيارتك مالسما اجمل هدية

ودى منى ليكم

وحشتونى وهتوحشونى جدااااا

الى لقااااااء بإذن الله